Re xnimankil injultikankil, xb’aan laj Walter Rane

3-9 junio

Jwan 13-17

”Kanaaqex sa’ lin rahom”

Patz’ sa’ jun li tij xnawb’al li neke’raj ru li kok’al li nakatzoleb’ naq yookat chirilb’al ru Jwan 13–17. Kim, Taaqehin—Choq’ reheb’ li komon ut li junkab’al ut li tusleb’ aatin a’in naru nakate’xtenq’a chixtawb’al ru li tzol’leb’ ut chixk’eeb’al aana’leb’ re xtzolb’aleb’ li kok’al sa’ laa tzoleb’aal.

Xtz’iib’ankil li nakak’oxla

Xkanab’ankileb’ chi wotzok

Re xtenq’ankileb’ li kok’al chixwotzb’al li k’a’ru yookeb’ chixtzolb’al sa’ kab’l, k’e reheb’ jun li aamej yiib’anb’il rik’in hu ut kanab’eb’ chi junjunqal, naq te’xchap li aamej, chixwotzb’al li k’a’ru neke’xb’aanu re xk’utb’aleb’ xrahom chiruheb’ li kristiaan.

Xk’utb’al li tzol’leb’

Kok’al toj ka’ch’ineb’ xyu’am

Jwan 13:1–17

Li Jesus naraj naq took’anjelaq chiruheb’ li kristiaan.

Li seraq’ chirix naq li Jesus kixch’aj li roq’ jun reheb’ lix Apostol a’an jun reetalil li k’anjelak chiru qas qiitz’in rik’in tuulanil. Chan ru naru nakawaklesi xch’ooleb’ li kok’al chixtaaqenkil lix b’aanuhom li Jesus?

Kok’ k’anjel naru chi b’aanumank

• Oksi li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al re aatenq’ankil chixseraq’inkil li seraq’ natawman sa’ Jwan 13:1–17. Kanab’eb’ li kok’al chixk’utb’al sa’ li jalam-uuch li naxye sa’ li seraq’.

• K’uteb’ lix jalam-uuch li Jesus naq kik’anjelak chiruheb’ li kristiaan (chi’ilmanq Libro de obras de arte del Evangelio malaj sa’ li Liahona). Kanab’eb’ li kok’al chixk’eeb’aleb’ xhoonaleb’ chirib’ileb’ rib’ re xchapb’aleb’ li jalam-uuch naq yookat chixseraq’inkileb’ li esil eetalinb’ileb’ sa’ li jalam-uuch (wi naru, kanab’eb’ chi tenq’ank chixseraq’inkileb’ li esil).

• Patz’ reheb’ li kok’al k’a’ru neke’reek’a naq neke’tenq’aak xb’aan anihaq. Kanab’eb’ li kok’al chixyiib’ankileb’ li jalam-uuch re chan ru naru neke’xtaaqe lix b’aanuhom li Jesus rik’in k’anjelak chiru anihaq.

Jwan 13:34–35; 14:15

Nink’ut lin rahom choq’ re li Jesukristo naq ninpaab’eb’ lix taqlahom.

Chan ru naru nakatenq’aheb’ li kok’al chixtawb’al ru naq lix paab’ankileb’ li taqlahom a’an jun reetalil lix rahomeb’ choq’ re li Jesukristo?

Kok’ k’anjel naru chi b’aanumank

• K’e reheb’ li junjunq chi kok’al jun li aamej yiib’anb’il rik’in hu re te’ruutz’u’uji ru. Kanab’eb’ chixchapb’al chi kutankil li aamej rajlal sut naq te’xb’ichaheb’ li aatin wan rilom rik’in li aatin “rahok” sa’ “Chiqara li qas qiitzʼin” ut “Li rahok cheribʼil eerib,” B’ichleb’aal choq’ reheb’ li Kok’al,39,  74.

• Tenq’aheb’ li kok’al chixkanab’ankil sa’ xk’a’uxleb’ Jwan 14:15; choq’ re a’an, patz’ reheb’ naq te’xchap chi kutankil li aamej yiib’anb’il rik’in hu naq neke’xye: “Wi nikineera,” ut jun li jalam-uuch reheb’ li perpookil pek naq neke’xye: “Teepaab’ lin chaq’rab’.”

• Kanab’eb’ li kok’al chixk’eeb’aleb’ xhoonal chirib’ileb’ rib’ re xk’utb’esinkil li k’a’ru naru neke’xb’aanu choq’ re junaq re xk’utb’al lix rahomeb’ choq’ re li Jesus. Patz’ reheb’ lix komoneb’ li kok’al naq te’xq’ehi k’a’ru li yookeb’ chixb’aanunkil.

• Tz’aqob’resi li perel re kok’ k’anjel re li xamaan a’in rik’ineb’ li kok’al.

Jwan 14:26–27; 15:26; 16:13–14

Li Santil Musiq’ej nikinixtenq’a chireek’ankil naq nach’ wankin rik’in li Jesus.

Us ta naq eb’ li kok’al li nakatzoleb’ maji’ neke’xk’ul li maatan re li Santil Musiq’ej, naru neke’xtzol anajwan chan ru nak’anjelak lix wankil li Santil Musiq’ej sa’ lix yu’ameb’.

Kok’ k’anjel naru chi b’aanumank

• K’ut li jalam-uuch La Última Cena (Libro de obras de arte del Evangelio, 54). Ch’olob’ chiruheb’ li kok’al naq sa’ lix loq’laj wa li Qaawa’, li Jesus kik’utuk chiruheb’ lix tzolom chirix li Santil Musiq’ej.

• Kanab’eb’ li kok’al chixk’eeb’al li ruq’eb’ sa’ xb’een li raameb’ ut sa’ xb’een lix jolomeb’. Teheb’ li loq’laj hu sa’ Tzol’leb’ ut Sumwank 8:2 ut ch’olob’ naq li Santil Musiq’ej naru nokoraatina “sa’ li qak’a’uxl ut sa’ li qach’ool,” malaj rik’in li naqak’oxla ut li naqeek’a.

• Chupeb’ li saqen ut chap jun li jalam-uuch chi kutankil. Chirix a’an k’ut li jalam-uuch rik’in xsaqen jun li pook. Patz’ reheb’ li kok’al chan ru naq li pook a’an chanchan li Santil Musiq’ej.

• Rik’in jun ch’ina xyaab’ kuxej q’un na’aatinak, b’icha rik’ineb’ li kok’al “Li Santil Musiqʼej,” B’ichleb’aal choq’ reheb’ li Kok’al, 56. B’oqeb’ chi ab’ink chi us re xk’eeb’al reetal li k’a’ru naxb’aanu li Santil Musiq’ej.

Xk’utb’al li tzol’leb’

Kok’al ak ninqeb’

Jwan 13:34–35; 14:15; 15:10–14

Nink’ut lin rahom choq’ re li Jesukristo naq ninpaab’eb’ lix taqlahom.

Naq nakawileb’ ru li raqal a’an naq nakattzolok aajunes, k’oxlaheb’ li kok’al li nakatzoleb’. Chan ru te’osob’tesiiq naq neke’xtaw ru naq lix paab’ankileb’ li taqlahom a’an reetalil lix rahomeb’ choq’ re li Kolonel?

Kok’ k’anjel naru chi b’aanumank

• Tenq’aheb’ li kok’al chixk’anab’ankil sa’ xk’a’uxleb’ Jwan 13:34–35. Naru nekeb’aanu rik’in xb’ichankil “ Li rahok cheribʼil eerib,” B’ichleb’aal choq’ reheb’ li Kok’al, 74, ut rik’in xtenq’ankileb’ li kok’al chixyoob’ankileb’ eek’asink-ib’ li naru neke’xk’ul rib’ rik’in li raatinul li b’ich.

• Kanab’eb’ li kok’al chixtz’iib’ankil sa’ li pizarron chan ru naq li Jesus naxk’ut naq nokoxra. Wi nakawaj, naru taak’uteb’ li jalam-uuch re lix yu’am li Kolonel re xtenq’ankileb’ (re xsik’b’al li na’leb’, chi’ilmanq Libro de obras de arte del Evangelio). Chan ru naru tink’ut lin rahom rik’ineb’ li kristiaan jo’ kixb’aanu li Kolonel? B’oqeb’ li junjunq chi kok’al chi xaqliik ut chixwotzb’al chan ru naq tixraheb’ li ras riitz’in (Jwan 13:34).

• Kanab’ jun li ch’ina al chirilb’al ru Jwan 14:15. Kanab’eb’ li kok’al chixk’eeb’aleb’ xhoonal chirib’ileb’ rib’ re xyiib’ankileb’ li jalam-uuch li te’reetali junaq li yoo chixpaab’ankil junaq taqlahom, naq lix komoneb’ li kok’al te’xq’ehi li k’a’ru yookeb’ chixyiib’ankil sa’ jalam-uuch. Re xtawb’al reetalileb’ li taqlahom, chi’ilmanq Para la Fortaleza de la Juventud. Chan ru naq lix paab’ankileb’ li taqlahom naxk’utb’esi naq naqara li Kolonel?

Jwan 14:26; 15:26; 16:13

Li Santil Musiq’ej nab’eresin, nak’ojob’an ch’oolej ut naxch’olob’ li yaal.

Anajwan naq naab’aleb’ li kok’al ak xk’ulumeb’ li maatan re li Santil Musiq’ej, chan ru naru nakatenq’aheb’ chixtawb’al ru chi us lix k’anjel li Santil Musiqej?

Kok’ k’anjel naru chi b’aanumank

• K’e reheb’ li kok’al li jun siir chi raqal a’in re te’ril ru sa’ ka’kab’il: Jwan 14:26; 15:26; y 16:13. Kanab’eb’ chixtawb’aleb’ kok’ aatin li neke’xk’ut chiruheb’ li k’a’ru naxb’aanu li Santil Musiq’ej. Tz’iib’aheb’ li kok’ aatin a’an sa’ li pizarron.

• Wotz jun aanumsihom naq li Santil Musiq’ej xatxb’eresi, xk’ojob’ aach’ool, xkol aawix, malaj xch’olob’ xyaalal li yaal chawu. Kanab’eb’ li kok’al chixwotzb’aleb’ yalaq k’a’ru xe’reek’a rik’in li Santil Musiq’ej. Chan ru xe’xk’e reetal lix wankil li Santil Musiq’ej?

• Kanab’eb’ li junjunq chi kok’al chixyiib’ankil sa’ jun jalam-uuch li rilob’aaleb’ sa’ jun li b’oolx yiib’anb’il rik’in hu. Loch jun li pook, li taareetali li Santil Musiq’ej, chi sa’eb’ li b’oolx. Chirix a’an k’eheb’ k’a’aq re ru sa’ li b’oolx li te’xram li saqen, jo’ jun li ch’ina t’ikr malaj sut yiib’anb’il rik’in hu, re xk’utb’al naq li k’a’ru ink’a’ us naqasik’ ru xb’aanunkil naru naxram lix wankil li Santil Musiq’ej sa’ li qayu’am. Kanab’eb’ li kok’al chirisinkil li ch’ina t’ikr malaj eb’ li sut yiib’anb’il rik’in hu sa’ li b’oolx re reetalinkil li jalb’a-k’a’uxlej.

Jwan 15:1–8; 17:3

Li qaChoxahil Yuwa’ ut li Jesukristo neke’raj naq tinnaweb’ ru.

Laa’at taawosob’tesi lix yu’ameb’ li kok’al chi junelik wi nakatenq’aheb’ chixnawb’al ru li qaChoxahil Yuwa’ ut li Jesukristo.

Kok’ k’anjel naru chi b’aanumank

• K’ut jun li pim naq eb’ li kok’al te’xk’e xhoonaleb’ chirib’ileb’ rib’ re rilb’al ruheb’ li raqal re Jwan 15:1–8. Chan ru naq li Jesukristo a’an chanchan jun li xtoonal li uva? Chan ru naq laa’o chanchano li ruq’ li che’? K’a’ru naru naqab’aanu re naq toowanq chi nach’ rik’in li Kolonel?

• Il ru chi kaw xyaab’ aakux Jwan 17:3. Patz’ reheb’ li kok’al k’a’ru yookeb’ chixb’aanunkil re xnawb’al ru li qaChoxahil Yuwa’ ut li Jesukristo. Wotz chan ru yookat laa’at chixnawb’aleb’ ru.

Li Kristo kixk’ut: “Kanaaqex wik’in” (Jwan 15:4).

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixpatz’b’al re junaq li komon sa’eb’ lix junkab’al k’a’ru naru neke’xb’aanu re k’anjelak chiruheb’. Chiru li tzolok sa’ li xamaan chal re, k’eheb’ xhoonal li kok’al chixwotzb’al li k’a’ru xe’xb’aanu.

Xchaab’ilob’resinkil li qak’utum

Oksiheb’ li kok’ k’anjel Wi nakatzoleb’ li kok’al toj ka’ch’ineb’ xyu’am, sa’ li perel reheb’ li kok’al ak ninqeb’ re li tusleb’ aatin a’in taataw xkomon li na’leb’ li naru nakawoksi sa’ laa tzoleb’aal. Jo’kan ajwi’, li kok’ k’anjel reheb’ li kok’al toj ka’ch’ineb’ xyu’am naru na’oksiman re xtzolb’aleb’ li kok’al ak ninqeb’.