Korinetia, fenua Hereni Apato’a , te Pū ’Āmuira’a Tivira, hōho’a peni nā Balage Balogh

19-25 nō ’Ātete

1 Korinetia 1–7

« ’Ia ’ati māite rā ’outou »

’Ua ha’api’i Elder Jeffrey R. Holland ē « tē haere mai nei te rahira’a ’o te mau ta’ata [i te purera’a] nō te ’imi i te hō’ē ’itera’a vārua » (« A Teacher Come from God », Ensign, Mē 1998, 26). ’Ia tai’o ana’e ’outou i te 1 Korinetia 1–7, ’a feruri ma te pure e aha te mea tā ’outou e nehenehe e rave nō te tauturu i te fa’atupu i te mau ’itera’a vārua i roto i tā ’outou piha ha’api’ira’a.

Pāpa’i i tō ’outou mau mana’o

Ani ’ia fa’a’ite mai i te mau mana’o

’A feruri i te ani i te mau pīahi ’ia pāpa’i i tō rātou huru i mua i te mau mea tā rātou i ’apo mai nā roto mai i te mau pāpa’ira’a mo’a. ’A ani i te tahi o te mau pīahi ’ia fa’a’ite mai i te mea tā rātou i pāpa’i.

Ha’api’i i te ha’api’ira’a tumu

1 Korinetia 1:10–17; 3

E ti’a i te mau melo nō te ’Ēkālesia a te Mesia ’ia tāhō’ēhia.

• E riro paha te ’āparaura’a i te mau pene mātāmua nō 1 Korinetia ’ei rāve’a nō te patu i te hō’ēra’a rahi a’e i rotopū i te mau melo nō te pāroita. E nehenehe tā ’outou e ha’amata ma te ani i te mau pīahi ’ia parau mai nō ni’a i te hō’ē taiete, pupu, ’aore rā tā rātou iho pupu tu’āro ē tē vai ra te hō’ēra’a i roto. Nō te aha teie pupu i hō’ē rahi ai ? E nehenehe tā ’outou e hi’opo’a i te tahi ’o te mau ha’api’ira’a a Paulo nō ni’a i te hō’ēra’a i roto i te 1 Korinetia 1:10–13; 3:1–11. E aha tā teie mau ’īrava, ’e te mau mea tei tupu ia ’outou, ’e ha’api’i mai nei nō ni’a i te mea e fa’atupu i te hō’ēra’a ’e te mea ’o tē ha’afifi nei i te reira ? E aha te mau ha’amaita’ira’a ’o te tae mai i te feiā tei hō’ē ? E nehenehe ato’a te mau ’ā’amu tei fa’a’itehia mai e te peresideni Henry B. Eyring i roto i « Te tahi atu ā mau rāve’a tauturu » e tauturu i teie nei ’āparaura’a.

• ’Ua fa’a’ohipa Paulo i te hōho’a nō te hō’ē fare nō te fa’aitoito i te hō’ēra’a i roto i te 1 Korinetia 3:9-17. Nāhea e nehenehe ai i teie fa’aaura’a ’ia tauturu i tā ’outou piha ha’api’ira’a ’ia ta’a maita’i a’e i te aura’a ’o te hō’ēra’a ? ’Ei hi’ora’a, i muri a’e i te tai’o ’āmuira’a i teie mau ’īrava, e nehenehe tā ’outou e hōro’a i te pīahi tāta’itahi te hō’ē ’ōfa’i ’e ’ia ha’a ’āmui nō te patu i te tahi mea. Nāhea tātou e riro ai « ’ei fare nō te Atua » ? (1 Korinetia 3:9). Nāhea te Atua e patu tāta’itahi ai ia tātou ? E aha ho’i tā tātou e patu ’āmui nei ’ei feiā mo’a ? E aha te mea tā tātou e nehenehe e rave ’ei pāroita tāhō’ē ’o te ’ore roa ho’i e noa’a ia tātou ’ia rave tāta’itahi ?

1 Korinetia 1:17–31 ; 2 ; 3:18–20

Nō te rave fa’aoti i te ’ohipa a te Atua, e hina’aro tātou i te pa’ari o te Atua.

• Tē mana’o nei te tahi mau ta’ata e ’ere rātou i te mea ’aravihi nō te tāvini i roto i te ’Ēkālesia nō tō rātou ’erera’a i te ha’api’ira’a ’aore rā te ha’api’iipi’ira’a tōro’a. Tē mana’o nei te tahi atu mau ta’ata ē ’ua ’aravihi rātou nō tō rātou ’ite ’aore rā ha’api’ipi’ira’a tōro’a. Tē fa’a’ite mai nei nā hi’ora’a to’opiti i te hō’ē ’ite ’ore i te mea e fa’ati’a mau nei ia tātou ’ia rave i te ’ohipa a te Atua. Teie te hō’ē mana’o nō te tauturu i tā ’outou piha ha’api’ira’a ’ia ti’aturi i te Atua : ’A vāhi i te mau pīahi i roto i te mau pupu ’e ’a ani ia rātou ’ia tai’o i te 1 Korinetia 1:17–31 ; 2 ; ’aore rā 3:18–20 mā te mā’imi i te mau tā’o mai te pa’ari ’e ma’ama’a. E nehenehe tā rātou e fa’a’ite i muri iho i roto i tā rātou mau pupu e aha tā teie mau ’īrava i ha’api’i mai nō ni’a i te rirora’a ’ei mea pa’ari i roto i te ’ohipa a te Fatu. E aha te mau mea nō ni’a i te ’evanelia ’o tei riro ’ei mea ma’ama’a nō te tahi mau ta’ata ? Nāhea teie mau mea e fa’a’ite mai ai i te pa’ari o te Atua ? Penei a’e e nehenehe ato’a tā te mau pīahi e fa’a’ite mai i te mau mea i tupu ’a ti’aturi ai rātou i te pa’ari o te Atua, ’aita rā i tō rātou iho pa’ari, nō te rave i tāna ’ohipa.

1 Korinetia 6:9-20

E mea mo’a tō tātou mau tino tāhuti.

• Nō te ha’amata i te hō’ē ’āparaura’a nō ni’a i teie mau ’īrava, e nehenehe tā ’outou e pāpa’i i ni’a i te ’iri pāpa’ira’a i teie mau uira’a : Nāhea te Fatu i te hi’o i tō tātou nei mau tino ? Nāhea te reira i ta’a ’ē ai i te huru tā Sātane e hina’aro ia tātou ’ia mana’o nō ni’a i tō tātou mau tino ? E aha te aura’a e mau hiero tō tātou mau tino nō te Vārua Maita’i ? ’A ani i te mau pīahi ’ia ’imi i te mau pāhonora’a i teie mau uira’a i roto i te 1 Korinetia 6:9–20 (’a hi’o ato’a PH&PF 88:15 ; Mose 6:8–9).

• E nehenehe e tu’u atu i roto i tā ’outou ’āparaura’a nō ni’a i te mo’ara’a o tō tātou mau tino te hō’ē paraparaura’a nō ni’a i te ture nō te vi’ivi’i ’ore. E riro te reira ’ei tauturura’a ta’a ’ē nō te mea ’ei feiā mo’a i te mau mahana hope’a nei, e mea pinepine tātou i te tātara i tō tātou mau ti’aturira’a nō ni’a i te vi’ivi’i ’ore i te feiā ’o tē ’ore e fāri’i nei i taua mau ti’aturira’a ra. Penei a’e e nehenehe tā ’outou e ani i tā ’outou mau pīahi e aha tā rātou i ha’api’i mai nā roto mai ia Paulo—mai roto ato’a mai i te tahi atu mau rāve’a tauturu a te ’Ēkālesia—ē e nehenehe e tauturu ia rātou ’ia ha’amāramarama atu ia vetahi ’ē te faufa’a rahi nō te vi’ivi’i ’ore. Tei roto i teie mau rāve’a tauturu te mau rāve’a tei tāpurahia i roto i « Te tahi atu ā mau rāve’a tauturu ».

Fa’aitoito i te ha’api’ira’a mai i te fare

’A parau i tā ’outou mau pīahi ē mai te mea e hina’aro rātou i te tahi atu ā mau mana’o e nāhea ’ia vai hō’ē atu ā i tō rātou hoa fa’aipoipo, ’utuāfare, ’aore rā pāroita, tē vai ra ïa te reira i roto i te 1 Korinetia 8–11.

Te tahi atu ā mau rāve’a tauturu

1 Korinetia 1–7

Mau hi’ora’a nō te hō’ēra’a

’Ua ha’api’i te peresideni Henry B. Eyring ē :

« ’Ua anihia vau ’ia tūturi i te hora ta’otora’a ’e te hō’ē ’utuāfare tei ani manihini mai iā’u i roto i tō rātou ’utuāfare. ’Ua anihia te tamari’i na’ina’i roa ’ia riro ’ei reo. ’Ua pure ’oia mai te hō’ē patereareha nō te mau ta’ata tāta’itahi ato’a i roto i te ’utuāfare ma te fa’ahiti i tō rātou mau i’oa. ’Ua ’ara’ara vau i tō’u mata nō te hō’ē noa taime poto nō te hi’o i te hōho’a mata o te tahi atu mau tamari’i ’e o nā metua. ’Ua nehenehe iā’u ’ia parau ē ’ua ’āpiti atu rātou i tō rātou fa’aro’o ’e tō rātou ā’au i te pure a taua tamaiti iti ra.

« ’Ua pure ’āmui iho nei te tahi mau tuahine nō te Sōtaiete Tauturu a fa’aineine ai rātou i te haere e fārerei nō te taime mātāmua i te hō’ē vahine ’ivi ’āpī ’e ’ua fa’aru’e ta’ue mai ho’i tāna tāne fa’aipoipo. ’Ua hina’aro rātou ’ia ’ite e aha te rave ’e e nāhea i te ha’a ’āmui nō te tauturu i te fa’aineine i te ’utuāfare nō te mau feti’i ’e te mau hoa ’o te tae mai i te taime hunara’a… ’Ua tae mai te hō’ē pāhonora’a i tā rātou pure. I tō rātou taera’a atu i te fare, ’ua haere te tuahine tāta’itahi e rave i te ’ohipa. ’Ua ’ineine ’oi’oi roa te fare ’e ’ua tātarahapa te mau tuahine e ’aita i noa’a ia rātou i te rave i te tahi atu ā ’ohipa. ’Ua parauhia te mau parau tāmāhanahana tano maita’i. ’Ua hōro’a tāhō’ē rātou i te tāvinira’a a te Fatu, ma te ’ā’au hō’ē » (« ’Ua hō’ē tō tātou mau ’ā’au », Ensign ’aore rā Liahona, Novema 2008, 68–69).

Te mau ha’amaita’ira’a nō te vi’ivi’i ’ore

I te hō’ē purera’a pae auahi nā te feiā ’āpī pa’ari, ’ua parau te tuahine Wendy W. Nelson :

« Te mā o te ta’ata tāta’itahi ’o te tāviri ïa nō te here mau. ’Ia hau atu tō ’outou mau ferurira’a ’e tō ’outou mau mana’o, tā ’outou mau parau ’e mau ’ohipa i te mā, e rahi atu ā ïa tō ’outou ’aravihi i te hōro’a ’e i te fāri’i i te here mau […]

« ’Ei tufa’a faufa’a rahi nō te fa’a’ite’itera’a i tō rāua here, te hina’aro nei te Fatu e ’ia fana’o te tāne fa’aipoipo ’e te vahine fa’aipoipo i te maere ’e te ’oa’oa ’o te herehere i rotopū i te tāne ’e te vahine […]

« … Te mau mea ato’a ’o te fa’ahaere mai i te Vārua i roto i tō ’outou nei orara’a, ’e i roto i te orara’a ’o tō ’outou hoa fa’aipoipo ’e tō ’outou fa’aipoipora’a, e fa’arahi ïa te reira i tō ’outou ’aravihi i te herehere i rotopū i te tāne ’e te vahine fa’aipoipo… I te tahi rā pae, te mau mea ato’a ’o te fa’a’ino’ino i te Vārua e fa’a’iti ïa te reira i tō ’outou ’aravihi ’ia hō’ē ’e tō ’outou hoa fa’aipoipo. […]

« Te hereherera’a i rotopū i te tāne ’e te vahine fa’aipoipo tei fa’ati’ahia e te Vārua, e ha’amaita’i ïa te Fatu i te reira ’e e mea mo’a ïa » (« Love and Marriage », Purera’a nā te Ao ato’a nā te Feiā ’Āpī Pa’ari, 8 nō Tēnuare 2017, broadcasts.lds.org).

’Ua ha’api’i mai ’o Elder Jeffrey R. Holland :

« E ha’apāpū atu nei au ē ’ua fa’ahereherehia te hereherera’a i rotopū i te tāne ’e te vahine fa’aipoipo nō te mea ’o te tāpa’o hope’ā ïa nō te hō’ēra’a, te hō’ē tā’āto’ara’a ’e te hō’ē tā’atira’a tei ha’apa’ohia ’e tei fa’ata’ahia e te Atua. […]

« Area rā taua huru tā’atira’a ra, taua huru ha’apa’ora’a fati ’ore ra i rotopū i te hō’ē tāne ’e te hō’ē vahine, e nehenehe ïa e tae mai nā roto ana’e i te pirira’a ’e te tāmaura’a ’o te hōro’ahia i roto i te hō’ē fafaura’a nō te fa’aipoipora’a, ma te mau fafaura’a hanahana ’e te hōro’ara’a i tā rāua mau mea ato’a—tō rāua iho mau ’ā’au ’e mau ferurira’a, tō rāua mau mahana ato’a ’e tā rāua mau moemoeā ato’a » (« Personal Purity », Ensign, Novema 1998, 76).

’Ua tātara mai Elder David  A. Bednar : « E ’ere [te ta’otora’a te tāne i te vahine] i te hō’ē noa ’ohipa ta’a ’ē e hi’opo’ahia atu, te hō’ē hia’ai e ha’amāhahia atu, ’e ’aore rā, te hō’ē ’ohipa ha’uti noa e ’aore rā fa’a’arearea-noa-ra’a e ’imihia atu ma te pipiri. E ’ere te manuiara’a i te hō’ē harura’a rē , ’e ’aore rā, te tahi ’ohipa iti noa e ravehia atu. ’Aita, ’o te hō’ē rā te reira ’o te mau rāve’a hau roa a’e i te fa’ahiahia nō te fa’a’ite i tō tātou natura ’e tō tātou fāito pūai Atua, e rāve’a ato’a nō te ha’apa’ari i te mau tā’amura’a ’o te ’ā’au ’e ’o te vārua i rotopū i te tāne ’e te vahine fa’aipoipo. E mau ti’amana tātou tei ha’amaita’ihia e te ti’amāra’a morare ’e tei ha’apāpūhia te hīro’a nā roto i tō tātou ti’ara’a hanahana ’ei mau tamari’i nā te Atua—’eiaha rā nā roto i te mau huru peu ta’otora’a, te mau peu ’o teie ’anotau e ’aore rā, nā roto i te mau ferurira’a a te ta’ata » (« Te ti’aturi nei mātou ē, e mea ti’a i te ta’ata ’ia ora ma te vi’ivi’i-’ore », Ensign ’aore rā Liahona, Mē 2013, 42).

Nāhea ’ia fa’aea mā noa i te pae morare ?

• « Te vi’ivi’i ’ore : E aha ïa te mau ’oti’a ? » « ’Ua mā’iti au ’ia vai mā noa » (videos), LDS.org

• « Te vi’ivi’i ’ore », Nō te Pūai ’o te Feiā ’Āpī, 35–37

Ha’amaita’ira’a i tā tātou ha’api’ira’a

Fa’a’ite i te ’itera’a pāpū nō Iesu Mesia ’A ha’api’i ai ’outou, ’a ha’amana’o i te hi’ora’a o Paulo: « ’aore ’oia i haere atu ma te parau ahaaha ’e te pa’ari, i te paraura’a atu … i te ’evanelia a te Atua » (1 Korinetia 2:1). E nehenehe tō ’outou ’itera’a pāpū nō te Fa’aora e riro ’ei ha’amaita’ira’a hōhonu.