« 12-18 nō ’Ātete. Roma 7–16 : ‘’Ia pohe rā te ’ino i te maita’i’ » Mai pe’e mai—nō te Ha’api’ira’a Sābat i: Faufa’a ’Āpī 20192019)
« 12-18 nō ’Ātete. Roma 7–16 », ’Mai pe’e mai—nō te Ha’api’ira’a Sābati : 2019
12-18 nō ’Ātete
Roma 7–16
« ’Ia pohe rā te ’ino i te maita’i »
’A tai’o i te Roma 7–16, ’e ’a pāpa’i i te mau mana’o tā ’outou i fāri’i e nāhea ’ia tauturu i te mau pīahi ’ia ha’api’i mai nā roto mai i te mau pāpa’ira’a mo’a. I te ha’amatara’a e riro paha tō ’outou mau mana’o ’ei mau mana’o ’ōhie noa, ’ia feruri rā ’outou i te reira, e nehenehe te reira e riro ’ei mau ’ohipa faufa’a rahi nō te ha’api’i mai.
Pāpa’i i tō ’outou mau mana’o
Ani ’ia fa’a’ite mai i te mau mana’o
E ti’a i te mau pīahi ’ia fa’a’ite mai i te mau mea ato’a tei fa’auru ia rātou i roto i tā rātou iho tuatāpapara’a ’aore rā i roto i te tuatāpapara’a ’utuāfare, i te tahi rā taime e riro ’ei tauturura’a ’ia ani i te mau mana’o nō ni’a i te tahi tumu parau pāpū. ’Ei hi’ora’a, e nehenehe tā ’outou e tai’o i te Roma 10:17 ’e 15:4 ’e ’ia ani ia rātou ’ia fa’a’ite mai i te mau pāpa’ira’a mo’a tei patu i tō rātou fa’aro’o ’aore rā tei hōro’a ia rātou te ti’aturira’a.
Ha’api’i i te ha’api’ira’a tumu
Nā roto ia Iesu Mesia, e nehenehe ai tātou e riro ’ei feiā tufa’a i te mau mea ato’a a te Metua i te Ao ra.
-
’Ei feiā mo’a i te mau mahana hope’a nei, tē ti’aturi nei tātou ē te aura’a ’o te mau pereota mai te « e feiā tufa’a i te Atua ra » ’e « e feiā tufa’a ’e te Mesia » o te rirora’a ïa nā roto i te tauturu a Iesu Mesia mai te Metua i te Ao ra ’e te fāri’ira’a i te mau mea ato’a i fatuhia e Āna (Roma 8:17 ; ’a hi’o ato’a PH&PF132:19–20). Nō te tauturu i te mau pīahi ’ia hi’o e nāhea teie ha’api’ira’a tumu e ha’api’ihia ai nā roto i te mau pāpa’ira’a mo’a, e nehenehe tā ’outou e ani i te ’āfara’a ’o te mau pīahi ’ia tuatāpapa i te tahi ’o te mau ’īrava o te Bībīlia tei tāpurahia i roto i « Te tahi atu ā mau rāve’a tauturu » ’e te tahi ’āfara’a nō te tuatāpapa ïa i te mau ’īrava i roto i te mau pāpa’ira’a mo’a nō te tau hope’a nei, i roto ato’a i « Te tahi atu ā mau rāve’a tauturu ». I muri iho e nehenehe i te mau pīahi ’ia ha’api’i i te tahi ’e te tahi i te mea tā rātou i ha’api’i mai. ’A hōro’a atu ia rātou i te taime nō te tuatāpapa nō te aha teie ha’api’ira’a tumu e mea faufa’a rahi roa. ’Ei hi’ora’a, e aha te ta’a-’ē-ra’a tā te reira e fa’atupu i roto i tō tātou orara’a ’ia ’ite ē e nehenehe tā tātou e riro « ’ei feiā tufa’a i te Atua, ’e ’ei feiā tufa’a e te Mesia » ? (Roma 8:17).
-
E nehenehe te ha’amana’ora’a ē tē tia’i mai nei te mau ha’amaita’ira’a mure ’ore i te feiā ha’apa’o, e tauturu ia tātou ’ia fa’aruru ana’e tātou i te fa’ahemara’a ’aore rā i te mau tāmatara’a (’a hi’o Roma 8:18). Te hō’ē rāve’a ’ōhie nō te fa’ahōho’a i teie parau tumu ’o te nīno’ara’a ïa i te hō’ē fāito i ni’a i te ’iri pāpa’ira’a ; ’a ani i te mau pīahi ’ia tāpura mai i te hō’ē pae te tahi o te mau tāmatara’a tā te ta’ata e nehenehe e fa’aruru. I muri iho e nehenehe rātou ’ia ’imi i te tahi o te mau pāpa’ira’a mo’a i roto i « Te tahi atu ā mau rāve’a tauturu » ’e ’ia tāpura mai i te tahi atu pae o te fāito te mau fa’a’itera’a o te mau ha’amaita’ira’a mure ’ore o tē tae mai i te feiā e fa’aruru nei i tō rātou mau tāmatara’a ma te itoito. Nāhea te mau tāmatara’a e fa’aauhia ai i te mau ha’amaita’ira’a tei fafauhia mai ? E aha tā ’outou e parau atu i te tahi ta’ata tei ani mai ia tātou e mea ho’ona ānei ’ia ha’apa’o i te mau fa’auera’a a te Fatu ?
-
E nehenehe te fa’aaura’a tei hōro’ahia mai e Elder Dallin H. Oaks i roto i « Te tahi atu ā mau rāve’a tauturu » e tauturu i te mau pīahi ’ia tuatāpapa e nāhea e nehenehe ai ia tātou ’ia fa’aineine ’ia riro « ’ei feiā tufa’a i te Atua » (Roma 8:17). E aha te tahi ’o te mau « ture ’e te mau parau tumu » tā Elder Oaks i fa’ahiti ?
« Nā vai ïa e fa’ata’a ’ē ia tātou i te aroha o te Mesia ?
-
E nehenehe te tuatāpapara’a ’āmui i te Roma 8 e hōro’a mai i te hō’ē tumu nō te tauturu i te mau pīahi ’ia ’ite i roto ia rātou te aroha o te Fa’aora. ’A feruri i te fa’a’ite atu i te tā’āto’ara’a ’o te hōho’a i roto i te arata’ira’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare ’e ’aore rā te tahi atu hōho’a nō Iesu Mesia ’a tai’o ai ’outou ’ei piha ha’api’ira’a i te Roma 8:18, 28, 31–39. E aha te mau mana’o ’aore rā te mau ’ite o te mau pīahi i muri a’e i te tai’ora’a i teie mau ’īrava ? E nehenehe tā ’outou e ani i te tahi nau pīahi ’ia fa’a’ite mai e nāhea i noa’a ai ia rātou te ’itera’a pāpū nō ni’a i te mau parau mau tā rātou i ’ite i roto i teie mau ’īrava. E nehenehe ato’a tā ’outou e hīmene ’āmui ’e ’aore rā ’ia ani i te tahi ta’ata ’ia fa’ata’i mai i te tahi pehe) nō ni’a i te aroha o te Atua ’e o Iesu Mesia, mai te « E Here tō te Atua » ’e ’aore rā « Te Maere nei Au »Te mau Hīmene, nūmera 107, 111). E aha te mau tā’o ’aore rā te mau pereota nō roto mai i teie mau hīmene ’o te tauturu i te mau pīahi ’ia ’ite i roto ia rātou te aroha o te Metua i te Ao ra ’e o Iesu Mesia ?
’Ua hope pā’āto’a te mau fa’auera’a a te Atua i te fa’aotihia i roto i te fa’auera’a ’ia aroha.
-
Nō te tauturu i te mau pīahi ’ia ’ite e nāhea te tā’āto’ara’a ’o te mau fa’auera’a i « hope ai i roto i » te fa’auera’a ’ia aroha atu i tō ta’ata tupu (Roma 13:9), ’a ani atu ia rātou ’ia pāpa’i i ni’a i te ’iri pāpa’ira’a te hō’ē tāpura ’o te mau fa’auera’a ato’a tā rātou e nehenehe e ha’amana’o. ’A tai’o ’āmui i te Roma 13:8–10 ’e te Mataio 22:36–40, ’e ’a tuatāpapa ’ei piha ha’api’ira’a te aura’a i rotopū i te arohara’a i te Atua ’e tō tātou ta’ata tupu ’e te ha’apa’ora’a i te fa’auera’a tāta’itahi tei tāpurahia i ni’a i te ’iri pāpa’ira’a. Nāhea teie parau mau e taui ai i te huru ’o tō tātou mana’o nō ni’a i te mau fa’auera’a ’e te ha’apa’ora’a ?
E ti’a ia tātou ’ia ha’apae i te ha’avā i te mau mā’itira’a a vetahi ’ē ’e ’ia riro ’ei tumu e marua ai te ta’ata i te pae vārua.
-
’Ei ha’amāramaramara’a i te ’ohipa i tupu i roto i te Roma 14, e nehenehe tā ’outou e fa’a’ite ē ’ua marō te tahi mau feiā mo’a nō Roma i te tahi ’e te tahi nō ni’a i te mau peu ta’a ’ē nō te tāmā’a, te ha’apa’ora’a i te mau mahana fa’afa’aeara’a, ’e te tahi atu mau peu ta’ere. E aha te hō’ē ā mau huru ’o tā tātou e fa’aruru nei i teie mahana ? Penei a’e e nehenehe tā te mau pīahi e tai’o i te Roma 14 ’e ’ia hōro’a mai i te hō’ē ha’apotora’a parau nō te a’o a Paulo. E aha te a’o tā tātou e nehenehe e fa’a’ite i te tahi ’e te tahi e nāhea ’ia ’ape i te ha’avā atu ? E nehenehe te fa’ahitira’a parau a te peresideni Dieter F. Uchtdorf i roto i « Te tahi atu ā mau rāve’a tauturu » e tauturu.
Fa’aitoito i te ha’api’ira’a mai i te fare
Nō te fa’auru i te mau pīahi ’ia tai’o i te 1 Korinetia 1–7, e nehenehe tā ’outou e parau atu ia rātou ē tei roto i te reira te a’o a Paulo i te mau melo e ora ra i roto i te hō’ē o te mau ’oire nō te ao tahito tei hau roa i te vi’ivi’i ’e te ha’amori idolo.
Te tahi atu ā mau rāve’a tauturu
Fāri’ira’a « i te mau mea ato’a [a] te Metua » (PH&PF 84:38).
Nō roto mai i te Bībīlia
Nō roto mai i te mau pāpa’ira’a mo’a nō te mau mahana hope’a nei
’Ua fa’ati’a Elder Dallin H. Oaks i teie nei parabole :
« ’Ua ’ite te hō’ē metua tāne moni roa e mai te mea e hōro’a ’oia i tāna faufa’a i te hō’ē tamari’i ’aita ā i ’aravihi roa ’e ’i pa’ari roa, e riro taua faufa’a ra i te ha’amau’ahia. ’Ua parau atu ra te metua tāne i tāna tamari’i :
« Tā’u mau faufa’a ato’a tē hina’aro nei au e hōro’a atu nā ’oe—’eiaha tā’u faufa’a ana’e, tō’u ato’a rā tōro’a ’e te ti’ara’a teitei i rotopū i te mau ta’ata. Tā’u mau faufa’a ato’a e ti’a iā’u ’ia hōro’a atu nā ’oe, ’āre’a rā tō’u huru nā ’oe iho ïa te reira e tītau. E manuia ’oe nō te fāri’i i tā ’oe faufa’a nā roto i te ha’api’ira’a mai tā’u i ha’api’i, ’e te orara’a mai tā’u i ora. E hōro’a atu vau ia ’oe te mau ture ’e te mau arata’ira’a tumu i fāri’i ai au i te ’aravihi ’e te manuia. ’A pe’e i tō’u hi’ora’a, ’a rave itoito mai tā’u i rave itoito, ’e e riro ’oe mai iā’u nei ’e e fāri’i ’oe i tā’u mau faufa’a ato’a » (« Te tītaura’a ’ia riro », Ensign, Novema 2000, 32).
Mau feiā tufa’a ’e te Mesia.
« Tē fa’ariro mau nei te feiā mo’a i te mau mahana hope’a nei i te mau ta’ata ato’a ’ei mau tamari’i nā te Atua ; tē fa’ariro nei rātou i te ta’ata tāta’itahi ’ei huru atua ’ia au i tō rātou hiro’a, tō rātou natura ’e tō rātou fāito pūai. … Mai te hō’ē tamari’i ’o te nehenehe e tupu ia au i te mau maita’i ’o tōna nā metua ’a pa’ari ai ’oia, e nehenehe te natura hanahana tā te ta’ata e fatu ra ’ia fa’atupuhia ’ia riro mai te huru o tō rātou Metua i te Ao ra… Tei te mau tāne ’e te mau vahine te ti’ara’a ’ia fa’ateiteihia i roto i te huru atuara’a » (« Rirora’a mai te Atua ra te huru », Mau Parau Tumu, topics.lds.org).
Ha’avāra’a ’ia vetahi ’ē.
’Ua ha’api’i te peresideni Dieter F. Uchtdorf :
« E nehenehe i teie tumu parau nō te ha’avāra’a ’ia vetahi ’ē e ha’api’ihia i roto i te hō’ē a’ora’a e piti noa tā’o parau. Nō ni’a i te parau nō te au ore, te ’āfa’ifa’i parau, te tau’a ’ore, te ha’avahavaha, te tāpe’ara’a i te ’ino’ino, ’aore rā te hina’arora’a i te fa’atupu i te ’ino, ’a fa’a’ohipa i teie arata’ira’a :
« ’A fa’aea !
« Mea ’ōhie roa. E ti’a ia tātou ’ia fa’aea i te ha’avā ia vetahi ’ē ’e ’ia mono i te mau mana’o fa’ahapa i te ’ā’au aroha rahi o te Atua ’e tāna mau tamari’i. ’O te Atua tō tatou Metua. E mau tamari’i tātou nāna. E mau taea’e ’e e mau tuahine pā’āto’a tātou… ’Ua tāpirihia te hō’ē poro’i ta’u i ’ite atu i muri i te hō’ē pere’o’o uira ’e e au ra ē e ’ere te ta’ata fa’ahoro i te huru maita’i roa, ’āre’a rā ’ua ha’api’i mai te mau parau tei tāpirihia i te hō’ē ha’api’ira’a faufa’a rahi. Tē parau ra, ‘’Eiaha e ha’avā mai iā’u nō te mea, mea ’ē tā’u hara i tā ’oe’ » (« E Noa’a te Aroha i Tei Aroha ’ia Vetahi ’ē ra », Ensign ’aore rā Liahona, Mē 2012, 75).
Ha’amaita’ira’a i tā tātou ha’api’ira’a
’Imi i te māteria e turu i te mau parau tumu. Ta’a ’ē noa atu i te mau mana’o nō te ha’api’i i roto i teie arata’ira’a, e nehenehe tā ’outou e taui i te mau ’ohipa i roto i te arata’ira’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare e ti’a ’ia fa’a’ohipahia i roto i tā ’outou piha ha’api’ira’a. (’A hi’o ato’a te Ha’api’ira’a mai tā te Fa’aora,17–18