“3–9 junio. Jwan 13–17 “Kanaaqex sa’ lin rahom” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“3–9 junio. Jwan 13–17,” Kim, Taaqehin—Choq’ reheb’ li komon ut li junkab’al: 2019
Re xnimankil injultikankil, xb’aan laj Walter Rane
3–9 junio
Jwan 13–17
“Kanaaqex sa’ lin rahom”
Naq nakawil lix yehom li Kolonel sa’ Jwan 13–17, li Santil Musiq’ej tatxtenq’a chixk’eeb’al reetal li na’leb li taatenq’anq aawe. Tz’iib’a li na’leb’ taak’utb’esiiq chawu.
Xtz’iib’ankil li nakak’oxla.
Anajwan li “wa’ak sa’ roso’jik” naqaye re, a’ut ink’a’ naqanaw ma ke’xnaw lix tzolom li Jesus, naq ke’xch’utub’ rib’ re xninq’ehinkil li Paswa li nab’aanuman rajlal chihab’, naq ka’aj chik li jun sut a’in te’wa’aq rik’in lix Tzoloneleb’ rub’elaj xkamik. A’ut li Jesus ak naxnaw naq “xwulak lix hoonal” (Jwan 13:1). Sa’ junpaat chik tixk’ul li rahilal sa’ Getsemani, taakanab’aaq ut taatz’eqtaanaaq xb’aaneb’ li neke’ochb’eenink re, ut taakamq rik’in nimla rahilal chiru li krus. Us ta ok re chixk’ulb’al chixjunil a’in, li Jesus ink’a’ kixk’oxla rib’, kixk’oxla b’an k’anjelak chiruheb’ lix tzolom. Rik’in tuulanil, kixch’ajeb’ li roq. Kixtzoleb’ chirix li rahok. Ut kixk’ojob’eb’ xch’ool, kixye reheb’ naq us ta taaxik, maajo’q’e tixkanab’eb’ xjunes, ut ink’a’ taa’ajmanq naq eb’ a’an te’xkanab’ a’an. Eb’ lix tzolom, sa’ li kutan a’an jo’ sa’ li kutan anajwan, naru neke’k’ojob’aak xch’ool rik’in li raatin: “Ink’a’ texinkanab’ eejunes” (Jwan 14:18). “Wi nekepaab’ lin chaq’rab’, texkanaaq sa’ lin rahom” (Jwan 15:10).
Li na’leb’ re xtzolb’aleb’ li loq’laj hu aajunes
Nink’ut lin rahom choq’ re li Jesukristo rik’in xpaab’ankil lix taqlahom naq tinrahoq.
Li Jesus ak kixk’ut chaq naq li wiib’ chi taqlahom q’axal nim neke’aatinak chirix li rahok (chi’ilmanq Mateo 22:34–40). Ut chi jo’kan ajwi’, kiwan li rahok choq’ xb’eenil li na’leb’ kixk’ut naq kixtzoleb’ lix tzolom sa’ roso’jik. Naq nakawil Jwan 13–15, naru taak’e reetal malaj taaweetali li junjunq sut na’oksiman li aatin rahok.
Naru nakak’e reetal naq li aatin taqlahom (malaj chaq’rab’) chi kok’ aj xsa’ narochb’eeni li aatin rahok sa’eb’ li ch’ol a’in. Rik’in li raatin li Kolonel, k’a’ru naru nakatzol chirix chan ru naq li rahok naxk’am rib’ rik’ineb’ li taqlahom? K’a’ chik ru chi aatin nakataw chi kok’ aj xsa’ rochb’een li aatin rahok sa’eb’ li ch’ol a’in? Rik’in li k’a’ru xatzol, maare naru taatz’iib’a xka’ch’inal li aatin chirix li k’a’ru kixk’ut li Kolonel chirix li rahok.
Chi’ilmanq ajwi’ D. Todd Christofferson, “Texkanaaq sa’ lin rahom,” Jolomil Ch’utub’aj-ib’ re octubre 2016.
Li Santil Musiq’ej nikinixtenq’a chixb’aanunkil ink’anjel jo’ xtzolom li Jesukristo.
Li Jesukristo kixnaw naq sa’ junpaat chik tixkanab’eb’ lix tzolom, ut kixnaw naq te’raj li musiq’ejil tenq’ naq xikenaq chik a’an. Re te’xtaw ru chan ru naq te’xk’ul xtenq’ankileb’ chi jo’kan, kixtzoleb’ chirix li Santil Musiq’ej. K’a’ru nakatzol chirix lix k’anjel li Santil Musiq’ej rik’in li raatin li Kolonel sa’eb’ li raqal a’in?
K’a’ut naq eb’ lix tzolom ke’raj ru tenq’aak chi jo’kan xb’aan li Santil Musiq’ej? Chan ru naq li Santil Musiq’ej xb’aanu li k’anjel a’in sa’ laa yu’am laa’at? Naq yookat chixtzolb’al li Ak’ Chaq’rab’, k’e reetal chan ru naq li Santil Musiq’ej kirosob’tesiheb’ lix tzolom li Jesus. Chan ru naq taajalano’q laa yu’am wi nakakanab’ li Santil Musiq’ej chatenq’ankil chi mas wi’chik?
Chi’ilmanq ajwi’ Mosiah 3:19; 5:1–3; 3 Nefi 27:20; Moroni 8:25–26; 10:5; Tzol’leb’ ut Sumwank 11:12–14; Moises 6:61; “Santil Musiq’ej,” K’utul Raqal reheb’ li Loq’laj Hu.
Naq ninkanaak rik’in li Kristo, tin’uuchinq chi chaab’il.
K’a’ru naraj naxye “kanaak rik’in li Kristo”? (Jwan 15:4). K’a’ru li “uuchinihom” li naxk’ut xyaalal naq wankat choq’ ruq’ lix toonal li uva, li wan choq’ reetalil li Jesukristo?
Li Jesus kitijok choq reheb’ lix tzolom.
Li raatin li Jesus li tz’iib’anb’il sa’ Jwan 17 a’an li tij re b’aanunk uuchil yeeb’il re. Sa’ li tij a’in, li Jesus kitijok choq’ reheb’ lix apostol, ut “chirixeb’ li te’paab’anq [re a’an] sa’ xk’ab’a’ li raatineb’ a’an” (Jwan 17:20). A’in naraj naxye naq yoo chaq chi tijok chawix laa’at. K’a’ru kixtz’aama li Jesus chiru lix Yuwa’ choq’ aawe laa’at ut choq’ reheb’ chixjunileb’ laj paab’anel?
Li tij a’in naxk’ut ajwi’ junjunq li junelikil yaalil na’leb’. K’a’ruheb’ li yaalil na’leb’ nakataw laa’at naq nakawil a’an?
Chan ru naq junajeb’ li Jesukristo rik’in li qaChoxahil Yuwa’?
Sa’ lix tij sa’ Jwan 17, li Jesus ki’aatinak chirix wank sa’ junajil rik’in lix Yuwa’, a’b’anan a’in ink’a’ naraj naxye naq a’an ut lix Yuwa’ a’aneb’ junaj chi winq. Naq li Kolonel kixtz’aama naq eb’ lix tzolom junajaqeb’ ta “jo’ naq”—malaj jo’ chanru naq a’an ut lix Yuwa’ junajeb’ (Jwan 17:21–22), ink’a’ yoo chixtz’aamankil naq junaj chi winq naq te’wanq lix tzolom. Kiraj b’an naq te’wanq sa’ junajil jo’ chanru naq a’an wan sa’ junajil rik’in lix Yuwa’—chi junajeb’ xk’anjel, junajeb’ xch’ool, ut junajeb’ xk’a’uxl.
Li na’leb re xtzolb’aleb’ li loq’laj hu sa’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
K’a’ru naqatzol sa’ li qajunkab’al rik’in li kixb’aanu li Kolonel sa’eb’ li raqal a’in? Chan ru naru taqab’aanu jo’ kixb’aanu a’an?
Naq nekex’aatinak chirix li raatin li Kolonel chirix li rahok, k’oxlahomaq ajwi’ li aatin a’in yeeb’il xb’aan li Awa’b’ej Thomas S. Monson: “Sa’ li ruchich’och’ anajwan, maab’ar chik na’ajman ru li k’ojleb’aal re li rahok chi q’axal wi’chik chiru naq sa’ li junkab’al. Ut maab’ar chik sa’ li ruchich’och’ taatawmanq li k’ojleb’aal a’an jo’ li wan sa’ rochocheb’ laj Santil Paab’anel sa’ Roso’jikeb’ li Kutan li xe’xk’e li rahok choq’ xch’oolil lix yu’ameb’ sa’ junkab’al. ... Li rahok a’an tz’aqal xch’oolil li evangelio, li na’leb’ q’axal taqenaq xch’aab’ilal choq’ re li raameb’ li winq” (“Como yo os he amado,” Liahona, febrero 2017, 4–5).
Eb’ li komon sa’ laa junkab’al maare te’raj xb’onb’al li jalam-uuch malaj xtz’iib’ankil aatin chiru jun aamej hu, li naxye k’a’ru neke’xra chirixeb’ lix komon. Naru te’xk’ojob’ li aamej hu a’an yalaq b’ar sa’ li ochoch, re taajultiko’q reheb’ xraab’al rib’ chirib’ileb’ rib’.
Maare us raj rilb’aleb’ li raqal a’in chirix kab’l, chixk’atq jun xtoonal li uva malaj jalan chik xtoonal li che’. Chan ru naq xb’aanunkil a’in naxtenq’aheb’ li komon sa’ laa junkab’al chixtawb’al ru li raatin li Kolonel?
Li Jesus kixk’ut, “Laa’in lix toonal li uva, laa’ex li ruq’ ” (Jwan 15:5).
K’a’ut nakak’oxla naq li Jesukristo kixtijeb’ lix tzolom chirix li rahob’tesiik? Chan ru naq neke’rahob’tesiik lix tzolom li Kristo sa’eb’ li kutan a’in? Chan ru naq li raatin li Kolonel sa’eb’ li raqal a’in naru chiqatenq’ankil naq naqak’ul li rahob’tesiik?
Chan ru naq li Kristo kixq’ax ru xwankil li ruchich’och’? Chan ru naq lix tojb’al rix li maak xb’aan a’an xk’am qik’in li tuqtuukilal ut li sahil ch’oolejil? (chi’ilmanq ajwi’ Tz. ut S. 68:6).
Chan ru naq naru taawanq sa’ junajil li qajunkab’al jo’ chanru naq li Jesukristo ut li qaChoxahil Yuwa’ wankeb’ sa’ junajil? Kʼaʼut naq li Qaawaʼ naraj naq junajaqo? (chi’ilmanq ajwi’ Tz. ut S. 38:27).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Oksi li chapb’il aatin. Naq nakak’uteb’ li loq’laj hu chiru laa junkab’al, naru taak’oxla roksinkileb’ li loq’laj hu chi chapb’il li aatin, jo’ natawman sa’ LDS.org malaj sa’ li aplicación Biblioteca del Evangelio. K’a’jo’ naq naru nak’anjelak rab’inkil Jwan 13–17, xb’aan naq wan naab’al li raatin li Kolonel sa’eb’ li ch’ol a’in.
Aj Taqlanel ut Moos, xb’aan laj Del Parson