jun winq li yoo chixq’alunkil li ralal

Li alalb’ej sachenaq, xb’aan xLiz Lemon Swindle

6–12 mayo

Lukas 12–17; Jwan 11

"Chisaho’q sa’ qach’ool wochb’eenex, xb’aan naq xintaw lin karneer li xsachk chiwu"

Tikib’ xkawresinkil aawib’ rik’in xtzolb’al rik’in tijok Lukas 12–17 ut Jwan 11. Aniheb’ li "karneer sachenaq" sa’ laa tzoleb’aal li neke’chal sa’ laa k’a’uxl? Oksi Kim, Taaqehin—Choq’ reheb’ li komon ut li junkab’al, jo’ ajwi’ li tusleb’ aatin a’in naq yookat chixsik’b’al aab’eresinkil rik’in li Qaawa’ chirix chan ru xtenq’ankileb’ li komon sa’ laa tzoleb’aal, ut jo’kan ajwi’ eb’ li ink’a’ neke’wulak.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Li yu’amink a’an jun raqal re li tzolok li aajel ru; chi jo’kan, kanab’eb’ li komon sa’ li tzoleb’aal chixwotzb’al chan ru naq xe’xsik’ ru xyu’aminkil jun na’leb’ xe’xtzol sa’eb’ li loq’laj hu chiru li xamaan a’in.

reetalil li tzolok

Xk’utb’al li tzol’leb’

Lukas 14:15–24

Maak’a’ junaq ajom li tz’aqal re xkanab’ankil li evangelio.

• Re xtenq’ankileb’ li komon chixtzolb’al li jaljookil ru aatin chirix li nimla wa’ak, naru taab’aanu aawib’ jo’ ok aawe chixb’oqb’aleb’ sa’ jun li ninq’e li tatwanq wi’ jo’ aj k’ulul ula’. Ye reheb’ naq te’xwotz junjunq rajb’al naq ink’a’ te’raj xik. Ilomaq ru sa’ komonil Lukas 14:15–24, ut aatinanqex chirix k’a’ut naq eb’ li b’oqb’ileb’ sa’ li wa’ak sa’ li jaljookil ru aatin, a’an reetalil li osob’tesink re li evangelio, ink’a’ xe’raj xik. Sa’eb’ li kutan a’in, k’a’ru rajb’al neke’xye li kristiaan naq ink’a’ neke’chal naq li Kolonel naxb’oqeb’ chixk’ulb’al li rosob’tesihom lix Choxahil Yuwa’? Maare eb’ li komon sa’ li tzoleb’aal te’ruuq chixwotzb’al k’a’ruheb’ li osob’tesink xe’xk’ul rik’in xmayejankil li k’a’ru na’ajman re xyu’aminkil junaq na’leb’ sa’ li evangelio.

Lukas 15

Naru naqasik’eb’ li ani sachsookeb’, ut taasaho’q qach’ool rik’in li Yuwa’b’ej naq neke’sutq’i chaq.

• Chan ru naq naru nakak’eheb’ xch’ool li ani tzolb’ileb’ aab’aan re te’xsik’eb’ li ani "sachsookeb’ " rik’in naq maak’a’ rik’ineb’ li osob’tesink re li evangelio, ut te’xb’oqeb’ chi sutq’iik chaq? Naru taab’oqeb’ li komon chixk’oxlankil chiru junpaat ani junaq li "karneer sachenaq" li neke’xnaw ru, ut chirix a’an te’ril ru Lukas 15:1–17 naq yookeb’ chixk’oxlankil li komon a’an. K’a’ru neke’eek’asiik chixb’aanunkil re xsik’b’al li kristiaan a’an rik’in chaab’ilal ut rahok? Li esil yeeb’il xb’aan li Awa’b’ej Thomas S. Monson sa’ "Xkomon chik li k’anjeleb’aal" malaj li raatin li Elder Mervyn B. Arnold, "Chi kolok-ix: Naru naqab’aanu" (Jolomil Ch’utub’aj-ib’ re abril 2016) naru texxtenq’a sa’ li seraq’ a’in.

• Ma us raj choq’ reheb’ li komon xtawb’al ru chan ru naq naru nakana chi sachso jun li kristiaan? Naru taak’oxla xjachb’aleb’ ru li komon sa’ li tzoleb’aal re xtzolb’aleb’ li oxib’ jaljookil ru aatin sa’ Lukas 15. K’a’ru neke’xye li jaljookil ru aatin a’in chirix chan ru naq tento taqayal qaq’e chixtawb’aleb’ li ani sachsookeb’? K’a’ru li aatin sa’ Lukas 15 li naxk’utb’esi k’a’ru nareek’a li qaChoxahil Yuwa’ chirixeb’ li ani sachsookeb’? Naru teeb’icha "Sa’ raam laj Ilol Karneer," Eb’ li B’ich, ajl 144, sa’ komonil re eetenq’ankil re tzolok chirixeb’ li jaljookil ru aatin a’in.

• Eb’ li komon maare te’tenq’aaq rik’in xk’eeb’al reetal li raatin ut lix b’aanuhom li alalb’ej asb’ej sa’ li jaljookil ru aatin chirix li alalb’ej sachenaq. Maare naru te’xtz’iib’a jalan chik xraqik li jaljookil ru aatin, sa’ li jalan wi’ xna’leb’ li alalb’ej asb’ej chirix li riitz’in. Rik’in li na’leb’ naxk’e li yuwa’b’ej sa’ li jaljookil ru aatin, k’a’ru naqatzol chirix li k’a’ru tento raj taqeek’a chirixeb’ li ani sachsookeb’ ut neke’sutq’i sa’ li evangelio? (Chi’ilmanq ajwi’ li raatin li Elder Jeffrey R. Holland sa’ "Xkomon chik li k’anjeleb’aal.") Malaj ut taaruuq taaye reheb’ li komon sa’ li tzoleb’aal naq te’xk’oxla rib’ jo’ a’aneb’ li yuwa’b’ej sa’ li jaljookil ru aatin a’in. K’a’ chik ru chi na’leb’ taaruuq te’xk’e re li alalb’ej asb’ej re xtenq’ankil chi saho’k sa’ xch’ool rik’in li chaab’ilo’k neke’xb’aanu li jun ch’ol chik?

Jwan 11:1–46

Li Jesukristo a’an li wakliik chi yo’yo ut li yu’am.

• Naq xe’ril resil lix waklijik laj Lazaro chiru li xamaan a’in, ma xe’xtaw li komon sa’ laa tzoleb’aal junaq na’leb’ li naxkawresi xpaab’aaleb’ chirix naq li Jesukristo a’an li Ralal li Dios, ut li Mesias li yeechi’inb’il? Kanab’eb’ chixwotzb’al li k’a’ru xe’xtaw. K’a’ chik ru xe’xk’ul li naxnimob’resi xpaab’aaleb’ chirix li Jesukristo? Maare us xyeeb’al reheb’ naq sa’ xk’ulb’al li sachb’a-ch’oolej a’in, laj Lazaro ink’a’ kixk’ul li wakliik wi’chik chi yo’yo, ka’ajwi’ kikana wi’chik chi yo’yo sa’ li yu’am a’in.

  li Jesus naq yoo chi yaab’ak

  Kiyaab’ak li Jesus, xb’aan laj James Tissot

• Jun na’leb’ re xtz’ilb’al rix Jwan 11:146 a’an xpatz’b’al reheb’ li komon sa’ li tzoleb’aal naq te’ril sa’ komonil eb’ li raqal, ut naq te’xaqliiq naq te’xtaw jun na’leb’ li naxk’ut xyaalalil li Jesukristo. Patzʼ rehebʼ naq teʼaatinaq chirix li kʼaʼru xeʼxtzol. Chan ru naq lix yalb’al qix ut li qach’a’ajkilal naru chixkawob’resinkil li qapaab’aal chirix a’an?

• Jun chik na’leb’ re rilb’al ru li esilal a’in a’an xyeeb’al re junjunq li komon naq te’xk’oxla chan ru xch’ooleb’ li ani wankeb’ sa’ li esilal—jo’ li Kolonel, eb’ li apostol, li xMarta, li xMaria, ut laj Lazaro. K’a’ru naru naqatzol rik’in li junjunq reheb’? K’a’ru naru naqatzol chirix li Kolonel sa’ Jwan 11:33–35? K’a’ut naq aajel ru xnawb’aleb’ li na’leb’ a’in chirix a’an?

reetalil li tzolok

Xb’oqb’aleb’ chi tzolok sa’ kab’l

Re xk’eeb’aleb’ xch’ool li komon sa’ li tzoleb’aal re te’ril ru Mateo 19–20; Markos 10; ut Lukas 18, naru taapatz’ jun patz’om jo’, "K’a’ raj ru taaweek’a wi ta xattrab’ajik chiru chixjunil li kutan ut juntaq’eet xattoje’ rik’in li ani xtrab’ajik yal chiru jun hoonal? Ye reheb’ naq wan jun li jaljookil ru aatin sa’ li k’a’ru te’ril ru choq’ re li xamaan jun chik li naxk’ut chan ru naru nak’oxlaman naq tiik a’in.

reetalil li k’anjeleb’aal

Xkomon chik li k’anjeleb’aal

Lukas 12–17; Jwan 11

"Xinaataw."

Li Awa’b’ej Thomas S. Monson xwotz li k’a’ru xk’ul naq yoo chi k’anjelak jo’ obiisp: "Sa’ jun doming xink’e reetal naq laj Richard, jun reheb’ laj tij li ink’a’ jwal nawulak, maa’ani wan sa’ li ch’utam re tijonelil. Xinkanab’ li molam sa’ ruq’ laj k’utunel, ut xinwulak sa’ rochoch laj Richard. Lix na’ xye naq wan sa’ li k’uub’leb’aal ch’iich’, ut yoo chi k’anjelak rik’ineb’ li b’eleb’aal ch’iich’. Xkohin sa’ li k’uub’leb’aal ch’iich’ re xsik’b’al laj Richard, ut yalaq b’ar xinsik’ok ut ink’a’ xintaw. Sa’ junpaat, xweek’a sa’ inch’ool naq tento raj tin’iloq taq’a sa’ jun nimla jul li wan chixjunpak’al li kab’l. Aran sa’ li aak’ab’ xwil wiib’ lix naq’ uhej. Xwab’i laj Richard chixyeeb’al, "Xinaataw, obiisp. Tintaqe’q." Naq laj Richard ut laa’in xoo’aatinak, xinye re naq ra xqeek’a naq maa’ani qik’in, ut naq naqaj ru a’an. Xink’e chixyeeb’al we naq taa’ok chi wulak sa’eb’ li ch’utam. ... [Moqon], laj Richard xye naq xjalman lix yu’am naq lix obiisp xtaw chi muqmu sa’ jun li jul, ut xb’oq chi sutq’iik sa’ li iglees" ("Las remolachas azucareras el el valor de un alma," Liahona, julio 2009, 4–5).

Tzolok chirix li jun chik alalb’ej sachenaq.

Li Elder Jeffrey R. Holland xye li na’leb’ a’in chirix li ras li alalb’ej sachenaq.

"Li alalb’ej a’in ink’a’ yoo xjosq’il chirix naq xsutq’i li riitz’in sa’ kab’l, yoo xjosq’il chirix naq eb’ lix na’ xyuwa’ saheb’ sa’ xch’ool rik’in. Xreek’a naq a’an ink’a’ k’eeb’il reetal, ut maare nareek’a b’ayaq xtoq’ob’al ru, li chaab’il alalb’ej a’in—ut k’a’jo’ naq chaab’il a’an—ut nasach sa’ xch’ool chiru junpaat naq maajun wa xreek’a a’an li tz’ajnil, li xiw, ut naq a’an maak’a’ xloq’al. Xsach sa’ xch’ool chiru junpaat naq chixjunileb’ li karneer sa’ li awimq wankeb’ choq’ re, jo’ ajwi’ chixjunileb’ li b’aatal sa’ li ochoch ut chixjunileb’ li matq’ab’ sa’ li kaax. Xsach sa’ xch’ool naq lix tiikilal junelik wanjenaq chi q’ajkamunb’il, ut jo’kan taawanq chi junelik.

"Ink’a’, li alalb’ej a’an li ak wan re chixjunil, ut rik’in xnimal lix k’anjel xk’ulub’ naq taawanq re, toj maak’a’ rik’in li k’a’ru taatz’aqob’resinq re ru jo’ xmoos li Qaawa’. Toj maji’ nawulak sa’ li toq’ob’ank-u ut li uxtaan, lix nimal li rilom li rahok chirilb’al naq li ani xsutq’i chak maawa’ junaq li yoo chixpleetinkil. A’an b’an li riitz’in. Naq lix yuwa’ yoo chixtz’aamankil naq taaril a’in, a’an li kamenaq chaq ut yo’yo chik. A’an li sachenaq chaq ut ak tawb’il" ("El otro hijo pródigo," Liahona, julio 2002, 70).

Xchaab’ilob’resinkil li qak’utum

Xsik’b’al li junjunq. Jo’ laj k’aak’alenel karneer sa’ lix jaljookil ru aatin li Kolonel (chi’ilmanq Lukas 15:4), "laa’at naru taaye’ laa wuq’ reheb’ li moko neke’wulak ta sa’ laa tzoleb’aal. Laa hoonal chixtzolb’al ut chixwaklesinkileb’ li komon sa’ li tzoleb’aal ut chixtenq’ankileb’ chi chalk rik’in li Kristo natawman ajwi’ chirix li tzoleb’aal ut rik’ineb’ ajwi’ li ani ink’a’ neke’wulak chi tzolok aawik’in" (Li k’utuk jo’ li Kolonel, 8).