“27 mayo–2 junio. Jose Smith—Mateo 1; Mateo 25; Markos 12–13; Lukas 21: “Taak’ulunq chaq li K’ajolb’ej” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“27 mayo–2 junio. Jose Smith—Mateo 1; Mateo 25; Markos 12–13; Lukas 21,” Kim, Taaqehin—Choq’ reheb’ li komon ut li junkab’al: 2019
Li xkab’ xk’ulunik li Qaawa’, xb’aan laj Harry Anderson
27 mayo–2 junio
Jose Smith—Mateo 1; Mateo 25; Markos 12–13; Lukas 21
“Taak’ulunq chaq li K’ajoleb’ej”
Naq nakawil sa’ Jose Smith—Mateo 1; Mateo 25; Markos 12–13; ut Lukas 21, naru taapatz’, “K’a’ru chi na’leb’ wan sa’eb’ li ch’ol a’in choq’ we laa’in? choq’ re lin junkab’al? choq’ re lin b’oqb’al?
Xtz’iib’ankil li nakak’oxla
Eb’ lix tzolom li Jesus maare ke’sach xch’ool rik’in lix profeetil aatin: li nimla santil ochoch sa’ Jerusalen, li wan choq’ xch’oolil lix na’leb’eb’ ut lix paab’aaleb’ li tenamit aj Judio, taasachmanq toj reetal naq “ink’a’ taakanaaq ... yal ta jun pek chixb’een li jun chik.” Eb’ li tzolom ke’raj rab’inkil chik li taak’ulmanq. “Jo’q’e taawanq li k’a’aq re ru a’in?” ke’xpatz’. “Ut k’a’ru reetalil laa k’ulunik?” (Jose Smith—Mateo1:2–4). Li k’a’ru kixsume li Kolonel kixk’utb’esi naq li nimla sache’k li taachalq sa’ Jerusalen—jun profeetil aatin li kitz’aqlok ru sa’ 70 chihab’ xk’ulunik chaq li Kristo —ka’ch’in chaq chiruheb’ li reetalil lix k’ulunik sa’ roso’jikeb’ li kutan. Wan k’a’ru q’axal xaqxo wi’chik chiru li santil ochoch sa’ Jerusalen li taawanq chi eek’anb’il sa’eb’ li kutan a’an—li saq’e, li po, eb’ li chahim, eb’ li tenamit, ut li palaw. Toj reetal “taachiq’manq lix wankilal li choxa” (Jose Smith—Mateo 1:33). Wi wan qamusiq’ejil na’leb’, li choqink a’in taaruuq tooxtenq’a chixkanab’ankil qib’ chiru li k’a’ru ink’a’ nalaj na’oso’. Jo’ kixye li Jesus, “Us ta taawulaq xkutankil naq taa’oso’q li choxa ut li ch’och’; li waatin b’an ink’a’ taa’oso’q. ... Ut ani nak’uulank re li waatin, ink’a’ taab’alaq’iiq” (Jose Smith—Mateo 1:35, 37).
Li na’leb’ re xtzolb’aleb’ li loq’laj hu aajunes
Jose Smith—Mateo
K’a’ru li Jose Smith—Mateo?
Jose Smith—Mateo, li wan sa’ li Q’ol Nim Xtz’aq, a’an jun jachal re li Santil Hu li jaltesinb’il ru xb’aan laj Jose Smith. Aran wan chi jalb’il ru lix raqikil raqal Mateo 23 ut chixjunil Mateo 24 (Chi’ilmanq li K’utul Raqal reheb’ li Loq’laj Hu, “Jaltesinb’il ru xb’aan laj Jose Smith (JJS)”). Sa’ li hu jaltesinb’il ru xb’aan laj Jose Smith, wan chi k’ojob’anb’il wi’chik li loq’laj yaalil na’leb’ li xsachman chaq. Sa’eb’ li raqal 12–21 re Jose Smith—Mateo, na’aatinak chirix lix sachik Jerusalen sa’ najter kutan, ut sa’eb’ li raqal 21–55 wankeb’ li profeetil aatin chirix roso’jikeb’ li kutan.
Jose Smith—Mateo 1:21–37; Markos 13:21–37; Lukas 21:25–38
Eb’ li profeetil aatin chirix li xkab’ xk’ulunik li Kolonel naru nikine’xtenq’a chixk’ulb’al rik’in paab’aal li k’a’ru toj taachalq.
Wan naq xiwxiw rilb’al resil li k’a’ru taak’ulmanq rub’elaj li xkab’ xk’ulunik li Jesukristo. A’b’anan naq li Jesus kixye resil a’in, kixye reheb’ lix tzolom, “ink’a’ chepoqle eek’a’uxl” (Jose Smith—Mateo 1:23). Chan ru naru naq “ink’a’ taapoqle aak’a’uxl” naq taawab’i resileb’ li hiik, li ninqi pleet, li b’alaq’il, ut li we’ej? K’oxla li patz’om a’in naq nakawileb’ li raqal a’in. K’e reetalil malaj tz’iib’a li na’leb’ li tixk’ojob’ aach’ool.
Chi’ilmanq ajwi’ Tzol’leb’ ut Sumwank 29:14–21; 38:30; 45:16–52; 88:86–94; “Xkab’ xk’ulunik li Jesukristo,” K’utul Raqal reheb’ li Loq’laj Hu.
Jose Smith—Mateo 1:26–27, 38–55; Mateo 25:1–13; Lukas 21:29–36
Junelik tento tinwanq chi kawresinb’il choq’ re li xkab’ xk’ulunik li Kolonel.
Li Dios ink’a’ xk’utb’esi “jo’q’e xkutankil chi moko lix hoonalil lix k’ulunik li K’ajolb’ej” (Mateo 25:13). A’b’anan a’an ink’a’ naraj naq taachalq li kutan a’an sa’ qab’een “chi maak’a’aq sa’ qach’ool” (Lukas 21:34), ut chi jo’kan xk’e li qana’leb’ chirix chan ru xkawresinkil qib’.
Naq nakawileb’ li raqal a’in, k’e reetaleb’ li jaljookil ru aatin ut xkomoneb’ chik li na’leb’ naroksi li Kolonel re xk’utb’al chiqu naq junelik toowanq chi kawresinb’il choq’ re li xkab’ xk’ulunik. K’a’ru nakatzol rik’ineb’ li na’leb’ a’in? K’a’ru nakaweek’a naq eek’asinb’ilat chixb’aanunkil?
Li qaChoxahil Yuwa’ naraj naq taqoksi li maatan li k’eeb’il qe rik’in xchaab’ilal li na’leb’.
Sa’ xkutankil li Kolonel, jun “talento” nayeeman re li oob’ mil chi tumin li yeeb’il resil. A’ut lix jaljookil ru aatin li Qaawa’ chirixeb’ li talento naru naxk’ut chiqu k’a’ru naraj a’an naq taqab’aanu rik’in li k’iila paay chi maatan li naxk’e a’an qe. Li Qaawa’ naraj naq taqachaab’ilob’resi li k’a’ru xk’e chaq qe. Naq nakawil li jaljookil ru aatin a’in, k’oxla junjunq li osob’tesink ut li maatan li xk’e aawe li qaChoxahil Yuwa’. K’a’ru naraj a’an naq taab’aanu rik’ineb’ li osob’tesink a’in? Chan ru naq nakatru chiroksinkileb’ li maatan a’in chi q’axal chaab’il wi’chik? Chan ru naq xniman li maatan xak’ul naq xatk’anjelak chiru li Qaawa’?
Naq nink’anjelak chiruheb’ li was wiitz’in, yookin chi k’anjelak chiru li Dios.
Wi xak’oxla jun sutaq chan ru naq li Qaawa’ taaraqoq aatin chirix laa yu’am, il li jaljookil ru aatin chirixeb’ li karneer ut eb’ li chib’aat. K’a’ru li aajelaq ru naq wankat chi xaqxo chiru li Kristo?
Chi’ilmanq ajwi’ Mosiah 2:17.
Ma toj taawanq li sumlaak chirix li wakliik chi yo’yo?
Naqatzol rik’in li k’a’ru k’utb’esinb’il sa’ roso’jikeb’ li kutan naq li raatin li Jesus, “Naq te’wakliiq chi yo’yo sa’ xyanqeb’ li kamenaq, ink’a’ te’k’amoq li winq chi moko te’k’ame’q li ixq” yoo chi aatinak chirixeb’ li ink’a’ okenaqeb’ sa’ li sumwank re li choxahil sumlaak (chi’ilmanq Tz. ut S. 132:15–16). Jun li choxahil sumlaak, naq “junaq winq taasumlaaq rik’in junaq rixaqil ... rik’in li ak’ ut junelikil sumwank,” taakanaaq “chiru anchal li junelik q’e kutan” wi li winq ut li ixq tiikeb’ chixpaab’ankil chixjunileb’ lix sumwank (Tz. ut S. 132:19).
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Re xtenq’ankil laa junkab’al chixtzolb’al li jun ch’ol a’in, ye reheb’ naq te’xsik’ li kixye li Kolonel chirix chan ru naq nokoru chixkawresinkil qib’ choq’ re li xkab’ xk’ulunik (jo’ jun eetalil, ileb’ li raqal 22–23, 29–30, 37, 46–48). K’a’ru naru tixb’aanu laa junkab’al re xb’aanunkil jo’ chanru kixye?
K’a’ru xyaalalil xk’uulankil li raatin li Dios? Chan ru naru naqab’aanu a’in jo’ junkab’al? Chan ru naq a’in tooxten’qa re naq ink’a’ toob’alaq’iiq?
Taaruuq taawoksi li jalam-uuch reheb’ li lajeeb’ tuq’ixq li narochb’eeni li tusleb’ aatin a’in re aatinak chirix Mateo 25:1–13. K’a’ru neke’ril li komon sa’ laa junkab’al sa’ li jalam-uuch a’in li yeeb’il resil sa’eb’ li raqal a’in?
Ma taawulaq chiruheb’ li komon sa’ laa junkab’al xsik’inkil li kok’ hu, reetalil li tz’uqul chi aseeyt li muqb’il aab’aan? Naru taaletzeb’ li tz’uqul chiruheb’ li k’a’aq re ru li te’wanq choq’ reetalil li k’a’ru neke’ru li komon chixb’aanunkil re xkawob’resinkil lix nawomeb’ xch’ool ut re xkawresinkil rib’ choq’ re li xkab’ xk’ulunik li Qaawa’, jo’eb’ li loq’laj hu, li aq’ej re xik sa’ li iglees, ut jun xjalam-uuch li santil ochoch.
K’a’ru naru neke’xtzol li komon sa’ laa junkab’al rik’in li k’a’ru kixb’aanu li xmalka’an? K’a’ru kixk’ut li Kolonel chiruheb’ lix tzolom chirixeb’ li mayej? K’ut jun xhuhil li lajetqil, ut aatinanqex chirixeb’ li mayej neke’xk’e laa junkab’al re li Qaawa’, ut chan ru naq eb’ li mayej a’in neke’tenq’an chixwaklesinkil lix awa’b’ejihom li Dios. Ma wankeb’ li mayej li neke’xk’e laa junkab’al li ink’a’ naru chi tz’iib’ak chiru xhuhil li lajetqil?
Lix tumin li xmalka’an, xb’aan li xSandra Rast
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Kawresi li na’ajej wankat wi’. “Li na’ajej wanko wi’ naru taawanq xnimal xwankil chirix qaseeb’al chixtzolb’al ut chireek’ankil li yaal” (Li k’utuk jo’ li Kolonel, 15). Yal aaq’e chixsik’b’al jun li na’ajej re xtzolb’aleb’ li loq’laj hu re taawanq aran li Santil Musiq’ej. Li chaab’il b’ich ut jalam-uuch neke’ru ajwi’ chixk’eeb’al xb’oqb’al li Musiq’ej.
Oob’ wankeb’ xna’leb’, xb’aan laj Walter Rane