laj Kornelio naq ki’aatinak rik’in laj Pedro

15–21 julio

Hechos 10–15

“Li raatin li Dios yoo chi k’ihank ut chi pukank”

Wi nakatzol rik’in tijok Hechos 10–15 xb’een wa chiru rilb’al ru li tusleb’ aatin a’in, tatxtenq’a chixk’ulb’al li musiq’anb’il na’leb’ rik’in li Qaawa’. Li k’a’ru tz’iib’anb’il arin wan yal re aatenq’ankil.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li komon sa’ li tzoleb’aal chixwotzb’al rik’in jun lix komon jun li esil chirixeb’ laj yehol aatin sa’ Hechos 10–15 li xwulak chiruheb’. Patz’ re wiib’ oxib’ reheb’ naq te’xwotz rik’in li tzoleb’aal li k’a’ru xe’xk’oxla.

reetalil li k’utuk

Xk’utb’al li tzolʼlebʼ

Hechos 10; 11:1–18; 15:1–25

Li qaChoxahil Yuwa’ nokoxtzol chi junjunqil li raqal chi k’utb’esinb’il.

• Maare te’wanq sa’ li tzoleb’aal li komon li ink’a’ neke’xtaw ru chan ru neke’k’ule’ li k’utb’esinb’il na’leb’. Maare usaq choq’ reheb’ naq te’aatinaq chirix chan ru naq kiwulak li k’utb’esinb’il na’leb’ rik’in laj Pedro, ut chan ru naq neke’ru chi xik chi uub’ej chi “maak’a’ li k’oxlak” (Hechos 10:20), naq chanchan maji’ tz’aqal ut ch’olch’o ru li k’a’ru k’utb’esinb’il. Wi taawaj, naru taayiib’ jun tzol chi helho chiru li pizarron, ut chixk’atq li tzol taatz’iib’a, Tento xjultikankil li evangelio chiruheb’ li maawa’eb’ aj Judio. Ilomaq sa’ komonil Hechos 10 ut 11:1–18, ut chirix a’an k’e chiru li tzol junjunq li tz’uqul li neke’xk’ut chan ru naq li Qaawa’ kixk’utb’esi chiru laj Pedro chi junjunqil li yokb’ naq ak xwulak xkutankil re taajultikamanq li evangelio chiruheb’ laj Gentil. Qayehaq, naru taatz’iib’a chire jun tz’uqul, “Laj Kornelio kiril jun matk’ ” (Hechos 10:1–6, malaj ut naru tattiklaaq rik’in lix taqlahom li Kolonel reheb’ lix tzolom naq “te’xtzol chixjunileb’ li tenamit” sa’ Mateo 28:19. K’a’ru naru naqatzol chirix li k’utb’esinb’il na’leb’ rik’in li k’a’ru kixk’ul laj Pedro? K’a’ chik ru naqatzol rik’in li raatin laj Nefi chirix li k’utb’esinb’il na’leb’ sa’ 2 Nefi 28:30 ut li raatin li Elder David A. Bednar ut li Elder Dallin H. Oaks sa’ “Xkomon chik li k’anjeleb’aal”?

• Chan ru naru nakatenq’aheb’ li komon sa’ li tzoleb’aal re naq mas wi’chik te’xk’oxla chirix chan ru neke’xk’ul li k’utb’esinb’il na’leb’? Naru nakasik’ sa’eb’ li loq’laj hu li esilal chirix chan ru naq li Qaawa’ kixtzoleb’ li tenamit chi junjunqil li raqal. Rochb’een li k’a’ru kixk’ul laj Pedro sa’ Hechos 10, eb’ li komon te’ruuq chirilb’al li kixk’ul laj Nefi (1 Nefi 18:1–3; laj Alma (Alma 7:8; 16:20); ut laj Mormon (3 Nefi 28:17, 36–40). K’a’ chik ru li esilal naru neke’xk’oxlaheb’ li komon sa’ li tzoleb’aal sa’ li ke’xk’ul wi’ li kristiaan li musiq’ejil b’eresink chi “junjunqil li raqal”? (2 Nefi 28:30). K’a’ut naq wan naq li Qaawa’ naxk’utb’esi li na’leb’ chi jo’ka’in, ut ink’a’ naxk’e chixjunil li na’leb’ sa’ jun xikik? (chi’ilmanq Tz. ut S. 50:40; 98:12). Maare jun jaljookil ru aatin naru chatenq’ankil: K’oxla wi tixye anihaq aawe naq taatzol li calculo xb’een wa chiru li geometria. K’a’ raj ru taaye? Chan ru naq a’in naxk’am rib’ rik’in chan ru naq li Qaawa’ naxk’utb’esi li yaal?

• Wan naq eb’ li komon wankeb’ xpatz’om naq najalman k’a’ru nab’aanuman, malaj chan ru na’uxman li k’anjel sa’ li Iglees. Maare us choq’ reheb’ aatinak chirix chan ru naq li k’utb’esinb’il na’leb’ re xk’utb’al li evangelio chiruheb’ laj Gentil (chi’ilmanq Hechos 10) kixk’ul xna’aj junjunq li aatin kixk’ut chaq li Qaawa’ chiruheb’ lix tzolom (chi’ilmanq Mateo 10:1, 5–6). K’a’ raj ru te’xye li komon sa’ li tzoleb’aal re jun kristiaan sa’ xkutankil laj Pedro li ink’a’ xwulak chriu li kixye laj Pedro, xb’aan naq ink’a’ naxk’am rib’ rik’in li k’a’ru xb’aanu chaq junxil? Chan ru naq li na’leb’ kik’utb’esiman sa’ Hechos 10 naru chiqatenq’ankil chi ab’ink chiru li na’leb’ naxk’utb’esi li Qaawa’ chiruheb’ lix profeet anajwan?

• Maare us raj rilb’al li na’leb’ank li ki’uxman sa’ xyanqeb’ li apostol chirib’ileb’ rib’, jo’ yeeb’il resil sa’ Hechos 15:1–22, ut li hu ke’xtz’iib’a rik’ineb’ laj santil paab’anel (chi’ilmanq li raqal 23–29). Naru taak’ut li video “La conferencia de Jerusalén” (LDS.org). K’a’ru ke’xpatz’ li tzolom? Chan ru naq ke’xsik’ xsumenkil? Li raatin li Awa’b’ej Gordon B. Hinckley sa’ “Xkomon chik li k’anjeleb’aal” naru naxk’e chik li na’leb’ chirix chan ru naq li Qaawa’ naxb’eresi lix Iglees rik’in li k’a’ru k’utb’esinb’il chiruheb’ li apostol ut li profeet.

Hechos 10:9–48

“Li Dios juntaq’eet narileb’ chixjunil.”

• Ma us raj naq eb’ li komon sa’ laa tzoleb’aal te’aatinaq chirix k’a’ru xyaalalil “rilb’aleb’ chi juntaq’eet chixjunil”? Maare us raj tiklaak rik’in xb’oqb’aleb’ li wankeb’ sa’ li tzoleb’aal chirilb’aleb’ ru li raqal li neke’xk’ut naq li Dios juntaq’eet narileb’ chixjunil, jo’ sa’ Romanos 2:1–11; 1 Nefi 17:34–40; 2 Nefi 26:32–33; Alma 5:33; Moroni 8:12; ut Tzol’leb’ ut Sumwank 1:34–35. Ye reheb’ li komon sa’ li tzoleb’aal naq te’xtz’iib’a k’a’ru xyaalalil “rilb’al chi juntaq’eet chixjunileb’ “ rik’in li k’a’ru xe’ril ru, ut naq te’xwotz k’a’ru xe’xtz’iib’a. Maare taa’ajmanq ru xtenq’ankileb’ li komon sa’ li tzoleb’aal chixtawb’al ru naq “rilb’al chi juntaq’eet chixjunileb’ ” ink’a’ naraj naxye naq li Dios narosob’tesi chi juntaq’eet chixjunileb’ li kristiaan, maak’a’ naxye k’a’ru neke’xb’aanu. A’an naraj naq chixjunileb’ li ralal te’xk’ul lix evangelio, a’b’anan lix tz’aqalil li osob’tesink re li evangelio k’uulanb’il choq’ reheb’ li neke’ok sa’ sumwank rik’in ut neke’xpaab’eb’ li sumwank. Chan ru naq li esil ut li na’leb’ sa’ Hechos 10:34–48 naxk’ut naq li Dios juntaq’eet narileb’ chixjunil? Chan ru naru naq “k’ulub’anb’ileb’ ” ut “usilanb’ileb’ ” li tiikeb’ xch’ool xb’aan li Dios, us ta a’an juntaq’eet narileb’ chixjunil? (chi’ilmanq Hechos 10:34–35; 1 Nefi 17:35).

Hechos 12:1–17

Lix tijeb’ li tiikeb’ xch’ool naru neke’xk’am chaq li ninqi sachb’a-ch’oolej.

• Li esil chirix naq kikole’ laj Pedro chiru tz’alam sa’ Hechos 12:1–17 naru naxtenq’aheb’ li komon sa’ li tzoleb’aal re taanimanq xpaab’aaleb’ chirix lix wankilal li tijok. Maare jun komon sa’ li tzoleb’aal taaruuq chi chalk chi kawresinb’il chixwotzb’al li esil a’in, ut tixye lix nawom xch’ool chirix li tijok. Malaj ut naru taapatz’ re wiib’ oxib’ li komon sa’ li teep re te’xye resil jun sut naq xe’reek’a malaj xe’ril li wankilal li xchal xb’aan naq xe’tijok sa’ komonil li komon. Naru ajwi’ teeb’ichaheb’ li b’ich chirix li tijok (jo’ “Ma tijok xayal?” Eb’ li B’ich, 81) ut tex’aatinaq chirix k’a’ru neke’xk’ut li b’ich chirix li tijok.

reetalil li tzolok

Xb’oqb’aleb’ chi tzolok sa’ kab’l

Ye reheb’ li komon sa’ li tzoleb’aal naq te’xk’oxla k’a’ut naq wan naq nokomajelo’ sa’ xwotzb’al li evangelio rik’ineb’ li qas qiitz’in. Naru taaye reheb’ naq rik’in xtzolb’al Hechos 16–21 naru te’xq’ax ru li k’a’ru naramok reheb’ chixwotzb’al li evangelio.

reetalil li k’anjeleb’aal

Xkomon chik li k’anjeleb’aal

Hechos 10–15

Xk’ulb’al li k’utb’esinb’il na’leb’ chi junjunqil li raqal.

Li Elder David A. Bednar kixye li aatin a’in chirix chan ru naq li Qaawa’ naxk’utb’esi li na’leb’: “Wan naq naqak’oxla naq taqak’ul jun xsumenkil malaj jun musiq’ejil na’leb’ naq nokotijok ut nokopatz’ok chi anchal qach’ool. Ut wan naq naqaj naq taachalq li sumenk malaj li musiq’ejil na’leb’ a’an sa’ junpaat ut chi junajwa. Chi jo’kan, wan naq naqapaab’ naq li Qaawa’ tixk’e qe jun nimla sumenk sa’ junpaat ut chi jun waakaj. A’b’anan li k’a’ru k’utb’il k’iila sut sa’eb’ li loq’laj hu a’an naq naqak’ul “chi junjunqil li raqal, chi junjunqil li na’leb’,” malaj sa’ jalan chik aatin, k’iila kok’ sumenk chiru naab’al kutan. Aajel ru xk’eeb’al reetal ut xtawb’al ru li na’leb’ a’in re taqak’ul qab’eresinkil ut qatenq’ankil rik’in li Santil Musiq’ej” (“Line upon Line, Precept upon Precept,” New Era, septiembre 2010, 3–4).

jun xqa’al yoo chirilb’aleb’ xsa’ li loq’laj hu

Li k’utb’esinb’il na’leb’ k’iila sut nachal chirix xyalb’al qaq’e chiru naab’al kutan.

Li Elder Dallin H. Oaks kixye li aatin a’in: “Tento taqak’oxla li na’leb’ sa’ li qak’a’uxl, ut taqoksi li wankilal chi na’leb’ank li xk’ojob’ laj Yo’ob’tesinel sa’ li qach’ool. Chirix a’an tento tootijoq re xk’ulb’al qab’eresinkil, ut taqab’aanu li naxye wi naqak’ul. Wi ink’a’ naqak’ul jun li qab’eresinkil, tento taqab’aanu li k’a’ru chaab’il li na’leb’anb’il qab’aan” (“Nuestros puntos fuertes se pueden convertir en nuestra ruina,”Liahona, mayo 1995, 15).

Li Awa’b’ej Gordon B. Hinckley kixwotz lix na’leb’ chirix k’anjelak sa’eb’ li jolomil ch’utam re li Iglees:

“Sa’ xtiklajik sa’ xk’oxlankil jun li na’leb’, wan naq jalan jalanq li qana’leb’ chirix. Ink’a’ nasach qach’ool rik’in a’in. Eb’ li winq a’in jalan jalanq li xe’chal wi’ chaq. A’aneb’ winq li neke’nawok xk’oxlankil xjuneseb’ rib’ li na’leb’. …

“… Rik’in ajwi’ li k’anjel a’in, naq eb’ li winq neke’xye li k’a’ru wan sa’ xk’a’uxleb’, eb’ li na’leb’ ut li k’oxlahom neke’ok chi tz’ilmank ut chi jachmank ru. A’b’anan maajun wa wilom li jachok-ib’ malaj li xik’ ilok sa’ xyanqeb’ lin komon. Xwil b’an li k’a’ru ch’ina-us ut sachol ch’oolej—chi b’eresinb’il xb’aan li Santil Musiq’ej ut rub’el xwankil li k’utb’esink, najunajiman li jalan jalanq chi na’leb’, toj reetal naq wan tz’aqal li junajil, ut junaj ru qach’ool chirix li na’leb’. Ka’ajwi’ chirix a’an nak’anjelaman. Ninch’olob’ xyaalal naq a’in li musiq’ej re k’utb’esink, li k’iila sut na’ilman sa’ xb’eresinkil li k’anjel a’in re li Qaawa’ ” (“La obra sigue adelante,” Liahona, julio 1994, 66).

Xchaab’ilob’resinkil li qak’utum

Tiklan rik’ineb’ li loq’laj hu. Xb’een wa chiru xsik’b’al jalan chik li hu, tzol chi yalb’il aaq’e eb’ li loq’laj hu, re najter kutan jo’ ajwi’ re li kutan a’in. Wi nakatzol rik’in tijok li raatin li Dios, li Musiq’ej taaruuq tatxtenq’a chixk’anjelankil li k’a’ru xatzol naq yookat chi k’utuk (chi’ilmanq Li k’utuk jo’ li Kolonel, 12).