"17–23 junio. Mateo 27; Markos 15; Lukas 23; Lwan 19: "Xtz’aqlok ru" " Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2019 (2019)

"17–23 junio. Mateo 27; Markos 15; Lukas 23; Jwan 19," Kim, Taaqehin—Choq’ re li Dominkil Tzoleb’aal: 2019

Jalam-uuch

li Kristo chiru laj Pilato

Ecce Homo, xb’aan laj Antonio Ciseri

17–23 junio

Mateo 27; Markos 15; Lukas 23; Jwan 19

"Xtz’aqlok ru"

Tikib’ xkawresinkil aawib’ chi k’ utuk rik’in rilb’al ru rik’in tijok Mateo 27; Markos 15; Lukas 23; ut Jwan 19. Chijultiko’q aawe naq tatruuq chixch’olob’ankil xyaalal li Kolonel ut lix tojb’al rix li maak xb’aan a’an wi aak’ulub’ wank aawik’in li Musiq’ej.

Xtz’iib’ankil li nakak’oxla

Jalam-uuch

reetalil li wotzok

Xkanab’ankileb’ chi wotzok

Maare us raj xtz’iib’ankil chiru li pizarron junjunq aatin malaj yehom re taajultiko’q reheb’ li k’a’ru yeeb’il resil sa’eb’ li ch’ol re li xamaan a’in. Ye reheb’ li komon naq te’xtz’iib’a chiru li pizarron junjunq aatin chirix k’a’ru xe’reek’a naq xe’ril ru li esilal a’in. K’a’ut naq xe’reek’a chi jo’kan?

Jalam-uuch

reetalil li k’utuk

Xk’utb’al li tzol’leb’

Mateo 27; Markos 15; Lukas 23; Jwan 19

Li Jesukristo kiwan xch’ool chixk’ulb’al rahilal, ut a’in naxk’ut lix rahom choq’ re li Yuwa’b’ej ut choq’ qe chiqajunil.

Re xtenq’ankileb’ li wankeb’ sa’ laa tzoleb’aal chixtawb’al ru chan ru naq li resil lix kamik li Kolonel naxk’ut lix rahom, naru taab’aanu jun k’anjel jo’ a’in: K’e re li junjunq jun ch’ina aamej hu, ut ye reheb’ naq te’xtz’iib’a chiru li ch’ina hu jun aatin sa’ 1 Korintios 13:4–7 li naxk’ut xyaalalil li rahok. Chirix a’an, ye reheb’ naq te’sik’oq sa’ Mateo 27; Markos 15; Lukas 23; malaj sa’ Jwan 19, ut te’xtz’iib’a chirix xjunpak’alil li aamej hu junjunq raqal li neke’xye chan ru naq li Kolonel kixk’ut li rahok jo’ yeeb’il sa’ li aatin xe’xsik’ ru. Kanab’eb’ chixwotzb’al li k’a’ru xe’xtaw. Ma wan k’a’ru xe’xk’ul li komon li xtenq’aheb’ chixtawb’al ru lix rahom li Kolonel?

Jalam-uuch
jun koroon k’ix

Eb’ laj puub’ "ke’xtz’ul jun koroon k’ix ut ke’xk’e sa’ xjolom" (Markos 15:17).
K’a’ru naru taab’aanu re xk’eeb’aleb’ xch’ool li komon chixyeeb’al xnawomeb’ xch’ool chirix li k’a’ru xe’xtzol chiru li xamaan a’in? Naru taaye reheb’ li komon sa’ li tzoleb’aal naq te’xtaw jun li b’ich li na’aatinak chirix li k’a’ru xe’ril ru, malaj chirix li k’a’ru neke’reek’a chirix li rahilal kixk’ul li Kolonel, ut lix kamik chiru krus. Naru teeb’icha sa’ komonil jun malaj wiib’ oxib’ li b’ich a’in. Chan ru naq li tzolok chirix li Kolonel sa’ roso’jik lix yu’am naxk’e qach’ool chixkanab’ankil qib’ chiru ut chixtaaqenkil?
Eb’ li jalam-uuch neke’ru chixtenq’ankileb’ li komon chixk’oxlankil junjunq li esil xe’ril ru chiru li xamaan a’in (chi’ilmanq "Xkomon chik li k’anjeleb’aal" re xtawb’aleb’ li jalam-uuch li neke’ru chi k’anjelak). Maare naru taajach ru li tzoleb’aal sa’ kok’ ch’uut, ut taak’e jun li jalam-uuch re li junjunq ch’uut. Eb’ li ch’uut te’ruuq chirilb’al ru sa’ komonil eb’ li raqal li neke’xye resil li k’utb’il sa’ lix jalam-uuch. Te’ruuq chi aatinak chirix lix yaalalileb’ li raqal a’an, ut te’xye chan ru naq li jalam-uuch naxtenq’aheb’ chixtawb’aleb’ ru li raqal a’an. Li junjunq ch’uut taaruuq chixwotzb’al lix k’oxlahomeb’ rik’in li tzoleb’aal. Naru ajwi’ taak’uteb’ li video "Jesús es condenado ante Pilato" ut "Jesús es azotado y crucificado" (LDS.org).
Ink’a’ taaruuq naq tex’aatinaq sa’ komonil chirix chixjunil li kik’ulman sa’ roso’jik lix yu’am li Kolonel, a’ut a’an a’in jun k’anjel li taatenq’anq eere chi aatinak chirix li k’a’ru mas neke’raj xk’oxlankil li ani tzolb’ileb’ aab’aan. Ye re chixjunqaleb’ li komon naq te’xsik’ ru jun ch’ol li ilb’il ru sa’ li xamaan a’in, ut chiru junjunq k’asal te’ril ru re xsik’b’al junaq aatin, junaq yehom, malaj junaq esil li naxk’ut junaq chaab’ilal chirix li Kolonel ut lix k’anjel. Kanab’eb’ chixwotzb’al k’a’ru xe’xtaw, ut chixyeeb’al k’a’ut naq wan xwankil choq’ reheb’.

Mateo 27:14–60

Eb’ li najteril profeet ke’ril naq li Kolonel tixk’ul rahilal ut taakamq chiru krus.

Maare taanimanq xpaab’aaleb’ li ani tzolb’ileb’ aab’aan rik’in xnawb’al naq eb’ li najteril profeet ak ke’xye chaq xyaalal naab’al li k’a’ru tixk’ul li Kolonel rub’elaj xkamik. Jun na’leb’ re xtenq’ankileb’ li komon sa’ li tzoleb’aal chirilb’aleb’ li profeetil aatin a’in ut chirilb’al chan ru naq ke’tz’aqlok ru, a’an xk’eeb’al re li junjunq reheb’ jun malaj wiib’ oxib’ li raqal sa’ "Xkomon chik li k’anjeleb’aal" ut taaye reheb’ naq te’xtaweb’ li raqal sa’ Mateo 27 li neke’xk’ut chan ru naq ke’tz’aqlok ru li profeetil aatin. Naru taatz’iib’a chi tusb’il eb’ li profeetil aatin ut chan ru naq ke’tz’aqlok ru. Naru taaye reheb’ li komon naq te’xtz’iib’a resil li raqal wankeb’ wi’ li profeetil aatin sa’ xmaril li perel sa’ li Ak’ Chaq’rab’ li wan wi’ Mateo 27. K’a’ru naqatzol rik’ineb’ li profeetil aatin a’in? Chan ru naq eb’ li profeetil aatin a’in neke’xnimob’resi li qapaab’aal chirix li Jesukristo?

Mateo 27:27–49; Markos 15:16–32; Lukas 23:11, 35–39; Jwan 19:1–5

Li rahob’tesiik ink’a’ naru chixramb’al lix k’anjel li Dios.

Wan naq eb’ li komon sa’ laa tzoleb’aal maare xe’xk’ul li ch’a’ajkilal—maare xe’jite’ malaj xe’eetz’uuk—naq xe’xye xyaalal lix paab’aaleb’, malaj naq xe’xyal xq’e chixyu’aminkil lix paab’aal. Naru taatikib’ li seraq’ rik’in xpatz’b’al re junjunq li komon sa’ li tzoleb’aal naq te’xye resil naq xe’xk’ul chi jo’kan. K’a’ru xe’xb’aanu? Ye reheb’ li komon sa’ li tzoleb’aal naq te’ril ru junjunq li raqal a’in sa’ Mateo 27; Markos 15; Lukas 23; ut sa’ Jwan 19, li neke’xye resil li rahob’tesink kixk’ul li Kolonel. K’a’ruheb’ li ch’a’ajkilal li neke’ramok re lix k’anjel li Dios sa’ li kutan a’in? K’a’ru naru naqatzol rik’in lix b’aanuhom li Kolonel, li naru chiqatenq’ankil naq naqak’ul li rahob’tesiik sa’eb’ li kutan wanko wi’? Jalaneb’ chik li raqal sa’eb’ li loq’laj hu li toohe’xtenq’a naq naqak’ul li ch’a’ajkilal a’aneb’ Mateo 5:10; Romanos 12:14; 2 Timoteo 3:10–12; Alma 1:19–28; ut 3 Nefi 12:10–12. K’a’ru naqatzol sa’eb’ li raqal a’in?

Lukas 23:34–43

Li Kolonel naxyeechi’i qe li yo’onink ut li kuyuk maak.

Ma usaq choq’ reheb’ li komon sa’ laa tzoleb’aal rilb’al ru resil li Kolonel naq kixtz’aama chiru li Yuwa’b’ej naq tixkuyeb’ xmaak laj puub’, ut naq kixk’e xyo’onihom laj elq’ chiru li krus? Naru taajacheb’ ru li tzoleb’aal sa’ wiib’ ch’uut, ut taaye re li jun ch’uut naq te’ril ru Lukas 23:34–38, ut li jun ch’uut chik naq te’ril ru Lukas 23:39–43. Eb’ li komon sa’ li junjunq ch’uut naru te’aatinaq chirix k’a’ru xe’xtzol chirix li Kolonel sa’eb’ li raqal a’in, ut te’xwotz lix k’oxlahomeb’ rik’in chixjunil li tzoleb’aal. Chan ru naq naru taqab’aanu li kixb’aanu li Kolonel?
Re xtenq’ankil li ani sa’ laa tzoleb’aal li maare ch’a’aj chiru xkuyb’al xmaak li ras riitz’in jo’ kixb’aanu li Jesus, naru taak’ut li raatin li Elder Jeffrey R. Holland, li wan sa’ "Xkomon chik li k’anjeleb’aal."

Jalam-uuch

reetalil li tzolok

Xb’oqb’aleb’ chi tzolok sa’ kab’l

Re xk’eeb’aleb’ xch’ool li komon sa’ li tzoleb’aal re te’ril ru Mateo 28; Markos 16; Lukas 24; ut Jwan 20–21 chiru li xamaan jun chik, patz’ reheb’ k’a’ raj ru te’xye re junaq li tixye, "Tento tinwil re taaruuq tinpaab’." Ye reheb’ naq li k’a’ru taa’ilmanq ru sa’ li xamaan jun chik tixtenq’aheb’ chixsumenkil li patz’om a’in.

Jalam-uuch

reetalil li k’anjeleb’aal

Xkomon chik li k’anjeleb’aal

Mateo 27; Markos 15; Lukas 23; Jwan 19

Xjalam-uuch li rahob’tesiik, li rahilal kixk’ul, ut lix kamik li Jesus.

Pilato se lava las manos (LDS.org; Mateo 27:11–25)
Cristo con una corona de espinas (LDS.org; Mateo 27:26–31)
Jesús lleva su cruz (LDS.org; Jwan 19:13–18)
La Crucifixión (LDS.org ut Libro de obras de arte del Evangelio, 57; Lukas 23:33–46; Jwan 19:23–37)
La sepultura de Jesús (LDS.org ut Libro de obras de arte del Evangelio, 58; Jwan 19:38–42)

Eb’ li najteril profeetil aatin chirix lix raqb’a-aatin ut lix kamik li Jesukristo.

Li Kolonel kixk’ut rik’in xb’aanuhom li kuyuk maak.

Li Elder Jeffrey R. Holland kixk’ut:

"Jo’ chanru naq tento taqajal qak’a’uxl, tento taawanq qach’ool chixkanab’ankil li jun ch’ol chik chixb’aanunkil ajwi’ chi jo’kan—tento taqakuyeb’ li maak jo’ chanru naq kuyb’il qamaak laa’o. Chi jo’kan, yooko chi tz’aqonk sa’ lix tojb’al rix li maak xb’aan li Jesukristo. Relik chi yaal naq li hoonal q’axal nim xwankil chiru lix raqikil viernes a’an, naq li tzuul taq’a yoo chixpoqlenkil rib’ ut naq kipejq’i li tz’apleb’ t’ikr sa’ li santil ochoch, a’an xk’utunik li uxtaan q’axal nim naq li Kristo kixye, "At Inyuwa’, chakuyeb’ xmaak xb’aan naq ink’a’ neke’xnaw k’a’ru yookeb’ chixb’aanunkil."Jo’ aj b’aanuhom quuchil chiru li Yuwa’b’ej, a’an toj yoo chixtz’aamankil a’in sa’ li kutan a’in—choq’ aawe laa’at ut choq’ we laa’in.

"Arin, jo’ sa’ chixjunil li k’a’ru kixb’aanu, li Jesus kixk’ut chiqu li tento taqab’aanu laa’o. Ka’ch’in ru li yu’am a’in re taqak’e xna’aj li raaxiik’. ... Ink’a’ naqaj naq li Dios tixjultika li qamaak laa’o, ut wan k’a’ru tz’aqal ink’a’ us qik’in wi laa’o ink’a’ naqakanab’ xk’oxlankil xmaakeb’ li qas qiitz’in" ("Las Cosas Apacibles del Reino," Liahona, enero 1997, 94).

Xchaab’ilob’resinkil li qak’utum

Xtawb’al qakawilal rik’in li Kolonel. "Sa’ xyalb’al aaq’e chi wank ut chi k’utuk jo’ li Kolonel, wan naq tatpalto’q. Mika’ch’ino’ aach’ool; kanab’ b’an naq laa maak ut lix q’unil aametz’ew tatxsutq’isi rik’in laa Choxahil Yuwa’ ut li Kolonel" (Li k’utuk jo’ li Kolonel, 14).