“13–19 mayo. Mateo 19–20; Markos 10; Lukas 18: “K’a’ru maji’ ninb’aanu?”” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“13–19 mayo. Mateo 19–20; Markos 10; Lukas 18,” Kim, Taaqehin—Choq’ reheb’ li komon ut li junkab’al: 2019
13–19 mayo
Mateo 19–20; Markos 10; Lukas 18
“K’a’ru maji’ ninb’aanu?”
Chawil ut chak’oxla Mateo 19–20; Markos 10; ut Lukas 18, ut taak’e reetal li na’leb’ nakak’ul. K’e reetal li na’leb’ k’eeb’il aawe, ut k’oxla chan ru naq taak’anjela.
Xtz’iib’ankil li nakak’oxla
Wi ta tatruuq chixpatz’b’al jun patz’om chiru li Kolonel, k’a’ raj ru taapatz’? Naq jun li saaj winq b’ihom kixnaw ru li Kolonel xb’een wa, kixpatz’, “K’a’ru li chaab’ilal tinb’aanu re naq tweechani li junelik yu’am?” (Mateo 19:16). Lix sumehom li Kolonel naxk’ut naq kixb’antioxi li k’a’ru chaab’il ak xb’aanu li saaj winq, ut kixq’unb’esi xch’ool rik’in rahok naq toj wan k’a’ru tixb’aanu. Naq naqak’oxla li junelik yu’am, wan ajwi’ naq maare laa’o taqapatz’ ma toj wan chik li k’a’ru tento raj taqab’aanu. Naq naqapatz’ jo’ kixpatz’ a’an, “K’a’ru maji’ ninb’aanu?” (Mateo 19:20), li Qaawa’ naru chixk’eeb’al xsumenkil choq’ qe laa’o, jo’ chanru naq kixk’e re li saaj winq b’ihom. Maak’a’ naxye k’a’ru naxpatz’ li Qaawa’ naq taqab’aanu, re xb’aanunkil li k’a’ru naxsume wi’, junelik na’ajman ru naq taqakanab’ qib’ chiru a’an, ut ink’a’ chiru li qatiikilal laa’o (chi’ilmanq Lukas 18:9–14) ut naq “taqak’ul lix awa’b’ejihom li Dios jo’ junaq ch’ina al” (Lukas 18:17; chi’ilmanq ajwi’ 3 Nefi 9:22).
Li na’leb’ re xtzolb’aleb’ li loq’laj hu aajunes
Li sumlaak wan wi’ jun winq rik’in jun ixq, kʼojob’anb’il xb’aan li Dios.
Sa’ li seraq’ a’in kiwan wi’ li Kolonel rik’ineb’ laj Fariseo, wan jun paay chi aatin kixye li Kolonel chirix li sumlaak. Chirix rilb’al Mateo 19:1–9 ut Markos 10:1–12, tz’iib’a junjunq li na’leb’ li nakak’oxla naq naxye resil li kixk’oxla li Qaawa’ chirix li sumlaak. Chirix a’an, tzol li raqal “Sumlaak” sa’ li K’utul Raqal reheb’ li Loq’laj Hu, ut tz’iib’a chik li na’leb’ naq nakataweb’. Chan ru naq xnawb’al chirix lix k’uub’anb’il na’leb’ li Yuwa’b’ej choq’ re li kolb’a-ib’ nakatxtenq’a chixnawb’al k’a’ut naq li sumlaak wan wi’ jun winq rik’in jun ixq k’uub’anb’il xb’aan li Dios?
Li sumlaak re junelik a’an jun raqal sa’ lix k’uub’anb’il na’leb’ li Dios.
Maare nakanaw ru ani ink’a’ napaab’ank re malaj naxwech’ lix na’leb’ li Qaawa’ chirix li sumlaak. Re xnawb’al chan ru naq nakatru chi aatinak rik’in chaab’ilal rik’ineb’, naru taawil li video, “Everyday Example: When Beliefs are Questioned” (LDS.org).
Ma kixk’ut li Jesus naq li jachok-ib’ maajo’q’e us, ut naq eb’ li jachb’ileb’ rib’ tento naq ink’a’ te’sumlaaq wi’chik?
Sa’ jun yehom chirix li jachok-ib’, li Elder Dallin H. Oaks kixye naq li qaChoxahil Yuwa’ naraj naq li sumlaak taawanq chi junelik. A’b’anan li Dios naxtaw ajwi’ ru naq “xb’aan xkawil li qajolom” (Mateo 19:8), jo’ xb’aan naq xsik’man ru li ink’a’ us malaj xb’aan xq’etq’etil jun malaj xkab’ichaleb’ li sum aatin, wan naq na’ajman ru li jachok-ib’.
Li Elder Oaks kixch’olob’ naq li Qaawa’ “naxkanab’eb’ li jachb’ileb’ rib’ chi sumlaak wi’chik chi moko wan ta sa’ xb’eeneb’ xtz’ajnil li maak li ch’olob’anb’il sa’ li taqenaqil chaq’rab’. Wi jun li komon li xjach rib’ ink’a’ xb’aanu li ninqi q’etok aatin, a’an naru chixk’ulb’al jun xhuhil li santil ochoch rik’in xpaab’ankil li elajinb’il chiruheb’ li jun siir chik chi komon” (“El divorcio,” Liahona, mayo 2007, 70).
Chi’ilmanq ajwi’ “Jachok ib’ ” sa’ li K’utul Raqal reheb’ li Loq’laj Hu.
Mateo 19:16–22; Markos 10:17–22; Lukas 18:18–23
Wi ninpatz’ re li Qaawa’, a’an tixk’ut chiwu k’a’ru tento tinb’aanu re tinweechani li junelik yu’am.
Li k’a’ru kik’ulman rik’in li saaj winq b’ihom naru naxk’e chi k’oxlak jun li tzolom li xpaab’ank chiru chixjunil lix yu’am. Naq nakawil sa’ Markos 10:17–22, k’a’ru nakawil li naxk’ut chawu naq chaab’il ut anchal xch’ool li saaj winq?
Jo’ li saaj winq b’ihom, chiqajunilo maji’ tz’aqal qe qu, ut jo’ tzolom, tento taqapatz’, “K’a’ru maji’ ninb’aanu?”—ut tento taqapatz’ chiru chixjunil li qayu’am. K’e reetal naq nak’ehe’ xsumenkil li patz’om a’in rik’in rahok, ut li nasumenk re naxk’e reetal aniho chi yaal (chi’ilmanq Markos 10:21). K’a’ru naru taab’aanu re xkawresinkil aawib’ chixpatz’b’al re li Qaawa’ k’a’ru maji’ nakab’aanu—ut chixk’ulub’ankil li k’a’ru tixye aawe?
Chi’ilmanq ajwi’ Larry R. Lawrence, “K’a’ru maji’ ninb’aanu?” Jolomil Ch’utub’aj-ib’ re octubre 2015; S. Mark Palmer, “Li Jesus kixka’ya, kixra,” Jolomil Ch’utub’aj-ib’ re abril 2017.
Chixjunileb’ neke’ru chixk’ulb’al li osob’tesink re li junelik yu’am, maak’a’ naxye jo’q’e neke’xk’ul li evangelio.
Ma naru nakaye resil li ke’xk’ul laj k’anjelenel sa’ li awimq? K’a’ru li na’leb’ nakatzol laa’at sa’ li aatin a’in? Li raatin li Elder Jeffrey R. Holland “Los obreros de la viña” (Liahona, mayo 2012, 31–33) naru tatxtenq’a chirilb’al chan ru xk’anjelankil li jaljookil ru aatin a’in. K’a’ chik ru li na’leb’ naxk’e aawe li Musiq’ej?
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li musiq’ej naru nakatxtenq’a chixnawb’al k’a’ru li na’leb’ taak’e xwankil tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Ma usaq choq’ re laa junkab’al wi tex’aatinaq chirix li kixk’ut li Dios chirix li sumlaak ut li junkab’al? Wi jo’kan, taaruuq teeril “Li Junkab’al: Jun Jek’inb’il Aatin choq’ re li Ruchich’och’ ” (Liahona, noviembre 2010, 129, malaj li jek’inb’il aatin sa’ Q’eqchi’). Chan ru naq li k’a’ru k’utb’il sa’ li jek’inb’il aatin natenq’an chixtuqub’ankil li sachok-ib’ ut li b’alaq’il li yeeb’il sa’ li ruchich’och’ chirix li sumlaak ut eb’ li junkab’al?
Chan ru naq jalan wi’ naq wan li b’ihomal rik’in naq naqak’e qach’ool chirix li b’ihomal? (chi’ilmanq Markos 10:23–24). Naq nakawil li raqal 27, naru nakak’ut li k’a’ru naxye li jaltesinb’il ru xb’aan laj Jose Smith: “Chiruheb’ li winq li neke’xkanab’ rib’ chiru li b’ihomal, ink’a’ naru; a’ut moko wan ta chi ink’a’ naru chiruheb’ li winq li neke’xkanab’ rib’ chiru li Dios ut neke’xkanab’ chixjunil choq’ we laa’in, xb’aan naq rik’ineb’ a’in, naru chixjunil li na’leb’ a’in” (sa’ Markos 10:27, chi jaltesinb’il ru xb’aan laj Jose Smith) .
Re xk’utb’aleb’ li raqal chi na’leb’ sa’ Mateo 20:1–16, naru taak’uub’ jun ch’ina b’atz’unk, jo’ jun li carrera, ut taaye naq li ani taaq’axok-u tixk’ul jun li maatan. Chirix naq xe’xchoy li carrera, k’e li maatan chi juntaq’eet re chixjunileb’, ut tattiklaaq rik’in li xkana chi ixej toj rik’in li xq’axok-u. K’a’ru naxk’ut a’in chiqu chirix ani na’osob’tesiik rik’in li junelik yu’am, sa’ lix k’uub’anb’il na’leb’ li qaChoxahil Yuwa’?
K’a’ru xyaalalil li aatin, “Ani naraj naq nimaq xwankil sa’ eeyanq, a’anaq laj k’anjel cheru”? (Mateo 20:27). Chan ru naq li Jesukristo kixk’ut rik’in xb’aanuhom li na’leb’ a’in? Chan ru naru taqab’aanu li kixb’aanu a’an sa’ li qajunkab’al, li qateep, ut li qatenamit?
K’a’ru naqatzol chirix li tijok sa’ li wiib’ chi jaljookil ru aatin sa’eb’ li raqal a’in?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok qajunes
Taw jun hoonal li nak’anjelak choq’ aawe laa’at. Wan naq us wi’chik tzolok naq nakatru chixtzolb’aleb’ li loq’laj hu naq maa’ani taa’aatinanq aawe. K’oxla jun hoonal li taak’anjelaq aawe, ut k’e aach’ool chi tzolok sa’ li hoonal a’an wulaj wulaj.
Li Kristo ut li saaj aj b’ihom xb’aan laj Heinrich Hofmann