Hulyo 15–21

Mga Buhat 10–15

“Ang Pulong sa Dios Mitubo ug Misanay”

Ang mainampuong pagtuon sa Mga Buhat 10–15 sa dili pa magbasa niining outline makatabang kanimo aron makadawat og mga impresyon gikan sa Ginoo. Ang mga ideya sa ubos mga sugyot lamang.

Irekord ang Imong mga Impresyon

Dapita ang Pagpaambit

Dapita ang mga sakop sa klase sa pagpaambit og usa ka misyonaryo nga kasinatian, uban sa usa ka tawo nga naglingkod sa duol, gikan sa Mga Buhat 10–15 nga nakapadayeg kanila. Dapita ang pipila nga mopaambit sa ilang mga ideya ngadto sa tibuok klase.

Itudlo ang Doktrina

Mga Buhat 10; 11:1–18; 15:1–25

Ang Langitnong Amahan nagtudlo kanato og pagtulun-an ngadto sa lain nga pagtulun-an pinaagi sa pagpadayag.

• Ang ubang mga sakop sa klase mahimong dunay sayop nga mga ideya mahitungod sa proseso sa pagdawat og pagpadayag. Mahimong makatabang kanila ang paghisgot kon sa unsang paagi miabut ngadto kang Pedro ang pagpadayag ug unsaon nila sa pagpadayon, “sa walay pag-ukon-ukon” (Mga Buhat 10:20), sa dihang ang pagpadayag daw dili kompleto o dili klaro. Ikonsiderar ang pagdrowing og usa ka linya diha sa pisara ug sa pagsulat sa tumoy sa usa ka linya og Ang ebanghelyo isangyaw ngadto sa mga Hentil. Isip usa ka klase, ribyuha ang Mga Buhat 10 ug 11:1–18, ug dayon dugangi og mga punto diha sa linya nga nagpakita kon giunsa sa Ginoo pagpadayag ngadto kang Pedro sa hinay-hinay nga ang panahon miabut na nga isangyaw ang ebanghelyo ngadto sa mga Hentil. Pananglitan, mahimo kang magsugod sa usa ka punto nga gibutangan og label nga “Si Cornelio nakakita og panan-awon” (Mga Buhat 10:1–6) o magsugod gani sa sugo sa Manluluwas ngadto sa Iyang mga disipulo sa “pagtudlo sa tanang kanasuran” diha sa Mateo 28:19. Unsay atong makat-unan mahitungod sa pagpadayag gikan sa kasinatian ni Pedro? Unsay madugang sa mga pagtulun-an ni Nephi mahitungod sa pagpadayag diha sa 2 Nephi 28:30 ug sa mga pagtulun-an gikan nila ni Elder David A. Bednar ug Elder Dallin H. Oaks sa “Dugang nga mga Kapanguhaan” ngadto sa panaghisgutan?

• Sa unsa kaha nga paagi nga makatabang ka sa mga sakop sa klase sa paghunahuna og maayo mahitungod kon unsaon nila pagdawat og pagpadayag? Mahimo nimong tun-an ang mga higayon diha sa mga kasulatan diin gitudloan sa Ginoo ang mga tawo og pagtulun-an human sa usa ka pagtulun-an. Agig dugang sa kasinatian ni Pedro diha sa Mga Buhat 10, ang mga sakop sa klase mahimong moribyu sa mga kasinatian nila ni Nephi (1 Nephi 18:1–3); Alma (Alma 7:8; 16:20); ug Mormon (3 Nephi 28:17, 36–40). Unsa ang laing mga ehemplo nga mahunahunaan sa mga sakop sa klase diin ang mga tawo nakadawat og espiritwal nga giya “diyutay dinhi ug diyutay didto”? (2 Nephi 28:30). Ngano kaha nga usahay ang Ginoo mopili sa pagpadayag sa mga butang niining paagiha imbis nga mohatag kanato og mga tubag nga ang tanan sa usa ra ka higayon? (tan-awa sa DP 50:40; 98:12). Usa ka analohiya sama niini mahimong makatabang: Pananglitan dunay usa ka tawo nga misugyot nga mokuha kamo og klase sa calculus sa wala pa kamo makakat-on og algebra o geometry. Unsaon ninyo sa pagtubag? Sa unsang paagi kini dunay kalabutan sa sumbanan sa Ginoo sa pagpadayag og kamatuoran?

• Usahay ang mga miyembro dunay mga pangutana o mga kabalaka mahitungod sa mga kausaban sa mga polisiya ug mga programa sa Simbahan. Mahimong makatabang kanila ang paghisgot kon sa unsang paagi nga ang pagpadayag nga sugdan ang pagsangyaw sa ebanghelyo ngadto sa mga Hentil (tan-awa sa Mga Buhat 10) mipuli sa nag-unang mga instruksyon sa Ginoo ngadto sa Iyang mga disipulo (tan-awa sa Mateo 10:1, 5–6). Unsaon kaha sa mga sakop sa klase pagtubag ang usa ka tawo sa panahon ni Pedro nga misupak sa mando ni Pedro tungod kay misukwahi kini sa nag-unang mga gipangbuhat? Sa unsang paagi nga ang pagpadayag diha sa Mga Buhat 10 makatabang kanato sa pagpatalinghug sa padayon nga pagpadayag sa Ginoo pinaagi sa Iyang propeta?

• Mahimong makapainteresado ang pagribyu sa pagtinambagay nga nahitabo tali sa mga Apostoles, sigun sa gihulagway diha sa Mga Buhat 15:1–22, ug sa sulat nga ilang gihimo ngadto sa mga Santos (tan-awa sa mga bersikulo 23–29). Unsa nga mga pangutana nga aduna ang mga disipulo? Giunsa nila sa pagtinguha og tubag? Ang pamahayag ni Presidente Gordon B. Hinckley sa “Dugang nga mga Kapanguhaan” mahimong makahatag og dugang nga pagpasabut kon giunsa pagpangulo sa Ginoo ang Iyang Simbahan pinaagi sa pagpadayag ngadto sa mga apostoles ug mga propeta.

Mga Buhat 10:9–48

“Ang Dios wala diay pinalabi sa mga tawo.”

• Ang mga sakop sa imong klase makabenepisyo ba gikan sa panaghisgutan kon unsay kahulugan sa “walay pinalabi sa mga tawo”? Mahimong sugdan nimo pinaagi sa pagdapit sa klase sa pagbasa sa mga kasulatan nga nagtudlo nga ang Dios walay pinalabi sa mga tawo, sama sa Mga Taga-Roma 2:1–11; 1 Nephi 17:34–40; 2 Nephi 26:32–33; Alma 5:33; Moroni 8:12; ug Doktrina ug mga Pakigsaad 1:34–35. Hangyoa ang mga sakop sa klase sa pagsulat og posible nga mga kahulugan sa “walay pinalabi sa mga tawo,” base sa unsay ilang nabasahan, ug dayon ipaambit kon unsay ilang nasulat. Mahimong kinahanglan nimong tabangan ang mga sakop sa klase nga makasabut nga ang “walay pinalabi sa mga tawo” wala magpasabut nga parehas nga panalanginan sa Dios ang tanan nga dili igsapayan ang atong mga aksyon. Gusto Niya nga ang tanan Niyang mga anak modawat sa Iyang ebanghelyo, apan ang kahingpitan sa mga panalangin sa ebanghelyo gireserbar alang niadtong mohimo ug motuman sa mga pakigsaad ngadto Kaniya. Sa unsang paagi nga ang mga panghitabo ug mga baruganan diha sa Mga Buhat 10:34–48 nagpakita nga ang Dios walay pinalabi sa mga tawo? Sa unsang paagi nga ang matarung “gidawat” ug “gikahimut-an” sa Dios bisan kon Siya walay pinalabi sa mga tawo? (tan-awa sa Mga Buhat 10:34–35; 1 Nephi 17:35).

Mga Buhat 12:1–17

Ang mga pag-ampo sa mga matarung makadala og dagkong mga milagro.

• Ang istorya bahin sa pagpalingkawas kang Pedro gikan sa bilanggoan diha sa Mga Buhat 12:1–17 makatabang sa mga sakop sa klase sa pag-ugmad sa ilang pagtuo sa gahum sa pag-ampo. Tingali ang usa ka sakop sa klase mahimong motungha nga andam sa pagpaambit sa mga detalye niini nga istorya ug sa iyang pagpamatuod bahin sa pag-ampo. O mahimo nimong dapiton ang usa o dugang pa nga mga miyembro sa ward o branch sa pagpaambit og mga kasinatian diin sila mibati o nakasaksi sa gahum sa hiniusa nga pag-ampo sa mga miyembro. Mahimo usab nga mokanta kamo og mga himno mahitungod sa pag-ampo (sama sa “Ikaw Naghunahuna ba sa Pag-ampo?” Mga Himno ug mga Awit sa mga Bata, nu. 48) ug hisguti kon unsay gitudlo sa mga himno mahitungod sa gahum sa pag-ampo.

Awhaga ang Pagkat-on diha sa Panimalay

Dapita ang mga sakop sa klase sa pagpamalandong sa mga rason nga usahay mapakyas kita sa pagpaambit sa ebanghelyo ngadto sa uban. Isugyot nga ang pagtuon sa Mga Buhat 16–21 makatabang kanila nga mabuntog ang mga babag nga makapugong kanila sa pagpaambit sa ebanghelyo.

Dugang nga mga Kapanguhaan

Mga Buhat 10–15

Pagdawat og pagpadayag pagtulun-an human sa usa ka pagtulun-an.

Si Elder David A. Bednar mihimo sa mosunod nga mga obserbasyon mahitungod sa sumbanan sa Ginoo bahin sa pagpadayag: “Kadaghanan kanato maghunahuna nga makadawat kita og tubag o usa ka pag-aghat sa atong kinasingkasing nga mga pag-ampo ug mga pangamuyo. Ug kanunay usab kita nga magdahum nga ang maong tubag o pag-aghat moabut dayon ug ang tanan sa usa ra ka higayon. Sa ingon, lagmit nga motuo kita nga ang Ginoo mohatag kanato og dako nga tubag diha-diha dayon ug ang tanan sa usa ra ka higayon. Hinoon, ang sumbanan nga gibalik-balik paghulagway diha sa mga kasulatan nagsugyot nga makadawat kita og ‘pagtulun-an human sa usa ka pagtulun-an, lagda human sa usa ka lagda,’ o sa laing pagkasulti, daghang ginagmay nga mga tubag sulod sa taas nga panahon. Ang pag-ila ug pagsabut niini nga sumbanan usa ka importante nga yawe sa pagbaton og inspirasyon ug tabang gikan sa Espiritu Santo” (“Line upon Line, Precept upon Precept,” New Era, Sept. 2010, 3–4).

Ang personal nga pagpadayag kasagaran moabut sulod sa taas nga panahon pinaagi sa makanunayong paningkamot.

Si Elder Dallin H. Oaks mihatag niini nga tambag: “Kinahanglan natong tun-an ang mga butang diha sa atong hunahuna, gamit ang gahum sa pangatarungan nga gihatag sa atong Tiglalang ngari kanato. Dayon kinahanglan kitang mag-ampo alang sa giya ug lihukon kini kon makadawat kita niini. Kon dili kita makadawat og giya, kinahanglan kitang molihok base sa atong pinakamaayong paghukom” (“Our Strengths Can Become Our Downfall,” Ensign, Okt. 1994, 13–14).

Si Presidente Gordon B. Hinckley mihatag sa iyang panglantaw nga nagserbisyo sa tigdumalang mga konseho sa Simbahan:

“Sugod sa sinugdanan sa pagkonsiderar og mga butang, duna tingali mga kalainan sa opinyon. Ingon gayud niana. Kining mga tawhana naggikan sa managlahing kaagi. Mga tawo kini nga maghunahuna sa ilang kaugalingon. …

“… Gikan niining mao gayud nga proseso sa mga tawo nga mipagawas sa ilang mga hunahuna anaa ang paghashas sa mga ideya ug mga konsepto. Apan wala gayud ako makabantay nga dunay seryusong panaglalis o personal nga pagdumot tali sa akong Kaigsoonan. Hinoon, akong namatikdan ang matahum ug talagsaong butang—ang pagkahiusa, ubos sa direktang impluwensya sa Espiritu Santo ug ubos sa gahum sa pagpadayag, mahitungod sa managsukwahing panglantaw hangtud nga makab-ot ang bug-os nga paghiusa ug hingpit nga panag-uyon. Niana lamang himoon ang pag-implementar. Kana, ako mopamatuod, nagrepresentar sa diwa sa pagpadayag nga gipakita og balik-balik sa pagdumala niining buhat sa Ginoo” (“God Is at the Helm,” Ensign, Mayo 1994, 54, 59).

Pagpalambo sa Atong Pagtudlo

Sugdi sa mga kasulatan. Sa dili pa modangup sa tabang nga mga kapanguhaan, makugihong magtuon sa karaan ug sa modernong mga kasulatan. Ang mainampuong pagtuon sa pulong sa Dios motugot sa Espiritu sa pagtabang kanimo nga magamit ang imong gitun-an samtang magtudlo ka (tan-awa sa Pagtudlo sumala sa Pamaagi sa Manluluwas, 12).