« 26 nō ’Ātete–1 nō Tetepa. 1 Korinetia 8–13 : ‘’O te Tino ’Outou nō te Mesia’ » Mai pe’e mai—nō te Ha’api’ira’a Sābati : Faufa’a ’Āpī 2019 (2019)
« 26 nō ’Ātete–1 nō Tetepa. 1 Korinetia 8-13 », Mai pe’e mai—nō te Ha’api’ira’a Sābati : 2019
26 nō ’Ātete–1 nō Tetepa
1 Korinetia 8–13
« ’O te tino ’outou nō te Mesia »
’Ua ha’api’i mai Elder Richard G. Scott ē « e nehenehe tā tātou e ’ore e fa’aro’o i te ’arata’iraa faufa’a rahi a te Vārua nō tātou iho nō te mea ’aita tātou i pāhono, i pāpa’i ’e i fa’a’ohipa i « te mau fa’a’itera’a mātāmua tei tae mai ’ia [tātou] ra » (« ’Ia noa’a te arata’ira’a a te Vārua », Ensign ’aore rā Liahona, Novema 2009, 8).
Pāpa’i i tō ’outou mau mana’o
Ani ’ia fa’a’ite mai i te mau mana’o
’Ua fa’a’ohipa Paulo i te mau fa’aaura’a ’e te fa’ahōho’ara’a i roto i te 1 Korinetia 8–13, mai te hō’ē ta’ata horo i roto i te hō’ē horora’a, te hō’ē tino ta’ata, ’e i « te hō’ē sumebalo māniania » (1 Korinetia 13:1). E aha te mau mana’o o te mau pīahi nō ni’a i teie fa’ahōho’ara’a ? Nāhea te reira i tauturu ai ia rātou ’ia māramarama i te hō’ē parau mau o te ’evanelia ?
Ha’api’i i te ha’api’ira’a tumu
E fa’aruru pā’āto’a tātou i te fa’ahemara’a, ’ua hōro’a mai rā te Atua i te hō’ē rāve’a ’ia ’āpe atu i te reira.
-
Nāhea e nehenehe ai ia ’outou ’ia tauturu i te mau pīahi ’ia ’ite i te mau parau mau pūai i roto i te 1 Korinetia 10:13 ? Te hō’ē mana’o ’o te vahira’a ïa i te ’īrava nā roto i te mau pereota poto, ’e ’a hōro’a atu ai te reira mau pereota poto i te mau piahi tāta’itahi, ’e ’a ani ia rātou ’ia fa’ahiti fa’ahou i te mau pereota ’ia au i tā rātou iho mau parau. ’Ei hi’ora’a, e aha ïa te tahi atu rāve’a nō te parau « e parau mau tā te Atua » ’aore rā « e ti’a ia ’outou ’ia fa’a’oroma’i » ? E nehenehe tā ’outou i muri iho e tu’u ’āmui i te mau fa’ahitira’a parau a te mau pīahi ’e ’ia hi’o i te tahi atu ā mau fa’a’ohipara’a i roto i tō tātou orara’a. E nehenehe i te mau pīahi e fa’a’ite i te mau ’ohipa i tupu i reira tō rātou ’itera’a e mea mau te mau fafaura’a i roto i teie ’īrava. E aha ïa te tahi atu ā mau mana’o e nehenehe e noa’a ia ’outou i roto i teie mau ’īrava mai roto mai i te Alama 136:27-28 ?
-
’Eiaha e fa’aea noa i ni’a i te mau fa’ahemara’a ta’a ’ē a te tahi ta’ata, e hina’aro paha ’outou i te fa’atumu i te ’āparaura’a i ni’a i te 1 Korinetia 10:13 nō ni’a i te mau fa’ahemara’a « mai tā te ta’ata nei » ’ia au i te mau parau a Paulo. E nehenehe tā te mau pīahi e ha’amata nā roto i te ’itera’a i te mau fa’ahemara’a tā Paulo i fa’aara i roto i te mau ’īrava 1–12. E nehenehe ato’a tā rātou e hōro’a mai i te tahi mau hi’ora’a nō teie tau nō te mau fa’ahemara’a mātauhia, mai te mau fa’ahemara’a ’ia ha’avare, ’ia ’āfa’ifa’i parau, ’aore rā ’ia ha’avā ia vetahi ’ē. Nāhea ïa e nehenehe ai i te hō’ē ta’ata, nā roto i te tauturu a te Atua, ’ia « ora mai » i teie mau fa’ahemara’a ? E hina’aro paha ’outou i te fa’aha’uti i te tahi ’o teie mau hi’ora’a.
-
E mea faufa’a paha ’ia feruri i te 1 Korinetia 10:13 ’ia au i te hina’aro rahi o Paulo ’ia hō’ē te feiā mo’a. E aha ïa tā ’outou e nehenehe e rave nō te tauturu i te tahi ’e te tahi ’ia « ora atu » ’e « ’ia fa’a’oroma’i » i te mau fa’ahemara’a tā tātou e nehenehe e fa’aruru atu ? Nāhea te tāhō’ēra’a e tauturu ai ia tātou ’ia pāto’i atu i te fa’ahemara’a ?
1 Korinetia 10:16–17; 11:23–30
E fa’atāhō’ē te ’ōro’a ia tātou ’ei mau melo nō te ’Ēkālesia a te Mesia.
-
E nehenehe teie mau ’īrava e fa’auru i te hō’ē ’āparaura’a e nāhea te ’ōro’a e nehenehe ai ’ia fa’atāhō’ē i tā ’outou pāroita i roto i tā ’outou mau tauto’ora’a ’ia riro atu ā mai te Fa’aora te huru. E nehenehe tā ’outou e ha’amata nā roto i te tai’ora’a i te 1 Korinetia 10:16–17 ’e te mā’imira’a e aha te aura’a ’o te tā’o auhoara’a i roto i teie hi’ora’a (e nehenehe tā te tahi pīahi e hi’o i te mau tātarara’a i roto i te hō’ē fa’atoro parau). Nāhea te rave-’āmui-ra’a i te ’ōro’a mo’a i tauturu ai ia tātou ’ia hō’ē roa atu ā ? E aha tā tātou e nehenehe e rave nō te fa’atupu i te hō’ēra’a i roto i te purera’a ’ōro’a ? Nāhea te a’o a Paulo « E hi’opo’a māite te ta’ata iāna iho » e tū’ati ai i teie fā ? (1 Korinetia 11:28).
E ti’a ia tātou ’ia tūtava i te mau hōro’ara’a a te Vārua nō te ha’amaita’i i te mau tamari’i ato’a a te Metua i te Ao ra.
-
Nāhea e nehenehe ai ia ’outou ’ia tauturu i tā ’outou mau pīahi ’ia tai’o fa’ahou i te mau hōro’ara’a vārua tā Paulo i fa’ata’a mai ’e ’ia ’ite ē ’ua rau te huru o te mau hōro’ara’a vārua ? E nehenehe tā ’outou e hōro’a ia rātou hō’ē minuti nō te pāpa’i i te hō’ē tāpura nō te mau hōro’ara’a a te Vārua e rave rahi, tā rātou e nehenehe e feruri. ’Ia ’oti ana’e te reira, ’a ani i te mau pīahi ’ia fa’a’ite mai i te mea tā rātou i pāpa’i e tae noa atu ’ua fa’ahitihia te mau hōro’ara’a ato’a tā rātou i tāpura. I muri iho e nehenehe i te mau pīahi ’ia ’imi i te tahi atu mau hōro’ara’a nō te tū’u atu i ni’a i tā rātou tāpura nā roto i te ’imira’a i roto i te 1 Korinetia 12 ’e te tāpura a Elder Marvin J. Ashton i roto i « Te tahi atu ā mau rāve’a tauturu ». E aha ’o teie mau hōro’a tā te mau pīahi i ’ite i roto i te mau ta’ata tei mātauhia e rātou ? Nāhea te fa’atupura’a i teie mau hōro’ara’a e tauturu ai ia tātou ’ia riro mai ia Iesu Mesia rā te huru ?
-
Nō te tauturu i te mau pīahi ’ia ’ite i te mau hi’ora’a e nāhea te fa’atupura’a i tō rātou mau hōro’ara’a vārua e tauturu ai i te ha’amaita’i i te ’Ēkālesia, ’a ani ia rātou ’ia feruri i te mau hōro’ara’a vārua tei fāri’ihia e te mau ta’ata i roto i te mau pāpa’ira’a mo’a. Nō te mau mana’o, e nehenehe tā ’outou e fa’aue atu ia rātou ’ia mā’iti i te hō’ē ’o te mau pāpa’ira’a mo’a i roto i « Te tahi atu ā mau rāve’a tauturu » ’e ’ia fa’a’ite mai i te mau hōro’ara’a vārua tei fāri’ihia, i tō rātou mana’ora’a, e taua ta’ata ra. Nāhea te mau hōro’ara’a a teie mau ta’ata i ha’amaita’i ai ia rātou iho ’e ia vetahi ’ē ? Nāhea e nehenehe ai ia tātou ’ia fa’a’ohipa i tā tātou mau hōro’ara’a vārua nō te ha’amaita’i ia vetahi ’ē ’e ’ia ha’apūai i te tino o te Mesia, ’aore rā te ’Ēkālesia ? (’a hi’o 1 Korinetia 12:12–31 ; ’a hi’o ato’a 1 Korinetia 14:12).
-
Nō te tauturu i te mau pīahi ’ia ta’a e nāhea i te fa’atupu i te mau hōro’ara’a vārua, ’a ani ia rātou ’ia tai’o i te 1 Korinetia 12:27–31 ; Moroni 7:48 ; 10:23, 30 ; Te Parau Ha’api’ira’a ’e te Parau Fafau 46:8 ; ’e te fa’ahitira’a parau a George Q. Cannon i roto i « Te tahi atu ā mau rāve’a tauturu ». E aha tā teie mau rāve’a tauturu e ha’api’i mai nei ia tātou e nāhea e noa’a ai te mau hōro’ara’a vārua ? Nāhea te fa’atupura’a i te mau hōro’ara’a vārua e fa’ariro rahi ai ia tātou mai te Mesia ra te huru ? ’A ani i te mau pīahi ’ia mā’iti i te hō’ē hōro’ara’a e hina’arohia nei e rātou nō te fāri’i ’e nō te ’imi i te tauturura’a a te Fatu ’ia noa’a taua hōro’ara’a ra.
Te aroha ’o te hōro’ara’a vārua rahi roa a’e ïa.
-
Tē mana’o nei te tahi mau ta’ata ē te aroha ’o te mau ō ïa i te feiā vēvē ’aore rā i te hāmani-maita’i-ra’a a vetahi ’ē. Noa atu e nehenehe teie mau mea i te fa’a’ite pāpū mai i te aroha, e mea ’ā’ano atu ā ïa te tātarara’a a Paulo. Nō te tauturu i te mau pīahi ’ia tuatāpapa i te reira, e nehenehe tā ’outou e ani ia rātou ’ia feruri mamu noa i te 1 Korinetia 13 ’e ’ia feruri i te tahi ta’ata tā rātou i ’ite tei riro e hō’ē hi’ora’a maita’i nō te hō’ē ’aore rā hau atu ’o te mau tufa’a nō te aroha tā Paulo i fa’ahiti. E nehenehe tā te tahi mau pīahi e fa’a’ite mai i te ta’ata tā rātou i mana’o ’e te hō’ē ’ohipa i reira teie ta’ata i te fa’ahōho’ara’a i te aroha. E hina’aro paha ’outou i te tāpura i te mau tufa’a ’o te fa’a’itera’a a Paulo i ni’a i te ’iri pāpai’ra’a ’e ’ia ani i te mau pīahi ’ia fa’a’ite mai i te mau mana’o nō te aura’a o te parau « e fa’a’oroma’i roa » ’aore rā « e’ita e riri vave » (1 Korinetia 13:4–5). E mea nāhea tō te Fa’aora fa’ahōho’ara’a i teie mau maita’i o te aroha ? Nāhea tātou e fa’atupu ai i te aroha ? (’a hi’o Moroni 7:46–47).
Fa’aitoito i te ha’api’ira’a mai i te fare
’Ua ’ite ānei tā ’outou mau pīahi ē ’ua fa’ahitihia te mau ha’api’ira’a nō te mau bāpetizora’a nō te feiā pohe ’e nā bāsileia hanahana e toru i roto i te Bibilia ? ’A parau atu ia rātou e ha’api’i mai ïa rātou i teie mau parau mau ’a tuatāpapa ai rātou i te 1 Korinetia 14–16 i teie hepetoma.
Te tahi atu ā mau rāve’a tauturu
Mau hōro’ara’a vārua tei ’ore paha i mana’ohia e ’outou.
’Ua fa’a’ite mai Elder Marvin J. Ashton i teie mau hi’ora’a nō te mau mea tāna i pi’i e mau hō’ro’ara’a a te vārua « ’aita i ’ite maita’ihia : Te hōro’ara’a nō te ani ; te hōro’ara’a nō te fa’aro’o ; te hōro’ara’a nō te fa’aro’o ’e nō te fa’a’ohipa i te reo iti ha’iha’i ; te hōro’ara’a nō te ti’ara’a ’ia ta’i ; te hōro’ara’a nō te ha’apae i te mārō ; te hōro’ara’a nō te riro ’ei ta’ata au maita’i ; te hōro’ara’a nō te ha’apae i te fa’ahiti faufa’a ’ore noa i te parau ; te hōro’ara’a nō te ’imi i te parau ti’a ; te hōro’ara’a nō te ’ore e ha’avā ; te hōro’ara’a nō te hi’o i ni’a i te Atua nō te arata’ira’a ; te hōro’ara’a nō te riro ’ei pipi ; te hōro’ara’a nō te aupuru ia vetahi ’ē ; te hōro’ara’a nō te ti’ara’a ’ia feruri hōhonu ; te hōro’ara’a nō te hōro’a i te pure ; te hōro’ara’a nō te fa’a’ite i te hō’ē ’itera’a pāpū pūai ; te hōro’ara’a nō te fāri’i i te Vārua Maita’i » (« There Are Many Gifts », Ensign, Novema 1987, 20).
Mau hi’ora’a i roto i te mau pāpa’ira’a mo’a o te mau hōro’ara’a vārua.
’Imi i te mau hōro’ara’a vārua
’Ua parau te peresideni George Q. Cannon (1827–1901) nō te Peresidenira’a Mātāmua ē tā tātou hōpo’a ’o « te purera’a ïa i te Atua ’ia hōro’a mai ia [tātou] te mau hōro’ara’a ’o te fa’a’āfaro i tō [tātou] mau paruparu… ’Ua fa’ata’ahia te reira nō teie tumu. ’E’ita e ti’a i te hō’ē ta’ata ’ia parau ē, « e’ita tā’u e nehenehe e taui ; tō’u tera natura ». E ’ore ’oia e fa’ati’ahia i te reira, i te mea ē, ’ua fafau mai te Atua i te hōro’a mai i te pūai nō te fa’atiti’aifaro i teie mau mea, ’e ’ua hōro’a mai i te mau hōro’ara’a nō te ha’amou i te reira. Mai te mea te ’ere ra te hō’ē ta’ata i te pa’ari, e ’ohipa ïa nāna ’ia ani i te pa’ari i te Atua. Hō’ē ā huru ’e te tahi atu mau mea » (Millennial Star 23 nō ’Ēperera 1894, 260).
Ha’amaita’ira’a i tā tātou ha’api’ira’a
’A ora i te mau parau tumu tā ’outou e ha’api’i nei. E tauturu te orara’a i te mau parau tumu tā ’outou e ha’api’i nei ia ’outou nō te fa’a’ite pāpū pūai atu ā nō ni’a i teie mau parau tumu. ’Ua ha’api’i Paulo ē, « ’Oia ato’a te feiā i parau i te ’evanelia nei, ’ua ha’apa’ohia e te Fatu ’ia ora rātou i te ’evanelia » (1 Korinetia 9:14).