“Hulyo 22–28. Mga Buhat 16–21: ‘Gitawag Kami sa Ginoo aron sa Pagsangyaw sa Maayong Balita [Ebanghelyo]’” Dali, Sunod Kanako—Alang sa Sunday School: Bag-ong Tugon 2019 (2019)
“Hulyo 22–28. Mga Buhat 16–21,” Dali, Sunod Kanako—Alang sa Sunday School: 2019
Hulyo 22–28
Mga Buhat 16–21
“Gitawag Kami sa Ginoo aron sa Pagsangyaw sa Maayong Balita [Ebanghelyo]”
Sa dili pa motan-aw niining outline, mainampuong mobasa sa Mga Buhat 16–21 nga maghunahuna sa mga sakop sa imong klase. Ang mosunod nga mga ideya makadugang sa inspirasyon nga imong madawat gikan sa Espiritu.
Irekord ang Imong mga Impresyon
Dapita ang Pagpaambit
Ikonsiderar ang pagdapit sa mga sakop sa klase sa pagpaambit og usa ka tudling gikan sa Mga Buhat 16–21 nga nagpahinumdom kanila sa usa nila ka kasinatian nga nagpaambit sa ebanghelyo.
Itudlo ang Doktrina
Isip mga miyembro sa Simbahan, magpamatuod kita bahin ni Jesukristo ug mopaambit sa Iyang ebanghelyo.
-
Tungod kay ang Mga Buhat 16–21 naghulagway sa duha ka misyonaryo nga biyahe ni Pablo, ang mga sakop sa klase mahimong makakat-on gikan niining mga kapitulo kon unsaon sa pagpamatuod bahin ni Jesukristo ug sa pagpaambit sa Iyang ebanghelyo sa epektibong paagi. Aron sa pagdasig og panaghisgutan bahin niining hilisgutan, tingali mahimo nimong dapiton ang pipila ka sakop nga motungha sa klase nga andam nga mopaambit sa ilang mga ideya nga ilang naangkon gikan sa Mga Buhat 16–21 mahitungod sa pagpaambit sa ebanghelyo. Aron mapalig-on ang panaghisgutan, mahimo usab silang mopaambit og mga pamahayag gikan sa usa ka pakigpulong sa bag-ohay nga kinatibuk-ang komperensya mahitungod sa misyonaryo nga buhat. Mahimo silang mangita og usa nga ilang kaugalingon, o mahimo kang mosugyot og usa sa mga mensahe diha sa “Dugang nga mga Kapanguhaan.”
-
Usa ka mahinungdanong mensahe niining mga kapitulo mao ang importante nga tahas sa Espiritu Santo sa pagpaambit sa ebanghelyo. Pananglitan, ang mga sakop sa klase mahimong makadiskubre kon giunsa pagtabang sa Espiritu Santo nila ni Pablo ug Silas diha sa Mga Buhat 16:6–15. Mahimo usab silang mobasa sa 2 Nephi 33:1 ug Doktrina ug mga Pakigsaad 42:14 ug ipaambit ang mga kamatuoran nga ilang makit-an mahitungod sa kaimportante sa pagbaton sa Espiritu kon mopaambit sa ebanghelyo (tan-awa usab ang pamahayag ni Elder Dallin H. Oaks diha sa “Dugang nga mga Kapanguhaan”). Tingali ang mga sakop sa klase mahimong mopaambit sa mga kasinatian sa dihang ang Espiritu Santo migiya sa ilang mga paningkamot sa pagpaambit sa ebanghelyo. Unsa ang pipila nato ka kasinatian sa pagpaambit sa ebanghelyo ngadto sa usa ka tawo nga gibutang sa Ginoo diha sa atong agianan? (tan-awa usab sa Isangyaw ang Akong Ebanghelyo, 3–4).
-
Unsaon nimo paggamit ang mga kasinatian ni Pablo sa pagtabang sa mga sakop sa imong klase nga makabaton og kaisug kon aghaton sila sa pagpaambit sa ilang mga pagpamatuod? Ikonsiderar ang pagribyu og dungan sa mga istorya sa kasulatan nga naghulagway kang Pablo nga nagpamatuod, sama sa iyang mga kasinatian didto sa Macedonia (tan-awa sa Mga Buhat 16:19–34), sa Atenas (tan-awa sa Mga Buhat 17:16–34), ug sa Corinto (tan-awa sa Mga Buhat 18:1–11). Unsa ang makita natong ebidensya bahin sa kaisug ug kaprangka ni Pablo? Unsa nga mga doktrina ang gitudlo (ug nasabtan) ni Pablo nga nakahatag kaniya og pagsalig sa iyang mensahe? Nganong usahay mahadlok man kita nga mopaambit sa ebanghelyo, ug unsaon man nato pagbuntog kini nga kahadlok? Tingali ang full-time nga mga misyonaryo mahimong mobisita sa imong klase ug mopaambit sa mga paagi nga nadawat nila ang kaisug sa pagpamatuod. Awhaga ang mga sakop sa klase sa paghunahuna og usa ka paagi nga makasunod sila sa ehemplo ni Pablo ug mahimong mas maisugon sa pagpaambit sa ilang pagpamatuod bahin ni Kristo.
Kay kaliwat man diay kita sa Dios.
-
Didto sa Areopago [Mars’ Hill], nagtudlo si Pablo mahitungod sa Langitnong Amahan ngadto sa usa ka grupo sa katawhan nga gamay ra ang nahibaloan mahitungod sa tinuod nga kinaiyahan sa Dios. Aron masiksik kining mga pagtulun-an, ang mga sakop sa klase mahimong mobasa sa Mga Buhat 17:24–31 ug isulat sa pisara ang mga kamatuoran nga ilang makit-an mahitungod sa Langitnong Amahan, ang atong relasyon ngadto Kaniya, ug ang atong mga relasyon sa usag usa. Unsa nga mga kasinatian ang mapaambit sa mga sakop sa klase diin gibati nila ang kamatuoran sa pamahayag ni Pablo nga ang Dios “dili ra halayo gikan sa matag usa kanato”? (bersikulo 27).
-
Samtang susihon ninyo og dungan kining mga bersikulo, ikonsiderar ang paghisgot sa kamatuoran nga gitudlo diha sa bersikulo 29, “Kay kaliwat man diay kita sa Dios,” nga buot ipasabut nga ang Langitnong Amahan mao ang literal nga amahan sa atong mga espiritu. Sa pagbuhat niini, mahimo nimong isulat sa pisara ang Tungod kay mga anak kita sa Dios ug Kon wala kita mahibalo nga mga anak kita sa Dios. Dapita ang mga sakop sa klase sa pagsugyot og mga paagi sa pagkompleto niining mga sentence. Pananglitan, unsa ang gitudlo kanato sa kamatuoran nga kita mga anak sa Dios mahitungod sa Dios? mahitungod sa atong kaugalingon? mahitungod sa paagi nga kinahanglan natong trataron ang usag usa? Unsa kaha ang kalainan sa atong kinabuhi kon wala pa kita mahibalo mahitungod sa atong tinuod nga relasyon ngadto sa Dios? Mahimong moresulta kini sa panaghisgutan kon unsaon nato pagtabang ang uban nga makasabut nga sila mga anak sa Dios. Ang pamahayag ni Elder Dallin H. Oaks diha sa “Dugang nga mga Kapanguhaan” mahimong makadugang niining panaghisgutan.
Ang bunyag kinahanglang pagasundan gayud sa pagdawat sa gasa sa Espiritu Santo.
-
Ang Mga Buhat 19 usa ka maayong dapit nga hatagan og gibug-aton kon unsa kaimportante ang makumpirmahan human kita mabunyagi. Ikonsiderar ang pagpaambit niining pamahayag gikan kang Propeta Joseph Smith: “Ang bunyag pinaagi sa tubig katunga lamang sa bunyag, ug walay bili kon wala ang laing katunga—kana mao, ang bunyag sa Espiritu Santo” (Mga Pagtulun-an sa mga Presidente sa Simbahan: Joseph Smith, 112). Sa unsang paagi nga ang mga pagtulun-an ni Pablo diha sa Mga Buhat 19:1–7 mokumpirmar sa pamahayag ni Joseph Smith? Ang mga sakop sa klase mahimo usab nga makabenepisyo gikan sa pagsiksik sa “Espiritu Santo, Bunyag sa” diha sa Giya ngadto sa mga Kasulatan aron makakat-on og dugang pa mahitungod sa mga panalangin sa pagdawat sa gasa sa Espiritu Santo.
Awhaga ang Pagkat-on diha sa Panimalay
Aron maawhag ang mga sakop sa klase nga mobasa sa Mga Buhat 22–28 atol sa sunod nga semana, pangutan-a sila sama sa, “Kon kamo adunay kahigayunan nga mosulti sa lider sa atong nasud mahitungod sa ebanghelyo, unsa may inyong isulti?” Sultihi sila nga diha sa Mga Buhat 22–28, mahibaloan nila kon unsay gisulti ni Pablo ngadto sa pipila sa labing gamhanang mga lider sa iyang panahon.
Dugang nga mga Kapanguhaan
Mga mensahe mahitungod sa misyonaryo nga buhat.
-
Dallin H. Oaks, “Pagpakigbahin sa Gipahiuli nga Ebanghelyo,” Liahona, Nob. 2016, 57–60.
-
David A. Bednar, “Dali ug Tan-awa,” Liahona, Nob. 2014, 107–10.
-
Neil L. Andersen, “Usa ka Saksi sa Dios,” Liahona, Nob. 2016, 35–38.
-
Mervyn B. Arnold, “Motabang sa Pagluwas: Mahimo Nato Kini,” Liahona, Mayo 2016, 53–55.
-
S. Gifford Nielsen, “Pagpadali sa Estratehiya sa Ginoo!” Liahona, Nob. 2013, 33–35.
Kitang tanan mga anak sa Dios.
Ang “Ang Pamilya: Usa ka Pamahayag ngadto sa Kalibutan” nagpaambit og mahangturong mga kamatuoran mahitungod sa atong relasyon ngadto sa Dios: “Ang tanan nga mga tawo—lalaki ug babaye—gilalang diha sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios” (Liahona, Nob. 2010, 129).
Si Elder Dallin H. Oaks sa Korum sa Napulog Duha ka mga Apostoles namulong bahin sa kaimportante sa pagtan-aw sa atong kaugalingon labaw sa tanan isip espirituhanong mga anak sa Dios:
“Pagmatngon kon giunsa ninyo pagpaila ang inyong kaugalingon. Ayaw ipaila o itino ang inyong kaugalingon pinaagi sa yutan-ong kalidad. Ang mao lamang nga nag-inusarang kalidad nga kinahanglang mopaila kanato mao nga kita anak sa Dios. Kana nga kamatuoran molabaw sa tanang uban nga mga kinaiya, lakip ang kaliwat, trabaho, pisikal nga mga kinaiya, mga kadungganan, o bisan ang relihiyusong pagkasakop. …
“Kita adunay kabubut-on, ug makapili kita og bisan unsa nga kinaiya nga mopaila kanato. Apan kinahanglan kitang masayud nga kon mopili kita sa pagpaila sa atong kaugalingon o sa pagpresentar sa atong kaugalingon pinaagi sa pipila ka kinaiya nga temporaryo o dili importante sa mahangturong mga termino, dili nato hatagan og gibug-aton ang labing importante mahitungod kanato, ug pasobrahan nato sa paghatag og gibug-aton kon unsay dili kaayo importante. Mahimo kining makadala kanato ngadto sa sayop nga dalan ug makapugong sa atong mahangturong pag-uswag” (“Be Wise” [debosyonal sa Brigham Young University–Idaho, Nob. 7, 2006], byui.edu).
Pagpalambo sa Atong Pagtudlo
Dapita ang mga batan-on nga mahimong kabahin sa imong leksyon. Kon magtudlo ka og mga batan-on, hinumdumi nga kasagaran makasabut sila sa mga butang nga naagian sa ilang mga kaedad. Kon ang usa ka batan-on mopamatuod o magtudlo og doktrina, ang ubang mga batan-on mahimong matandog sa paagi nga dili nimo masundog. Hatagi og mga oportunidad ang mga batan-on sa pagtudlo sa usag usa. (Tan-awa sa Pagtudlo sumala sa Pamaagi sa Manluluwas, 33.)