"3–9 junio. Jwan 13–17: "Kanaaqex sa’ lin rahom" " Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2019 (2019)
"3–9 junio. Jwan 13–17," Kim, Taaqehin—Choq’ re li Dominkil Tzoleb’aal: 2019
Re xnimankil injultikankil, xb’aan laj Walter Rane
3–9 junio
Jwan 13–17
"Kanaaqex sa’ lin rahom"
Naq yookat chixtzolb’al rik’in tijok Jwan 13–17, k’oxla chan ru naq tatruuq chixk’utb’al aarahom choq’ reheb’ li ani tzolb’ileb’ aab’aan. Li Santil Musiq’ej tixk’am chaq li na’leb’ sa’ laa k’a’uxl naq nakattzolok sa’eb’ li loq’laj hu, sa’ Kim, Taaqehin—Choq’ reheb’ li komon ut li junkab’al, ut sa’ li tusleb’ aatin a’in.
Xtz’iib’ankil li nakak’oxla
Xkanab’ankileb’ chi wotzok
Tz’iib’aheb’ li ajl 13 toj 17 chiru li pizarron, a’aneb’ li ch’ol sa’ Jwan li xe’ril ru li komon sa’ li tzoleb’aal chiru li xamaan a’in. Kanab’eb’ junjunq komon sa’ li tzoleb’aal chixtz’iib’ankil, chixk’atq li junjunq rajlil li ch’ol, li rajlil junaq raqal li xwulak chiruheb’ ut li te’raj aatinak wi’ sa’ komonil.
Xk’utb’al li tzol’leb’
Li Kolonel rik’in xb’aanuhom kixk’ut chiqu chan ru k’anjelak chiru li qas qiitz’in rik’in tuulanil.
-
Re xtenq’ankileb’ li komon sa’ laa tzoleb’aal chixk’oxlankil yaalalil k’a’ut naq li Jesus kixch’ajeb’ roq lix tzolom, naru taapatz’ re jun komon chi rub’elaj naq tixb’aanu ruuchil laj Pedro sa’ li esil a’in, ut li jun ch’ol chik reheb’ li komon te’xpatz’ li patz’om re. Ye reheb’ li komon sa’ li tzoleb’aal naq te’xtz’il rix Jwan 13:1–17, ut te’xk’oxlaheb’ li patz’om li te’ruuq chixpatz’b’al re laj Pedro. K’a’ru naqatzol rik’in li esilal a’in li taaruuq taajaloq re chan ru naq nokok’anjelak chiruheb’ li qas qiitz’in?
Li rahok a’an jun eetalil li nawb’ileb’ wi’ ru lix tzolom li Jesukristo.
-
K’a’ru taatenq’anq reheb’ li komon sa’ li tzoleb’aal re naq mas wi’chik te’wanq choq’ aj rahonel? Maare naru taapatz’ reheb’ chan ru neke’xnaw naq anihaq li neke’xnaw ru a’an aj taaqenel re li Kristo. K’a’ru neke’xk’e reetal chirix li kristiaan a’an? Taaruuq taaye reheb’ naq te’xtz’il rix Jwan 13:34–35 re xtzolb’al chan ru naq te’nawe’q ru lix tz’aqal tzolom li Kolonel. K’a’ru naru taqab’aanu laa’o re naq li rahok a’anaq tz’aqal reetalil li qawanjik jo’ tzolom? Chan ru naq li na’leb’ a’in naxjal chan ru naq nokowan rik’ineb’ li qas qiitz’in, ut jo’kan ajwi’ naq wanko sa’ li internet?
-
Sa’ li tzoleb’aal, maak’a’jo’ li xetzol chirix lix yu’am li Kolonel chiru li chihab’ a’in, ut xeril k’iila sut naq kixk’ut lix rahom choq’ reheb’ li jun ch’ol chik. Jun na’leb’ re xtenq’ankileb’ li komon sa’ li tzoleb’aal chixk’oxankil li taqlahom sa’ Jwan 13:34 a’an xtz’iib’ankil Jo’ naq xexinra laa’in chiru li pizarron, ut taaye reheb’ li komon naq te’xye k’a’ruheb’ li esil sa’ li Ak’ Chaq’rab’ li neke’xk’ut lix rahom li Jesus. Chirix a’an naru taatz’iib’a Chera eerib’ cherib’il eerib’ chiru li pizarron, ut taaye reheb’ li komon sa’ li tzoleb’aal naq te’xye chan ru naq laa’o nokoru chi rahok jo’ kirahok a’an. Jo’ jun raqal li k’anjel a’in, naru teeb’icha malaj teerab’i li b’ich "Li rahok cherib’il eerib’," Eb’ li B’ich, ajl 201, malaj teeril jun reheb’ li video sa’ "Xkomon chik li k’anjeleb’aal."
-
Wi ink’a’ yooko chireek’ankil li rahok choq’ reheb’ li qas qiitz’in, k’a’ru naru taqab’aanu re xsik’b’al li maatan re li rahok? Chan ru naq li na’leb’ sa’ Moroni 7:48; 8:26 nokoxtenq’a chixtawb’al ru li maatan a’in? Ani naqanaw ru li naraj ru reek’ankil naq raab’il qab’aan?
Li rahok a’an jun reetalileb’ lix tzolom li Kristo.
Li Santil Musiq’ej nokoxtenq’a chixtz’aqob’resinkil ru li qak’anjel jo’ xtzolom li Jesukristo.
-
Re xtenq’ankileb’ li komon chi tzolok chirixeb’ li jalan jalanq k’anjel re li Santil Musiq’ej, naru taajacheb’ ru sa’ kok’ ch’uut, ut taak’e re li junjunq ch’uut jun reheb’ li raqal a’in: Jwan 14:16–27; 15:26; ut 16:7–15. Kanab’ li junjunq ch’uut chixtz’iib’ankil chiru li pizarron k’a’ru xe’xtzol chirix li Santil Musiq’ej sa’eb’ li raqal a’in. Eb’ li komon sa’ li tzoleb’aal te’ruuq chixyeeb’al xkomoneb’ chik li na’leb’ neke’xtaw naq neke’rileb’ ru li raqal sa’eb’ li loq’laj hu li tz’iib’anb’ileb’ sa’ "Xkomon chik li k’anjeleb’aal." Jo’q’e xqeek’a lix wankil li Santil Musiq’ej? K’a’ru li eechej malaj li k’anjeleb’aal li tatruuq chixk’amb’al chaq sa’ li tzoleb’aal li tixtenq’aheb’ li komon chixtawb’al ru lix k’anjel li Santil Musiq’ej?
-
Naru taapatz’ re junjunq komon sa’ li tzoleb’aal naq te’xtzol chi junxilaj junaq reheb’ li yehom sa’ li jolomil ch’utub’aj-ib’ li tz’iib’anb’il sa’ "Xkomon chik li k’anjeleb’aal" (malaj jalaneb’ chik yehom li neke’xnaw) chirix li Santil Musiq’ej. Kanab’eb’ chixwotzb’al rik’in li tzoleb’aal chiru junpaat li k’a’ru xe’xtzol. Chan ru naq eb’ li yehom a’in neke’xk’e chik li na’leb’ chirix li k’a’ru xqatzol chirix li Santil Musiq’ej sa’ Jwan 14–16?
Naq nokokana rik’in li Kolonel, too’uuchinq ut taawanq xsahil qach’ool.
-
K’a’ru xe’xtzol li komon sa’ li tzoleb’aal chiru li xamaan a’in rik’in lix jaljookil ru aatin li Kolonel chirix li toon li che’ ut eb’ li ruq’? Naru taak’am chaq jun ch’ina toon che’ sa’ li tzoleb’aal, ut taawoksi re xtenq’ankileb’ li komon chixtawb’al ru lix jaljookil ru aatin li Kolonel. Chirix rilb’al ru Jwan 15:1–12 sa’ komonil, naru tex’aatinaq chirix k’a’ru xyaalalil "kanaak rik’in li Kristo" (Jwan 15:4). Naru taab’oq junjunq li komon sa’ li tzoleb’aal chixwotzb’al chan ru naq xe’xtaw naq yaal li aatin sa’ Jwan 15:5. (Chi’ilmanq ajwi’ li raatin li Elder Jeffrey R. Holland sa’ "Xkomon chik li k’anjeleb’aal.") Li video "La voluntad de Dios" (LDS.org naru ajwi’ chetenq’ankil sa’ li seraq’ a’in.
Li qaChoxahil Yuwa’ ut li Jesukristo wankeb’ tz’aqal sa’ junajil, ut te’raj naq laa’o ajwi’ toowanq sa’ junajil.
-
Maare ink’a’ tatruuq chixk’utb’al chixjunileb’ li xninqal ru yaalil na’leb’ li neke’tawman sa’ Jwan 17 sa’ jun tzoleb’aal, a’ut a’in jun na’leb’ re xtenq’ankileb’ li komon chixtz’ilb’al rix junjunq reheb’. Tz’iib’a chiru li pizarron junjunq na’leb’ isinb’il chaq sa’ Jwan 17, jo’eb’ li we’:
-
Li qakomonil rik’in li Jesukristo.
-
Lix komonil li Jesukristo rik’in lix Yuwa’.
-
Li qakomonil rik’in chixjunil li ruchich’och’.
-
Li qakomonil chiqib’il qib’ jo’ lix tzolom a’an.
B’oqeb’ chixjunqaleb’ li komon sa’ li tzoleb’aal re te’xsik’ ru jun reheb’ li na’leb’ a’in, ut sa’ rilb’al ru Jwan 17, te’xsik’eb’ li raqal li neke’aatinak chirix a’an. Patz’ re junjunq komon sa’ li tzoleb’aal naq te’xwotz li k’a’ru xe’xtzol.
-
Xb’oqb’aleb’ chi tzolok sa’ kab’l.
Re xk’eeb’aleb’ xch’ool li komon sa’ li tzoleb’aal re te’ril ru Mateo 26; Markos 14; Lukas 22; ut Jwan 18 chiru li xamaan taachalq, naru taaye reheb’ naq sa’eb’ li ch’ol a’in te’ril jun reheb’ hoonal q’axal nim xwankil sa’ lix nimla k’uub’anb’il na’leb’ li Dios re li kolb’a-ib’.
Xkomon chik li k’anjeleb’aal
Eb’ li video sa’ LDS.org chirix li rahok.
-
“Amad a otros”
-
"Families Sacrifice, Give, and Love"
-
"Preparación de Thomas S. Monson: Aprendió sobre la compasión desde muy joven"
Li Santil Musiq’ej.
-
Hechos 2:37–38; Galatas 5:22–23; 1 Nefi 10:17–19; 2 Nefi 32:3–5; Mosiah 3:19; 3 Nefi 27:20; Moroni 8:26; 10:4–5; Tzol’leb’ ut Sumwank 8:2–3; 42:17
-
Robert D. Hales, "Li Santil Musiq’ej," Jolomil Ch’utub’aj-ib’ re abril 2016
-
Henry B. Eyring, "Li Santil Musiq’ej choq’ eerochb’een," Jolomil Ch’utub’aj-ib’ re octubre 2015
-
David A. Bednar, “Recibe el Espíritu Santo,” Liahona, noviembre 2010, 94–97
Kanaak rik’in li Kristo.
Re xk’utb’al naq li aatin kanaak naraj naxye naq ink’a’ naqakanab’ ut naq k’eek’ooq qach’ool, li Elder Jeffrey R. Holland kixye:
"Lix yaalalil li aatin a’in, a’an "tatkanaaq, a’ut tatkanaaq chi junelik." A’an li b’oqok naxk’e li evangelio. ... Kimqex, a’ut kimqex re texkanaaq. Kimqex rik’in paab’aal, ut rik’in xnajtil eekuyum. ...
"Li Jesus kixye, "Wi jachjookex wik’in maak’a’ naru teeb’aanu" [Jwan 15:5]. Ninch’olob’ xyaalal naq tz’aqal yaal a’in. Li Kristo a’an chixjunil choq’ qe, ut tento "tookanaaq" rik’in a’an chi junajwa, chi xaqxooko, chi ink’a’ noko’eek’an, chi junelik q’e kutan. Re naq li ruuchinihom li evangelio taa’atz’umaq ut taarosob’tesi li qayu’am, tento toowanq chi chapcho chi kaw chiru a’an, laj Kolol qe chiqajunil, ut chiru lix Iglees, li nak’amok re lix santil k’ab’a’. A’an li toon che’ li nachal wi’ chaq li qametz’ew, ut ka’ajwi’ rik’in a’an naqak’ul li junelik yu’am. Rik’in a’an, ink’a’ ka’ajwi’ tookanaaq, jo’kan ajwi’ toonumtaaq ut tooq’axoq-u sa’ li santil k’anjel a’in li maajo’q’e taasachq chiqu" ("Permaneced en mí," Liahona, mayo 2004, 32).
Xchaab’ilob’resinkil li qak’utum
Xb’oqb’al li Musiq’ej. "Maajun aj k’utunel re li ruchich’och’, maak’a’ naxye chanru xseeb’al malaj xnajtil chi k’utuk, naru tixk’ul xna’aj li Musiq’ej. A’b’an naru toowanq jo’ k’anjeleb’aal sa’ ruq’ li Dios re xtenq’ankileb’ li ralal xk’ajol chi tzolok rik’in li Musiq’ej. Re xb’aanunkil a’in, naqab’oq lix wankil li Musiq’ej sa’ li qayu’am ut naqawaklesi xch’ooleb’ li ani tzolb’ileb’ qab’aan chixb’aanunkil ajwi’ a’an. ... Li loq’laj b’ich, eb’ li loq’laj hu, li raatineb’ li profeet sa’ roso’jikeb’ li kutan, xyeeb’al resil aarahom ut lix nawom aach’ool, ut xhoonalil li k’oxlak sa’ ch’anch’ookilal naru te’xb’oq lix wanjik li Musiq’ej" (Li k’utuk jo’ li Kolonel, 10).