laj Pablo sa’ li b’e naxik Damasko

Jo’kan choowanq, xb’aan laj Sam Lawlor

8–14 julio

Hechos 6–9

Hechos 6–9: “K’a’ru taawaj tinb’aanu?”

Tzol Hechos 6–9 ut tz’iib’a li musiq’ejil na’leb’ nakak’ul. A’in tatxtenq’a chixk’ulb’al li k’utb’esinb’il na’leb’ chirix chan ru xtenq’ankileb’ li komon sa’ li tzoleb’aal chi nach’ok rik’in li Jesukristo sa’ xtzolb’aleb’ li ch’ol a’in.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Chiru li pizarron, tz’iib’a xk’ab’a’eb’ junjunq li kristiaan yeeb’ileb’ resil sa’ Hechos 6–9, jo’ laj Esteban, laj Sawlo, laj Felipe, laj Ananias, laj Pedro, ut xTabita. B’oqeb’ junjunq komon sa’ li tzoleb’aal chixwotzb’al k’a’ruhaq li xe’xtzol chirix jun reheb’ li kristiaan a’an naq yookeb’ chi tzolok chiru li xamaan a’in.

reetalil li k’utuk

Xk’utb’al li tzolʼlebʼ

Hechos 7

Xramb’al li Santil Musiq’ej naru nokoxk’am sa’ xtz’eqtaanankil li Kolonel ut eb’ lix profeet.

• K’a’ru li yaalil na’leb’ xe’xtzol li komon sa’ li tzoleb’aal rik’in rilb’al ru resil laj Esteban chiru li xamaan a’in? Naru taab’oqeb’ li komon sa’ li tzoleb’aal chixtzolb’al lix yehom laj Esteban sa’ Hechos 7:37–53, ut te’xsik’ chan ru naq eb’ laj jolominel aj Judio chanchaneb’ li najter aj Israelita li ke’xtz’eqtaanaheb’ li profeet. Naru taak’ut li raatin laj Esteban chirixeb’ laj jolominel a’an sa’ Hechos 7:51. Chan ru naq li aatin sa’ 2 Nefi 28:3–6; 33:1–2; Mosiah 2:36–37; Alma 10:5–6; ut Alma 34:37–38 naxtenq’aheb’ li komon sa’ li tzoleb’aal chixtawb’al ru li aatin a’in? K’a’ut naq wan naq “naqaq’etq’eti qib’ chiru li Santil Musiq’ej”? K’a’ru naru naqab’aanu re naq taqak’e reetal ut taqataaqe li nokoreek’asi wi’ li Santil Musiq’ej?

Hechos 8:9–24

Li qach’ool tento taawanq chi “tiik chiru li Dios.”

• Li xtzolb’al resil laj Simon naru chixtenq’ankileb’ li komon sa’ li tzoleb’aal re te’xk’oxla k’a’ut naq neke’xtaaqe li evangelio. Re xtzolb’al li esil a’in jo’ tzoleb’aal, naru taatz’iib’a chiru li pizarron eb’ li patz’om a’in: Ani laj Simon? K’a’ru kiraj? ut Chan ru naq kixsik’ xk’ulb’al? Ye re li junjunq chi komon sa’ li tzoleb’aal naq taaril ru Hechos 8:9–24, ut tixsik’ xsumenkileb’ li patz’om a’in. K’a’ru naqatzol rik’in li k’a’ru kixk’ul laj Simon?

• Re xtenq’ankileb’ li komon sa’ laa tzoleb’aal chixtawb’al ru k’a’ru xyaalalil naq “tiikeb’ xch’ool chiru li Dios” (Hechos 8:21), naru taapatz’ reheb’ naq te’xtz’il rix Tzol’leb’ ut Sumwank 121:41–46, ut te’xsik’eb’ li aatin malaj li ch’ol aatin li neke’xch’olob’ xyaalal chan ru naq tento taawanq qach’ool naq naqayal qaq’e chi k’anjelak chiru li Dios ut chixk’ulb’aleb’ li maatan naxk’e. Eb’ li komon sa’ li tzoleb’aal naru neke’ril chan ru naq jalan li na’leb’ a’in rik’in li yeeb’il resil chirix laj Simon li natawman sa’ Hechos 8:9–24. K’a’ru li yaalil na’leb’ li maji’ kixtaw ru laj Simon? Chan ru naq naru naqakanab’ li qach’ool chi “tiik chiru li Dios”?

• Naq xe’tzolok xjuneseb’, ma xe’ril li komon sa’ laa tzoleb’aal chan ru naq laj Esteban ut laj Felipe jalaneb’ rik’in laj Simon, jo’ yeeb’il sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al? Wi xe’xb’aanu, k’a’ru xe’xtzol? Naru ajwi’ taapatz’ reheb’ naq te’xsik’ resil sa’eb’ li ch’ol a’in chan ru naq tiikeb’ xch’ool li jun siir chik chi kristiaan—jo’ laj Felipe ut li winq aj Etiopia (Hechos 8:26–40) ut laj Sawlo (Hechos 9:1–22).

Hechos 8:26–39

Li Santil Musiq’ej tooxtenq’a chixk’amb’aleb’ xb’e li kristiaan rik’in li Jesukristo.

• Re xtenq’ankileb’ li komon sa’ li tzoleb’aal chixnawb’al chan ru naq neke’ru chixk’amb’aleb’ xb’e jalan rik’in li Jesukristo (chi’ilmanq Hechos 8:31), naru taapatz’ re wiib’ komon sa’ li tzoleb’aal re te’chunlaaq chi ka’pak’alil ut te’ril ru li raatin laj Felipe ut li winq aj Etiopia sa’ Hechos 8:26–39. Jun chik li komon naru chirilb’al ru li aatin li moko yeeb’il ta xb’aaneb’ li wiib’ a’in. K’a’ru naqatzol rik’in lix b’aanuhom laj Felipe, chirix xk’utb’al li evangelio reheb’ li qas qiitz’in?

• Re xsik’b’al li na’leb’ sa’eb’ li kutan a’in chirix li k’a’ru yeeb’il resil sa’ Hechos 8:26–39, eb’ li komon sa’ li tzoleb’aal te’ruuq chixwotzb’al li k’a’ru xe’xk’ul rik’in xwotzb’al li evangelio, malaj naq xe’xjunaji rib’ rik’in li Iglees. Chan ru naq li Santil Musiq’ej xtenq’aheb’? Chan ru naq jalan chik xk’amok b’e chiruheb’? Ye reheb’ li komon sa’ li tzoleb’aal naq te’xk’oxla ani te’ruuq chixk’amb’al xb’e rik’in li evangelio.

Hechos 9

Naq naqaq’axtesi qib’ chiru li rajom xch’ool li Qaawa’, noko’ok choq’ k’anjeleb’aal sa’ ruq’ a’an.

• Eb’ li komon sa’ li tzoleb’aal neke’ru chixtzolb’al li xninqal ru yaalil na’leb’ chirix lix jalajikeb’ xch’ool rik’in xtzolb’al li kixk’ul laj Sawlo, sa’ li wan wi’ li yaalil na’leb’ naq yalaq ani naru chixjalb’al xk’a’uxl ut xyu’am wi wan xch’ool chixb’aanunkil. Naru taapatz’ reheb’ li komon naq te’xjuntaq’eeta li k’a’ru kixk’ul laj Sawlo rik’in li kixk’ul laj Alma (chi’ilmanq Mosiah 17:1–4; 18; 26:15–21) ut laj Laman ut laj Lemuel (chi’ilmanq 1 Nefi 3:28–31). K’a’ru kiwan sa’ xch’ool laj Sawlo ut laj Alma li kitenq’ank reheb’ re te’xjal k’a’uxl ut te’xjal rib’? K’a’ru kiwan sa’ xch’ool laj Laman ut laj Lemuel, li ink’a’ kixkanab’eb’ chi jalok? K’a’ru ke’ru chixb’aanunkil laj Sawlo ut laj Alma chirix naq ke’xjaleb’ xch’ool? K’a’ru esil naqataw choq’ re li qayu’am sa’eb’ li esilal a’in?

• Re xtenq’ankileb’ li komon sa’ li tzoleb’aal chixk’anjelankil li k’a’ru kixk’ul laj Sawlo sa’ xyu’ameb’, naru taapatz’ re junjunq komon naq te’chalq chi kawresinb’il re xwotzb’al k’a’ru xe’xtzol rik’ineb’ li jar raqal sa’ li raatin laj Dieter F. Uchtdorf, “A la espera en el camino a Damasco” (Liahona, mayo 2011, 70–77). Chan ru naru naq laa’o nokokana chi oyb’enink sa’ li b’e naxik Damasko? Jo’ chanru naxye li Awa’b’ej Uchtdorf, k’a’ru naru nokoxtenq’a chirab’inkil lix yaab’ xkux li Dios? Naru ajwi’ nakak’oxla xk’utb’al li video “El camino a Damasco” (LDS.org). Re xtenq’ankileb’ li komon chixtaaqenkil lix b’aanuhom laj Sawlo rik’in xpatz’b’al re li Qaawa’, “K’a’ru taawaj tinb’aanu?” naru tex’aatinaq chirix li k’a’ru xk’ul li Awa’b’ej Thomas S. Monson, li natawman sa’ “Xkomon chik li k’anjeleb’aal.” Maare eb’ li komon sa’ li tzoleb’aal te’ruuq chixwotzb’al k’a’ru xe’xk’ul naq xe’xsik’ ut xe’xtaaqe li rajom xch’ool li Dios.

reetalil li tzolok

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon sa’ li tzoleb’aal re te’ril ru Hechos 10–15 chiru li xamaan taachalq, naru taawaatinaheb’ chirixeb’ li sachb’a-ch’oolejil esilal li neke’tawman sa’eb li ch’ol a’in—li elk sa’ tz’alam rik’in sachb’a-ch’oolej, eb’ laj yehol aatin li ke’k’ule’ jo’ dioseb’, ut jun apostol li kikute’ chi pek ut kikanab’aak jo’ kamenaq—ut chirix a’an kiwakli wi’chik.

reetalil li k’anjeleb’aal

Xkomon chik li k’anjeleb’aal

Hechos 6–9

“K’a’ru taawaj tinb’aanu?”

Naq li Awa’b’ej Thomas S. Monson yoo chi tz’aqonk sa’ jun ch’utub’aj-ib’ re oqech, li awa’b’ej re li oqech xpatz’ re ma taaruuq taarula’ani jun li xqa’al, lajeeb’ chihab’ xyu’am, xChristal Methvin xk’ab’a’, li yoo chi kamk rik’in nimla yajel. Li rochoch li xqa’al 130 kiloom xnajtil rik’in li na’ajej taawanq wi’ li ch’utub’aj-ib’. Li Awa’b’ej Monson kixwotz a’in:

“Xink’e reetal jo’q’e te’wanq li ch’utam. … Maak’a’ li hoonal tooruuq wi’ chi wulak aran. Xchal sa’ ink’a’uxl k’a’ru taaruuq raj taqab’aanu. Ma ink’a’ tooruuq chi tz’aamank sa’ komonil chirix li xqa’al naq yooko chi tijok sa’ li ch’utub’aj-ib’? …

“… [Sa’ jun reheb’ li ch’utam] yookin chaq chirilb’al lin tz’iib’ahom re tinxaqliiq chi aatinak, ut xwab’i jun xyaab’ kuxej chi aatinak sa’ inmusiq’. Moko k’i ta li aatin, ut nawb’il ru inb’aan: “Kanab’omaqeb’ li kok’al chi chalk wik’in ut meeram chiruheb’, xb’aan naq li kama’eb’ a’an, reheb’ lix nimajwal awa’b’ejihom li Dios.” (Markos 10:14.) Ink’a’ chik saqen xwil lin tz’iib’ahom. Ka’ajwi’ xinru chixk’oxlankil li ch’ina xqa’al li xraj raj jun rosob’tesinkil. Xink’e inch’ool. Xjalman xhoonalileb’ li ch’utam. …

“… [Sa’ rochocheb’ laj Methvin,] xwil jun li ch’ina xqa’al li maak’a’ chik xmetz’ew chi wakliik—ra chi sa naq wan xmetz’ew chi aatinak. Xb’aan lix yajel, ink’a’ chik na’ilok. Q’axal kaw li Musiq’ej xweek’a, ut xinwiq’la, xinch’ap lix ch’ina uq’ sa’ li wuq’ ut yal xinye, “Christal, arin wankin.” A’an xte lix tz’uumal re, ut sa’ hasb’ xye, “Hermano Monson, xinnaw naq tatk’ulunq.”” (La fe de un niño,” Liahona, agosto 1998, 5).

Naab’al chihab’ chik chirix a’an, li Awa’b’ej Dieter F. Uchtdorf kixwotz li esilal a’in, ut kooxb’oq re “taqayal qaq’e chi wank sa’ xyanqeb’ li naxnaw li Qaawa’ naq te’ab’inq chiru lix yaab’ xkux sa’ hasb’ ut te’ab’inq chiru, jo’ kixb’aanu laj Sawlo sa’ li b’e naxik Damasko naq kixye, “Qaawa’, K’a’ru taawaj tinb’aanu?”“ (“A la espera en el camino a Damasco,” Liahona, mayo 2011, 75).

Xchaab’ilob’resinkil li qak’utum

K’ameb’ xb’e li tzolb’ileb’ aab’aan. Jo’ aj k’utunel, naru nakak’ameb’ xb’e li ani tzolb’ileb’ aab’aan sa’eb’ li loq’laj hu, jo’ chanru naq laj Felipe kixk’am xb’e li winq aj Etiopia naq kixtzol chirix li raatin laj Isaias (chi’ilmanq Hechos 8:26–37). Re xb’aanunkil a’in, tento naq teesik’ “xk’ulb’al eenawom rik’in li tzolok ut rik’in ajwi’ li paab’aal” (Tz. ut S. 109:7). Li na’leb’ nakataw naru naxk’e xnimal aawankil re xtenq’ankileb’ li komon sa’ laa tzoleb’aal re te’raj xtawb’al li yaal ut te’xyu’ami xjuneseb’ rib’.