29 nō Tiurai–4 nō ’Ātete

Te mau ’Ohipa 22–28

« ’Ei tahu’a ’e ’ei ’ite »

’A tai’o i Te mau ’Ohipa 22–28 ma te hō’ē pure i roto i tō ’outou ’ā’au ’e ’ia fa’auru mai te Vārua Maita’i ia ’outou ’ia ’ite e aha te mea e ti’a ia ’outou ’ia fa’atumu atu i ni’a iho ’o te tauturu i tā ’outou mau pīahi. ’A pāpa’i i te mau mana’o ato’a ’o te tae mai i roto i tō ’outou ferurira’a ; e riro paha te reira ’ei ’ōmuara’a nō tā ’outou fa’anahora’a ha’api’ira’a.

Pāpa’i i tō ’outou mau mana’o

Ani ’ia fa’a’ite mai i te mau mana’o

’A ani i te mau pīahi ’ia pāpa’i i te hō’ē fa’ahorora’a pāpa’ira’a mo’a nō roto mai i Te mau ’Ohipa 22–28 tei ha’aputapū i tō rātou ’ā’au i teie hepetoma. ’A ha’aputu i tā rātou mau pāhonora’a ’e ’a tai’o i te tahi ’o te mau ’īrava. ’A ani i te mau pīahi ’ia fa’a’ite mai i te tumu e faufa’a ai teie mau ’īrava nō rātou.

Ha’api’i i te ha’api’ira’a tumu

Te mau ’Ohipa 22:1–21 ; 26:1–29

Te hō’ē ’itera’a pāpū ’o te hō’ē ïa fa’ahitira’a i te parau mau tei niuhia i ni’a i te ’ite ’aore rā te ti’aturira’a o te ta’ata iho.

• E nehenehe te ’itera’a pāpū a Paulo ia Phesito ’e i te ari’i Ageripa e riro ’ei taime nō te tuatāpapa e aha mau ra te aura’a ’ia fa’a’ite i te ’itera’a pāpū. E nehenehe tā ’outou e ha’amata ma te ani i te mau pīahi ’ia tai’o fa’ahou i Te mau ’Ohipa 22:1-21 ’e 26:1-29. E aha te mea tā tātou e ha’api’i mai nā roto mai i te hi’ora’a o Paulo i te fa’a’itera’a i tōna ’itera’a pāpū ? E aha te tahi atu mau arata’ira’a tā tātou e ha’api’i mai nō ni’a i te fa’a’itera’a i te ’itera’a pāpū mai roto mai i te fa’ahitira’a parau a Elder M. Russell Ballard i roto i « Te tahi atu ā mau rāve’a tauturu » ? E nehenehe te hīmenera’a ’aore rā te fa’ata’ira’a i te hīmene « ’Itera’a Pāpū » (Te mau Hīmene, nūmera  70) e tauturu i te fa’ahaere mai i te Vārua i roto i tā ’outou tau’ara’a parau.

• E nehenehe e noa’a i te mau pīahi te mau ’ite nō rātou iho ’a tuatāpapa ai rātou i te ’itera’a pāpū o Paulo ia Phesito ’e te ari’i Ageripa. ’A ani ia rātou ’ia fa’a’ite mai i tō rātou mau mana’o. E aha tā te mau fa’aarara’a a te ari’i Ageripa i pāhono atu i te ’itera’a pāpū o Paulo e ha’api’i mai ia tātou i teie mahana ? (’a hi’o Te mau ’Ohipa 26:28). E nehenehe ato’a i te mau pīahi ’ia feruri i te tahi atu mau ’itera’a pāpū i roto i te mau pāpa’ira’a mo’a tei fa’auru ia rātou. (Te tahi mau hi’ora’a mai ia Ioba 19:25–27 ; 2 Nephi 33:10–15 ; Alama 5:45–48 ; ’e PH&PF 76:22–24.) ’Aore rā penei a’e e nehenehe tā rātou e fa’a’ite mai i te mau ’ohipa i tupu ’a ha’amaita’ihia ai rātou e te ’itera’a pāpū a te tahi ta’ata.

• ’Ua fa’aau te peropheta Iosepha Semita i te ’ohipa tei tupu iāna ’a fa’a’ite ai ’oia i te ’Ōrama Mātāmua i tō Paulo ti’ara’a atu i mua i te ari’i Ageripa (’a hi’o Iosepha Semita—’Ā’amu 1:24–25). Penei a’e e nehenehe tā te mau pīahi ’ia ha’apea nō te fa’atupu i te hō’ē tāpura nō te hō’ē ā mau mea e ’itehia i roto i teie nā tāvini e piti a te Atua. Nāhea teie ’ohipa e tauturu ai ia tātou ’ia ta’a e nāhea ’ia fa’a’ite i tō tātou ’itera’a pāpū noa atu e mea fifi ’ia nā reira ?

• Noa atu ē ’aita Paulo i tūtava i te ’itera’a vārua tāna i fāri’i i ni’a i te purūmu nō Damaseko, ’ua hōro’a rā ’oia i te toe’a o tōna orara’a nō te tāpe’a ’e nō te pāruru i tōna ’itera’a pāpū (’a hi’o Te mau ’Ohipa 22:10, 14–16 ; 26:19). E nehenehe te hi’ora’a o Paulo e tauturu i tā ’outou piha ha’api’ira’a ’ia ta’a ē e tītau te hō’ē ’itera’a pāpū i te ’ohipa ’e te tusia. Nō te ha’amata i te ’āparaura’a nō ni’a i te reira, penei a’e e nehenehe tā te hō’ē pīahi e fa’a’ite mai i tāna tūtavara’a ’ia riro mai ’ei hō’ē ta’ata ’aravihi nō te fa’ata’i i te upa, te peni hōho’a, ’aore rā te hō’ē mā’ona. Nāhea te fa’atupura’a i taua huru ’aravihi ra e riro ai mai te noa’ara’a ’e te ha’apūaira’a i te hō’ē ’itera’a pāpū ? E aha te mau tauto’ora’a e ti’a ia tātou ’ia rave ’ia noa’a ’e ’ia pūai te hō’ē ’itera’a pāpū ? (’a hi’o ato’a ’ia Alama 5:46).

Te mau ’Ohipa 26:9–23

E hōpoi’a nā tātou i te aupurura’a ia vetahi ’ē.

• ’Ua pi’i te Fatu ia Paulo ’ia riro ’ei « hō’ē tahu’a » (Te mau ’Ohipa 26:16), e aha rā ïa te aura’a ’o te reira ta’o ? Nō te tauturu i te mau pīahi ’ia tuatāpapa e nāhea e nehenehe ai ia rātou ’ia aupuru ia vetahi ’ē, e nehenehe ’outou e pāpa’i i ni’a i te ’iri pāpa’ira’a teie uira’a E aha te aura’a nō te parau aupuru ? ’A ani i te mau pīahi ’ia hi’o i te mau pāhonora’a i roto i teie mau vāhi : Mataio 20:25–28 ; Te mau ’Ohipa 26:16–18 ; 3 Nephi 18:29–32 ; Te Arata’ira’a i te mau Pāpa’ira’a Mo’a, « Aupuru », scriptures.lds.org. ’A fa’a’ite ai rātou i te mea tā rātou i ’ite, ’a fa’aitoito ia rātou ’ia tuatāpapa i te mau rāve’a e nehenehe ai ia tātou pā’to’a ’ia utuutu ia vetahi ’ē, e tae noa atu i roto i tō tātou mau pi’ira’a i roto i te ’Ēkālesia.

• ’Ua a’o te taea’e David L. Beck nō ni’a i te mau hōpoi’a a te feiā tei mau i te autahu’ara’a ’ia utuutu ia vetahi ’ē, ’e e nehenehe tōna mau mana’o e rave rahi e fa’aauhia i te feiā ato’a e tāvini nei i roto i te ’Ēkālesia (’a hi’o « Tā ’outou hopoi’a mo’a ’ia tāvini », Ensign ’aore Liahona, Mē 2013, 55–57). ’Ei hi’ora’a, e aha tā te ’ā’amu nō Chy Johnson e ha’api’i mai nei ia tātou nō ni’a i te utuutura’a ia vetahi ’ē ? E riro ato’a te video « Te Semeio i ni’a i te Ato fare » (LDS.org) ’ei hō’ē hōho’a maita’i nō te utuutura’a. E aha te tahi atu mau hōho’a e nehenehe i te mau pīahi ’ia fa’a’ite mai ? ’A hōro’a i te taime i te mau pīahi ’ia feruri i te tahi ta’ata e nehenehe tā rātou ’ia utuutu i teie hepetoma e nāhea rātou i te rave i te reira.

Te mau ’Ohipa 27

Mai te mea e fa’aro’o tātou i te mau peropheta a te Fatu, e arata’i ’e e pāruru ’Oia ia tātou i te ’ino.

• Tē vai ra paha tō tā ’outou mau pīahi mau ’ā’amu ’a pe’e ai rātou i te arata’ira’a a te mau peropheta noa atu ē ’ua ta’a ’ē atu te reira i te mana’o ’o te mau ’aivana’a o te ao nei ’aore rā te mau mana’o o te mau ta’ata nā piha’i iho ia rātou. ’A ani i te tahi mau pīahi ’ia haere ineine mai i te piha ha’api’ira’a nō te fa’a’ite i taua mau mea ra. ’A ani i muri iho i te mau pīahi ’ia fa’a’ite mai e nāhea te mau ta’ata i ni’a i te pahi i te pāhonora’a ’a tohu ai Paulo ē « e pau rahi ’o te tao’a ’e te pahi e ati rahi ato’a » (Te mau ’Ohipa 27:10). Nāhea te mau pāhonora’a a te tahi mau ta’ata i te a’o a te peropheta i riro ai mai tā rātou ra i tō tātou nei ’anotau ?

• E aha tā tātou i ’apo mai nā roto mai i Te mau ’Ohipa 27 nō ni’a i te pe’era’a i te mau peropheta a te Fatu ? Tē vai nei i roto i te fa’ahitira’a parau a Elder Ronald A. Rasband i roto i « Te tahi atu ā mau rāve’a tauturu » te mau uira’a ’ia ferurihia ’e te hō’ē tāpura ’o te mau ’ati tā te mau peropheta nō teie tau i fa’aara mai ia tātou. E mea nāhea tō tātou ha’amaita’ira’ahia nā roto i te pe’era’a i te parau a’o a te mau peropheta ora ?

Fa’aitoito i te ha’api’ira’a mai i te fare

Nō te tauturu i te fa’auru i te mau pīahi ’ia ha’amata i te tai’o i te mau ’episetole a Paulo, ’a ani ia rātou ’ia mana’o ē ’ua pāpa’i mai te hō’ē melo nō te Pupu nō te Tino ’Ahuru ma Piti ’āpōsetolo i te hō’ē rata i tā ’outou pāroita. E aha ïa tō ’outou mana’o nō taua rata ra ? E aha ïa tāna e parau ia ’outou ? ’A ani i te mau pīahi ’ia tāpe’a i teie mau mana’o i roto i te ferurira’a ’a tai’o ai rātou i te rata a Paulo i te feiā mo’a nō Roma.

Te tahi atu ā mau rāve’a tauturu

Te mau ’Ohipa 22–28

Fa’a’itera’a i te ’itera’a pāpū.

’Ua a’o Elder M. Russell Ballard nō ni’a i te ’itera’a pāpū a Paulo i mua i te ari’i Ageripa ’e ’ua ha’api’i e aha te aura’a nō tātou ’ia fa’a’ite i te ’itera’a pāpū:

« E mea ti’a i tā tātou mau purera’a ’īritira’a mana’o ’ia fa’atumu-rahi-hia i ni’a i te Fa’aora, i te mau parau ha’api’ira’a nō te ’evanelia, te mau ha’amata’ira’a nō te fa’aho’i-fa’ahou-ra’a mai, ’e te mau ha’api’ira’a o te mau pāpa’ira’a mo’a. E mea ti’a ’ia mono te mau ’itera’a pāpū mau i te mau ’ā’amu, te mau tere ori-haere-ra’a, ’e te mau a’o paraparau. Te feiā tei ti’aturihia ’ia a’o ’e ’ia ha’api’i i roto i tā tātou mau putuputura’a, e tītauhia ia rātou ’ia nā reira ma te pūai i te pae ha’api’ira’a ’o te fa’aro’ohia ’e ’o te ha’aputapū i te ’ā’au, ’o te fa’ateitei i te mau vārua ’e ’o te fa’auru i tō tātou mau ta’ata […]

« … E mea maita’i noa ihoa ’ia fa’a’ite i te here ’e te māuruuru, ’e’ita rā taua mau parau ra e riro mai te huru ’itera’a pāpū o te fa’a’ama i te ti’aturira’a i roto i te orara’a o vetahi ’ē. Tē fa’a’itera’a i te ’itera’a pāpū ’o « te fa’a’itera’a ïa i te ’itera’a nā roto i te pūai ’o te Vārua Maita’i, nō te fa’atupu i te hō’ē fa’a’itera’a hanahana nō te parau mau tei fa’atumuhia i ni’a i tō te ta’ata iho ’ite e ’aore rā ti’aturira’a » [Aratai’ra’a i te mau Pāpa’ira’a Mo’a, « Fa’a’ite Pāpū »,scriptures.lds.org]. Nā te fa’a’itera’a māramarama nō te parau mau e horo’a i te ta’a-’ē-ra’a i roto i te orara’a o te ta’ata. ’O te mea ïa e taui te mau ’ā’au. ’O te mea ïa tā te Vārua Maita’i e nehenehe e ha’apāpū i roto i te ’ā’au o te mau tamari’i a te Atua » (« Te ’Itera’a Pāpū Mau », Ensign ’aore rā Liahona, Novema 2004, 41).

Ti’ara’a i piha’i iho i te feiā fa’atere o te ’Ēkālesia.

’Ua ha’api’i Elder Ronald A. Rasband :

« ’Ua pi’ihia [tō tātou feiā fa’atere] nā roto i te fa’aurura’a a te Atua nō te ha’api’i ’e nō te arata’i ia tātou ’e … nō te fa’aara ia tātou i te mau ’ati tā tātou e fa’aruru nei i te mau mahana ato’a—mai te ha’apa’o-ha’umani-noa-ra’a i te mahana sābati, te ha’amata’ura’a i ni’a i te ’utuāfare, te ’arora’a i te ti’amāra’a pae fa’aro’o e tae noa atu i te mārōra’a i te heheura’a nō teie mau mahana hope’a nei. Te mau taea’e ’e te mau tuahine, tē ha’apa’o rā ānei tātou i tā rātou mau a’o ? …

’Ia haere ti’a atu ai tātou i mua ma te mā’iti ’ia pe’e i te mau parau a’o ’e te mau fa’aarara’a a tō tātou feiā fa’atere, tē mā’iti ra ïa tātou ’ia pe’e i te Fatu ’a haere noa atu ai te ao i tōna ’āvei’a ’ē. Tē mā’iti nei tātou ’ia mau te rima i ni’a i te ’auri, ’ia riro ’ei feiā mo’a i te mau mahana hope’a nei, ’ia rave i te ’ohipa a te Fatu ’e ’ia ’ī « i te ’oa’oa rahi roa’ [1 Nephi 8:12].

« Mea pāpū maita’i te uira’a rahi i teie mahana : tē ti’a ra ānei ’outou i piha’i ’e te feiā fa’atere o te ’Ēkālesia i roto i teie ao e pōiri noa ra, ’ia ha’aparare i te māramarama o te Mesia ? » (« Ti’a ’e te feiā fa’atere o te ’Ēkālesia », Ensign ’aore rā Liahona, Me 2016, 47–48).

Ha’amaita’ira’a i tā tātou ha’api’ira’a

Fa’aineine hou te mahana ha’api’ira’a ’A feruri ai ’outou e nāhea te mau parau tumu nō te ’evanelia tā ’outou e ha’api’i ra e ha’amaita’i ai i te mau melo nō tā ’outou piha ha’api’ira’a, e tae mai te mau mana’o ’e te mau fa’a’itera’a i roto i tō ’outou orara’a i te mau mahana ato’a—’a tere ai ’outou nō te haere i te ’ohipa, nō te rave i te mau ’ohipa i te fare, ’aore rā i roto i tō ’outou mau aura’a ’e te ’utuāfare ’e te mau hoa. ’Eiaha e feruri i te fa’aineinera’a pae vārua mai te tahi mea e fa’ata’a ’outou i te hō’ē taime mai te tahi rā mea tā ’outou e rave noa.(Ha’api’ira’a mai tā te Fa’aora, 12).