xkab’ k’ulunik li Qaawa’

Li xkab’ xk’ulunik li Qaawa’, xb’aan laj Harry Anderson

27 mayo–2 junio

Jose Smith—Mateo 1; Mateo 25; Markos 12–13; Lukas 21

"Taak’ulunq chaq li K’ajolb’ej"

Chijultiko’q aawe naq taatikib’ xkawresinkil li k’utuk rik’in rilb’al ru rik’in tijok Jose Smith—Mateo 1; Mateo 25; Markos 12–13; ut Lukas 21. Sik’ li Musiq’ej aajunes, ut chirix a’an taawil ru li tusleb’ aatin a’in re xtawb’al chik xkomon li na’leb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Tz’iib’a chi tzoltzo chiru li pizarron eb’ li jaljookil ru aatin re li Kolonel li neke’tawman sa’eb’ li raqal re li xamaan a’in, jo’ re lix toonal li higo, li chaab’il winq ut laj elq’, li chaab’il ut li maa’us aj moos, li lajeeb’ tuq’ixq, eb’ li talento (li tumin), ut eb’ li karneer ut li chib’aat. Ye reheb’ li komon naq te’xwotz li yaalil na’leb’ xe’xtzol rik’ineb’ li jaljookil ru aatin a’in li taatenq’anq reheb’ chixkawresinkil rib’ choq’ re li xkab’ xk’ulunik li Qaawa’. K’a’ru yookeb’ chixb’aanunkil re xyu’aminkil li yaalil na’leb’ a’in?

reetalil li k’utuk

Xk’utb’al li tzol’leb’

Jose Smith—Mateo 1:21–37

Eb’ li profeetil aatin chirix li xkab’ xk’ulunik li Kolonel neke’ru chiqatenq’ankil re taqak’ul rik’in paab’aal li k’a’ru chalel.

• Maare ch’a’ajaq choq’ re junjunq li komon sa’ li tzoleb’aal xtawb’aleb’ ru li reetalil li xkab’ xk’ulunik li Kolonel. Maare usaq choq’ reheb’ k’anjelak sa’ kok’ ch’uut ut te’xk’e reetal k’a’ruheb’ li eetalil li neke’xtaw sa’ Jose Smith—Mateo 1:21–37. Naru naq k’a’jo’ wi’chik te’xtaw ru lix nimal xwankileb’ li eetalil a’in wi neke’xjuntaq’eetaheb’ rik’ineb’ li eetalil li neke’tawman chire jun nimb’e. K’a’ut naq neke’ajman ru li eetalil chire li b’e? K’a’ru li na’leb’ naqak’ul rik’in a’in chirixeb’ li reetalil li xkab’ xk’ulunik li Qaawa’? Naru taak’e re li junjunq ch’uut li kok’ hu chi setb’il chanchaneb’ li eetalil re b’e, ut taab’oqeb’ chixtz’iib’ankil chiru li junjunq ch’ina hu jun eetalil li taak’utmanq rub’elaj li xkab’ xk’ulunik li Qaawa’. Chirix a’an, kanab’eb’ chixwotzb’al li k’a’ru xe’xtaw, ut ye reheb’ li komon naq te’aatinaq chirix chan ru naq yookeb’ chi k’utmank li eetalil a’in sa’ li ruchich’och’ anajwan.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, xe’b’oqe’ li komon sa’ li tzoleb’aal chixsik’b’al li na’leb’ sa’eb’ li raqal a’in chirix chan ru naq naru toowanq chi "ink’a’ poqlenb’il qak’a’uxl" naq naqil li k’a’ru taak’ulmanq rub’elaj li xkab’ xk’ulunik li Qaawa’ (chi’ilmanq ajwi’ li raatin li Awa’b’ej Thomas S. Monson sa’ "Xkomon chik li k’anjeleb’aal"). K’ut jun jalam-uuch re li xkab’ xk’ulunik li Qawa’ (chi’ilmanq La Segunda Venida, Libro de obras de arte del Evangelio, ajl 66), ut b’oqeb’ li komon sa’ li tzoleb’aal chixwotzb’aleb’ li raqal li xe’xk’e reetal naq yookeb’ chi tzolok xjuneseb’. K’a’ut naq osob’tesink choq’ qe xnawb’al k’a’ru taak’ulmanq rub’elaj li xkab’ xk’ulunik li Kolonel?

Jose Smith—Mateo 1:26–27, 38–55; Mateo 25:1–13

Junelik tento naq kawresinb’ilaqo choq’ re li xkab’ xk’ulunik li Kolonel.

• Us ta li Kolonel xye qe naq junelik kawresinb’ilaqo choq’ re li xkab’ xk’ulunik, ink’a’ ch’a’aj naq sa’ xk’oxlankil li k’a’aq re ru re li qayu’am re wulaj wulaj, ink’a’ mas naqak’oxla a’an. Eb’ li jaljookil ru aatin sa’ Jose Smith—Mateo 1:26–27, 38–55 ut sa’ Mateo 25:1–13 neke’ru chixtenq’ankileb’ li komon sa’ li tzoleb’aal chixk’eeb’al reetal chan ru naq aajel ru xkawresinkil rib’ choq’ re li xkab’ xk’ulunik li Qaawa’. B’oqeb’ li komon sa’ li tzoleb’aal chixtawb’aleb’ li jaljookil ru aatin a’in ut chixwotzb’al k’a’ru neke’xk’ut chirix li wank chi kawresinb’il choq’ re li xkab’ xk’ulunik li Qaawa’. Maare jun malaj wiib’eb’ li komon te’ruuq chi chalk chi kawresinb’il re xk’utb’esinkileb’ jun reheb’ li jaljookil ru aatin a’in.

• Li jaljookil ru aatin chirixeb’ li lajeeb’ tuq’ixq naru naxtenq’aheb’ li komon sa’ li tzoleb’aal chixk’oxlankil ma kawresinb’ileb’ chixk’ulb’al li Kolonel. Li Elder David A. Bednar kixk’e jun ch’olob’ank chirix li jaljookil ru aatin li taaruuq chixtenq’ankileb’ (chi’ilmanq "Xkomon chik li k’anjeleb’aal"). Eb’ li komon sa’ li tzoleb’aal te’ruuq chi aatinak chirix k’a’ru naru taqab’aanu sa’ li qayu’am re wulaj wulaj re toowanq chi tz’aqal jalb’il qach’ool chirix li evangelio. K’a’ut naq chiqajunqal tento taqak’ul lix jalb’al qach’ool? K’a’ru chik li na’leb’ naqataw sa’ Tzol’leb’ ut Sumwank 45:56–57 chirix li jaljookil ru aatin a’in?

• Naru teeb’icha sa’ komonil eb’ li b’ich chirix li xkab’ xk’ulunik li Qaawa’, ut k’a’ru li na’leb’ k’utb’il sa’eb’ li b’ich a’an (chi’ilmanq "Xkomon chik li k’anjeleb’aal").

Mateo 25:14–46

Sa’ li raqb’a-aatin sa’ roso’jik, taqaq’axtesi chiru li Qaawa’ resil li qayu’am.

• Li jaljookil ru aatin chirixeb’ li talento (li tumin) ut li jaljookil ru aatin chirixeb’ li karneer ut li chib’aat naru tooreek’asi chixk’oxlankil li resil li qayu’am li taqak’e re li Qaawa’ sa’ li raqb’a-aatin sa’ roso’jik. Naru teeril sa’ komonil eb’ li jaljookil ru aatin a’in ut taapatz’ re li junjunq komon sa’ li tzoleb’aal naq tixwotz jun patz’om li maare tixpatz’ li Kolonel naq naqak’e resil li qayu’am. Kanab’ jun k’asal re naq eb’ li komon sa’ li tzoleb’aal te’xk’oxla chan ru naq te’xyu’ami li musiq’anb’il na’leb’ xe’xtzol sa’ li seraq’ a’in.

  eb’ li karneer ut li chib’aat

  Li Kristo kiroksiheb’ li karneer ut li chib’aat re qatzolb’al chirix li raqb’a-aatin sa’ roso’jik (chi’ilmanq Mateo 25:31–33).

• Maare taawaj xnumsinkil rik’ineb’ li komon k’a’ru li raqb’a-aatin sa’ roso’jik jo’ yeeb’il resil sa’ "Raqb’a-aatin sa’ Roso’jik" sa’ li K’utul Raqal reheb’ li Loq’laj Hu. Chirix a’an, tatruuq chixtz’aamankil chiruheb’ li komon sa’ li tzoleb’aal naq te’ril junjunq raqal sa’eb’ li loq’laj hu chirix chan ru naq taawanq li raqb’a-aatin sa’ roso’jik, jo’ sa’ Alma 5:17–25. K’a’ru nokohe’reek’asi li raqal a’in chixb’aanunkil re xkawresinkil qib’ choq’ re li kutan a’an?

• Re xtenq’ankileb’ li komon sa’ li tzoleb’aal chixtawb’al k’a’ru li na’leb’ choq’ reheb’ sa’ li jaljookil ru aatin chirixeb’ li talento malaj li tumin (chi’ilmanq Mateo 25:14–30), naru te’xwotz junjunq li na’leb’ malaj te’roksi li k’anjel sa’ "La parábola de los talentos," xb’aan li Elder Ronald A. Rasband (Liahona, agosto 2003, 34–37).

• Re xtikib’ankil li aatinak chirix Mateo 25:34–40, naru taab’oqeb’ li komon sa’ li tzoleb’aal chixwotzb’al aniheb’ li kristiaan li neke’xyu’ami li toq’ob’ank-u li yeeb’il resil sa’eb’ li raqal a’in. Kanab’eb’ chiru jun k’asal chixk’oxlankil ani taaraj ru tenq’aak xb’aaneb’. Chan ru nokoru laa’o chixk’eeb’al chi wa’ak li te’tz’okaaq, chixtiqib’ankileb’ li t’ust’uukeb’, ut chirula’aninkileb’ li yaj?

reetalil li tzolok

Xb’oqb’aleb’ chi tzolok sa’ kab’l

Re xk’eeb’aleb’ xch’ool li komon sa’ li tzoleb’aal chirilb’al ru Jwan 13–17 chiru li xamaan jun chik, ye reheb’ naq te’xk’oxla k’a’ raj ru te’xye re jun alalb’ej malaj jun rab’inb’ej naq xik re sa’ jun li mision. Sa’ Jwan 13–17, taqil ru li aatin kixye li Kolonel reheb’ lix tzolom naq ok re chi kamsiik chiru krus.

reetalil li k’anjeleb’aal

Xkomon chik li k’anjeleb’aal

Jose Smith—Mateo 1; Mateo 25; Markos 12–13; Lukas 21

Eb’ li b’ich chirix li xkab’ xk’ulunik li Qaawa’.

• "Chisaho’q sa’ qach’ool," Eb’ li B’ich, ajl 3

• "Ralal xk’ajol li Qaawa’," Eb’ li B’ich, ajl 28

• “Chalqat, xReyeb’ li rey,” Eb’ li B’ich, ajl 29

• "Ninpaab’ li Kristo," Eb’ li B’ich, ajl 75

• “Sahaq eechʼool, li Qaawaʼ xchal,” Eb’ li B’ich, ajl 123

Li aseeyt re lix jalajik qach’ool.

Li Elder David A. Bednar kixye jun na’leb’ li naru naxch’olob’ xyaalal li jaljookil ru aatin chirixeb’ li lajeeb’ tuq’ixq:

"K’oxlahomaq naq li aseeyt a’an li aseeyt re xjalajik li qach’ool [chi’ilmanq Mateo 25:4–9]. ...

"Eb’ li oob’ tuq’ixq li wankeb’ xna’leb’, ma aj q’etq’eteb’ ut ink’a’ ke’raj wotzok, malaj ut ma yal yookeb’ chixyeeb’al li k’a’ru yaal, naq li aseeyt re lix jalajik qach’ool ink’a’ naru chi to’nimank? Li musiq’ejil kawilal li nachal rik’in xpaab’ankil chi rajlal eb’ li taqlahom, ma naru xq’eeb’al re jalan chik kristiaan? Li na’leb’ tawb’il rik’in xtz’ilb’aleb’ rix ut xk’oxlankileb’ li loq’laj hu chi yalb’il qaq’e, ma naru xq’axb’al re jalan chik li naraj ru? Li tuqtuukilal naxk’am li evangelio rik’in jun aj Santil Paab’anel sa’ Roso’jikeb’ li Kutan li tiik xch’ool, ma naru xq’axb’al re jalan chik li yoo chixnumsinkil li rahilal malaj jun nimla ch’a’ajkilal? Ch’olch’o naq lix sumenkil chixjunileb’ li patz’om a’in, a’an naq ink’a’ naru.

"Jo’ ke’xye li tuq’ixq li wankeb’ xna’leb’, chiqajunqal tento "toxqaloq’ chaq li qe." Eb’ li ixq a’in ink’a’ yookeb’ chi aatinak chirix li loq’ok, yookeb’ b’an chixk’utb’al naq tento sa’ qab’een laa’o naq taakanaaq chi lochlo li qasaqen, ut naq tz’aqalaq qik’in li aseeyt re xjalajik li qach’ool. Natawman li loq’laj aseeyt a’in chi junjunq tz’uqul—"chi junjunqil li raqal ut chi junjunqil li na’leb’ " (2 Nefi 28:30), rik’in kuyuk ut rik’in k’anjelak" ("Convertidos al Señor," Liahona, noviembre 2012, 109).

Mexxiwak.

Li Awa’b’ej Thomas  S. Monson kixye:

"Us ta neke’ch’utla li choql, us ta nachal xkawil li hab’ sa’ qab’een, li qanawom chirix li evangelio ut li qarahom choq’ re li qaChoxahil Yuwa’ ut li qaKolonel te’xk’ojob’ qach’ool ut toohe’xwaklesi, ut te’xk’am chaq xsahil li qach’ool wi nokob’eek chi xaqxo ut naqapaab’eb’ li taqlahom. ...

"Ex was wiitz’in raarookex inb’aan, mexxiwak. Chisaho’q eech’ool. Saqen ru li k’a’ru chalel a’ yaal jo’ saqen ru lee paab’aal" ("Sed de buen ánimo," Liahona, mayo 2009, 92).

Xchaab’ilob’resinkil li qak’utum

K’e reetal naq taak’ut li yaalil tzol’leb’. "Junelik taapatz’ aawib’, "Chan ru naq li k’a’ru yookin chixk’utb’al tixtenq’aheb’ li komon sa’ lin tzoleb’aal chixnimob’resinkil lix paab’aal chirix li Kristo, chixjalb’aleb’ xk’a’uxl, chixb’aanunkil ut chixpaab’ankil li sumwank rik’in li Dios, ut chixk’ulb’al li Santil Musiq’ej?" (Li k’utuk jo’ li Kolonel, 20).