Tō te Mesia fāra’a ia Paulo i roto i te fare tāpe’ara’a

23–29 nō Tetepa.

Galatia

« E ha’apa’o i tā te Vārua ra »

’A tai’o ’e ’a feruri ai ’outou nā roto i te pure i te Galatia, e ha’api’i ïa te Fatu ia ’outou i te mea e ti’a ia ’outou ’ia fa’a’ite atu i tā ’outou mau pīahi. E fa’a’ite te pāpa’ira’a i tō ’outou mau mana’o i tō ’outou ’ā’au māuruuru i te Atua nō tāna tauturura’a (’a hi’o Paul B. Pieper, « Fa’ariro ’ei mea mo’a », Ensign ’aore rā Liahona, Mē 2012, 109).

Pāpa’i i tō ’outou mau mana’o

tāpa’o nō te fa’a’itera’a mai

Ani ’ia fa’a’ite mai i te mau mana’o

E mea pinepine te tai’ora’a i te mau pāpa’ira’a mo’a i te arata’i ti’a atu i te mau ’āparaura’a ’evanelia ’e te ’utuāfare ’aore rā te mau hoa. ’Ua tupu ānei te reira i tā ’outou mau pīahi i teie hepetoma ? ’A ani ia rātou ’ia fa’a’ite mai i te mau mea tei tupu ia rātou.

tāpa’o nō te ha’api’ira’a

Ha’api’i i te ha’api’ira’a tumu

Galatia 1:6–7; 3:1–5; 4:8–21; 5:1, 13–14

Te pūpū mai nei te ’evanelia a Iesu Mesia i te ti’amāra’a.

• E mea ’ōhie a’e te tai’ora’a i te hō’ē buka ’ia ’ite ana’e tātou i te tumu i pāpa’ihia ai te reira. Nō reira, e mea maita’i paha ’ia ha’amata i tā ’outou ’āparaura’a nō ni’a i te Galatia nā teie huru uira’a « I tō ’outou mana’o e aha te tumu ’o Paulo i pāpa’i ai ’oia i teie ’episetole ? » ’aore rā « E aha ra ïa te fifi tā Paulo e tāmata nei i te tātara ? » ’A ani i te mau pīahi ’ia ’imi i te mau tāpa’o fa’a’ite i roto i te Galatia 1:6–7; 3:1–5 ; 4:8–21. Nāhea te pōro’i a Paulo i faufa’ahia ai nō tātou i teie mahana ?

• ’Ua mana’o te tahi feiā mo’a nō Galatia ē ’ua ti’a ia rātou ’ia tāmau noa i te ora i te ture a Mose. I tō Paulo mana’ora’a, e orara’a ïa teie i roto te hō’ē « zugo tāvini » ’ia fa’aauhia i te ti’amāra’a tei hōro’ahia mai i roto i te ture a te Mesia (Galatia 5:1). Noa atu ē ’aita tātou e fa’aruru tāmau nei i teie fifi i teie mahana, e fa’aruru pā’āto’a rā tātou i te hō’ē ā huru mā’itira’a i rotopū i te tītīra’a vārua ’e te ti’amāra’a nā roto ia Iesu Mesia. Nō te tauturu i te mau pīahi ’ia ’imi i te mau ha’api’ira’a a Paulo nō ni’a i te ti’amāra’a ’e te tītīra’a, e nehenehe tā ’outou e ani ia rātou ’ia fa’a’ite mai i te mau peu ’e te mau ’ohipa ’o te nehenehe e arata’i ti’a atu i te tītīra’a vārua (mai te mau peu ta’ere, te mau peu ’ino, te mau ti’aturira’a hape, ’aore rā te fa’atumura’a’ i ni’a i te mau ’ohipa nō rāpae au ’eiaha rā i ni’a i te fa’afāriura’a i roto i te ta’ata iho. ’Ia au i te Galatia 5:1, 13–14, nāhea tātou e ’ite ai te ti’amāra’a i te fa’atītīra’a vārua ? Nāhea tō te mau pīahi ’itera’a i te ti’amāra’a tei fafauhia i roto i te ’evanelia a te Mesia ? E nehenehe ato’a tā ’outou e ani i te mau pīahi ’ia fa’a’ite mai e nāhea rātou ’ia pāhono i te tahi ta’ata tei mana’o e tā oti’a te orara’a i te ’evanelia i te ti’amāra’a o te ta’ata tāta’itahi.

Galatia 5:16–26

Mai te mea « e pe’e tātou i tā te Vārua », e fāri’i ïa tātou i te « hotu a te Vārua ».

• E rave rahi mau ta’ata e fifi nei i te ’ite i te mana o te Vārua. E nehenehe tā teGalatia 5 e tauturu i tā ’outou mau pīahi ’ia ’ite i te hotu a te Vārua. Penei a’e e nehenehe tā ’outou e ha’amata ma tē ani atu ia rātou ’ia mā’imi i roto ia Galatia 5:22–25 nō te ’imi i te mau parau tā Paulo i fa’a’ohipa nō te fa’a’ite i te hotu a te Vārua. Nō te aha te hotu i riro ai ’ei parabole maita’i nō te fa’a’ite i te huru e ha’amaita’i mai ai te Vārua ia tātou ? Penei a’e e nehenehe tā te mau pīahi e fa’a’ite mai e nāhea teie hotu i ’itehia ai i roto i tō rātou orara’a ’aore rā te orara’a o te mau ta’ata tā rātou i mātau. Te tahi atu mau rāve’a tauturu e ti’a ’ia hi’ohia tei roto ïa i te Mataio 7:16–18 ; Ioane 14:26–27 ; Moroni 7:13–17 ; Te Parau Ha’api’ira’a ’e te mau Parau Fafa’u 11:12–13 ; ’e te mau fa’ahitira’a parau a te peresideni Gordon B. Hinckley i roto i « Te tahi atu ā mau rāve’a tauturu ».

  mau ’apara i ni’a i te hō’ē tumu rā’au

  E nehenehe tā tātou e fāri’i i « te hotu a te Vārua » ’ia ’imi ana’e tātou i te reira.

• I te tahi mau taime e nehenehe tā tātou e ha’api’i mai nō ni’a i te hō’ē parau tumu nā roto i te ha’api’ira’a mai i te mea e’ita e tano i ni’a i taua parau tumu ra. ’Ei hi’ora’a, i roto i te Galatia 5:16–26, ’ua fa’a’ite Paulo e’ita e tano « te mau peu a te tino » e « te hotu a te Vārua ». Nō te tauturu i te mau pīahi ’ia feruri i te fāito o tō rātou « ha’apa’o i tā te Vārua », e nehenehe tā ’outou e parau ē ’ia tai’o rātou i te Galatia 5:16–26 ’e ’ia ha’amau i muri iho i te hō’ē hi’opo’ara’a tāta’itahi mai te Hōro’ara’a i te peu maita’i i te ’api  126 nō te ’Ia Poro Haere i Tā’u Nei ’Evanelia. ’Ei hi’ora’a, nō te ’ohipa tāta’itahi tei tāpa’ohia i roto i te mau ’īrava 19–23, e nehenehe tā rātou e pāpa’i i te hō’ē uira’a mai teie « E mana’o nounou ānei tō’u i tō’u mau hoa? » ’aore rā « Tē ’ite ānei ra vau i te here i te mau mahana ato’a ? » ’Eiaha te mau pāhonora’a a te mau pīahi i tā rātou mau hi’opo’ara’a ia rātou iho ’ia fa’a’ite’itehia, e nehenehe rā tā ’outou e ani ia rātou ’ia fa’a’ite mai i te mau mana’o nō te tauturu i te tahi ’e te tahi ’ia « ha’apa’o i tā te Vārua ». Mai te mea ’aita tō ’outou e taime nō te fa’aoti i teie ’ohipa i roto i te piha ha’api’ira’a, e nehenehe tā ’outou e parau atu i te mau pīahi ’ia fa’aoti atu i te reira i te fare.

Galatia 6:7–10

’Ia ueue ana’e tātou « i tā te Vārua », e ’ō’oti ïa tātou i te mau ha’amaita’ira’a ’ia tae i te taime ti’a.

• E nehenehe te tai’ora’a i te Galatia 6:7-10 e tauturu i te mau pīahi ’ia feruri hōhonu atu ā i ni’a i te mau hope’ara’a roa nō tā rātou mau mā’itira’a. Nō te tauturu ia rātou, e nehenehe ’outou e ’āfa’i mai i te mau huru huero ato’a, ’e te mau rā’au tupu, te mau mā’a hotu, ’aore rā te mau pota ’o te tupu mai roto mai i teie mau huero tāta’itahi (’aore rā ’e nehenehe tā ’outou e ’āfa’i mai i te mau hōho’a nō teie mau mā’a hotu). E nehenehe tā te mau pīahi ’ia ha’a ’āmui nō te fa’atano i te huero tāta’itahi i te hotu tāna e fa’atupu mai. E nehenehe tā rātou e tai’o mai i muri iho i te mau ’īrava 7–10 ’e ’ia paraparau nō ni’a i te aura’a ’ia ueue « i tā te tino » ’e « i tā te Vārua ». (E nehenehe te pōro’i a Elder Ulisses Soares i roto i « Te tahi atu ā mau rāve’a tauturu » e tauturu.) E aha tā tātou e ’ō’oti ’ia ueue ana’e tātou i tā te tino ? E aha tā tātou e ’ō’oti ’ia ueue ana’e tātou i tā te Vārua ? (’a hi’o Galatia 5:22–23). ’A feruri i te ani i te mau pīahi ’ia feruri i te mau ha’amaita’ira’a vārua tā rātou e ti’aturi i te fāri’i. E aha ïa te « ueuera’a » tā tātou e nehenehe e rave i teie nei ’ia ineine nō te fāri’i i taua mau ha’amaita’ira’a ra ? E hina’aro ato’a paha ’outou e ani ia rātou ’ia pāpa’i i tō rātou mau mana’o ē, mai te mea e au rātou, ’ia fa’a’ite mai i te reira.

• Tē ’ite nei paha te tahi mau pīahi i te « rohirohi i te parau maita’i » (Galatia 6:9)—penei a’e nō te mea ’aita rātou i pāpū ē e hotu mai tā rātou mau tauto’ora’a. E riro paha te hō’ē ’āparaura’a nō ni’a i te Galatia 6:7–10 i te tauturu. Nō te ’ōmua i teie mau ’īrava, e nehenehe tā ’outou e ani i te tahi pīahi ’ia paraparau poto noa mai nō ni’a i te hō’ē taime i hina’aro ai ’oia i te fa’a’oroma’i ’a tamata ai ’oia i te fa’atupu i te tahi mea. E aha tā te ’ohipa i ravehia e teie ta’ata, mai te au i te Galatia 6:7–10, e ha’api’i mai nei ia tātou nō ni’a i tā tātou mau tauto’ora’a ’ia « ha’apa’o i tā te Vārua » ? Galatia 5:25

tāpa’o nō te ha’api’ira’a mai.

Fa’aitoito i te ha’api’ira’a mai i te fare

Nō te fa’aitoito i tā ’outou mau pīahi ’ia tai’o i te ’episetole i tō Ephesia, ’e nehenehe tā ’outou e parau atu ia rātou ē i roto i teie ’episetole e ha’api’i mai ïa rātou nāhea e nehenehe ai ia rātou ’ia « pāto’i atu i te mau rāve’a pa’ari a te diabolo » (Ephesia 6:11).

tāpa’o nō te mau rāve’a tauturu

Te tahi atu ā mau rāve’a tauturu

Galatia

Te mau hotu nō te orara’a i te ’evanelia.

’Ua ha’api’i te peresideni Gordon B. Hinckley : « Nāhea tātou e ’ite ai i te mau mea nō te Vārua ? Nāhea tātou e ’ite ai ē nō ’ō mai te reira i te Atua ra ? Nā roto ïa i te mau hotu o te reira. Mai te mea e arata’i atu te reira i te tupura’a ’e te rahira’a, mai te mea e arata’i atu te reira i te fa’aro’o ’e te ’itera’a pāpū, mai te mea e arata’i atu te reira i te hō’ē rāve’a maita’i a’e nō te rave i te mau mea, mai te mea e arata’i atu te reira i te atuara’a, nō ’ō mai ïa te reira i te Atua ra. Mai te mea e ha’aparuparu te reira ia tātou, mai te mea e ’āfa’i te reira ia tātou i roto i te pōuri, mai te mea e fa’aturori ’e e ha’ape’ape’a te reira ia tātou, mai te mea e arata’i te reira i te fa’aro’o ’ore, nō ’ō mai te reira i te diabolo ra ».

I te tahi atu taime, ’ua parau te peresideni Hinckley : « E ’ite ’outou i te mau muhumuhu a te Vārua nā roto i te mau hotu a te Vārua—te mea ’o te ha’amāramarama, ’o te fa’atupu mai i te au, ’o te ha’amaita’i ’e ’o te ha’apāpū ’e ’o te fa’ateitei ’e ’o te arata’i ia tātou i te mau mana’o maita’i a’e ’e te mau parau maita’i ’e te mau ’ohipa maita’i nā te Vārua ïa o te Atua. Tē mea ra ’o te ha’aparuparu, ’o te arata’i ia tātou i te mau ’ē’a au ’ore—nā te ’enemi ïa te reira. Tē mana’o nei au ē e mea pāpū maita’i, e mea ’ōhie noa » (Te mau Ha’api’ira’a ’a te mau Peresideni o te ’Ēkālesia : Gordon B. Hinckley [2016], 121).

Ueuera’a i tā te Vārua

’Ua ha’amāramarama mai ’o Elder Ulisses Soares ē : « Nō te ueue i tā te Vārua e ti’a ïa i tō tātou mau mana’o, tā tātou mau parau ’e tā tatou mau ’ohipa ato’a ’ia fa’ateitei ia tātou i te fāito hanahana ’o tō tātou mau metua i te ra’i ra. Tē fa’ahiti nei ra te mau pāpa’ira’a mo’a i te parau nō te tino mai te natura tino o te ta’ata tino nei, ’o te fa’ati’a ho’i i te mau ta’ata ’ia fa’ahemahia nā roto i te here rahi, te mau hina’aro, te mau hia’ai, ’e te mau tura’ira’a a te tino ’eiaha rā te ’imira’a i te faaurura’a nō ’ō mai i te Vārua Maita’i ra. Mai te mea e’ita tātou e ara maita’i, e nehenehe taua mau mea ra ’ia ’āmuihia e te tura’ira’a a te ’ino i roto i te ao nei, e arata’i atu ia tātou ’ia fa’a’o’hipa i te huru fa’atura ’ore ’e i te mea ’o te nehenehe e riro ’ei tuha’a nō tō tātou huru » (« A fa’aea noa i te pae o te Fatu ! » Ensign ’aore rā Liahona, Mē 2012, 39).

Ha’amaita’ira’a i tā tātou ha’api’ira’a

Tauturu i te mau pīahi ’ia turu i te tahi ’e te tahi ’Ua riro te pīahi tāta’itahi i roto i tā ’outou piha ha’api’ira’a ’ei puna rahi nō te ’itera’a pāpū, te mau mana’o ’e te orara’a i te ’evanelia. ’A ani ia rātou ’ia fa’a’ite ’e ’ia fa’aitoito i te tahi ’e te tahi » (Ha’api’ira’a mai tā te Fa’aora, 5).