Kim, Taaqehin
20–26 mayo. Mateo 21–23; Markos 11; Lukas 19–20; Jwan 12: "We’ chaq aawik’in laa Rey"


"20–26 mayo. Mateo 21–23; Markos 11; Lukas 19–20; Jwan 12: "We’ cha aawik’in laa Rey" " Kim, Taaqehin—Choq’ re li Dominkil Tzoleb’aal: 2019 (2019)

"20–26 mayo. Mateo 21–23; Markos 11; Lukas 19–20; Jwan 12," Kim, Taaqehin—Choq’ re li Dominkil Tzoleb’aal: 2019

Jalam-uuch
jun winq taqenaq sa’ jun toon li che’ naq kinach’ok li Jesus

Laj Zakeo sa’ xtoonal li sikomoor, xb’aan laj James Tissot

20–26 mayo

Mateo 21–23; Markos 11; Lukas 19–20; Jwan 12

"We’ chaq aawik’in laa Rey"

Naq nakawil Mateo 21–23; Markos 11; Lukas 19–20; ut Jwan 12, k’oxlaheb’ li patz’om naru nakapatz’ re xtenq’ankileb’ li komon sa’ laa tzoleb’aal. Li Santil Musiq’ej tatxtenq’a chixnawb’al k’a’ruheb’ li patz’om ut li na’leb’, jo’eb’ li wankeb’ sa’ li tusleb’ aatin a’in, li te’k’anjelaq re xtenq’ankileb’.

Xtz’iib’ankil li nakak’oxla

Jalam-uuch
reetalil li wotzok

Xkanab’ankileb’ chi wotzok

Chiru li xamaan rub’elaj li tzoleb’aal, patz’ re junjunq komon sa’ li tzoleb’aal naq te’wanq chi kawresinb’il re xyeeb’al resil li k’a’ru xe’xk’ul rik’in xtzolb’aleb’ li ch’ol li eetanb’ileb’ choq’ re li xamaan a’in. K’a’ru li osob’tesink li xchal rik’ineb’ naq xe’xtzoleb’ li loq’laj hu chiru li xamaan?

Jalam-uuch
reetalil li k’utuk

Xk’utb’al li tzol’leb’

Lukas 19:1–10

Li Kolonel naxnaw qu chiqajunqal.

  • Naru naq eb’ li komon sa’ laa tzoleb’aal wan naq xe’reek’a chiru xyu’ameb’ naq ink’a’ k’oxlanb’ileb’ malaj naq kanab’anb’ileb’ xjunes. Li esil chirix laj Zakeo naru tixtenq’aheb’ chixtawb’al ru naq lix Choxahil Yuwa’ ut li Jesukristo neke’xnaweb’ ru ut neke’xk’oxlaheb’. Re xtenq’ankileb’ li komon chixjuntaq’eetankil li esil a’in rik’in lix yu’ameb’, ye reheb’ naq te’xk’oxla rib’ naq a’aneb’ laj Zakeo. K’a’ru nakak’oxla naq kixtzol a’an chirix li Kolonel naq kixk’ul a’in? K’a’ru naru naqatzol rik’in li k’a’ru kixb’aanu laj Zakeo re xsik’b’al li Kolonel?

  • Naru ajwi’ naq us raj xpatz’b’al reheb’ li komon naq te’xk’oxla jalaneb’ chik sut sa’eb’ li loq’laj hu naq li Qaawa’ kixb’oq anihaq rik’in xk’ab’a’. (Wankeb’ chik li raqal k’utb’il sa’ "Xkomon chik li k’anjeleb’aal.") Naru ajwi’ taakanab’eb’ li komon sa’ li tzoleb’aal chixwotzb’al li k’a’ru xe’xk’ul li naxk’e chixnaweb’ naq li Qaawa’ naxnaweb’ ru.

Mateo 21:1–11; Markos 11:1–11; Lukas 19:29–44; Jwan 12:12–16

Li Jesukristo a’an Rey chiqu.

  • Jun ch’ina k’anjel taaruuq chi k’anjelak re xtikib’ankil li seraq’ chirix li rokik li Kolonel jo’ Rey sa’ Jerusalen: Junjunq li komon sa’ li tzoleb’aal te’ruuq chixtz’iib’ankil chiru li pizarron xjalam-uuch li k’a’aq re ru li wan re jun li rey, jo’ jun koroon, malaj jun k’ojarib’aal, ut li jun ch’ol chik te’ruuq chik’eeb’al reetal li k’a’ru yookeb’ chixtz’iib’ankil. Chirix a’an, jalaneb’ chik li komon te’ruuq chixtz’iib’ankil xjalam-uuch jun b’uur ut eb’ li ruq’ che’. K’a’ru xk’anjel li k’a’aq re ru a’in choq’ re jun rey? Chirix a’an tatruuq chixk’utb’al chiruheb’ jun jalam-uuch chirix li rokik li Kolonel sa’ Jerusalen jo’ Rey, sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut taaye reheb’ li komon sa’ li tzoleb’aal naq te’ril ru Markos 11:1–11. Chan ru naq xe’xnaw li tenamit naq li Jesus a’an lix Reyeb’? Chan ru naq laa’o naqaloq’oni li Jesukristo jo’ li qaRey rik’in li qaatin ut li qab’aanuhom?

  • Re xtenq’ankileb’ li komon sa’ li tzoleb’aal chixtawb’al ru naq li Jesukristo a’an li qaRey, naru taapatz’ reheb’ naq te’ril ru li b’ich, "Chalqat, xReyeb’ li Rey," Eb’ li B’ich, ajl 29, malaj jalan chik li b’ich chirix li Jesus jo’ li qaRey. K’a’ru li aatin sa’ li b’ich li naxk’ut chiqu li yaalil na’leb’ sa’ Mateo 21:1–11; Markos 11:1–11; Lukas 19:29–44; ut Jwan 12:12–16?

Mateo 22:34–40

Li wiib’ xninqal ru chaq’rab’ a’aneb’ xraab’al li Dios ut xraab’aleb’ li qas qiitz’in jo’ naqara qib’ laa’o.

  • Li Awa’b’ej Dieter F. Uchtdorf kixk’ut naq wi naqak’e k’a’aq chik ru ruuchileb’ li wiib’ xninqal ru taqlahom choq’ xch’oolil li qayu’am, chanchan yooko chixkutb’aleb’ li tzimaj chiru jun tz’ak saq ru, ut xtz’iib’ankileb’ li marca chi sutsu chirixeb’ li tzimaj (chi’ilmanq "Apuntar hacia el centro," Liahona, enero 2017, 4–5). Wi taak’ut li jaljookil ru aatin a’in, ma tixtenq’aheb’ li komon sa’ li tzoleb’aal chixtawb’al ru Mateo 22:34–40? Jun na’leb’ re xb’aanunkil a’in, a’an xhelb’al jun nimla hu chiru li ch’och’ ut xkanab’ankileb’ li komon sa’ li tzoleb’aal chixkanab’ankil chi t’ane’k jun tz’iib’leb’ sa’ xb’een. Chirix a’an taaruuq teetz’iib’a li eetalil yalaq b’ar nakana li tz’iib’leb’ chiru li hu, ut te’xtz’iib’a junaq taqlahom chiru li junjunq eetalil. Chirix rilb’al ru sa’ komonil Mateo 22:34–40, taaruuq taatz’iib’a jun nimla eetalil li naxsut rix chixjunileb’ chik li eetalil, ut taatz’iib’a chiru, "xraab’al li Dios ut xraab’al aawas aawiitz’in." Chan ru naq xjayalinkil li wiib’ xninqal ru taqlahom nokoxtenq’a chixpaab’ankil chixjunileb’ chik lix taqlahom li Dios? Chan ru naru naqajayali li qayu’am rik’ineb’ li wiib’ chi taqlahom a’in?

Mateo 23:13–33

Taakole’q qix wi ink’a’ naqataaqeheb’ laj k’amol b’e li mutz’.

  • Ma te’chaab’ilo’q li komon sa’ laa tzoleb’aal rik’in aatinak chirix li aatin "aj k’amol b’e ink’a’ nekex’ilok," li kixye li Kolonel chirixeb’ laj Fariseo ut eb’ laj na’ol chaq’rab’ li wankeb’ xmusiq’ejil mutz’il? (Mateo 23:16). Naru taak’oxla chan ru taak’utb’esi chiruheb’ k’a’ raj ru taak’ulmanq rik’in xtaaqenkil li ani ink’a’ na’ilok. Malaj eb’ li wankeb’ sa’ li tzoleb’aal te’ruuq chixtz’iib’ankil chiru li pizarron chan ru jun aj k’amol b’e li ink’a’ na’ilok, jo’ yeeb’il resil sa’ Mateo 23:13–33. Sa’ xtz’iib’ankil, k’oxla rilb’aleb’ jalan chik raqal sa’eb’ li loq’laj hu li neke’aatinak chirix li musiq’ejil mutz’il, jo’ 2 Korintios 4:3–4; 2 Nefi 9:28–32; ut Jakob 4:14. Chan ru naru taqanaweb’ ru ut taqanajtob’resi qib’ rik’ineb’ laj k’amol b’e li mutz’eb’?

  • Naru naq taawaj xtenq’ankileb’ li komon sa’ li tzoleb’aal chixtawb’al ru naq eb’ laj Fariseo ut laj na’ol chaq’rab’ neke’xik xch’ool chirix li oor ut eb’ li maatan li wankeb’ sa’ li santil ochoch, ut ink’a’ chirix lix loq’alil li santil ochoch (chi’ilmanq Mateo 23:16–22). Re xb’aanunkil a’in, naru taawotz li jaljookil ru aatin chirix li lemtz’ q’ol ut li kaax xb’aan li Awa’b’ej Boyd K. Packer sa’ "Xkomon chik li k’anjeleb’aal." K’a’ru naru chi jalb’ehink qe sa’ xyalb’al li tz’aqal osob’tesink re li santil ochoch? re li ch’utam re li loq’laj wa’ak?

Jalam-uuch
wiib’ winq li yookeb’ chi tijok sa’ li santil ochoch

Laj titz’ol toj li yot’b’il xch’ool ut laj Fariseo aj q’etq’et sa’ li santil ochoch, xb’aan laj Frank Adams

Jwan 12:42–43

Li nimaak qu xb’aaneb’ li winq naru naxram chiqu wank choq’ chaab’il xtzolom li Jesukristo.

Jalam-uuch
reetalil li tzolok

Xb’oqb’aleb’ chi tzolok sa’ kab’l

Li Kolonel kixye naq sa’eb’ li roso’jik kutan toj reetal eb’ li sik’b’ileb’ ru te’ruuq chi b’alaq’iik (chi’ilmanq Jose Smith—Mateo 1:22). Re xk’eeb’aleb’ xch’ool li komon chirilb’al Jose Smith—Mateo 1; Mateo 25; Markos 12–13; ut Lukas 21 sa’ li xamaan taachalq, naru taaye reheb’ naq te’xtaw sa’eb’ li ch’ol a’an chan ru naq te’xkol rib’ chiru li b’alaq’iik sa’eb’ li roso’jik kutan.

Jalam-uuch
reetalil li k’anjeleb’aal

Xkomon chik li k’anjeleb’aal

Mateo 21–23; Markos 11; Lukas 19–10; Jwan 12

Li qaChoxahil Yuwa’ naxnaw aawu.

Li Elder Neal A. Maxwell kixye: "Ninch’olob’ chawu naq li Dios naxnaw aawu ... chalen chaq najter najter (chi’ilmanq Tz. ut S. 93:23). Nakatxra chalen chaq najter najter. Ink’a’ ka’ajwi’ naxnaw xk’ab’a’eb’ chixjunileb’ li chahim (chi’ilmanq Salmo 147:4; Isaias 40:26), naxnaw eek’ab’a’ chejunqalex laa’ex, ut naxnaw ru chixjunil lix rahil ut lix sahil eech’ool!" ("Recordemos cuán misericordioso ha sido el Señor," Liahona, mayo 2004, 46).

Junjunq sut naq li Qaawa’ kixb’oq anihaq rik’in xk’ab’a’.

Li jaljookil ru aatin chirix li lemtz’ q’ol ut li kaax

Li Awa’b’ej Boyd K. Packer xwotz li jaljookil ru aatin a’in: "Jun winq aj k’ay li yoo chixsik’b’aleb’ li lemtz’ pek terto xtz’aq, sa’ jun kutan kixtaw jun lemtz’ q’ol q’axal chaab’il. A’an kixtz’aama chiru jun chaab’il aj pech naq tixyiib’ jun chaq’al ru kaax ut tixhel raxi t’ikr chixsa’. Kixk’e li q’ol nim xtz’aq chi k’utmank, re naq chixjunileb’ te’ruuq chirilb’al lix chaq’al ru pek. Ki’ilok naq yookeb’ chi chalk chirilb’al. Sa’ junpaat, kiraho’ xch’ool chi ilok. Kixk’e reetal naq a’an li kaax li yookeb’ chirilb’al, ink’a’ li lemtz’ q’ol" ("Lenguas de fuego," Liahona, julio 2000, 7).

Xchaab’ilob’resinkil li qak’utum

Ink’a’ na’ajman ru naq taak’ut chixjunil. "Naab’al wan chixyeeb’al sa’ li junjunq tzolok, a’b’an moko na’ajman ta ru naq taak’utmanq chixjunil sa’ jun tzolok re xtoch’b’al xch’ool junaq—chi kok’ aj xsa’ tz’aqal jun malaj wiib’ na’leb’. Naq nakak’oxla li rajomeb’ ru li ani tzolb’ileb’ aab’aan, li Musiq’ej tatxtenq’a chixk’eeb’al reetal li xb’eenil na’leb’, li seraq’, malaj li raqal sa’eb’ li loq’laj hu li q’axal chaab’ilaq choq’ reheb’ " (Li k’utuk jo’ li Kolonel, 7).

Isi reetalil