14–20 nō ’Ātopa

Philipi ; Kolosa

« E ti’a iā’u te mau mea ato’a nei i te Mesia, tei tauturu mai iā’u ra »

’A ha’amata nā roto i te tai’ora’a i te Philipi ’e te Kolosa, ’e te ferurira’a nā roto i te pure i te ha’api’ira’a tumu tā te Fatu e hina’aro ia ’outou ’ia ha’api’i. ’A vaiiho i te Vārua ’ia arata’i ia ’outou ’a feruri ai ’outou i te mau uira’a ’e te mau rāve’a tauturu e nehenehe ia ’outou ’ia fa’a’ohipa nō te ha’api’i i teie ha’api’ira’a tumu.

Pāpa’i i tō ’outou mau mana’o

Ani ’ia fa’a’ite mai i te mau mana’o

’A ani i te mau pīahi ’ia pāpa’i i ni’a i te ’iri pāpa’ira’a te hō’ē tā’o ’aore rā te hō’ē pereota ’o te ha’apoto mai i te mea tā rātou i ha’api’i mai nā roto mai i te Philipi ’e te Kolosa ’e ’ia ha’amāramarama mai i muri iho i tā rātou mā’itira’a. ’A fa’aitoito ia rātou i te fa’a’ite mai i te mau ’īrava ’ei tufa’a nō tā rātou ha’amāramaramara’a.

Ha’api’i i te ha’api’ira’a tumu

Philipi 2:1–5, 14–18 ; 4:1–9 ; Kolosa 3:1–17

E riro te mau pipi a Iesu ’ei mea « ’āpī » ’ia ora ana’e rātou i te ’evanelia.

• E hina’aro paha ’outou i te tauturu i tā ’outou mau pīahi ’ia fa’ahōho’a i te aura’a ’ia « ha’apae i te ta’ata tahito » ’e ’ia « fa’ata’ata ’āpī » nā roto ia Iesu Mesia (Kolosa 3:9–10). Nō te ravera’a i te reira, e nehenehe tā ’outou e fa’a’ite’ite i te tahi mea tahito ’e te tahi mea ’āpī (mai te hō’ē mā’a hotu tei para roa ’e te hotu ’āpī ’e ’aore rā te hō’ē ’ahu tahito ’e te mea ’āpī. E nehenehe tā te mau pīahi ’ia ’āparau e nāhea e nehenehe ai ia tātou ’ia riro ’ei mea « ’āpī » nā roto i tō tātou fa’aro’o ia Iesu Mesia ’e tō tātou hina’aro i te ora i tāna ’evanelia. ’Ei tufa’a nō teie ’āparaura’a, e nehenehe tā ’outou e ani i te ’āfara’a o te mau pīahi ’ia tai’o i te Philipi 2:1–5, 14–18 ; 4:1–9 ’e te tahi atu ’āfara’a te Kolosa 3:1-7, ma te ’imi i te mau tāpa’o nō te « ta’ata tahito » ’e te « ta’ata ’āpī ». E nehenehe ato’a ’outou e ani i te mau pīahi ’ia fa’a’ite mai e nāhea te fa’aro’ora’a ia Iesu Mesia ’e te orara’a i te ’evanelia i tauturu ai ia rātou ’ia riro ’ei mau ta’ata ’āpī. Te tahi atu mau pāpa’ira’a mo’a tā ’outou e nehenehe e ’imi ’āmui te Roma 6:3–7 ; Mosia 3:19 ; ’e Alama 5:14, 26.

Philipi 4:1–13

E nehenehe tā tātou e ’ite i te ’oa’oa i roto i te Mesia, noa atu e aha tō tātou huru orara’a.

• Noa atu e mea ta’a ’ē tō tātou huru orara’a i tō Paulo, e nehenehe pā’āto’a tātou ’ia ha’api’i i tōna hina’aro i te poupou ’e te ’oa’oa i roto i te mau huru ato’a o tōna orara’a. Nō te ha’amata i te hō’ē tau’ara’a parau nō ni’a i teie parau tumu, e nehenehe ’outou e tai’o fa’ahou i te mau tāmatara’a tā Paulo i fa’aruru (’a hi’o, ’ei hi’ora’a i te 2 Korinetia 11:23–28). E nehenehe tā ’outou e ani i muri iho i te mau pīahi ’ia tai’o fa’ahou i te Philipi 4:1–13 nō te ’imi i te a’o tā Paulo i hōro’a ’o te nehenehe e tauturu ia tātou ’ia ’oa’oa e tae noa atu i roto i te mau tau tāmatara’a.

  Mai te mea e hina’aro ’outou i te fa’ahōhonu atu ā i teie parau tumu, e nehenehe tā ’outou e ani i te hō’ē pīahi ’ia fa’a’ite mai i te tahi mau ’ā’amu ’aore rā fa’ahitira’a parau fa’aitoito nō roto mai i te a’ora’a a te peresideni Russell M. Nelson « Te ’oa’oa nō te oraora i te pae Vārua » (Ensign’aore rā Liahona, Novema 2016, 81–84), ’aore rā e nehenehe tā te mau pīahi ’ia māta’ita’i i te video « Tāmatara’a a te ’enemi » (LDS.org). Nāhea te mau ta’ata i roto i te a’ora’a a te peresideni Nelson ’aore rā te vahine i roto i te video i ’ite ai i te ’oa’oa, noa atu tō rātou huru orara’a fifi ?

• Penei a’e e nehenehe i te mau pīahi ’ia ’ite i te mana’o tauturu i roto i te Philipi 4 ’o te nehenehe e tauturu ia rātou ’ia fa’aruru ana’e rātou i te mau tāmatara’a. E nehenehe tā ’outou e hōro’a i te pīahi tāta’itahi i te hō’ē tāreta ’ia nehenehe ia rātou ’ia pāpa’i i te mea tā rātou i ’ite. ’A ani ia rātou ’ia tu’u te reira i te vāhi e ’ite ai rātou ’ia hina’aro ana’e rātou i te reira.

• I te tahi mau taime e nehenehe te hō’ē hīmene e fa’arahi i tō tātou ’ite nō ni’a i te mau pāpa’ira’a mo’a. ’Ei hi’ora’a, i muri a’e i te tai’ora’a i te Philipi 4:7, 13 , e nehenehe tā ’outou e hīmene ’āmui « I Hea Vau e Fāri’i ai i te Hau ? » ’aore rā te ’īrava mātamua nō « Pe’e Au Ia ’Oe » (Te Mau Hīmene, nūmera  62, 131). E aha ïa te mau tū’atira’a tā te mau pīahi e ’ite ra i rotopū i te mau parau a teie nā hīmene e piti ’e te Philipi 4:7, 13 ? Penei a’e e nehenehe tā rātou e fa’a’ite mai i te mau taime ’a ’ite ai rātou i te « hau a te Atua, ’o tei hau ’ē atu i te ’ite ta’ata nei » ’aore rā i te taime i ’ite ai rātou i te pūai « nā roto i te Mesia » nō te ravera’a i te tahi mea e ’ore roa e noa’a i te rave nā roto i te tahi ’ē atu rāve’a. E nehenehe te ’ohipa i tupu ’ia Elder Jay E. Jensen, tei ’itehia i roto i « Te tahi atu ā mau rāve’a tauturu », e tauturu i te tau’ara’a parau nō ni’a i teie mau ’īrava.

• Nō te mea ho’i ē te rahi noa atura te ’ino i roto i te ao i teie nei, e fana’o ïa te mau pīahi nā roto i te a’o a Paulo ’ia « ha’amana’o » i te mau mea ha’avare ’ore, te mau mea au maita’i ra, te mau mea ti’a ra, te mau mea vi’ivi’i ’ore ra, te mau mea poupouhia ra, ’aore rā te mau mea ro’o maitata’i (Philipi 4:8). Penei a’e e nehenehe tā ’outou e fa’ata’a i te pīahi tāta’itahi (’aore rā i ni’a i te mau pupu iti ’o te mau pīahi) te hō’ē ’o te mau maita’i i fa’ahitihia i roto i te Philipi 4:8 ’aore rā Te mau Hiro’a Fa’aro’o 1:13. E nehenehe tā rātou tāta’itahi e fa’a’ohipa i te Arata’i nō te mau Parau Tumu nō te ’imi i te mau pāpa’ira’a mo’a nō ni’a i te maita’i tei fa’ata’ahia atu ia rātou ’e ’ia fa’a’ite mai i tō te piha ha’api’ira’a te mea tā rātou i ’ite. E nehenehe ato’a tā rātou e fa’a’ite mai i te mau hi’ora’a nō taua maita’i ra i roto i te orara’a o te mau ta’ata. Nāhea tātou i te « ’imi i teie mau mea » ?

Kolosa 1:12–23; 2:3–8

’Ia « a’ahia » tō tātou fa’aro’o i ni’a ia Iesu Mesia, e pāruru-pūai-hia ïa tātou i te mau fa’atianira’a a tō te ao nei.

• E hōro’a mai te ’itera’a pāpu o Paulo nō ni’a i te Fa’aora tei ’itehia i roto i te Kolosa 1:12–23 ; 2:3–8 i te hō’ē taime maita’i nō te mau pīahi ’ia feruri ’e ’ia ha’apa’ari i tō rātou fa’aro’o. E nehenehe tā te mau pīahi ’ia ’imi i teie mau ’īrava nō te ’ite i te mau mea ’o te ha’apa’ari i tō rātou fa’aro’o ia Iesu Mesia. E aha ïa te aura’a o te parau « ’ia a’ahia ’e ’ia pātuhia i ni’a ’ia [Iesu Mesia] » ? (Kolosa 2:7). E nehenehe te hōho’a nō te hō’ē tumu rā’au i roto i te arata’ira’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare ’e te video « Te mau pūāhiohio pae Vārua » (LDS.org) e tauturu i te mau pīahi ’ia tau’aparau i teie ’īrava. (’A hi’o ato’a Neil L. Andersen, « Te mau pūāhiohio pae Vārua », Ensign ’aore rā Liahona, Mē 2014, 18–21.) E aha te nehenehe e ha’apa’ari ’aore rā e ha’aparuparu i te mau a’a o te hō’ē tumu rā’au ? Nāhea « te a’ara’ahia ’e te pātura’ahia i ni’a ia [Iesu Mesia] » e ha’apa’ari ai ia tātou i mua i te mau mana fa’atianira’a a te ao nei ? (’a hi’o Kolosa 2:7–8 ; ’a hi’o ato’a Helamana 5:12 ; Etera 12:4).

• ’Ua ’ite paha tā ’outou mau pīahi i te mau ha’api’ira’a pa’ari ’e te mau peu a te ta’ata nei ’o te nehenehe e « ha’amou » i te fa’aro’o o te hō’ē ta’ata i te Mesia nō te mea tē pāto’i nei te reira i te mau parau mau a te ’evanelia ’e tē ha’afifi nei i te orara’a i te ’evanelia (Kolosa 2:8). Penei a’e e nehenehe tā te mau pīahi e tāpura i te tahi o teie mau mea (e nehenehe te mau mana’o tei hōro’ahia mai e Elder Dallin H. Oaks, tei ’itehia i roto i « Te tahi atu ā mau rāve’a tauturu », e tauturu). E nehenehe tā ’outou e tuatāpapa i muri iho e nāhea te a’ara’a i roto i te mau ha’api’ira’a a Iesu Mesia e tauturu ai ia tātou ’ia pe’e atu i te a’o a Paulo : « ’Ua fāri’i ’outou i te Fatu te Mesia ra ia Iesu, e ha’apa’o ā ’outou i tāna » (Kolosa 2:6). Nāhea e nehenehe ai ia tātou ’ia pāturu i te tahi ’e te tahi i roto i tā tātou mau tauto’ora’a ’ia pe’e atu i te Fa’aora ’eiaha ra i te mau peu hape a te ao nei ?

Fa’aitoito i te ha’api’ira’a mai i te fare

’Ua hāmani-’ino-a’ena-hia ānei tā ’outou mau pīahi nō tō rātou ti’aturira’a i te ’evanelia ? ’A parau atu ia rātou ē tē vai nei i roto i te 1 ’e 2 Tesalonia te a’o tā Paulo i hōro’a i te feiā mo’a e ora ra i rotopū i te hāmani-’ino-ra’a pūai ’e ’o tei fa’aea itoito noa rā.

Te tahi atu ā mau rāve’a tauturu

Philipi ; Kolosa

Te hau tei hau ē atu i te ’ite ta’ata.

’A tāvini ai ’oia ’ei melo nō te Hitu ’Ahuru, ’ua fa’a’ite mai Elder Jay E. Jensen i teie ’ohipa tei tupu :

« Tā māua mo’otua iti o Quinton, e mea rahi roa tōna mau fifi i tōna fānaura’ahia mai, ’e ua ora ’oia e toru hepetoma toe e matahiti ai, ’e i roto i taua ārea taime ra, ’ua tere tāmau noa ’oia i te fare ma’i, ’e i rāpae i te fare ma’i. Tē ora ra māua te tuahine Jensen i te fenua Raparata i taua taime ra. ’Ua hinaaro roa māua e pārahi i rotopū i tā māua mau tamari’i nō te fa’aitoito ia rātou ’e ’ia fa’aitoito-ato’a-hia māua nā roto ia rātou. ’O teie tā māua mo’otua tā maua i here roa ’e i hinaaro roa e pārahi i piha’i iho iāna. Tā māua noa, ’o te pure ïa, ’e ’ua nā reira māua ma te u’ana !

« Tei roto vau ’e te tuahine Jensen i te hō’ē tere ha’ati i te misiōni i fāri’i ai māua i te parau ē, ’ua pohe ’o Quinton. ’Ua ti’a noa a’e ra māua i roto i te piha tomora’a o te hō’ē fare purera’a ’e ’ua tauahi ’e ’ua tamarū māua te tahi i te tahi. Tē fa’a’ite pāpū atu nei au ia ’outou ē, ’ua tae mai te hau i roto ia māua mai ō mai i te Vārua Maita’i ra, te hō’ē hau e’ita e roa’a ’ia feruri e tae roa mai i teie mahana (’a hi’o ’ia Philipi 4:7). ’Ua riro ato’a māua ’ei ’ite nō te hōro’ara’a parau-’ore-hia a te Vārua Maita’i i roto i te orara’a ’o tā māua tamaiti ’e te tamahine huno’a ’e tā raua mau tamari’i tei fa’ahitihiti i te parau nō taua taime ra ma te fa’aro’o, ma te hau ’e ma te māhanahana » (« Te Vārua Maita’i ’e te heheura’a Ensign ’aore rā Liahona, Novema 2010, 78).

Mau parau tumu o te ’evanelia ’e te mau peu a te ta’ata nei.

’Ua ’ite Elder Dallin H. Oaks e rave rahi mau peu o te ao nei tei fa’ahapa i te mau parau mau o te ’evanelia (’a hi’o « Te tātarahapara’a ’e te tauira’a », Ensign ’aore rā Liahona, Novema 2003, 37–40):

• Ha’afaufa’a ’ore i te ture nō te vi’ivi’i ’ore

• Te haere tāmau-’ore-ra’a ’e ma te fa’aea noa i te purera’a

• ’Ōfatira’a i te Parau Pa’ari

• Ha’avarera’a

• Hia’aira’a nō te mau ti’ara’a teitei i roto i te mau ti’ara’a i roto i te ’Ēkālesia

• Te hō’ē peu nō te tāparura’a ’eiaha rā e hōpoi’a nā te ta’ata tāta’itahi

Ha’amaita’ira’a i tā tātou ha’api’ira’a

’A fa’a’ohipa i te pehe E fa’ahaere mai te pehe mo’a i te mana o te Vārua Maita’i. E nehenehe te reira e fa’atupu i te vārua tura ’e e fa’auru i te ha’apa’ora’a ’e te ’ohipara’a. A feruri e nāhea « te ha’api’ira’a ’e te a’ora’a i te tahi ’e te tahi nā roto i te mau Salamo ’e te mau hīmene » e riro ai ’ei tufa’a nō tā ’outou piha ha’api’ira’a (Kolosa 3:16 ; ’a hi’o ato’a i te Ha’api’ira’a mai tā te Fa’aora, 22).