30 nō Tetepa–13 nō ’Ātopa

Ephesia

« ’Ei fa’aau i te feiā mo’a i te ’ohipa ra »

E tae mai te mau mana’o ’e te mau fa’a’itera’a nō ni’a i te mea ’e te huru ’ia ha’api’i, ’a tai’o ai ’outou ma te pure i te Ephesia, te mau a’ora’a nō te ’āmuira’a rahi tei tupu iho nei, teie arata’ira’a, ’e te Mai pe’e mai—nō te ta’ata hō’ē ’e te ’utuāfare.

Pāpa’i i tō ’outou mau mana’o

Ani ’ia fa’a’ite mai i te mau mana’o

’A feruri i te ani i te mau pīahi ’ia pāpa’i i te hō’ē pereota nō te ha’apotora’a i te tahi mea tā rātou i ’āpo mai i roto i tā rātou tuatāpapara’a i teie hepetoma ’e ’a tāpiri i tā rātou mau ha’apotora’a i ni’a i te ’iri pāpa’ira’a. ’A mā’iti haere i te tahi nau ha’apotora’a, ’e ’a ani i te mau pīahi tei pāpa’i i te reira ’ia fa’a’ite mai i tō rātou mau mana’o.

Ha’api’i i te ha’api’ira’a tumu

Ephesia 2:19–22 ; 4:4–8, 11–16

Nā te mau peropheta ’e te mau ’āpōsetolo—’e tātou pā’āto’a—e ha’apūai ’e e fa’atāhō’ē i te ’Ēkālesia.

• E nehenehe ānei tā ’outou ’e tā ’outou mau pīahi e patu ’āmui i te tahi mea nō te fa’ahōho’a e nāhea te ’Ēkālesia i te « pātura’ahia i ni’a iho i te niu o te mau ’āpōsetolo ’e te mau peropheta » ’e e nāhea tō te Fa’aora rirora’a ’ei « tihi rahi » ? (Ephesia 2:20). Penei a’e e nehenehe tā te mau pīahi e tāpa’o i te mau ’ōfa’i ’aore rā te mau ’āu’a parau ’e ’ia ha’aputuputu i te reira nō te hāmani i te hō’ē patu ’aore rā pīrāmī, ’e ’o Iesu Mesia ’e te mau ’āpōsetolo ’e te mau peropheta te niu. E nehenehe tā ’outou e fa’a’ite’ite i muri iho, e aha te tupu mai te mea ’e ’īriti-’ē-hia atu te Mesia ’aore rā te mau ’āpōsetolo ’e te mau peropheta. Nō te aha te tihi rahi i riro ai ’ei parabole maita’i nō Iesu Mesia ’e tāna ’ohipa i roto i te ’Ēkālesia ? (Nō te hō’ē fa’a’itei’tera’a ’o te hō’ē tihi rahi, ’a hi’o i « Te tahi atu ā mau rāve’a tauturu ».) E nehenehe tā te mau pīahi e ’imi i roto i te Ephesia 2:19–22 ; 4:11–16 i te mau ha’amaita’ira’a tā tātou e fāri’i nei māoti te mau ’āpōsetolo, te mau peropheta, ’e te tahi atu mau ta’ata fa’atere ’o te ’Ēkālesia. E aha ïa tā tātou e nehenehe e rave nō te patu i tō tātou orara’a i ni’a i tā rātou mau ha’api’ira’a ?

  

  ’O Iesu Mesia te tihi rahi o te ’Ēkālesia.

• Nō te fa’a’ite e nāhea te ha’api’ira’a tumu e ta’a-hape-hia ai e ’aita ho’i e arata’ira’a tāmau a te mau peropheta ’e te mau ’āpōsetolo, e nehenehe tā ’outou e ha’uti i te hō’ē ha’utira’a nō te parau atu i te hō’ē ’ā’amu poto i te hō’ē pīahi, ’ia ’ore te tahi atu mau pīahi ’ia fa’aro’o mai. I muri iho ’a ani i taua pīahi ra ’ia fa’a’ite fa’ahou i te ’ā’amu i te tahi atu pīahi e tae noa atu ’ua fa’aro’ohia te ’ā’amu nā te mau pīahi e rave rahi. I muri iho ’a ani i te pīahi hope’a tei fa’aro’o i te ’ā’amu ’ia fa’a’ite i te toe’a ’o te mau pīahi te mea tāna i fa’aro’o. ’Ua taui ra ānei te ’ā’amu ? E aha ïa te tupu mai ’āhani ’ua nehenehe i te ’orometua ha’api’i i te fa’a’āfaro i te mau hape ? E aha ïa tā teie ha’utira’a e ha’api’i mai ia tātou nō ni’a i te tumu e ti’a ai « i te ’Ēkālesia a te Mesia ’ia pātuhia i ni’a iho i te niu ’o te mau ’āpōsetolo ’e te mau peropheta ?

• Mai te mea ’ua fa’aro’o tā ’outou mau pīahi i te ’āmuira’a rahi mai te taime hope’a i fārerei ai ’outou, ’a ani ia rātou ’ia fa’a’ite mai ē nāhea te mau mea tei ha’api’ihia i roto i te ’āmuira’a i tauturu ai i te fa’atupu i te mau fā tei fa’ahitihia i roto i te Ephesia 4:11–16.

• Penei a’e e nehenehe tā ’outou e hōro’a i te hō’ē taime nō te tāpura i te tahi ’o te mau « ’ohipa » ’aore rā hōpoi’a i pi’ihia atu rātou i roto i te ’ēkālesia (’a hi’o Ephesia 4:1)—’ei hi’ora’a, e ’orometua hāhaere, e metua, e pipi nā te Mesia, e te tahi atu ā. I muri iho e nehenehe tā rātou e taui i te mau tāpura ’e te tahi atu pīahi, ’a tai’o i te Ephesia 4:4–8, 11–16, ’e ’ia fa’a’ite mai e nāhea te mau pi’ira’a ’e te mau ’ohipa i ni’a i tā rātou mau tāpura e tauturu ai i te ha’amaita’i i te tino o te Mesia. Nāhea e nehenehe ai ia tātou ’ia ha’a ’āmui ’ia riro ’ei hō’ē i raro a’e i te « hō’ē Fatu, hō’ē fa’aro’o, hō’ē bāpetizora’a » ?

Ephesia 5:22–6:4

E nehenehe te pe’era’a i te hi’ora’a o te Fa’aora e ha’apa’ari i te mau aura’a ’utuāfare.

• Noa atu ē, ’ua ora tō Ephesia i roto i te hō’ē ta’ere e ’aita te mau vahine fa’aipoipo i fa’arirohia ’ei ’aifāito i tā rātou mau tāne fa’aipoipo, tē vai noa nei ā ra te tahi a’o faufa’a rahi nō te mau tāne ’e te mau vahine fa’aipoipo i teie mahana. E nehenehe tā ’outou e pāpa’i i teie mau huru uira’a i ni’a i te ’iri pāpa’ira’a ’e ’ia ani i te mau pīahi ’ia ’āparau nō ni’a i te reira ’ia tai’o ana’e rātou i te Ephesia 5:22-33 i roto i te mau pupu : Nāhea tō te Mesia fa’a’itera’a i tōna here nō te ’Ēkālesia ? E aha ïa tā tātou e nehenehe e rave nō te pe’e i tōna hi’ora’a nā roto i tō tātou huru i ni’a i tō tātou mau hoa fa’aipoipo ? E nehenehe tā ’outou e ani i te mau pīahi ’ia fa’a’ite mai i te mau hi’ora’a i reira tō rātou ’itera’a i te huru mai tō te Mesia ra ’o te mau hoa fa’a’ipoipo i ni’a i te tahi ’e te tahi. E nāhea ïa tātou ’ia fa’a’ohipa i te reira mau parau tumu i roto i te tahi atu mau aura’a ’utuāfare ?

• Noa atu ē, ’ua fa’ata’ehia te a’o a Paulo ’ia « fa’atura atu i tō metua tāne ’e tō metua vahine » (Ephesia 6:2) i te mau tamari’i, e nehenehe ato’a te reira e tano i ni’a iho ia tātou, noa atu e aha tō tātou fāito matahiti ’aore rā te huru o te ’utuāfare. ’A ani i te mau pīahi ’ia feruri e nāhea rātou e fa’a’ohipa ai i te a’o a Paulo i roto i te Ephesia 6:1–3 i ni’a ia rātou iho. ’Ei hi’ora’a, nāhea e nehenehe ai ia tātou ’ia fa’atura i tō tātou mau metua noa atu ’aita tā rātou mau mā’itira’a i tū’ati i te mau ha’api’ira’a a Iesu Mesia ? E nehenehe tā ’outou e hōro’a atu i te mau pīahi te tahi nau minuti nō te pāpa’i i te mea tā rātou e nehenehe e rave nō te fa’atura maita’i a’e i tō rātou mau metua.

• Mai te mea tē vai ra te mau metua—’aore rā te mau metua i te mau mahana i mua nei—e mau tamari’i ’āpī tā rātou i roto i tā ’outou piha ha’api’ira’a, e fana’o paha ïa rātou i te tuatāpapara’a i te Ephesia 6:4. E aha ïa te aura’a ’ia ha’api’i i te mau tamari’i ’ia « pa’ari ma te a’o a te Fatu ra » ? Penei a’e e nehenehe tā te mau pīahi e mau tamari’i pa’ari a’e tā rātou ’ia fa’a’ite mai i te aura’a nō te reira nō rātou e nāhea tō rātou tāmatara’a i te fa’a’ohipa i teie a’o i roto i tō rātou ’utuāfare.

Ephesia 6:10–18

E pāruru ïa te ha’ana tama’i a te Atua ia tātou i te ’ino.

• E aha ïa te mea ’o te tauturu i te tura’i i te mau pīahi ’ia tūtava i te ’ahu i te tā’āto’ara’a ’o te ha’ana tama’i a te Atua i te mau mahana ato’a ? E nehenehe tā ’outou e fa’aineine i te hō’ē ’ohipara’a i reira te mau pīahi e fa’atano ai i te mau tufa’a nō te ha’ana i te mau parau tumu ’aore rā viretu tā rātou e fa’ahōho’a nei i roto i te Ephesia 6:14–17. Nāhea e nehenehe ai i te tufa’a tāta’itahi o te ha’ana tama’i ’ia tauturu i te pāruru ia tātou i te ’ino ? (Nō te tahi tauturura’a, ’a hi’o i « Te tahi atu ā mau rāve’a tauturu ».) Nāhea tō te mau pīahi ’ahura’a i teie ha’ana tama’i ? ’Ei tufa’a nō teie ’āpara’ura’a, e nehenehe tā ’outou e fa’a’ite i te tātarara’a ’a te peresideni N. Eldon Tanner i roto i « Te tahi atu ā mau rāve’a tauturu ». E aha ïa tā tātou e nehenehe e rave nō te ’ite ’e nō te ha’apa’ari i te mau paruparu i roto i tō tātou ha’ana ?

Fa’aitoito i te ha’api’ira’a mai i te fare

Nō te fa’auru i te mau pīahi ’ia tai’o i te Philipi ’e te Kolosa, e nehenehe tā ’outou e parau atu ia rātou ē ’ua niuhia te hō’ē o te mau Hiro’a Fa’aro’o i ni’a i te hō’ē ’īrava tei ’itehia i roto i te hō’ē o te mau ’episetole. E nehenehe tā rātou e ’imi i te reira i roto i tā rātou mau tai’ora’a i teie hepetoma ?

Te tahi atu ā mau rāve’a tauturu

Ephesia

E aha ïa te hō’ē tihi rahi ?

Te tihi rahi o te ’ōfa’i mātāmua ïa tei tu’uhia i roto i te hō’ē niu. E riro te reira ’ei hō’ē tāpa’o fa’a’ite nō te fāitora’a ’e te tu’ura’a i te tahi atu mau ’ōfa’i, ’o te ti’a i te pāna’ihia atu i ni’a i te tihi rahi. Nō te mea ho’i tei ni’a i te reira te teiahara’a ’o te toe’a ’o te fare, e ti’a ïa i te tihi rahi ’ia pa’ari maita’i, ’ia pāpū, ’e ’ia ti’aturihia (’a hi’o « The Cornerstone », Ensign, Tēnuare 2016, 74–75).

Te ha’ana tama’i a te Atua

Te mau tau’upu i mauhia i te parau mau :Teie tufa’a o te ha’ana tama’i mai te hatua ïa i tātuahia i te ’ari’arira’a tino. Te aura’a ’o te tā’o tātuahia ’o tei ha’apūaihia ïa, ha’apa’arihia, ’aore rā ha’apāutuutuhia.

Tāpo’i ōuma :E pāruru te hō’ē tāpo’i ’ōuma i te māfatu ’e te tahi atu mau tufa’a faufa’a ’o te tino.

’Āvae fa’atāma’ahia:E fa’ahiti ra te reira i te ’ahu pāruru i te ’āvae o te hō’ē fa’ehau.

Pāruru :E nehenehe te hō’ē pāruru e pāruru fātata i te mau tufa’a ato’a o te tino i te mau ’arora’a huru rau.

Fa’a’upo’o :E pāruru te fa’a’upo’o i te upo’o.

’O’e :E fa’ati’a te hō’ē ’o’e e ’ia ’aro atu tātou i te ’enemi.

« ’A hi’opo’a i tō ’outou ha’ana tama’i ».

’Ua ani te peresideni N. Eldon Tanner, tei tāvini na ’ei tauturu i roto i te Peresidenira’a Mātāmua, i te mau melo o te ’Ēkālesia ’ia hi’opo’a i te pūai ’o tō rātou iho ha’ana tama’i nā roto i te ferurira’a i tā rātou mau tauto’ora’a ’ia ora i te ’evanelia. ’Ua ha’amāramarama mai ’oia i muri iho :

« Mai te mea… e mea paruparu tō tātou ha’ana tama’i, tē vai rā ïa te hō’ē vāhi pāruru-’ore-hia e nehenehe e ’itehia, te hō’ē vāhi paruparu ’ia ’arohia atu, ’e e noa’ahia tātou i te pēpē ’aore rā i te ha’amouhia e Sātane, ’o te ’imi e tae noa atu ’ua ’ite ’oia i tō tātou mau paruparu, mai te mea tē vai nei tō tātou paruparu.

« ’A hi’opo’a i tō ’outou ha’ana tama’i. Tē vai ra ānei te hō’ē vāhi tia’i-’ore-hia ’aore rā pāruru-’ore-hia ? ’A fa’aoti i teie nei ’ia tu’u mai i te tufa’a e ’ere nei. Noa atu e aha te tahitora’a ’aore rā te ’erera’a ’o te mau tufa’a i roto i tō ’outou ha’ana tama’i, ’a ha’amana’o noa ē tei roto ia ’outou te mana ’ia rave i te mau fa’atanora’a e tītauhia nō te fa’ahope roa i tō ’outou ha’ana tama’i.

« Nā roto i te parau tumu fa’ahiahia ’o te tātarahapara’a e nehenehe tā ’outou e taui i tō ’outou nei orara’a ’e ’ia ha’amata i te ’ahu ia ’outou iho i te ha’ana a te Atua nā roto i te tai’ora’a, te pure ’e te hō’ē fa’aotira’a ’ia tāvini i te Atua ’e ’ia ha’apa’o i tāna mau fa’aue » (« Put on the Whole Armor of God », Ensign, Mē 1979, 46).

Ha’amaita’ira’a i tā tātou ha’api’ira’a

Tūtava i te here mai tō te Mesia ra. E ti’a i tō ’outou mau aura’a ’e te mau pīahi ’ia tura’ihia ’e te here. E ha’amaita’ihia ïa ’outou ’e tā ’outou mau pīahi ’ia pure ana’e ’outou nō te fa’atupu i te aroha mai tō te Mesia ’e ’ia ’imi i te mau rāve’a ’ia fa’a’ite atu i te reira (’a hi’o Ha’api’ira’a mai tā te Fa’aora, 6 ; Moroni 7:48).