“10–16 junio. Mateo 26; Markos 14; Lukas 22; Jwan 18: “Moko jo’ ta li nawaj laa’in, jo’aq b’an li nakawaj laa’at” ” Kim, Taaqehin—choq’ reheb’ li komon ut li junkab’al: Li Ak’ Chaq’rab’ 2019 (2019)
“10–16 junio. Mateo 26; Markos 14; Lukas 22; Jwan 18,” Kim, Taaqehin—Choq’ reheb’ li komon ut li junkab’al: 2019
Ak q’ojyink chik, xb’aan laj Benjamin McPherson
10–16 junio
Mateo 26; Markos 14; Lukas 22; Jwan 18
“Moko jo’ ta li nawaj laa’in, jo’aq b’an li nakawaj laa’at”
Naq nakawil resil li k’a’ru yeeb’il resil sa’ Mateo 26; Markos 14; Lukas 22; ut Jwan 18, k’e reetal li musiq’ejil na’leb’ nakak’ul, ut mas wi’chik li taa’eek’asinq aawe chixjalb’al aayu’am.
Xtz’iib’ankil li nakak’oxla
Ka’ajwi’ oxib’eb’ li winq li ke’ilok re li rahilal kixk’ul li Jesukristo sa’ li Awimq Getsemani—ut chiru lix k’ihal a’an ke’wan chi warenaq. Sa’ li awimq a’an, ut moqon chik chiru li krus, li Jesus kixk’ul sa’ xb’een a’an lix maakeb’, lix rahileb’, ut lix yot’ikeb’ xch’ool chixjunileb’ li wanjenaqeb’ chaq chi yo’yo, us ta maajun li yo’yo sa’ li kutan a’an kixk’e reetal li yoo chi k’ulmank. A’b’anan naab’al sut li k’a’ru q’axal nim xwankil sa’ li junelik q’e kutan nak’ulman chi ink’a’ ilb’il xb’aan li ruchich’och’. A’ut li Dios Yuwa’b’ej kixk’e reetal. A’an kirab’i li raatin lix chaab’il alal: “At inYuwa’, wi taawaj, chawisi wik’in li sek’ a’in, a’b’an ink’a’ chi’uxmanq li nawaj laa’in, a’b’an laa wajom laa’at. Toja’ naq jun li anjel kichalk chaq sa’ choxa ut kixk’ut rib’ chiru li Jesus, yoo chixk’eeb’al xkawub’ xch’ool” (Lukas 22:42–43). Us ta ink’a’ xoowan aran re rilb’al naq kib’aanuman li q’axtesink-ib’ ut kub’sink-ib’ a’in, chiqajunil naru nokowan choq’ aj yehol nawom chirix lix tojb’al rix li maak xb’aan li Jesukristo. Rajlal sut naq naqajal qak’a’uxl ut nakuyman li qamaak, ut rajlal sut naqeek’a lix wankil li Kolonel chiqakawob’resinkil, naru naqaye xyaalal li k’a’ru kik’ulman sa’ li Awimq Getsemani.
Li na’leb’ re xtzolb’aleb’ li loq’laj hu aajunes
Mateo 26:17–20; Markos 14:12–26; Lukas 22:7–39
Rik’in li loq’laj wa’ak naru najultiko’ qe li Kolonel.
K’a’ru nakab’aanu re te’jultiko’q aawe li ani xe’wan xwankil sa’ laa yu’am? Naq li Kolonel kixk’ut li loq’laj wa’ak chiruheb’ lix tzolom, kixye “Cheb’aanu a’in re xnimankil injultikankil” (Lukas 22:19; chi’ilmanq ajwi’ 3 Nefi 18:7). Chan ru naq li kaxlan wa, li ha’, ut xkomoneb’ chik li na’leb’ sa’ li k’ojob’anb’il k’anjel a’in nakate’xtenq’a re taajultiko’q aawe a’an ut li rahilal kixk’ul? K’oxla li patz’om a’in naq nakawil resil li xb’een loq’laj wa’ak. Chak’e ajwi’ reetal chan ru naq jalb’il li aatin sa’ li Santil Hu li jaltesinb’il ru xb’aan laj Jose Smith.
K’oxla chiru junpaat li k’a’ru nakak’ul sa’ xk’ulb’al li loq’laj wa’ak rajlal xamaan. K’a’ru naru taab’aanu re naq mas wi’chik taak’anjelaq choq’ aawe? Maare tatruuq chixtz’iib’ankil junjunq li na’leb’ li nakaweek’a naq us raj naq taajultiko’q aawe chirix li Kolonel—li raatin, lix b’aanuhom re rahok, li hoonal naq xaweek’a naq nach’ wankat rik’in, malaj eb’ li maak ut li rahilal li kixk’ul sa’ xb’een choq’ aawe laa’at.
Chi’ilmanq ajwi’ 3 Nefi 18:1–13; Tzol’leb’ ut Sumwank 20:76–79; “Loq’laj Wa’ak,” K’utul Raqal reheb’ li Loq’laj Hu; “Recordarle siempre” (video, LDS.org).
Mateo 26:36–46; Markos 14:32–42; Lukas 22:40–46
Li Kolonel kixk’ul rahilal choq’ we sa’ Getsemani.
Li Awa’b’ej Russell M. Nelson xye qe naq us wi “naqoksi li qahoonal chi tzolok chirix li Kolonel ut lix mayej aj tojol-ix” (“Roksinkil lix wankil li Jesukristo sa’ li qayu’am,” Jolomil Ch’utub’aj-ib’ re abril 2017).
K’oxla k’a’ru taab’aanu re xk’ulub’ankil lix yehom li Awa’b’ej Nelson. Naru tattiklaaq rik’in tijok chirix ut xk’oxlankil li rahilal kixk’ul li Kolonel sa’ Getsemani, jo’ yeeb’il resil sa’eb’ li raqal a’in, ut taatz’iib’a li na’leb’ ut li patz’om li neke’chal aawik’in.
Re xtawb’al chik aana’leb’ chirix li Kolonel ut lix tojb’al rix li maak xb’aan, naru taasik’ sa’ jalaneb’ chik raqal reheb’ li loq’laj hu lix sumenkil li patz’om jo’ a’in:
-
K’a’ut naq ki’ajman ru naq li Kolonel kixtoj rix li maak? (Chi’ilmanq sa’ 2 Nefi 2:5–10, 17–26; 9:5–26; Alma 34:8–16; 42:9–26.)
-
K’a’ru kixk’ul li Kolonel naq yoo chixk’ulb’al rahilal? (Chi’ilmanq Isaias 53:3–5; Mosiah 3:7; Alma 7:11–13; Tz. ut S. 19:16–19.)
-
Chan ru naq wan xwankil sa’ lin yu’am li rahilal kixk’ul li Kristo? (Chi’ilmanq Jwan 10:10–11; Hebreos 4:14–16; 1 Jwan 1:7; Alma 34:31; Moroni 10:32–33; Dallin H. Oaks, “K’eeb’il qametz’ew xb’aan lix tojb’al rix li maak xb’aan li Jesukristo,” Jolomil Ch’utub’aj-ib’ re octubre 2015.
-
Xkomoneb’ chik lin patz’om:
Naq nakattzolok chirix li k’a’ru kik’ulman sa’ Getsemani, maare us xnawb’al naq Getsemani a’an jun awimq wankeb’ wi’ lix toonal li olivo, ut aran wan jun yatz’leb’aal olivo, li na’oksiman re xpitz’b’aleb’ li olivo re risinkil chaq li aseeyt li na’oksiman choq’ re li xam ut li tzakemq, ut re ajwi’ k’irtesink (chi’ilmanq Lukas 10:34). Li aalil che’ li oksinb’il re risinkil chaq li aseeyt sa’eb’ li olivo naru nawan choq’ reetalil li raalil li maak ut li rahilal li kixk’am li Kolonel choq’ qe (chi’ilmanq D. Todd Christofferson, “Texkanaaq sa’ lin rahom,” Jolomil Ch’utub’aj-ib’ re octubre 2016.
Markos 14:27–31, 66–72; Lukas 22:31–32
Li jalok ch’oolej a’an jun li k’anjel li toj yoo chi b’aanumank.
K’oxla li k’a’ru kixk’ul laj Pedro rik’in li Kolonel—eb’ li sachb’a-ch’oolej kiril ut eb’ li na’leb’ kixtzol. Rik’in a’an, k’a’ut naq li Kolonel kixye re laj Pedro, “Ut laa’at, naq tatsutq’iiq chaq wik’in, chakawub’resi xch’ooleb’ laa was aawiitz’in”? (Lukas 22:32; tiqb’il xkawil li aatin). Chanru naq jalan wi’ li wank xnawom xch’ool junaq chiru li wank chi jalb’il xch’ool, jo’ kixye laj David A. Bednar? (Chi’ilmanq “Convertidos al Señor,” Liahona, noviembre 2012, 106–109). Naq nakawil li k’a’ru kixk’ul laj Pedro sa’ Markos 14:27–31, 66–72, k’oxla chirix ma jalb’il aach’ool laa’at. K’a’ru li na’leb’ naru nakatzol rik’in laj Pedro? Naq toj yookat chirilb’al li Ak’ Chaq’rab’, k’a’ru nakawil li naxk’ut naq jalb’il xch’ool laj Pedro, ut naq yoo chixyalb’al xq’e chixkawob’resinkileb’ xch’ool xkomoneb’ li kristiaan? Chan ru naq xk’ulb’al li maatan re li Santil Musiq’ej kixtenq’a chixjalb’al xch’ool? (chi’ilmanq Jwan 15:26–27; Hechos 1:8; 2:1–4).
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq yookat chirilb’al resil lix raqikil xamaan lix yu’am li Kolonel rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’, re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Chan ru naq wan laa junkab’al naq yoo chi uxmank li loq’laj wa’ak rajlal xamaan? Wi nekeril resil li xb’een loq’laj wa’ak, maare texruuq chi aatinak chirix xnimal ru li loq’laj wa’ak, ut chan ru naq eb’ li komon sa’ li junkab’al neke’ru chixchaab’ilob’resinkil li loq’onink neke’xb’aanu. Naru taak’ut li jalam-uuch Se reparte la Santa Cena (Libro de obras de arte del Evangelio, ajl 108), ut tex’aatinaq cherib’il eerib’ chirix k’a’ru naru nekeb’aanu naq maji’ na’uxman li loq’laj wa’ak, naq yoo chi uxmank, ut chirix naq x’uxman.
Naq nekerileb’ li raqal a’in jo’ junkab’al, naru te’xwotz li k’a’ru xe’xtzol naq xe’ril li raqal li wankeb’ sa’ li jun jachal chik re li hu a’in chirix xtzolb’aleb’ aajunes li loq’laj hu, b’ar wi’ naxye “Li Kolonel kixk’ul rahilal choq’ we sa’ Getsemani.”
K’a’ru naqatzol chirix li Jesus rik’in li yeeb’il resil arin?
Tz’aqalaq a’in, kanab’omaq, xb’aan laj Walter Rane
K’a’ru naqatzol rik’in li raatin li Kolonel sa’eb’ li raqal a’in?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Tzol li raatineb’ li profeet ut apostol re roso’jikeb’ li kutan. Il ru li k’a’ru xe’xk’ut li profeet uf apostol sa’ roso’jikeb’ li kutan chirixeb’ li yaalil na’leb’ nakataw sa’eb’ li loq’laj hu. Jo’ jun eetalil, sa’ li hu Liahona wan wi’ resilal li jolomil ch’utub’aj-ib’ li toja’ xnume’, taaruuq tatsik’ok sa’ li tusleb’aal aatin rub’el li aatin “expiación” (chi’ilmanq Li k’utuk jo’ li Kolonel, 21).
Ink’a’ chi’uxmanq li nawaj laa’in, xb’aan laj Walter Rane