22-28 nō Tiurai

Te mau ’Ohipa 16–21

« Te parau mai ra te Fatu ia mātou e haere e parau atu i te ’evanelia »

Hou ’a hi’o ai i teie arata’ira’a, ’a tai’o ma te pure i Te mau ’Ohipa 16-21 ma te ha’amana’o i tā ’outou mau pīahi. E nehenehe teie mau mana’o e tauturu i te fa’aurura’a tā ’outou e fāri’i nō ō mai i te Vārua ra.

Pāpa’i i tō ’outou mau mana’o

Ani ’ia fa’a’ite mai i te mau mana’o

’A feruri i te ani i te mau pīahi ’ia fa’a’ite mai i te hō’ē tufa’a nō roto mai i Te mau ’Ohipa 16–21 ’o tei fa’aha’amana’o ia rātou i te hō’ē ’ohipa tā rātou i rave nō te fa’a’itera’a i te ’evanelia.

Ha’api’i i te ha’api’ira’a tumu

Te mau ’Ohipa 16–21

’Ei melo nō te ’Ēkālesia, tē fa’a’ite nei tātou i tō tātou ’itera’a pāpū nō ni’a ia Iesu Mesia ’e tē fa’a’ite nei tātou i tāna ’evanelia.

• Nō te mea ho’i tē tātara mai nei Te mau ’Ohipa 16–21 e piti ’o te mau tere a Paulo, e nehenehe ïa i te mau pīahi ’ia ha’api’i mai roto mai i teie mau pene e nāhea i te fa’a’ite i te parau pāpū nō ni’a ia Iesu Mesia ’e nō te fa’a’ite manuia atu i tāna ra ’evanelia. Nō te fa’auru i te tuatāpapara’a nō ni’a i teie parau tumu, e nehenehe paha tā ’outou e ani i te tahi mau melo ’ia haere ineine mai i roto i te piha ha’api’ira’a nō te fa’a’ite i te mau mana’o tei noa’a ia rātou i roto i Te mau ’Ohipa 16-21 nō ni’a i te fa’a’itera’a i te ’evanelia. Nō te fa’ahōhonu atu i te tuatāpapara’a, e nehenehe ato’a tā rātou e fa’a’ite i te mau fa’ahitira’a parau nō ni’a i te ’ohipa misiōnare nō roto mai i te hō’ē ’āmuira’a rahi tei tupu iho nei. E nehenehe rātou e ’imi i tā rātou iho, ’aore rā e nehenehe tā ’outou e fa’ahiti atu i te hō’ē ’o te mau pōro’i i roto i « Te tahi atu ā mau rāve’a tauturu ».

• Te hō’ē pōro’i faufa’a i roto i teie mau pene ’o te ’ohipa faufa’a rahi ïa a te Vārua Maita’i i roto i te fa’a’itera’a i te ’evanelia. ’Ei hi’ora’a, e nehenehe tā te mau pīahi e ’ite e nāhea te Vārua Maita’i i te tauturura’a ia Paulo ’e ia Sila i roto i Te mau ’Ohipa 16:6-15. E nehenehe ato’a rātou e tai’o i te 2 Nephi 33:1 ’e Te Parau Ha’api’ira’a ’e te Parau Fafau 42:14 ’e ’ia fa’a’ite mai i te mea tā rātou i ’ite nō ni’a i te faufa’a rahi ’ia mau i te Vārua ’ia fa’a’ite ana’e i te ’evanelia (’a hi’o ato’a i te fa’ahitira’a parau a Elder Dallin H. Oaks i roto i « Te tahi atu ā mau rāve’a tauturu »). Penei a’e e nehenehe ato’a te mau pīahi e fa’a’ite i te mau ’ohipa i tupu ’a arata’i ai te Vārua Maita’i i tā rātou mau tauto’ora’a nō te fa’a’ite i te ’evanelia. E aha ïa te tahi mau ’ohipa tei tupu ia tātou i te fa’a’itera’a i te ’evanelia i te tahi ta’ata tā te Fatu i tu’u i ni’a i tō tātou haere’a ? (’a hi’o ato’a ’Ia Poro Haere i Tā’u nei ’Ēvanelia, 3-4).

• Nāhea e nehenehe ai ia ’outou ’ia fa’a’ohipa i te mau ’ohipa i tupu ia Paulo nō te tauturu i tā ’outou mau pīahi ’ia noa’a te itoito ’ia fa’auru-ana’e-hia rātou ’ia fa’a’ite i tō rātou ’itera’a pāpū ? ’A feruri i te tai’o ’āmui fa’ahou i te mau ’ā’amu i roto i te mau pāpa’ira’a mo’a ’o tē fa’a’ite nei ia Paulo e fa’a’ite ra i tōna ’itera’a pāpū, mai te mau ’ohipa i tupu iāna i Makedonia (’a hi’o Te mau ’Ohipa 16:19–34), i Ateno (’a hi’o Te mau ’Ohipa 17:16–34), ’e i Korinetia (’a hi’o Te mau ’Ohipa 18:1–11). E aha te tāpa’o fa’a’ite tā tātou e ’ite nō ni’a i te itoito ’e te taiā ’ore o Paulo ? E aha ïa te mau ha’api’ira’a tumu tā Paulo i ha’api’i (’e i ta’a) ’o tei hōro’a iāna i te ha’apāpūra’a i roto i tāna pōro’i ? Nō te aha i te tahi mau taime e ri’ari’a tātou i te fa’a’ite i te ’evanelia, ’e nāhea ïa tātou e ha’avī ai i teie ri’ari’a ? Penei a’e e nehenehe tā te mau misiōnare rave tāmau e haere mai i roto i tā ’outou piha ha’api’ira’a ’e ’ia fa’a’ite i te mau rāve’a i fāri’i ai rātou i te itoito nō te fa’a’ite i tō rātou ’itera’a pāpū. ’A fa’aitoito i te mau pīahi ’ia feruri i te hō’ē rāve’a e nehenehe ai rātou e pe’e i te hi’ora’a o Paulo ’e ’ia itoito a’e i te fa’a’itera’a i tō rātou ’itera’a pāpū nō ni’a i te Mesia.

Te mau ’Ohipa 17:16–34

E tamari’i tātou nā te Atua.

• I te ’aivi nō Māti, ’ua ha’api’i Paulo nō ni’a i te Metua i te Ao ra i te hō’ē pupu ta’ata e mea iti ho’i tō rātou ’ite nō ni’a i te natura mau o te Atua. Nō te hi’opo’a i teie mau ha’api’ira’a, e nehenehe tā te mau pīahi e tai’o i Te mau ’Ohipa 17:24–31 ’e ’ia pāpa’i i ni’a i te ’iri pāpa’ira’a te mau parau mau tā rātou i ’ite nō ni’a i te Metua i te Ao ra, tō tātou aura’a e ’ona, ’e tō tātou mau aura’a te tahi ’e te tahi. E aha te mau ’ohipa i tupu tā te mau pīahi e nehenehe e fa’a’ite ’a ’ite ai rātou i te parau mau nō te fa’ahithira’a parau a Paulo e « ’aita te Atua i ātea ē atu ia tātou ato’a nei » ? (’īrava 27).

• ’A hi’o ’āmui ai ’outou i teie mau ’īrava, ’a feruri i te tuatāpapa i te parau tei ha’api’ihia i roto i te ’īrava 29, « E tamari’i tātou nā te Atua », ’oia ho’i ’o te Metua i te Ao ra iho te metua o tō tātou mau vārua. Nō te rave i te reira, e nehenehe ïa ’outou e pāpa’i i ni’a i te ’iri papa’ira’a Nō te mea e tamari’i tātou nā te Atua ’e Mai te mea ’aita tātou i ’ite e tamari’i tātou nā te Atua. ’A ani i te mau pīahi ’ia hōro’a mai i te mau rāve’a nō te fa’ahope i teie mau pereota. ’Ei hi’ora’a, e aha tā te ’itera’a ē e tamari’i tātou nā te Atua e ha’api’i mai nei ia tātou nō ni’a i te Atua ? nō ni’a ia tātou iho, ’e i te huru e ti’a ia tātou ’ia rave i ni’a i te tahi ’e te tahi ? Nāhea tō tātou orara’a e huru ’ē ai mai te mea ’aita tātou i ’ite i tō tātou aura’a mau ’e te Atua ? E nehenehe te reira e arata’i ti’a atu i te hō’ē tuatāpapara’a e nāhea e nehenehe ai ia tātou ’ia tauturu ia vetahi ’ē ’ia ta’a ē e tamari’i rātou nā te Atua. E nehenehe te fa’ahitira’a parau a Elder Dallin H. Oaks i roto i « Te tahi atu ā mau rāve’a tauturu » e tu’u-ato’a-hia i roto i teie tuatāpapara’a.

Te mau ’Ohipa 19:1–7

E ti’a i te bāpetizora’a ’ia ’āpe’ehia i te fāri’ira’a i te hōro’ara’a i te Vārua Maita’i.

• Te mau ’Ohipa 19 e vāhi maita’i ïa nō te ha’apāpū i te faufa’a rahi ’ia fāri’i i te Vārua Maita’i i muri a’e i tō tātou bāpetizora’a. ’A feruri i te fa’a’ite i teie fa’ahitira’a parau a te peropheta Iosepha Semita : « Te bāpetizora’a i te pape ’o te ’āfara’a ïa o te bāpetizora’a, ’e ’aore tōna e maita’i mai te mea ’aita te tahi ’āfa—’oia ho’i, te bāpetizora’a a te Vārua Maita’i » (Te mau Ha’api’ira’a ’a te mau Peresideni o te ’Ēkālesia : Iosepha Semita, 95). Nāhea te ha’api’ira’a a Paulo i roto i Te mau ’Ohipa 19:1–7 e ha’apāpū ai i te fa’ahitira’a parau a Iosepha Semita ? E nehenehe ato’a te mau pīahi e fana’o nā roto i te ’imira’a i te « Vārua Maita’i, Bāpetizora’a a » i roto i te Arata’ira’a nō te mau Parau Tumu nō tē ha’api’i atu ā nō ni’a i te mau ha’amaita’ira’a nō te fāri’ira’a i te hōro’ara’a i te Vārua Maita’i.

Fa’aitoito i te ha’api’ira’a mai i te fare

Nō te fa’aitoito i te mau pīahi ’ia tai’o i Te mau ’Ohipa 22–28 i te hepetoma i mua, ’a ani ia rātou i te tahi mea mai teie te huru, « Ahani e noa’a ia ’outou te rāve’a nō te parau atu i te fa’atere nō tō tātou fenua nō ni’a i te ’evanelia, e aha ïa tā ’outou e parau atu?» ’A parau atu ia rātou ē i roto i Te mau ’Ohipa 22–28, e ’ite ïa rātou e aha tā Paulo i parau atu i te tahi ’o te mau ti’a fa’atere pūai roa a’e i tōna ra tau.

Te tahi atu ā mau rāve’a tauturu

Te mau ’Ohipa 16–21

Mau pōro’i nō ni’a i te ’ohipa misiōnare.

• Dallin H. Oaks, « Fa’a’itera’a i te ’evanelia tei fa’aho’i-fa’ahou-hia mai », Ensign ’aore rā Liahona, Novema 2016, 57–60.

• David A. Bednar, « ’A haere mai ’e ’a hi’o », Ensign ’aore rā Liahona, Novema 2014, 107–10.

• Neil L. Andersen, « ’Ei ’ite nō te Atua », Ensign ’aore rā Liahona, Novema 2016, 35–38.

• Mervyn B. Arnold, « ’A haere e fa’aora : E nehenehe tā tātou ’ia rave i te reira », Ensign ’aore rā Liahona, Mē 2016, 53–55.

• S. Gifford Nielsen, « Ha’ape’epe’era’a i te fa’anahora’a ha’uti a te Fatu ! » Ensign ’aore rā Liahona, Novema 2013, 33–35.

E mau tamari’i pā’āto’a tātou nā te Atua

Tē fa’a’ite mai nei « Te ’Utuāfare : E Pōro’i i tō te Ao nei » i te mau parau mau mure ’ore nō ni’a i tō tātou aura’a e te Atua : « ’Ua hāmanihia te mau ta’ata ato’a—te tāne ’e te vahine—i te hōho’a o te Atua. ’Ua riro tātou tāta’itahi ’ei tamaiti ’e ’ei tamahine vārua herehia nā te metua i te ra’i ra, ’e nō reira, e huru ’e e hope’a hanahana tō tātou tāta’itahi ». (Ensign ’aore rā Liahona, Novema 2010, 129).

’Ua a’o Elder Dallin H. Oaks nō te Pupu nō te Tino ’Ahuru ma Piti ’āpōsetolo i te faufa’a ’ia hi’o ia tātou iho na mua roa ’ei mau tamari’i vārua nā te Atua :

« ’A ara i te huru e hi’o ai ’outou ’ia ’outou iho. ’Eiaha e fa’ahi’o ’aore rā e fa’a’ite ia ’outou nā roto i te tahi tāpa’o maita’i ’o te ’ore e vai maoro mai. Te hō’ē ana’e maita’i e fa’a’ite ē ’o vai ra tātou ’oia ïa e tāmari’i tamāroa ’aore rā e tamari’i tamāhine tātou nā te Atua. ’Ua hau atu ïa taua tāpa’o ra i te tahi atu mau tāpa’o mai te tātai, te ’ohipa, te mau tāpa’o pae tino, te mau tura, ’aore rā te pae fa’aro’o […]

« E ti’amāra’a tō tātou, ’e e nehenehe tātou e mā’iti i te mau huru tāpa’o nō te fa’a’ite ’o vai ra tātou. E ti’a rā ia tātou ’ia ’ite e ’ia mā’iti ana’e tātou i te fa’a’ite ia tātou iho nā roto i te tahi tāpa’o poto noa ’aore rā faufa’a ’ore ’ia au i te hi’ora’a mure ’ore, tē fa’aiti ra ïa tātou i te mea hau roa atu i te faufa’a rahi i roto ia tātou, ’e te ha’afaufa’a rahi ra ïa tātou i te mea e ’ere i te mea faufa’a rahi roa. E nehenehe ïa te reira ’ia arata’i ti’a atu ia tātou i ni’a i te ’ē’a hape ’e ’ia fa’ataupupū i tō tātou haerera’a mure ’ore i mua » (« Be Wise » [Brigham Young University–Idaho devotional, 7 nō Nōvema 2006], byui.edu).

Ha’amaita’ira’a i tā tātou ha’api’ira’a

Ani i te feiā ’āpī ’ia riro ’ei tufa’a nō tā ’outou ha’api’ira’a. Mai te mea e ha’api’i ’outou i te feiā ’āpī, ’a ha’amana’o ē e mea pinepine rātou i te ta’a i te mau mea tā tō rātou mau hoa e fa’aruru ra. ’Ia fa’a’ite ana’e te hō’ē feiā ’āpī i tōna ’itera’a pāpū ’aore rā ’ia ha’api’i ’oia i te ha’api’ira’a tumu, e nehenehe te ’ā’au o te tahi atu feiā ’āpī i te putapūhia nā roto i te hō’ē rāve’a e ’ore e nehenehe ia ’outou ’ia nā reira. Hōro’a i te feiā ’āpī te taime nō te ha’api’i te tahi ’e te tahi (’A hi’o i te Ha’api’ira’a mai tā te Fa’aora, 28