Kita Unta Magpakabuhi sa Ingon, ni Sam Lawlor

Hulyo 8–14

Mga Buhat 6–9

“Unsa ang Buot Nimong Ipabuhat Kanako?”

Tun-i ang Mga Buhat 6–9 ug i-rekord ang imong mga impresyon. Makatabang kini kanimo nga makadawat og pagpadayag kon sa unsang paagi nga ang mga sakop sa klase mas maduol kang Jesukristo pinaagi sa ilang pagtuon niining mga kapitulo.

Irekord ang Imong mga Impresyon

Dapita ang Pagpaambit

Diha sa pisara, isulat ang mga ngalan sa pipila ka tawo nga nahisgutan diha sa Mga Buhat 6–9, sama sa Esteban, Saulo, Felipe, Ananias, Pedro, ug Tabita o Dorcas. Dapita ang pipila ka sakop sa klase sa pagpaambit og butang nga ilang nakat-unan gikan sa usa niining mga tawhana diha sa ilang pagtuon karong semanaha.

Itudlo ang Doktrina

Mga Buhat 7

Ang pagbatok sa Espiritu Santo makagiya ngadto sa pagsalikway sa Manluluwas ug sa Iyang mga propeta.

• Unsa nga mga kamatuoran ang nakat-unan sa mga sakop sa klase gikan sa pagbasa sa istorya bahin ni Esteban karong semanaha? Ikonsiderar ang pagdapit sa mga sakop sa klase sa pagtuon sa mga pagtulun-an ni Esteban diha sa Mga Buhat 7:37–53, nga mangita kon sa unsang paagi nga ang mga lider nga Judeo susama sa karaang mga Israelite nga misalikway sa mga propeta. Mahimo kang mag-focus sa pamahayag ni Esteban mahitungod niining mga lider diha sa Mga Buhat 7:51. Sa unsang paagi nga ang 2 Nephi 28:3–6; 33:1–2; Mosiah 2:36–37; Alma 10:5–6; ug Alma 34:37–38 makatabang sa mga sakop sa klase aron masabtan kini nga pamahayag? Ngano man kaha nga kita “nagapakigbatok sa Espiritu Santo”? Unsa ang atong mabuhat aron mas makaila ug makasunod sa mga pag-aghat sa Espiritu Santo?

Mga Buhat 8:9–24

Ang atong kasingkasing kinahanglan nga mahimong “matarung sa atubangan sa Dios.”

• Ang pagtuon sa istorya bahin ni Simon makatabang sa mga sakop sa klase nga matimbang-timbang ang mga rason nganong mosunod sila sa ebanghelyo. Sa pagtuon niini nga istorya isip usa ka klase, mahimo nimong isulat diha sa pisara ang mga pangutana nga Kinsa man si Simon? Unsa may iyang gusto? ug Giunsa man niya pagsulay sa pagbaton niini? I-assign ang matag sakop sa klase sa pagbasa sa Mga Buhat 8:9–24, nga mangita sa mga tubag niining mga pangutana. Unsa man ang atong makat-unan gikan sa kasinatian ni Simon?

• Aron matabangan ang mga sakop sa imong klase nga masabtan kon unsay buot ipasabut sa paghimo sa ilang kasingkasing nga “matarung sa atubangan sa Dios” (Mga Buhat 8:21), mahimo nimo silang dapiton nga magtuon sa Doktrina ug mga Pakigsaad 121:41–46, nga magsiksik sa mga pulong nga naghulagway kon unsay kinahanglang mahitabo sa atong kasingkasing samtang maningkamot kita nga moserbisyo sa Dios ug modawat sa Iyang mga gasa. Ang mga sakop sa klase mahimo nga motandi niining mga ideya ngadto sa istorya ni Simon, nga makita diha sa Mga Buhat 8:9–24. Unsa nga mga kamatuoran ang wala pa masabti ni Simon? Sa unsang paagi nga mahimo nato ang atong kasingkasing nga “matarung sa atubangan sa Dios”?

• Gitandi ba sa mga sakop sa imong klase sila si Esteban ug Felipe ngadto ni Simon atol sa ilang personal nga pagtuon, sigun sa gisugyot sa outline karong semanaha sa Dali, Sunod Kanako—Alang sa mga Indibidwal ug mga Pamilya? Kon mao, unsa may ilang nakat-unan? Mahimo nimo silang dapiton sa pagpangita og ebidensya diha niining mga kapitulo nga ang kasingkasing sa ubang tawo matarung—mga tawo sama ni Felipe ug ang tawo gikan sa Etiopia (Mga Buhat 8:26–40) ug ni Saulo (Mga Buhat 9:1–22).

Mga Buhat 8:26–39

Ang Espiritu Santo motabang kanato sa paggiya sa uban ngadto ni Jesukristo.

• Aron matabangan ang mga sakop sa klase nga masabtan kon unsaon nila paggiya ang uban ngadto ni Jesukristo (tan-awa sa Mga Buhat 8:31), mahimo nimong dapiton ang duha ka sakop sa klase nga maglingkod nga mag-atubang sa usag usa ug basahon ang panag-istoryahanay nila ni Felipe ug sa tawo nga gikan sa Etiopia diha sa Mga Buhat 8:26–39. Ang ikatulong sakop sa klase mahimong mobasa sa mga bahin nga dili panag-istoryahanay. Unsa ang atong makat-unan gikan sa ehemplo ni Felipe mahitungod sa pagtudlo sa ebanghelyo ngadto sa uban?

• Aron masiksik ang modernong mga ehemplo sa istorya diha sa Mga Buhat 8:26–39, ang mga sakop sa klase mahimong mopaambit og ilang mga kasinatian kalabut sa pagpaambit sa ebanghelyo o sa pagpasakop sa Simbahan. Giunsa pagtabang sa Espiritu Santo kanila? Giunsa sa usa ka tawo paglihok isip ilang giya? Dapita ang mga sakop sa klase sa pagpamalandong kon kinsa kaha ang ilang magiyahan ngadto sa ebanghelyo.

Mga Buhat 9

Kon mopaubos kita sa kabubut-on sa Ginoo, mahimo kitang mga instrumento sa Iyang mga kamot.

• Ang mga sakop sa klase makakat-on og gamhanang mga kamatuoran mahitungod sa ilang kaugalingong pagkakabig pinaagi sa pagtuon sa kasinatian ni Saulo, lakip na ang kamatuoran nga ang tanan makahinulsol ug mausab kon andam sila. Mahimo nimong hangyuon ang mga sakop sa klase sa pagtandi sa kasinatian ni Saulo ngadto sa mga kasinatian ni Alma (tan-awa sa Mosiah 17:1–4; 18; 26:15–21) ug nila ni Laman ug Lemuel (tan-awa sa 1 Nephi 3:28–31). Unsa nga mga kinaiya nila ni Saulo ug Alma ang nakatabang kanila nga maghinulsol ug mag-usab? Unsa nga mga kinaiya ang nakapugong nila ni Laman ug Lemuel nga mag-usab? Unsa man ang impluwensya nga nabatunan nila ni Saulo ug Alma human sila nakabig? Unsa nga mga mensahe ang atong makit-an alang sa atong kaugalingong kinabuhi gikan niining mga istorya?

• Aron matabangan ang mga sakop sa klase nga magamit ang kasinatian ni Saulo ngadto sa ilang kaugalingon, mahimo nimong dapiton ang pipila ka sakop sa klase nga mangandam sa pagpaambit sa ilang nakat-unan gikan sa matag seksyon sa pakigpulong ni Presidente Dieter F. Uchtdorf nga “Naghulat diha sa Dalan sa Damasco” (Liahona, Mayo 2011, 70–77). Sa unsang paagi nga usahay maghulat kita diha sa dalan paingon sa Damasco? Sumala ni Presidente Uchtdorf, unsa may makatabang kanato aron mas makadungog sa tingog sa Dios? Aron madasig ang mga sakop sa klase nga mosunod sa ehemplo ni Saulo ug mangutana sa Ginoo, “Unsa ang buot nimong ipabuhat kanako?” ikonsiderar ang paghisgot sa kasinatian ni Presidente Thomas S. Monson nga makita diha sa “Dugang nga mga Kapanguhaan.” Tingali ang mga sakop sa klase mahimo nga mopaambit sa ilang mga kasinatian kalabut sa pagtinguha ug pagsunod sa kabubut-on sa Dios.

Awhaga ang Pagkat-on diha sa Panimalay

Aron maawhag ang mga sakop sa klase nga magbasa sa Mga Buhat 10–15 atol sa umaabut nga semana, mahimo nimong ipaambit ang pipila ka mabulukong mga panghitabo diha niining mga kapitulo—usa ka milagrusong paggawas sa bilanggoan, mga misyonaryo nga naalaan nga mga dios sa taga-Roma, ug usa ka Apostol nga gibato ug gipasagdan nga mamatay—dayon naulian.

Dugang nga mga Kapanguhaan

Mga Buhat 6–9

“Unsa ang Buot Nimong Ipabuhat Kanako?”

Samtang nagtambong si Presidente Thomas S. Monson og stake conference, ang stake president mihangyo kaniya kon pwede ba siyang makabisita sa 10 anyos nga batang babaye nga ginganlan og Christal Methvin, kinsa himatyon na tungod sa kanser. Ang pamilya sa batan-ong babaye nagpuyo og 80 ka milya gikan sa lokasyon sa komperensya. Si Presidente Monson mipaambit sa mosunod:

“Gitan-aw nako ang iskedyul sa mga miting. … Wala gayuy available nga oras. Usa ka alternatibong sugyot ang misantup sa hunahuna. Dili ba nato pwedeng hinumduman ang gamayng bata diha sa atong mga pag-ampo sa publiko atol sa komperensya? …

“… [Atol sa usa niining mga miting] nangaykay ko sa akong mga notes, nangandam nga mobarug sa pulpito, sa dihang nakadungog ko og usa ka tingog nga namulong sa akong espiritu. Ang mensahe mubo, ang mga pulong pamilyar: ‘Paduola kanako ang gagmayng kabataan, ug ayaw ninyo sila pagpugngi: kay ang gingharian sa Dios ila sa mga sama kanila.” (Marcos 10:14.) Ang akong notes dili kaayo maklaro. Ang akong hunahuna naadto sa gamayng bata nga babaye nga nanginahanglan og panalangin. Ang desisyon gihimo. Ang iskedyul sa miting nausab. …

“… [Didto sa panimalay sa Methvin,] mitutok ko sa bata nga masakiton kaayo nga maglisud sa pagbarug—luya kaayo bisan sa pagsulti. Ang iyang sakit karon nakapabuta na kaniya. Labihan ka kusog sa espiritu nga miluhod ko, mikupot sa iyang luya nga kamot, ug yanong miingon, ‘Christal, ania ko.’ Gibuka niya ang iyang mga ngabil ug mihunghong, ‘Brother Monson, kahibalo gyud ko nga moanhi ka’” (“The Faith of a Child,” Ensign, Nob. 1975, 20–22).

Mga katuigan ang milabay, si Presidente Dieter F. Uchtdorf mipaambit niini nga istorya, nga nagdapit kanato nga “maningkamot kita nga mahilakip niadtong masaligan sa Ginoo nga maminaw sa Iyang mga paghunghong ug motubag, sama sa gibuhat ni Saulo sa iyang dalan paingon sa Damasco, ‘Ginoo, unsa man ang imong gusto nga akong buhaton?’” (“Naghulat diha sa Dalan sa Damasco,” Liahona, Mayo 2011, 75).

Pagpalambo sa Atong Pagtudlo

Giyahi ang imong mga tigkat-on. Isip magtutudlo, mahimo nimong magiyahan ang imong mga tigkat-on pinaagi sa mga kasulatan, sama sa paggiya ni Felipe sa Etiopiahanon nga tawo pinaagi sa pagtudlo kaniya gikan sa Isaias (tan-awa sa Mga Buhat 8:26–37). Sa pagbuhat niini, kinahanglan gayud ikaw nga “[m]angita og kasayuran gani pinaagi sa pagtuon ug usab pinaagi sa hugot nga pagtuo” (DP 109:7). Ang kahibalo nga imong maangkon mahimong usa ka gamhanang pwersa sa pagtabang sa mga sakop sa klase nga magtinguha sa pagdiskubre sa kamatuoran alang sa ilang kaugalingon ug sa pagsunod niini.