li wa’ak sa’ roso’jik

Ak q’ojyin chik, xb’aan laj Benjamin McPherson

10–16 junio

Mateo 26; Markos 14; Lukas 22; Jwan 18

"Moko jo’ ta li nawaj laa’in, jo’aq b’an li nakawaj laa’at"

Il ru Mateo 26; Markos 14; Lukas 22; ut Jwan 18, ut k’oxlaheb’ li na’leb’ ut li eek’ahom li neke’chal sa’ laa k’a’uxl. K’a’ru li esilal neke’raj ru xtzolb’al li komon sa’ laa tzoleb’aal?

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li komon sa’ li tzoleb’aal chixwotzb’al li k’a’ru xe’xtzol chiru li xamaan a’in li xtenq’aheb’ chixtawb’al chik xyaalalil li loq’laj wa’ak. K’a’ru xe’xb’aanu, ut chan ru naq a’in xtenq’aheb’ sa’ xk’ulb’al li loq’laj wa’ak?

reetalil li k’utuk

Xk’utb’al li tzol’leb’

Mateo 26:26–29; Lukas 22:19–20

Sa’ li loq’laj wa’ak naru naq junelik taajultiko’q qe li Kolonel.

• K’a’ut naq li Kolonel kixtikib’ li loq’laj wa’ak? K’a’ut naq naqak’ul li loq’laj wa’ak rajlal xamaan? K’a’ruheb’ li sumenk naru neke’xtaw li komon sa’ Mateo 26:26–29; Lukas 22:7–20; Tzol’leb’ ut Sumwank 20:75–79; ut sa’ Leales a la fe,176–178? Jo’ jun eetalil, sa’ Leales a la fe, k’utb’il naq li loq’laj wa’ak a’an reetalil lix mayej li Kristo, li kixtz’aqob’resi ru lix chaq’rab’ laj Moises. Naru ajwi’ teeye sa’ komonil eb’ li tij re li loq’laj wa’ak, ut taaye reheb’ li komon sa’ li tzoleb’aal naq te’xk’e reetal k’a’ruheb’ li sumwank noko’ok wi’ sa’ li k’ojob’anb’il k’anjel a’in. Chan ru nokoru chixtenq’ankil junaq chik komon chixtawb’al ru k’a’ruheb’ li teneb’ank a’in? Chan ru naq li tz’aqonk sa’ li loq’laj wa’ak tento raj naq tixb’eresi k’a’ru naqasik’ ru xb’aanunkil chiru li xamaan?

  jun saaj ixq naxk’ul li loq’laj wa’ak

  Naq naqak’ul li loq’laj wa’ak, naqa’ak’ob’resi li qasumwank.

• Naru naq te’tenq’aaq li komon sa’ li tzoleb’aal naq te’rab’i lix na’leb’eb’ chirib’ileb’ rib’ chirix chan ru xjultikankil li Kolonel naq yoo chi uxmank li loq’laj wa’ak, ut chiru li xamaan (chi’ilmanq Tz. ut S. 6:36–37). Maare naru taab’oqeb’ chixwotzb’al k’a’ru naxtenq’aheb’ a’an ut lix junkab’aleb’ chixjultikankil li Kolonel ut chixpaab’ankileb’ lix sumwank. K’a’ruheb’ li raqal sa’eb’ li raqal eetanb’il choq’ re li xamaan a’in li naxnimob’resi li qoxloq’ihom chirix li loq’laj wa’ak? Re xtawb’al chik li na’leb’ chirix chan ru xjultikankil li Kolonel, chi’ilmanq Gerrit W. Gong, "Junelik xjultikankil A’an," Jolomil Ch’utub’aj-ib’ re abril 2016.

• Sa’ li seraq’ a’in, us raj xtz’ilb’al rix rik’ineb’ li komon sa’ li tzoleb’aal k’a’ruheb’ li eetalil sa’ li loq’laj wa’ak. Chan ru naq eb’ li eetalil a’in nokohe’xtenq’a chixk’oxlankil li Kolonel naq yoo chi uxmank li k’ojob’anb’il k’anjel? K’a’ru neke’xk’ut chiqu eb’ li eetalil a’in chirix a’an ut chirix li qakomonil rik’in a’an?

• Sa’ xraqik lee seraq’ chirix li loq’laj wa’ak, naru nakakanab’eb’ li komon sa’ li tzoleb’aal chiru jun k’asal naq te’xk’oxla ut te’xtz’iib’a k’a’ru eek’asinb’ileb’ chixb’aanunkil re xkawresinkil rib’ choq’ re li loq’laj wa’ak sa’ li xamaan jun chik. Re taa’eek’amanq li Musiq’ej naq yoo chi uxmank a’in, maare taawaj xk’eeb’al chi yab’asiik jun b’ich re li loq’laj wa’ak naq yookeb’ chi k’oxlak.

Mateo 26:36–46

Noko’ok chanchan li Kristo naq naqaq’axtesi li rajom qach’ool chiru rajom xch’ool li Yuwa’b’ej.

• Xk’oxlankil chan ru naq li Kolonel kixq’axtesi li rajom xch’ool chiru li rajom xch’ool li Yuwa’b’ej naru chixtenq’ankileb’ li komon sa’ laa tzoleb’aal naq na’ajman ru naq te’xb’aanu ajwi’ chi jo’kan. Re xtikib’ankil jun seraq’, naru taapatz’ re li junjunq komon naq tixye resil jun sut naq xq’axtesi rib’ re xb’aanunkil li k’a’ru xraj li Dios naq tixb’aanu. K’a’ru x’eek’asink reheb’ chixb’aanunkil chi jo’kan? Ye reheb’ li wankeb’ sa’ li tzoleb’aal naq te’ril ru Mateo 26:36–42 ut te’xk’oxla k’a’ut naq li Kolonel kiwan xch’ool chixq’axtesinkil li rajom xch’ool chiru li rajom xch’ool lix Yuwa’. Chan ru naq xq’axtesinkil li rajom qach’ool chiru li Yuwa’b’ej nokorosob’tesi moqon?

• Re xtz’ilb’al rix li na’leb’ re xq’axtesinqil qib’ chiru li Dios, naru taaye re xyijach li tzoleb’aal naq te’ril ru Mosiah 3:19, ut lix yijach chik naq te’ril ru 3 Nefi 9:20. K’a’ru neke’xk’ut li raqal a’in chirix k’a’ru xyaalalil xq’axtesinkil qib’ chiru li Dios? Chan ru naq naqaq’axtesi qib’? Eb’ li komon sa’ li tzoleb’aal naru te’xk’oxla chan ru naru te’xq’axtesi li rajomeb’ xch’ool chiru li Dios sa’ li xamaan taachalq. Li raatin li Elder Neal A. Maxwell sa’ "Xkomon chik li k’anjeleb’aal" naru texxtenq’a sa’ lee seraq’.

Mateo 26:20–22, 31–35

Tento taqatz’il rix li qayu’am re xk’eeb’al reetal chan ru naq li aatin yeeb’il xb’aan li Qaawa’ nak’anjelak choq’ qe.

• Naqab’i k’iila k’utum chirix li evangelio sa’ li qayu’am, a’ut wan naq noko’aaleek chixk’oxlankil naq wankeb’ li k’utum a’an choq’ re jalan chik. Wi noko’aatinak chirix Mateo 26, naru tooxtenq’a chixq’axb’al ru li aaleek a’in. Re xtikib’ankil li seraq’ a’in, naru taajacheb’ ru li tzoleb’aal chi ka’kab’, ut taaye re li jun sa’ li junjunq sumal naq taaril ru Mateo 26:20–22, ut li jun chik naq taaril ru eb’ li raqal 31–35. Ye reheb’ naq te’xye chan ru naq jalan wi’ li raatineb’ li tzolom sa’eb’ li raqal a’in. K’a’ru naru naqatzol chirix chan ru naq eb’ li tzolom xe’xjuntaq’eeta li raatin li Qaawa’ rik’ineb’ a’an? Re xtawb’al chik li na’leb’, chi’ilmanq lix yehom li Awa’b’ej Dieter F. Uchtdorf chirix Mateo 26:21–22 sa’ lix yehom "Qaawa’, ma laa’inin?" (Jolomil Ch’utub’aj-ib’ re octubre 2014).

Mateo 26:36–46

Li Jesukristo kixtoj rix li maak chi junajwa choq’ qe.

• Naru taapatz’ reheb’ li komon sa’ li tzoleb’aal naq te’xwotz li na’leb’ xe’xtaw chirix lix tojb’al rix li maak xb’aan li Jesukristo sa’ li tzolok xe’xb’aanu xjunes malaj sa’ junkab’al.

• Sa’ Mateo 26 naxye resil k’a’ru kik’ulman sa’ Getsemani, a’b’anan ma neke’xtaw ru li komon sa’ laa tzoleb’aal k’a’ru xk’anjel a’an sa’ xyu’ameb’? Re xtenq’ankileb’, naru taatz’iib’a chiru li pizarron eb’ li patz’om, jo’ K’a’ru kik’ulman sa’ Getsemani? ut K’a’ut naq wan xwankil choq’ we? Eb’ li komon sa’ li tzoleb’aal te’ruuq chi k’anjelak xjuneseb’ malaj sa’eb’ li kok’ ch’uut re xtawb’al xsumenkil sa’ Mateo 26:36–46; sa’ Alma 7:11–13; ut sa’ Tzol’leb’ ut Sumwank 19:16–19. Te’ruuq ajwi’ chixtawb’al xsumenkil sa’ li raatin li Elder C. Scott Grow, "El milagro de la expiación," (Liahona, mayo 2011, 108–110).

• Sa’ lix Hu laj Mormon, laj Jakob kixye naq lix tojb’al rix li maak xb’aan li Jesukristo "wan choq’ xtojb’al rix li maak li maak’a’ roso’jik" (2 Nefi 9:7). Re xtenq’ankileb’ li komon chixtawb’al ru k’a’ru xyaalalil a’in, naru taawotz lix k’utum li Awa’b’ej Russell M. Nelson sa’ "Xkomon chik li k’anjeleb’aal," ut taaye reheb’ li komon naq te’xtz’iib’a chi tustu chan ru naq naru nayeeman naq maak’a’ roso’jik lix wankil lix tojb’al rix li maak xb’aan li Kolonel. Te’ruuq ajwi’ chirilb’aleb’ ru li raqal a’in sa’eb’ li loq’laj hu naq yookeb’ chixtusb’al li aatin: Hebreos 10:10; Alma 34:10–14; Tzol’leb’ ut Sumwank 76:24; ut Moises 1:33. Chan ru naru naqak’ut qab’antioxihom chirix li k’a’ru kixb’aanu li Kolonel choq’ qe?

reetalil li tzolok

Xb’oqb’aleb’ chi tzolok sa’ kab’l

Re xk’eeb’aleb’ xch’ool li komon chirilb’al ru li hu, naru taapatz’ reheb’ ma neke’xnaw li wuqub’ chi aatin kixye li Jesus naq kiwan chiru li krus. Ye reheb’ naq te’xtaw k’a’ru kixye li Kolonel naq neke’ril ru Mateo 27; Markos 15; Lukas 23; ut Jwan 19.

reetalil li k’anjeleb’aal

Xkomon chik li k’anjeleb’aal

Mateo 26; Markos 14; Lukas 22; Jwan 18

Eb’ li video chirix li Santil Hu (LDS.org).

"La Última Cena," "El Salvador sufre en Getsemaní"

Xq’axtesinkil li rajom qach’ool chiru li Yuwa’b’ej.

Li Elder Neal A. Maxwell kixk’ut: "Naq nekeq’axtesi li rajom eech’ool chiru li Dios, yookex chixk’eeb’al re li jun chi eechej li nekexru chixk’eeb’al re, li eere laa’ex re xk’eeb’al. Meeb’ay eerib’ chixtawb’al li artal, malaj chixk’eeb’al li maatan re li rajom eech’ool sa’ xb’een!" ("Recordemos cuán misericordioso ha sido el Señor," Liahona, mayo 2004, 46).

Lix tojb’al rix li maak li maak’a’ roso’jik.

Li Awa’b’ej Russell M. Nelson kixk’ut:

"Lix tojb’al rix li maak xb’aan li Jesukristo wan chi maak’a’ roso’jik. Kiwan ajwi’ chi maak’a’ roso’jik rik’in naq chixjunileb’ li winq te’kole’q chiru jun li kamk li ink’a’ raj taa’oso’q. Maak’a’ roso’jik sa’ xk’ab’a’ lix nimal li rahilal kixnumsi. Maak’a’ roso’jik sa’ li kutan kiwan wi’, rik’in naq kik’ehe’ xraqik li mayej re xul, li kiwan choq’ reetalil a’an. Maak’a’ roso’jik sa’ xnimal ru—kib’aanuman jun sut choq’ re chixjunileb’. Ut li ruxtaan lix tojb’al rix li maak wan choq’ re xk’ihaleb’ li winq li maak’a’eb’ roso’jik, jo’ ajwi’ xk’ihaleb’ li ruchich’och’ li yiib’anb’ileb’ xb’aan a’an. Maak’a’ roso’jik rik’in naq ink’a’ naru chi b’ismank xb’aaneb’ li winq, chi moko naru chi tawmank ru.

"Ka’ajwi’ li Jesus kiru chixmayejankil lix tojb’al rix li maak jo’ a’in, rik’in naq kiyo’la rik’in jun li ixq li naru chi kamk, ut jun Yuwa’b’ej li maak’a’ li kamk sa’ xb’een. Xb’aan naq kiyo’la chi jo’kan, li Jesus a’an jun li aamej li maak’a’ roso’jik" ("La Expiación," Liahona, enero 1997, 38–39).

Li Awa’b’ej Heber J. Grant kixk’ut: "Li Jesus ink’a’ ka’ajwi’ kichal jo’ jun maatan li maak’a’ roso’jik, kichal jo’ jun mayej. ... Choq’ qe chiqajunqal kikam sa’ Kalvario, ut lix kik’el tooxkol wi qak’ulub’. Ink’a’ tooxkol jo’ tenamit, jo’ ch’och’, malaj jo’ komonil, tooxkol chiqajunqal" ("A Marvelous Growth," Juvenile Instructor, diciembre 1929, 697).

Xchaab’ilob’resinkil li qak’utum

Tat-iloq rik’in xnaq’ ru li Dios. K’e aach’ool chirilb’aleb’ li komon sa’ laa tzoleb’aal jo’ chanru naq ilb’ileb’ xb’aan li Dios, ut li Musiq’ej tixk’ut chawu lix choxahil loq’aleb’ ut li k’a’ru te’ruuq chixb’aanunkil. Naq nakab’aanu chi jo’kan, k’amb’ilaq aab’e naq nakayal aaq’e chixtenq’ankileb’ (chi’ilmanq Li k’utuk jo’ li Kolonel, 6).