xkutankil li Pentecostes

Xkutankil li Penecostes, xb’aan laj Sidney King

1–7 julio

Hechos 1–5

“Laa’exaq aj yehol yaal chiwix”

Wi nakawil ru Hechos 1–5 ut nakasik’ aab’eresinkil xb’aan li Musiq’ej, taak’ul li musiq’anb’il na’leb’ chirix k’a’ru li yaalil na’leb’ sa’eb’ li ch’ol a’in li te’tenq’anq reheb’ li komon sa’ laa tzoleb’aal chixkanab’ankil rib’ chiru li Santil Musiq’ej, ut chixyeeb’al xyaalal li Qaawa’ Jesukristo.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Wankeb’ k’iila chaab’il aatin ut na’leb’ sa’ Hechos 1–5. Jun na’leb’ re taataw k’a’ru li q’axal taak’anjelaq chiru ut tixtenq’aheb’ li komon sa’ laa junkab’al, a’an naq taakanab’eb’ chixyeeb’al aawe k’a’ru li xe’xk’e reetal naq yookeb’ chi tzolok. Chan ru naq taab’oqeb’ chi wotzok chi jo’ka’in? Maare yal taa’ajmanq xk’eeb’al reheb’ junjunq k’asal re te’xsik’ ut te’xwotz jun raqal sa’ Hechos 1–5 sa’ li xe’reek’a wi’ lix yaab’ xkux li Qaawa’ chiraatinankileb’.

reetalil li k’utuk

Xk’utb’al li tzolʼlebʼ

Hechos 1:1–8; 2:37–39; 4:1–16, 31–33

Li Jesukristo naxb’eresi lix Iglees rik’in li Santil Musiq’ej.

• Naq nekeril ru lix k’ulumeb’ li apostol, naru naxtenq’aheb’ li komon sa’ laa tzoleb’aal chirilb’al chan ru neke’ru chixk’ulb’al lix wankil ut lix b’eresihom li Santil Musiq’ej sa’eb’ lix b’oqb’al sa’ li Iglees. Jun k’anjel re xnumsinkil li k’a’ru kik’ulman sa’ Hechos 1–5, a’an xtz’iib’ankil chiru li pizarron, Li Santil Musiq’ej naru chintenq’ankil sa’ lin b’oqb’al chi jo’ka’in: ut chirix a’an taab’oqeb’ li komon sa’ li junkab’al re te’xtz’il rix Hechos 1:1–8; 2:36–39; ut 4:1–6, 31–33 re xtawb’al li na’leb’ taatz’iib’amanq. K’a’ut naq eb’ li apostol ke’raj ru li Santil Musiq’ej?

• Jo’ tzoleb’aal, naru ajwi’ teetz’il rix chan ru naq li Jesukristo naxb’eresi lix Iglees sa’ li kutan wanko wi’ anajwan, rik’in li Santil Musiq’ej. Re xb’aanunkil a’in, naru taab’oqeb’ junjunq li komon sa’ li tzoleb’aal chi rub’elaj, ut taapatz’ reheb’ naq te’xnumsi li tz’iib’anb’il resil sa’ Hechos 1:1–8; 2:37–39; 4:1–16, 31–33 ut te’chalq chi kawresinb’il re xwotzb’al k’a’ru xe’xk’ul a’an li chanchan li xe’xk’ul li apostol. Qayehaq, naru te’xwotz jun sut naq li Santil Musiq’ej xtenq’aheb’ chixch’olob’ankil jun na’leb’ chirix li evangelio, malaj chixsumenkil lix patz’om anihaq. K’a’ru xe’xb’aanu chaq re xsik’b’al xb’eresinkileb’ xb’aan li Santil Musiq’ej?

Hechos 1:15–26

Eb’ lix apostol li Jesukristo b’oqb’ileb’ xb’aan li Dios chi k’utb’esinb’il.

• Maare usaq choq’ reheb’ li wankeb’ sa’ laa tzoleb’aal wi te’xk’e reetal naq eb’ li komon sa’ lix Molameb’ li Kab’laju chi Apostol sa’ li najteril Iglees ke’b’oqe’ chi k’utb’esinb’il, jo’ sa’ li kutan a’in. Naru taab’oqeb’ li komon sa’ li tzoleb’aal chixch’olob’ankil chan ru naq jun li nimla k’ayib’aal maare te’xsik’ raj junaq ak’ aj k’anjenel choq’ aj b’eresinel; qayehaq, maare te’xk’e reetal ma xtzolok, b’ar xk’anjelak, ut xkomon chik. Ye reheb’ naq te’xye chan ru naq jalan a’in rik’in lix b’oqb’al laj Matias sa’ Hechos 1:15–26 (chi’ilmanq ajwi’ 1 Samuel 16:1–13). Chan ru naq li raatin li Awa’b’ej Gordon B. Hinckley sa’ “Xkomon chik li k’anjeleb’aal” naru tixtenq’aheb’ li komon sa’ li tzoleb’aal chixtawb’al ru li na’leb’ a’in? (Chi’ilmanq ajwi’ Russell M. Nelson, “Xxaqab’ankil xwankileb’ li profeet,” Jolomil ch’utub’aj-ib’ re octubre 2014). Chan ru naq li na’leb’ a’in naxkawob’resi li qapaab’aal chirixeb’ laj b’eresinel li b’oqb’ileb’ xb’aan li Qaawa’? Chan ru naq xataw xnawom aach’ool chirixeb’ li apostol ut li profeet sa’eb’ li kutan a’in?

Hechos 2:22–47; 3:13–26; 4:5–12

Naqak’ul li osob’tesink re lix tojb’al rix li maak naq naqayu’ami li xb’een raqal chi na’leb’ ut k’ojob’anb’il k’anjel re li evangelio.

• Chan ru naq eb’ li tzolb’ileb’ aab’aan te’ruuq chixtawb’al li wankilal ut li na’leb’ sa’ li yaalil aatin k’utb’il xb’aan laj Pedro ut laj Jwan (xpaab’ankil li Jesukristo, li jalb’a-k’a’uxlej, li kub’iha’, li maatan re li Santil Musiq’ej, ut kuyuk toj sa’ roso’jik)? Jun na’leb’ a’an xtz’ilb’al rix lix aajelil ru eb’ li raqal chi na’leb’ ut li k’ojob’anb’il k’anjel a’in, a’aneb’ li tzol’leb’ re li Kristo yeeb’il re (chi’ilmanq 2 Nefi 31). Naru taak’am chaq oob’ nim ruhil hu sa’ li tzoleb’aal, ut sa’ xjolomil li junjunq taatz’iib’a jun reheb’ li raqal a’in re li tzol’leb’ re li Kristo: Xpaab’ankil li Jesukristo, Jalb’a-k’a’uxlej, Kub’iha’, Maatan re li Santil Musiq’ej, Kuyuk toj sa’ roso’jik. Jacheb’ ru li tzoleb’aal sa’ oob’ ch’uut, ut k’e jun hu re li junjunq ch’uut. Kanab’eb’ li jar ch’uut chixsik’b’al xna’leb’eb’ chirix li aatin xe’xk’ul sa’ xhuheb’ sa’ li K’utul Raqal reheb’ li Loq’laj Hu malaj sa’ Predicad mi Evangelio. Chirix a’an, naru te’xnumsi wi’chik li raatin laj Pedro sa’ Hechos 2:22–47; 3:13–26; ut 4:5–12 ut te’xtz’iib’a chiru lix hu junjunq na’leb’ xe’xtaw sa’eb’ li raqal a’in chirix li aatin xe’xk’ul. Chan ru naq eb’ li raqal chi na’leb’ ut k’ojob’anb’il k’anjel a’in re li evangelio nokohe’xtenq’a chixk’ulb’al li osob’tesink li nachal rik’in lix tojb’al rix li maak xb’aan li Kolonel? K’a’ru xk’anjeleb’ li raqal chi na’leb’ ut li k’ojob’anb’il k’anjel a’in sa’ lix k’uub’anb’il na’leb’ li qaChoxahil Yuwa’ re li kolb’a-ib’?

• Naru nakapatz’ re jun reheb’ li misioneer, malaj junaq li ak xsutq’i chaq sa’ lix mision, malaj jun misioneer re teep re taa’aatinaq chiru junpaat chirix chan ru naq xe’xtzol anihaq chirix li tzol’leb’ re li Kristo rik’in li ch’ol 3 sa’ Predicad mi Evangelio. K’a’ut naq li tzol’leb’ re li Kristo a’an jun xnimal ru na’leb’ choq’ reheb’ li misioneer? Chan ru naq li ani ak xkub’e xha’ ut xk’ul li maatan re li Santil Musiq’ej toj naru chixyu’aminkil li tzol’leb’ re li Kristo?

Hechos 2:37–47

Li Santil Musiq’ej nokoxmusiq’a re taqak’anjela li k’a’ru xqatzol.

• Naq eb’ li komon sa’ li tzoleb’aal neke’xtzoleb’ li loq’laj hu sa’ kab’l malaj sa’ li tzoleb’aal rajlal xamaan, maare chi kok’ aj xsa’ te’reek’a naq “xe’toch’e’ xch’ool” (Hechos 2:37). Maare eek’asinb’ilat chixtenq’ankileb’ re te’xb’aanu jun chik yokb’ rik’in xpatz’b’al, “K’a’ru tento taqab’aanu?” (Hechos 2:37). Ilomaq ru sa’ komonil Hechos 2:37–47, ut ye reheb’ li komon sa’ li tzoleb’aal naq te’xsik’ li k’a’ru ke’xb’aanu li oxib’ mil kristiaan a’in xb’aan lix b’oqom laj Pedro. Maare taaruuq te’xye resil chan ru naq xe’xk’anjela li musiq’anb’il na’leb’ xe’xk’ul sa’ xtzolb’al li raatin li Dios. Chirix a’an, maare taaruuq taak’uula junjunq k’asal sa’ xraqik li tzoleb’aal re naq li junjunq tixpatz’ “K’a’ru tento tinb’aanu?” ut tixtz’iib’a li k’a’ru naxk’oxla.

laj Pedro kijultikan aatin chirix naq kirapleek

Us ta kichape’ ut kirapleek, laj Pedro kixjultika li evangelio chi kaw xch’ool.

Hechos 3; 4:1–21; 5:12–42

Naq laa’o nokonujak rik’in li Santil Musiq’ej, naru naqawotz li evangelio chi kaw qach’ool.

• Li resil laj Pedro ut laj Jwan naq ke’xch’olob’ xyaalal li Jesus chi kaweb’ xch’ool naru tixtenq’aheb’ li wankeb’ sa’ laa tzoleb’aal re naq ink’a’ te’xxuwa k’a’ru neke’xk’oxla li jun siir chik naq neke’xwotz lix nawomeb’ xch’ool chirix li evangelio. K’a’ru xe’reek’a li komon sa’ li tzoleb’aal chirix lix kawil xch’ool laj Pedro ut laj Jwan sa’ Hechos 3; 4:1–21; ut 5:12–42? Chan ru naq xk’ulb’al li maatan re li Santil Musiq’ej nokoxtenq’a chixch’olob’ankil li yaal rik’in xkawil qach’ool? Eb’ li esil sa’eb’ li ch’ol a’in k’utb’esinb’ileb’ sa’eb’ li video “Pedro predica y es arrestado,” “Pedro y Juan son juzgados,” ut “Pedro y Juan continúan predicando el Evangelio” (LDS.org). Eb’ li komon sa’ li tzoleb’aal maare naru te’xwotz’ resil junaq sut naq xe’xkol rix malaj xe’xch’olob’ xyaalal li evangelio chi kaweb’ xch’ool, maare eb’ a’an, malaj maare jalan chik.

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li komon sa’ li tzoleb’aal naq te’xk’oxla k’a’ raj ru te’xb’aanu wi taaruuq raj te’kamsiiq xb’aan xpaab’ankil li evangelio. Ye reheb’ naq sa’ Hechos 6–9 te’ril resil jun kristiaan li kiwan xch’ool chi kamk choq’ re lix paab’aal.

reetalil li k’anjeleb’aal

Xkomon chik li k’anjeleb’aal

Hechos 1–5

Xb’oqb’al jun reheb’ li kab’laju chi apostol.

Laj Gordon B. Hinckley kixye li aatin a’in chirix chan ru naq nab’oqman jun li ak’ apostol: “Li k’a’ru na’uxman ka’ajwi’ natawman sa’ lix Iglees li Qaawa’. Maak’a’ li sik’ok k’anjel, maak’a’ li yalok-u re xk’ulb’al wankilal, maak’a’ li aatin re xyeeb’al xchaab’ilal junaq. K’oxlahomaq chan ru naq lix b’e li Qaawa’ jalan wi’ rik’in lix b’e li ruchich’och’. Lix b’e li Qaawa’ ch’anch’o, a’an xb’ehil li tuqtuukilal, maak’a’ wi’ li eek’ank ut li k’ehok tumin. Maak’a’ li q’etq’etil, chi moko li jo’maajo’il, chi moko li sik’ok wankilal. Sa’ lix k’uub’anb’il na’leb’ li Qaawa’, eb’ li teneb’anb’ileb’ chixsik’b’al ani taak’anjelaq, b’eresinb’ileb’ xb’aan jun nimla patz’om: “Ani taaraj li Qaawa’ naq taab’oqmanq?” Na’ux li k’oxlak chi ch’anch’o ut chi na’leb’anb’il. Ut na’ux xnaab’alil li tijok re xk’ulb’al xch’olob’ahom li Santil Musiq’ej naq us li ani sik’b’il ru” (“La Obra Sigue Adelante,” Ensign, mayo 1994, 53).

Xchaab’ilob’resinkil li qak’utum

Kanab’ aawib’ chiruheb’ laj k’amol b’e. “Laa jolominel sa’ li tijonelil ut li k’anjenel ch’uut neke’raj naq chaab’il tat-elq. Patz’ reheb’ lix na’leb’ naq nakayal aaq’e chixchaab’ilob’resinkil aawib’ jo’ aj k’utunel ut naq nakak’oxlaheb’ li rajomeb’ ru li ani tzolb’ileb’ aab’aan.” (Li k’utuk jo’ li Kolonel, 5).