5-11 nō ’Ātete

Roma 1–6

« Te mana o te Atua ’ia ora te feiā ato’a »

’A tai’o ma te pure i te Roma 1-6 ma te ha’amana’o i tā ’outou mau pīahi. E tauturu ïa te reira ia ’outou ’ia ha’apa’o i te mau muhumuhura’a a te Vārua ’a fa’aineine ai ’outou nō te ha’api’i.

Pāpa’i i tō ’outou mau mana’o

Ani ’ia fa’a’ite mai i te mau mana’o

’A feruri i te hōro’a i te tahi nau minuti i te mau pīahi nō te ’imi i roto i te Roma 1–6 i te hō’ē ’īrava tei au-ta’a-’ē-hia e rātou. E nehenehe tā rātou e fa’a’ite i muri iho i te ’īrava tā rātou i mā’iti i te tahi pīahi e pārahi ra i piha’i iho mai.

Ha’api’i i te ha’api’ira’a tumu

Roma 1:16–17

« ’Aore ho’i au i ha’amā i te ’evanelia a te Mesia ra ».

• ’Ua fa’aruru a’ena ānei tā ’outou mau pīahi i te ha’amā nō tō rātou ti’aturira’a ? ’A ani ia rātou ’ia tai’o i te Roma 1:16–17 ’e ’ia feruri i te mau taime i roto i te buka a Te mau ’Ohipa i fa’a’ite ai Paulo e ’aita ’oia i ha’amā i te ’evanelia. E aha te tahi mau mea e ’ore ai tātou e ha’amā i te rirora’a ’ei mau melo nō Te ’Ēkālesia a Iesu Mesia i te Feiā Mo’a i te mau Mahana Hope’a Nei ? ’A ani i te mau pīahi ’ia fa’a’ite mai i te tahi mau ’ohipa tei tupu ’a fa’a’ite ai rātou ’aore rā te tahi atu mau ta’ata e ’aita rātou i ha’amā i te ’evanelia a Iesu Mesia.

Roma 1:16–17 ; 2:28–29 ; 6:1–11

E ’itehia te ti’ara’a pipi mau i roto i tā tātou iho fa’a’otira’a, ’eiaha noa i roto i tā tātou mau ’ohipa.

• Nāhea tātou e fāito ai i tō tātou iho ti’ara’a pipi ? E nehenehe te a’o a Paulo i tō Roma e tauturu ia tātou ’ia ha’amana’o ’eiaha noa e fa’atumu i ni’a i te hō’ē tāpura o te mau ’ohipa e ti’a ra ’ia rave i ni’a ato’a i « te ’ā’au [’e] te vārua » (Roma 2:29). Nō te tauturu i tā ’outou mau pīahi ’ia ta’a i te a’o a Paulo, e nehenehe tā ’outou e pāpa’i i te ’īrava nō roto mai i te Roma 2:28–29 i ni’a i te ’iri pāpa’ira’a. ’A mono i te tā’o ’āti Iuda nā te Feiā Mo’a i te mau Mahana Hope’a nei ’e te tā’o peritome nā te fafaura’a. E aha tā teie tauira’a e fa’atupu nō te fa’arahi atu ā i tō tātou ta’ara’a i te mau ha’api’ira’a a Paulo ? E nehenehe ato’a ’outou e tuatāpapa i te mau hi’ora’a o te mau mea tā tātou e rave nei ’ei melo nō te ’Ēkālesia ’o tei hau atu i te faufa’a ’e te pūai ’ia rave ana’ehia « ma te ’ā’au, ’e te vārua » (Roma 2:29). ’Ei hi’ora’a, ’a hi’o i te ’aora’a a Elder Jeffrey R. Holland nō ni’a i te hāhaerera’a ’utuāfare, « Mau ti’a tonohia i te ’Ēkālesia » (Ensign ’aore rā Liahona, Novema 2016, 61–67), ’aore rā te a’ora’a a Elder Neil L. Andersen nō ni’a i te ’ohipa misiōnare, « E ’ite nō te Atua » (Ensign ’aore rā Liahona, Novema 2016, 35–38).

Roma 3–6

« Te vāhi i rahi ai te hara ra, ’ua rahi roa te hāmani maita’i i reira ».

• Tē vai ra paha te mau pīahi i roto i tā ’outou piha ha’api’ira’a e hina’aro nei i te tauturu nō te ta’a i te mau ha’api’ira’a a Paulo i roto i teie mau pene nō ni’a i te fa’aro’o, te ’ohipa, ’e te maita’i (’a hi’o ato’a te arata’ira’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare ’e te ’īritira’a a Iosepha Semita nō teie mau pene i roto i te mau fa’ahorora’a ’e te tufa’a ha’amāramaramara’a a te Bībīlia ). Nāhea e nenehenehe ai ia ’outou ’ia ha’api’i mai i te tahi ’e te tahi ? (’A feruri i te hōhora atu i teie nā hi’ora’a e piti nō te tauturu i te mau pīahi ’ia māramarama ē e’ita e ti’a ia tātou ’ia hi’o i tā tātou mau ’ohipa maita’i ’ei rāve’a nō te fa’a’ite i tō tātou parau-ti’a, ’e ’e’ita ato’a e ti’a ’ia hi’o tātou i te maita’i o te Mesia ’ei tumu nō te fa’ati’a i tā tātou mau hape ’e mau hara. ’A ani i te mau pīahi ’ia mā’imi i te mau parau mau i roto i te Roma 3:20–31 ; 5:1–2 ; 6:1–2, 21–23 ’o te nehenehe e tauturu ia Gloria ’e ia Justin. E aha te tahi atu mau ha’api’ira’a i roto i « Te tahi atu ā mau rāve’a tauturu » ’o te tauturu ia rātou ’ia ta’a i te faufa’a rahi nō te ravera’a i te ’ohipa parau-ti’a ’e te ti’aturira’a i te aroha mau o te Mesia ? E nehenehe tā ’outou e ani i te mau pīahi ’ia fa’a’ite mai i te mea tā rātou i ’ite ’aore rā ’ia ha’uti mai i te mea tā rātou e hina’aro i te parau mai.

Hi’ora’a 1

E hoa tō ’outou o Gloria te i’oa, tei hepohepo i roto i tāna mau tauto’ora’a ’ia riro ’ei pipi itoito. Tē rave pūai nei ’oia i te mau mea ato’a tāna i ’ite e ti’a iāna ’ia rave, tē ha’ape’ape’a pinepine nei rā ’oia e ’aita ’oia e manuia nei nā roto i tāna mau tauto’ora’a. « ’Ua nava’i ānei tō’u maita’i ? » ’ua ui ’oia iāna iho. « E fāri’i ānei te Fatu iā’u ? »

Hi’ora’a 2

E hoa tō ’outou o Justin te i’oa, ’o te ’ore e ha’ape’ape’a rahi nei nō ni’a i te ravera’a i te mau mā’itira’a ti’a. Tē ti’aturi nei ’oia ia Iesu Mesia, tē haere nei ’oia i tāna mau rurura’a a te ’Ēkālesia, ’e e metua tāne ’e e ta’ata tupu maita’i ’oia. Tera rā, ’ua mā’iti ’oia ’ia ’ore e ha’apa’o i te mau ture e nehenehe ai iāna ’ia fāri’i i te hō’ē parau fa’ati’a nō te hiero. ’Ia tāmata ana’e te ’utuāfare ’e te mau hoa i te fa’aitoito iāna ’ia fa’aineine nō te hiero, e pāhono ïa ’oia, « E ta’ata maita’i au. E fa’aro’o tō’u i te Mesia. ’Ua ’aufau a’ena ’oia i te ho’o o tā’u mau hara, ’e ’aita vau e mana’o nei ē e tāpe’a ’oia iā’u i rāpae au i te bāsileia tiretiera nō taua mau tumu ha’iha’i roa ».

Fa’aitoito i te ha’api’ira’a mai i te fare

Nō te fa’aitoito i te mau pīahi ’ia tai’o i te Roma 7–16, e nehenehe tā ’outou e parau atu ia rātou ē ’ua fa’a’ite mai Paulo i te hō’ē tama’ira’a i roto iāna—’e i roto ia tātou pā’āto’a. I roto i te Roma 7–16 e ’ite tātou e aha taua tama’i ra ’e e nāhea ’ia upo’oti’a i ni’a i te reira.

Te tahi atu ā mau rāve’a tauturu

Roma 1–6

Te fa’aro’o, te maita’i ’e te ’ohipa

’A tūtava noa ai tātou i te ha’apa’o i te mau fa’auera’a, e’ita ïa te ha’apa’o-noa-ra’a i te mau ture a te Atua e fa’aora ia tātou (’a hi’o Roma 3:27–31). Noa atu tā tātou mau tauto’ora’a maita’i roa, « ’ua rave pā’āto’a ho’i tātou i te hara, ’e ’ua ’ere i te ha’amaita’i a te Atua ra » (Roma 3:23). Nō taua tumu ra ho’i e hina’aro pā’āto’a ai tātou ia Iesu Mesia, ’e nō tōna ho’i aroha mau i fa’ati’a ai ia tātou ’ia fa’a’orehia tā tātou mau hara ’e e nehenehe ai ia tātou ’ia tāmau i te rave i te ’ohipa maita’i. Mai tā Paulo i ha’api’i, « te vāhi rā i rahi ai te hara ra, ’ua rahi roa te hāmani maita’i i reira » (Roma 5:20).

’Ua fa’a’ite mai te peresideni David O. McKay i te hō’ē fa’aaura’a nō ni’a i te hō’ē tamaiti tei ha’amata i te paremo ’a ’au ai ’oia ’e tōna mau hoa : « ’Aua’ē, te ferurira’a maita’i ’e te vitiviti o te hō’ē hoa i reira tei toro atu i te hō’ē rā’au roa nō roto mai i te hō’ē ’aua ’ārope ma te hōro’a atu i te hō’ē muara’a o te rā’au i te tamaiti e paremo ra ’o [tei] haru mai i te reira ’e ’ua tāpe’a maita’i atu i ni’a iho ’e ’ua ora mai ’oia.

« ’Ua parau pā’āto’a te mau tamāroa ē ’ua ora mai teie tamaiti iti maoti te tamaiti tei hōro’a i te rāve’a nō tauturu.

« Te reira ihoa te ’ohipa i tupu ; e noa atu ra te rāve’a tei hōro’ahia atu iāna, ’ahani ’aita te tamaiti iti i fa’a’ohipa i te reira, ’ahani ’aita ’oia i fa’aitoito iāna iho, ’ua paremo ïa ’oia, noa atu te ’ohipa fa’ahiahia a tōna ra hoa » (David O. McKay, « The Gospel of Work, », Instructor, Tenuare 1955, 1).

Nō ni’a i te uira’a ē e fa’a’orahia ānei tātou ma te fa’aro’o ’aore rā ma te ’ohipa, ’ua pāpa’i te ta’ata pāpa’i buka Keresetiano C. S. Lewis: « Hō’ē ā ïa huru uira’a ē e aha te reta faufa’a rahi roa a’e o nā reta e piti o te hō’ē paoti » (Mere Christianity, 148).

Hi’ora’a 1

• Etera 12:27

• Moroni 10:32-33

• J. Devn Cornish, « ’Ua nava’i ānei tō’u maita’i ? E manuia ānei au ? » Ensign ’aore rā Liahona, Novema 2016, 32–34

« E’ita te fa’aorara’a e nehenehe ’ia ho’ohia mai i te moni nō te ha’apa’o ; e hoo’hia mai rā te reira nā roto i te toto o te Tamaiti a te Atua.[’a hi’o Te mau ’Ohipa 20:28] […]

« E hōro’a nā te Atua te aroha mau, ’e tō tātou hina’aro ’ia ha’apa’o i te mau fa’auera’a tāta’itahi a te Atua, ’o te torora’a ïa i tō tātou rima tāhuti nei nō te fāri’i i teie hōro’a mo’a a tō tātou Metua i te Ao ra » (Dieter F. Uchtdorf, « Te hōro’a o te aroha mau » Ensign ’aore rā Liahona, Mē 2015, 109–10).

Hi’ora’a 2

• Iakobo 2:17–26

• Helamana 12:23–24

• D. Todd Christofferson, « E vai-here-hia atu ā ’outou e au », Ensign ’aore rā Liahona, Novema 2016, 48–51

« Mai te mea ē, e hōro’a nā te Atua te aroha mau, nō te aha ïa te ha’apa’ora’a i te mau fa’auera’a a te Atua i riro ai ’ei ’ohipa faufa’a roa ? Nō te aha e ha’ape’ape’a ai nō te mau fa’auera’a a te Atua―’e ’aore rā, te tātarahapa, nō te reira ? …

« E riro tō tātou ha’apa’o i te mau fa’auera’a a te Atua ’ei fa’ahope’ara’a au nō tō tātou here ’e tō tātou ’ā’au mehara hope ’ore i te maita’i rahi o te Atua. Nā teie huru here ’e te ’ā’au mehara rahi e ’āmui, mai te hō’ē semeio te huru, i tā tātou ’ohipa i te aroha mau o te Atua » (Dieter F. Uchtdorf, « Te hōro’a o te aroha mau », Ensign ’aore rā Liahona, Mē 2015, 109).

Tō tātou hina’aro tāmau i te aroha mau.

« Ta’a ’ē noa atu i te hina’aro i te aroha mau nō tō ’outou ora hope’a, e hina’aro ïa ’outou i teie mana i te mau mahana ato’a ’o tō ’outou nei orara’a. ’A ha’afatata atu ai ’outou i tō ’outou Metua i te Ao ra ma te itoito, te ha’eha’a, ’e te marū, e fa’ateitei ’e e ha’apūai ïa ’oia ia ’outou nā roto i tōna aroha mau (’a hi’o Maseli 3:34 ; 1 Petero 5:5 ; PHPF 88:78 ; 106:7–8). Nā te ti’aturira’a i ni’a i tōna aroha mau e fa’ati’a ia ’outou ’ia haere i mua ’e ’ia tupu i roto i te parau-ti’a » (’Ia Mau Maite i te Fa’aro’o, 78).

Ha’amaita’ira’a i tā tātou ha’api’ira’a

E mea fa’auruhia tō ’outou pī’ira’a ’Ei ’orometua ha’api’i, ’ua pi’ihia ’outou nā te Fatu nō te ha’amaita’i i tāna mau tamari’i. Tē hina’aro nei te Fatu ē ’ia manuia ’outou, nō reira ’a ora parau-ti’a ai ’outou nō te fāri’i i tāna tauturu, e hōro’a mai ïa ’oia ’ia ’outou te heheura’a tā ’outou e tūtava nei. (’A hi’o Ha’api’ira’a mai tā te Fa’aora, 29