“24–30 junio. Mateo 28; Markos 16; Lukas 24; Jwan 20–21: “Xwakliik chi yo’yo” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“24–30 junio. Mateo 28; Markos 16; Lukas 24; Jwan 20–21,” Kim, Taaqehin—Choq’ reheb’ li komon ut li junkab’al: 2019
Ch’olaniheb’ inkarneer, xb’aan xKamille Corry
24–30 junio
Mateo 28; Markos 16; Lukas 24; Jwan 20–21
“Xwakliik chi yo’yo”
Rik’in tijok, taawil xsa’ Mateo 28; Markos 16; Lukas 24; ut Jwan 20–21, ut taak’oxla li sahil ch’oolejil xak’ul xb’aan lix waklijik li Kristo chi yo’yo. K’oxla chan ru naq tatruuq chixch’olob’ankil xyaalal li na’leb’ a’in chiruheb’ laa komon.
Xtz’iib’ankil li nakak’oxla
Chiru naab’al li ke’ilok re, lix kamik li Jesus aj Nazaret chanchan tana’ jun nimla sachk chirix xnimal ru lix yu’am. Ma maawa’ a’in li winq li kiwaklesin chaq re laj Lazaro chiru li kamk? Ma ink’a’ kixxaqab’ chaq rib’ chiruheb’ laj Fariseo k’iila sut naq ke’xyeechi’i chaq xrahob’tesinkil? Kixk’ut chaq xwankil chixk’irtesinkil li ink’a’ neke’ilok, li saqlep rixeb’, ut eb’ li sik. Toj reetal li iq’ ut li palaw ke’ab’in chiru. A’b’anan aran wan, chi chircho chiru krus, ut yoo chixyeeb’al, “Xtz’aqlok ru” (Jwan 19:30). Maare ke’sach ajwi’ b’ayaq xch’ool li ani ke’eetz’unk re rik’in li aatin, “Jalanatq chik kixkoleb’, ut a’an ink’a’ naruhank chixkolb’al rib’ ” (Mateo 27:42). A’ut laa’o naqanaw naq li esilal chirix li Jesus ink’a’ kiraqe’ rik’in xkamik. Naqanaw naq li muqleb’aal kamenaq yal chiru junjunq hoonal kiwan, ut naq toja’ yoo chi tiklaak lix k’anjel li Kristo re kolok. Anajwan ink’a’ chik natawman “sa’ xyanqeb’ li kamenaq”; sa’ xyanqeb’ b’an li ani yo’yo (Lukas 24:5). Ink’a’ kiru xch’anab’ankil li raatin, xb’aan naq eb’ lix tzolom li tiikeb’ chixtaaqenkil te’xjultika li evangelio chiru “chixjunileb’ li tenamit,” ut ke’xpaab’ li raatin naq a’an “taawanq rik’ineb’ chixjunil li kutan toj sa’ roso’jik li ruchich’och’ ” (Mateo 28:19–20).
Li na’leb’ re xtzolb’aleb’ li loq’laj hu aajunes
Mateo 28; Markos 16; Lukas 24; Jwan 20
Rik’in naq kiwakli li Jesus chi yo’yo, laa’in ajwi’ tinwakliiq chi yo’yo.
Sa’eb’ li raqal a’in, tattzoloq chirix jun reheb’ li na’leb’ q’axal nim xwankil sa’ resilaleb’ li winq, a’an lix waklijik li Jesukristo chi yo’yo. Naq nakawil resil, k’oxla k’a’ raj ru taaweek’a wi ta wankat sa’ xna’ajeb’ li ani ke’ilok re li k’a’ru yoo chi k’ulmank naq ki’uxman li wakliik chi yo’yo. K’a’ raj ru ke’reek’a li ani ke’ilok re? K’a’ru nakaweek’a laa’at naq nakawil resil lix waklijik li Kolonel chi yo’yo? K’oxla chan ru naq xatjale’ xb’aan a’in—li k’a’ru nakak’oxla chirix li yu’am, chan ru nakawileb’ laa was aawiitz’in, laa paab’aal chirix li Kristo, ut laa paab’aal chirix li jar paay chik chi yaal chirix li evangelio.
Chi’ilmanq ajwi’ li K’utul Raqal reheb’ li Loq’laj Hu, “Wakliik chi yo’yo.”
Naru naqatz’aama chiru li Kolonel naq “taakanaaq qik’in.”
Li k’a’ru ke’xk’ul li wiib’ chi tzolom li ke’xk’ul li Kolonel chi b’eek chirix naq kiwakli chi yo’yo naru tatxtenq’a sa’ laa b’e re wank choq’ tzolom. Chan ru naq juntaq’eet li esilal a’in rik’in li k’a’ru xak’ul laa’at jo’ aj taaqehom re li Kristo? Chan ru naq tatruuq chi b’eek rochb’een a’an anajwan, ut taapatz’ re a’an naq “taakanaaq” b’ayaq chik? (Lukas 24:29). Chan ru naq tatruuq chixk’eeb’al reetal lix wankilal a’an sa’ laa yu’am? Chan ru naq li Santil Musiq’ej xk’ut xyaalal lix diosilal li Jesukristo chawu laa’at?
Ma wan xtib’el xb’aqel li Jesukristo?
Rik’in li resil lix k’utb’al rib’ li Qaawa’ chiru xMaria Magdalena, ut rik’in naq ki’aatinak rik’ineb’ lix tzolom chirix naq kiwakli chi yo’yo, naqak’e reetal naq lix waklijik li Jesus chi yo’yo kik’ulman chi tz’aqal yaal, ut sa’ li tz’ejwalej. Rik’in lix junxaqalil li waklijenaq chi yo’yo ut k’eeb’il xloq’al, a’an kib’eek, ki’aatinak, ut kiwa’ak rik’ineb’ lix tzolom. Wankeb’ chik li raqal sa’eb’ li loq’laj hu li neke’xch’olob’ xyaalal naq li Jesukristo wan xtz’ejwal re tib’ ut b’aq: Filipenses 3:20–21; 3 Nefi 11:13–15; Tzol’leb’ ut Sumwank 110:2–3; 130:1, 22.
“Us xaq reheb’ li maak’a’ xe’ril, ut xe’xpaab’.”
Naru naq ch’a’aj xpaab’ankil naq yaal k’a’ruhaq wi ink’a’ naqil chi tz’aqal. Maare wan naq nakak’oxla li kixk’oxla laj Tomas, naq kixye, “Wi ink’a’ twil ... ink’a’ tinpaab’ ” (Jwan 20:25). Sa’ xsumenkil, li Kolonel kixye re laj Tomas, “Us xaq reheb’ li maak’a’ xe’ril ut xe’xpaab’ ” (Jwan 20:29). Chan ru naq xat-osob’tesiik rik’in xpaab’ankil li musiq’ejil k’a’aq re ru li ink’a’ xatru chirilb’al? K’a’ru natenq’ank aawe chixpaab’ankil li Kolonel, us ta ink’a’ nakatru chirilb’al ru? K’a’ chik ru chi yaalil na’leb’ xapaab’, us ta ink’a’ xawil? Chan ru naq toj tatruuq chixnimob’resinkil laa paab’aal chirix li “k’a’aq re ru li moko ilb’il ta ru, li yaal”? (Alma 32:21; chi’ilmanq ajwi’ Eter 12:6). K’oxla xtz’iib’ankil sa’ jun li hu li k’a’ru xak’ul li nakatxtenq’a chixpaab’ankil li Jesukristo, malaj ye re jun aakomon.
Li Kolonel nikinixb’oq chixch’olaninkileb’ lix karneer.
Maare us raj xjuntaq’eetankil li raatin li Kolonel reheb’ lix tzolom sa’ Jwan 21 rik’in li kixye xb’een sut naq kixtaqlaheb’ chixkub’sinkil lix yoyeb’, jo’ tz’iib’anb’il sa’ Lukas 5:1–11. K’a’ru li juntaq’eet, ut k’a’ru li jalan nakawil? K’a’ru li na’leb’ chirix li wank choq’ tzolom nakawil?
K’oxla chan ru naq li raatin li Kolonel re laj Pedro sa’ Jwan 21:15–17 naru nawan xwankil choq’ aawe. Ma wan k’a’ru naramok aawe chi k’anjelak chiruheb’ lix karneer li Qaawa’? K’a’ raj ru taaye wi ta li Qaawa’ tixpatz’ aawe, “Ma nikinaara?” K’oxla chan ru naq tatruuq chixk’utb’al aarahom choq’ re li Qaawa’.
Chi’ilmanq ajwi’ Jeffrey R. Holland, “El primer y grande mandamiento,”Liahona, noviembre 2012, 83–85.
Li na’leb’ re xtzolb’aleb’ li loq’laj hu sa’ junkab’al, ut choq’ re li Q’ojyin re Junkab’al
Naq nakachoy rilb’al li resilal li Jesus rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
K’a’ut naq li aatin “Maa’ani chik arin; xwakli chi yo’yo” k’a’jo’ naq nujenaq rik’in yo’onink ut wankilal?
Naq nekeril jo’ junkab’al li jar ch’ol a’in, k’ehomaq reetal ani ke’aatinak rik’in li Jesus sa’ li junjunq esil. Qayehaq, naru tex’aatinaq chirix li ani xe’wulak sa’ xmuqleb’aal li Kolonel. Moqon, naru teeril chi us k’a’ru ke’xb’aanu li Apostol, malaj eb’ li tzolom sa’ li b’e li naxik Emaus.
Li b’e toj Emaus, xb’aan laj Jon McNaughton
Jo’ junkab’al, aatinanqex chirix li k’anjel li kiraj li Kristo naq te’xb’aanu lix Apostol. Chan ru naq naru nokotenq’an laa’o chixb’aanunkil li k’anjel a’in? Ma naru nakaye resil jun kutan naq xaweek’a naq “yoo chi k’anjelak li Qaawa’ ” aawochb’een re xk’eeb’al chi uxmank li rajom? (Markos 16:20).
Maare texruuq chirilb’aleb’ ru li raqal a’in naq yookex chi wa’ak sa’ komonil. A’in taaruuq chixtiqb’al xyaalalil li raatin li Kolonel, “ch’olaniheb’ lin karneer.” Rik’in li k’a’ru kixk’ut li Jesus chirixeb’ li karneer sa’ li Ak’ Chaq’rab’ (jo’ jun eetalil, chi’ilmanq Mateo 9:35–36; 10:5–6; 25:31–46; Lukas 15:4–7; Jwan 10:1–16), k’a’ut naq xch’olaninkileb’ li karneer nak’anjelak jo’ reetalil xch’olaninkileb’ ut rilb’aleb’ li ralal xk’ajol li Dios? K’a’ru naxk’ut li eetalil a’in chiqu chirix li k’a’ru nareek’a li qaChoxahil Yuwa’ ut li Jesus chiqix?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Oksi li b’ich re xb’oqb’al chaq li Musiq’ej ut re xtzolb’al li tzol’leb’. Rab’inkil malaj xb’ichankil jun b’ich jo’ “Ak xwakli!” malaj “Kristo anajwan xwakli,” Eb’ li B’ich, ajl 121 ut 122, naru chixb’oqb’al li Musiq’ej ut naru nakatxtenq’a chi tzolok chirix lix waklijik li Kolonel chi yo’yo.
At ixq, k’a’ut naq nakatyaab’ak? xb’aan laj Simon Dewey