« 21–27 nō ’Ātopa. 1 ’e 2 Tesalonia : ’Ia ’ore tō ’outou ’ā’au ’ia ’āueue vave, ’ia ’ore ’ia hitima’ue » Mai pe’e mai—nō te Ha’api’ira’a Sābati : Faufa’a ’Āpī 2019 (2019)
« 21–27 nō ’Ātopa. 1 ’e 2 Tesalonia », Mai pe’e mai—nō te Ha’api’ira’a Sābatil : 2019
21–27 nō ’Ātopa
1 ’e 2 Tesalonia
« ’Ia ’ore tō ’outou ’ā’au ’ia ’āueue vave, ’ia ’ore ’ia hitima’ue »
’Ua ha’apī’i Alama ē : « ’Eiaha ho’i e fa’ati’a i te tahi ta’ata ’ei ’orometua ’e ’ei ha’api’i nō ’outou, maori rā e ta’ata ’oia nō te Atua, i te haerera’a nā tōna ra mau ’ē’a, ’e i te ha’apa’ora’a i tāna mau fa’aue » (Mosia 23:14). E aha tā teie pāpa’ira’a mo’a e parau mai nei e nāhea e ti’a ai ia ’outou ’ia fa’aineine ia ’outou iho nō te ha’api’i ?
Pāpa’i i tō ’outou mau mana’o
Ani ’ia fa’a’ite mai i te mau mana’o
’A hōro’a i te mau pīahi te tahi nau minuti nō te hi’o ’oi’oi noa i te 1 ’e 2 Tesalonia ’e ’ia ’imi i te hō’ē ’īrava ’o tei fa’aputapū i tō rātou ’ā’au. ’A ani ia rātou ’ia fa’a’ite i tā rātou mau ’īrava i te tahi atu pīahi i roto i te piha, ’e ’a ani i muri iho i te tahi mau pea ’ia fa’a’ite mai i te mea tā rātou i ha’api’i mai nā roto mai i te tahi ’e te tahi.
Ha’api’i i te ha’api’ira’a tumu
E poro te mau tāvini nō te ’evanelia ma te ’ā’au tae ’e te aroha.
-
’Ua ha’amata Paulo i tāna ’episetole i tō Ephesia ma te fa’aha’amana’ora’a i te feiā mo’a i te huru i fa’a’ite ai ’oia ’e te tahi atu mau ta’ata i te ’evanelia ia rātou. E riro paha te reira ’ei taime maita’i nā tā ’outou mau pīahi ’ia hi’opo’a i te huru o tā rātou ha’api’ira’a ’e ’āpora’a mai i te ha’api’ira’a mai roto mai i te tahi ’e te tahi. E nehenehe tā ’outou e ani i te mau pīahi ’ia tai’o i te 1 Tesalonia1:5–8 ; 2:1–13 ’e ’ia ’ite i te mau parau tumu tei tū’ati i te fa’a’ite-maita’i-ra’a atu i te ’evanelia. E nehenehe tā rātou i muri iho ’ia pāpa’i i te mau uira’a tei niuhia i ni’a iho i teie mau ’īrava ’o te tauturu ia rātou ’ia hi’opo’a i tā rātou mau tauto’ora’a ’ia ha’api’i i te ’evanelia ia vetahi ’ē. ’Ei hi’ora’a, teie ïa te hō’ē uira’a « Tē riro ra ānei au ei hi’ora’a maita’i nō te mau mea tā’u i ’ite ? » (’a hi’o 1 Tesalonia 1:7). Nāhea te pe’era’a i te mau parau tumu i roto i teie ’īrava e tauturu ai ia tātou ’ia tāvini maita’i atu ā i te mau ta’ata tā tātou e ha’api’i nei ?
-
E nehenehe te tai’ora’a i te 1 Tesalonia 1:5–8 ; 2:1–13 e fa’aha’amana’o i te mau pīahi i te mau ’orometua ha’api’i mai te Mesia ra te huru tei ha’amaita’i ia rātou « mai te hō’ē metua tāne e nā reira i tāna ra mau tamari’i » (1 Tesalonia 2:11). ’A ani i te mau pīahi ’ia mā’imi i teie mau ’īrava nō te ’imi i te hō’ē tāpa’o ’o te hō’ē tāvini maita’i ’e ’ia ha’amana’o i te hō’ē ’orometua ha’api’i tā rātou i mātau ’o tei fa’ahōho’a i taua tāpa’o ra. E nehenehe tā ’outou e ani atu i te mau pīahi ’ia pāpa’i i te hō’ē rata ’aore rā te hō’ē parau ha’amāuruuru nā te ’orometua ha’api’i tā rātou e mana’o ra. ’A fa’aitoito ia rātou ’ia tu’u atu i roto i te rata ’aore rā i te parau ha’amāuruurura’a te hō’ē ’īrava nō roto mai i te 1 Tesalonia ’e te hō’ē ha’amāramaramara’a e nāhea tō teie ’orometua ha’api’i fa’ahōho’ara’a i taua ’īrava ra. E fa’auruhia paha rātou ’ia hōro’a ti’a atu te rata ’aore rā te parau ha’amāuruurura’a i te ta’ata tā rātou i pāpa’i atu.
’Ia pe’e ana’e tātou ia Iesu Mesia, e nehenehe ïa tātou ’ia riro mai ’ei mea mo’a.
-
’Ua ha’api’i Paulo i te feiā mo’a nō Tesalonia ē « ’aore ho’i te Atua i nomino mai ia tātou nō te parau faufau, ’ia maita’i rā » (1 Tesalonia 4:7). Nō te ha’amata i te hō’ē ’āparaura’a nō ni’a i te mo’ara’a, e nehenehe tā ’outou mau pīahi ’aore rā te hō’ē ta’ata e hīmene i te « ’E te Fatu Here » (Te mau Hīmene, nūmera 65). ’A ani i te mau pīahi ’ia paraparau nō ni’a i te mau tāpa’o nō te mo’ara’a tei fa’ahitihia i roto i te hīmene tei riro ’ei mea faufa’a nō rātou. ’A pāpa’i i ni’a i te ’iri pāpa’ira’a Fa’arahi mai nā i to’u maita’i, … ’e ’a ani i te mau pīahi ’ia hi’o i te mau tā’o ’aore rā te mau pereota i roto i te 1 Tesalonia 3:9–13 ; 4:1–12 nō te fa’ahope i te pereota. Nāhea e nehenehe ai ia tātou ’ia fa’ahotu i teie mau tāpa’o ?
-
Nō te tahi, e mea ataata paha te anira’a ’ia riro ’ei mea mo’a. E riro paha ’ei tauturura’a ’ia ’ite te mau pīahi ē te fa’atupura’a i te mo’ara’a e hō’ē ïa rāve’a ’o te tītau ia tātou ’ia « rahi atu ā » i te maorora’a ’o te tau (1 Tesalonia 4:10). Nō te fa’ahōho’a i teie ravera’a, e nehenehe tā ’outou e ani i te hō’ē pīahi ’ia paraparau mai nō ni’a i te hō’ē tāreni ’aore rā te hō’ē ’ohipa tei tītau i te tauto’ora’a tāmau, mai te hāmanira’a i te hō’ē tīfa’ifa’i ’aore rā te fa’ata’ira’a i te hō’ē mauha’a ’upa. Nāhea ïa te reira e riro ai e hō’ē ā huru ravera’a ’e te te tītaura’a ’ia riro ei mea mo’a. ’A ani i te mau pīahi ’ia tai’o fa’ahou i te 1 Tesalonia 3:9–13 ; 4:1–12 ’e ’ia fa’a’ite mai nō ni’a i te tūtavara’a e tītauhia ’ia riro ’ei mea mo’a mai tā Paulo i fa’ata’a mai. E aha ïa te mea e tauturu ia tātou ’ia nu’u atu i te mo’ara’a ?
1 Tesalonia 4:11–12 ; 2 Tesalonia 3:7–13
E ti’a ia tātou ’ia rave i te ’ohipa nō te fa’a’amu ia tātou iho ’e te feiā nava’i ’ore.
-
E nehenehe teie mau huru uira’a e fa’auru i te hō’ē tau’ara’a parau nō ni’a i te a’o a Paulo nō ni’a i te ’ohipa : E aha ïa te mau hotu nō te fa’atau ? I tō ’outou mana’o e aha tā Paulo e parau ra nā roto i te mau tā’o « hau » ’e « māite » ? (1 Tesalonia 4:11 ; 2 Tesalonia 3:12). E hina’aro paha ’outou ’ia pāpa’i i teie mau huru uira’a i ni’a i te ’iri pāpa’ira’a ’ia feruri te mau pīahi ’a tai’o ai rātou i te 1 Tesalonia 4:11–12 ’e 2 Tesalonia 3:7–13. ’A ani ia rātou ’ia ’āparau nō ni’a i teie mau uira’a nā roto i te mau pea, te mau pupu na’ina’i, ’aore rā ’ei piha ha’api’ira’a. E aha te tahi atu mau pāpa’ira’a mo’a ’o te tauturu ia tātou ’ia ta’a i te faufa’a rahi ’o te ’ohipa ’e te mau fifi nō te fa’atau ? (’a hi’o i te mau mana’o i roto i « Te tahi atu ā mau rāve’a tauturu »).
’Ua ti’a ’ia tupu te hō’ē tāivara’a hou te tae-piti-ra’a mai ’o Iesu Mesia.
-
E nehenehe te hāro’aro’ara’a i te Tāivara’a Rahi e ha’apa’ari i te ’itera’a pāpū o tā ’outou mau pīahi nō ni’a i te Fa’aho’ira’ahia mai o te ’evanelia a Iesu Mesia. Tei roto i te arata’ira’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare e rave rahi mau rāve’a tauturu nō ni’a i te tāivara’a. E nehenehe tā ’outou e ani i te tahi mau pīahi ’ia haere ineine mai nō te fa’a’ite i te mau mana’o nō roto mai i tā rātou tai’ora’a i teie mau rāve’a tauturu, ’aore rā e nehenehe tā ’outou e tai’o ’e e tuatāpapa ’āmui i te reira i roto i te piha ha’api’ira’a. Tē vai ato’a nei e rave rahi mau video nō ni’a i te tāivara’a i roto i « Te tahi atu ā mau rāve’a tauturu » ’o te nehenehe e tu’uhia atu i roto i tā ’outou ’āparaura’a.
-
E riro paha ’ei tauturura’a ’ia tuatāpapa i te tahi ’o te mau parabole tā te mau peropheta i fa’a’ohipa nō te fa’ata’a mai i te tāivara’a, mai te hō’ē ta’a-’ē-ra’a (’a hi’o i te 2 Tesalonia 2:3), te hō’ē o’e (’a hi’o Amosa 8:11–12), te mau ’ūrī taehae (’a hi’o Te mau ’Ohipa 20:28–30), ’e te mau tari’a ānoenoe (’a hi’o 2 Timoteo 4:3–4). ’A feruri i te vāhi i te mau pīahi nā roto i te mau pea ’e ’ia ani ia rātou ’ia tai’o i te hō’ē ’aore rā hau atu ’o teie mau pāpa’ira’a mo’a (’aore rā te tahi atu tā ’outou i mā’iti) ’e ’ia fa’a’ite mai i te mau ’īrava o te ha’api’i mai nō ni’a i te Tāivara’a Rahi. E aha tā te mau peropheta i ha’api’i nō ni’a i te tāivara’a ’e te hotu ’o te tupu mai ?
-
Nō te tauturu i te mau pīahi ’ia ha’api’i atu ā nō ni’a i te Tāivara’a Rahi, ’a ani ia rātou ’ia mana’o ē e hoa tō rātou tei ’ore i ta’a i te hina’arora’a nō te hō’ē fa’aho’i-fa’ahou-ra’a mai o te ’evanelia. ’A hāmani i te hō’ē tāpura e piti pae i ni’a i te ’iri pāpa’ira’a ’o tei pi’ihia Te mau tumu nō te tāivara’a ’e Te mau hotu o te tāivara’a ’A ani i te mau pīahi i roto i te mau pea ’aore rā mau pupu na’ina’i ’ia ’imi i te tufa’a tei pi’ihia « Te Tāivara’a Rahi » i roto i te ’A Poro Haere i Tā’u Nei ’Evanelia (mau ’api 35–36) ma te ’imi haere i te mau tumu ’e te mau hotu o te tāivara’a nō te pāpa’i atu i ni’a i te ’iri pāpa’ira’a. E aha ïa te mau mana’o i roto i teie tāpura tā rātou e nehenehe e fa’a’ohipa nō te tauturu i tō rātou hoa ’ia ta’a i te hina’aro nō te fa’aho’ira’a mai ?
-
E aha ïa te maita’i tā tō ’outou mau pīahi e fana’o nā roto i te ’āparaura’a e nāhea i te pāruru ia tātou iho ’ia ’ore e « tāiva atu » ? E nehenehe tā ’outou e ani ia rātou ’ia ’imi i roto i te 2 Tesalonia 2 ’e ’ia ’imi i te a’o tā rātou’e nehenehe e hōro’a atu i te hō’ē hoa nō te tauturu atu iāna ’ia ’ore ho’i ’oia ’ia tāiva.
Fa’aitoito i te ha’api’ira’a mai i te fare
Nō te fa’auru i te mau pīahi ’ia tai’o i te 1 ’e 2 Timoteo, Tito, ’e Philemona i teie hepetoma, ’a ani ia rātou ’ia feruri ē ’ua fāri’i rātou i te hō’ē rata nā te hō’ē ’āpōsetolo ma te hō’ē a’o e nāhea i te rave fa’aoti i tō rātou mau pi’ira’a i roto i te ’Ēkālesia. ’A parau atu ē ’ia feruri rātou i tō rātou mau pi’ira’a ’a tai’o ai rātou i teie mau rata a Paulo nō te mau fa’atere mātāmua o te ’Ēkālesia.
Te tahi atu ā mau rāve’a tauturu
1 ’e 2 Tesalonia
Mau Pāpai’ra’a Mo’a nō ni’a i te ’ohipa ’e te fa’atau.
Mau video nō ni’a i te tāivara’a i ni’a i te LDS.org.
-
« Te Tāivara’a Rahi »
-
« Tāivara’a—Tēnuare »
-
« Te Tāivara’a ’e te fa’aho’ira’a mai—’E aha ïa te faufa’a o te fa’aho’ira’a mai nō ’u »
Ha’amaita’ira’a i tā tātou ha’api’ira’a
’A fa’a’ohipa i te mau rāve’a huru rau nō te ha’api’i. E mea ’ōhie ’ia au maita’i noa i te fa’a’ohipara’a i te hō’ē noa huru rāve’a ha’api’ira’a, tera ra e tano ’ia fa’a’ohipahia te mau rāve’a ha’api’ira’a huru rau nō te mau pīahi huru rau o te piha ha’api’ira’a. ’A ’imi haere i te mau rāve’a huru rau nō tā ’outou huru ha’api’ira’a, mai te fa’a’ohipara’a i te mau video, te mau hōho’a peni, ’aore rā te pehe ’aore rā te hōro’ara’a i te mau pīahi te taime nō te ha’api’i atu (’a hi’o Ha’api’ira’a mai tā te Fa’aora, 22).