mahana nō te Penetetōte

Mahana nō te Penetetōte, nā Sidney King

1–7 nō Tiurai

Te mau ’Ohipa 1–5

« E ’ei ’ite ho’i ’outou nō’u »

’Ia tai’o ’outou Te mau ’Ohipa 1–5 ’e ’ia tūtava ana’e ’outou i te arata’ira’a a te Vārua, e fāri’i ïa ’outou i te fa’aurura’a nō ni’a i te mau parau mau i roto i te mau pene ’o te tauturu i tā ’outou mau pīahi ’ia ti’aturi rahi atu ā i ni’a i te Vārua Maita’i ’e ’ia riro ’ei mau ’ite ha’apa’o nō te Fatu ra ’o Iesu Mesia.

Pāpa’i i tō ’outou mau mana’o

tāpa’o nō te fa’a’itera’a mai

Ani ’ia fa’a’ite mai i te mau mana’o

E rave rahi mau ’īrava ’e te mau ha’api’ira’a faufa’a i roto i Te mau ’Ohipa 1–5. Te hō’ē rāve’a rahi nō te ’ite e tei hea te mea hau roa atu i te faufa’a rahi nō tā ’outou mau pīahi o te vaiihora’a ïa ia rātou ’ia parau mai te mea tei matara mai nā roto mai i tā rātou tuatāpapara’a. Nāhea ïa ’outou ’ia ani i teie huru fa’a’ite’itera’a ? E mea ’ōhie ma te hōro’ara’a ia rātou te tahi nau minuti nō te ’imi ’e nō te fa’a’ite mai i te hō’ē ’īrava nō roto mai i Te mau ’Ohipa 1–5 i reira tō rātou fa’aro’ora’a i te reo o te Fatu i te paraura’a mai ia rātou.

tāpa’o nō te ha’api’ira’a

Ha’api’i i te Ha’api’ira’a Tumu

Te mau ’Ohipa 1:1–8 ; 2:37–39 ; 4:1–16, 31–33

Tē fa’atere nei Iesu Mesia i Tāna ’Ēkālesia nā roto i te Vārua Maita’i.

• E nehenehe te tai’ora’a i te mau ’itera’a o te mau ’āpōsetolo e tauturu i tā ’outou mau pīahi ’ia hi’o e nāhea e nehenehe ai ia rātou ’ia fāri’i i te mana ’e te arata’ira’a a te Vārua Maita’i i roto i tō rātou mau pi’ira’a i roto i te ’Ēkālesia. Te hō’ē rāve’a nō te hi’o fa’ahou i te mau ’itera’a i roto i Te mau ’Ohipa 1–5 o te pāpa’ira’a ïa i ni’a i te ’iri pāpa’ira’a E nehenehe te Vārua Maita’i e tauturu iā’u i roto i tō’u nei pi’ira’a nā roto i : ’e te anira’a i muri iho i te mau pīahi ’ia mā’imi i roto i Te mau ’Ohipa 1:1–8 ; 2:36–39 ; ’e 4:1–16, 31–33, mā te ’imira’a i te mau rāve’a nō te fa’aoti i te pereota. Nō te aha te mau ’āpōsetolo i hina’aro ai i te Vārua Maita’i ?

• ’Ei piha ha’api’ira’a, e nehenehe ato’a tā ’outou e ’imi e nāhea Iesu Mesia i te fa’aterera’a i Tāna ’Ēkālesia i tō tātou nei tau nā roto i te Vārua Maita’i. Nō te rave i te reira, e nehenehe tā ’outou e fārerei nā mua roa i te tahi mau pīahi nō te ani atu ia rātou ’ia tai’o fa’ahou i te mau ’ā’amu i roto i Te mau ’Ohipa 1:1–8 ; 2:37–39 ; 4:1–16, 31–33 ’e ’ia haere ineine mai nō te fa’a’ite i te mau mea tā rātou i ’ite mai tā te mau ’āpōsetolo ato’a i ’ite. ’Ei hi’ora’a, e nehenehe tā rātou e fa’a’ite mai i te hō’ē taime ’a tauturu ai te Vārua Maita’i ia rātou ’ia fa’a’ite pāpū nō ni’a i te hō’ē parau tumu nō te ’evanelia ’aore rā ’ia pāhono i te uira’a a te tahi ta’ata. E aha tā rātou i rave nō te tūtava i te arata’ira’a a te Vārua Maita’i ?

Te mau ’Ohipa 1:15–26

’Ua pi’ihia te mau ’āpōsetolo a Iesu Mesia e te Atua nā roto i te heheura’a.

• E riro ’ei tauturura’a i tā ’outou mau pīahi ’ia fa’a’ite ē ’ua pi’ihia te mau melo ’āpī nō te Pupu nō te Tino ’Ahuru ma Piti ’āpōsetolo i roto i te ’Ēkālesia i muta’a ihora nā roto i te heheura’a, mai te reira ato’a i teie mahana. ’A feruri i te ani i te mau pīahi ’ia ha’amāramarama mai e nāhea te hō’ē taiete ’ohipa e mā’iti ai i te hō’ē mono nō te hō’ē ti’ara’a fa’atere, ma te hi’ora’a i te fāito ha’api’ira’a, te ’aravihi, ’e te tahi atu ā. ’A ani ia rātou ’ia fa’aau te reira i te pi’ira’ahia te ’āpōsetolo Matatia i roto i Te mau ’Ohipa 1:15–26 (’a hi’o ato’a 1 Samuela 16:1–13). Nāhea te fa’ahitira’a parau a te peresideni Gordon B. Hinckley i roto i « Te tahi atu ā mau rāve’a Tauturu » e fa’arahi ai i te ’ite o te mau pīahi ? (’a hi’o ato’a Russell M. Nelson, « Pāturura’a i te mau peropheta », Ensign ’aore rā Liahona, Novema 2014, 74–77). Nāhea teie ’ite e ha’amaita’i ai i tō tātou fa’aro’o i te mau ti’a fa’atere tā te Fatu i pi’i ? Nāhea e noa’a ai ia ’outou tō ’outou ’itera’a pāpū nō ni’a i te mau ’āpōsetolo ’e te mau peropheta nō teie nei tau ?

Te mau ’Ohipa 2:-22–47 ; 3:13-26 ; 4:5-12

E fāri’i tātou i te mau ha’amaita’ira’a nō te tāra’ehara ’ia ora ana’e tātou i te mau parau tumu mātāmua ’e te mau ’ōro’a mātāmua o te ’evanelia.

• Nāhea e nehenehe ai ’ia noa’a i te mau pīahi tā ’outou e ha’api’i nei te mana ’e te aura’a i roto i te mau parau mau ’ōhie tā Petero ’e Ioane i ha’api’i (te fa’aro’o ia Iesu Mesia, te tātarahapara’a, te bāpetizora’a, te hōro’ara’a i te Vārua Maita’i, ’e te fa’a’oroma’ira’a e tae noa atu i te hope’a) ? Te hō’ē rāve’a o te tuatāpapara’a ïa i te faufa’a rahi o teie mau parau tumu ’e teie mau ’ōro’a, tei parauhia i te tahi mau taime te ha’api’ira’a tumu a te Mesia (’a hi’o 2 Nephi 31). E nehenehe tā ’outou e ’āfa’i mai e pae ’api parau pia i te piha ha’api’ira’a ’e ’ia pāpa’i i te pae ni’a roa o te ’api parau pia tāta’itahi te hō’ē o teie mau tufa’a o te ha’api’ira’a tumu ’a te Mesia : Fa’aro’o ia Iesu Mesia, Tātarahapara’a, Bāpetizora’a, Hōro’ara’a i te Vārua Maita’i, Fa’a’oroma’ira’a e tae noa atu i te hope’a. ’A vāhi te mau pīahi i roto e pae pupu, ’e ’a hōro’a i te pupu tāta’itahi hō’ē o te mau ’api parau pia. ’A ani i te mau pupu ’ia tai’o fa’ahou i te tātarara’a o te parau tumu i ni’a i tā rātou ’api parau pia i roto i te Arata’iraʼa nō te pāpa’iraa mo’a ’aore rā ’Ia Poro Haere i Tā’u Nei ’Evanelia . E nehenehe tā rātou e tai’o fa’ahou i te mau ha’api’ira’a a Petero i roto i Te mau ’Ohipa 2:22–47 ; 3:13–26 ; ’e 4:5–12 ’e ’ia pāpa’i i ni’a i tā rātou ’api parau pia te mau hi’ora’a nō ni’a i te parau tumu tei fa’ata’ahia atu ia rātou nā roto mai i te mau pāpa’ira’a mo’a. Nāhea teie mau parau tumu ’e teie mau ’ōro’a o te ’evanelia e tauturu ai ia tātou ’ia noa’a mai te mau ha’amaita’ira’a nō te tāra’ehara a te Fa’aora ? E aha te ’ohipa a teie mau parau tumu ’e teie mau ’ōro’a i roto i te ’ōpuara’a fa’aorara’a a te Metua i te Ao ra ?

• E nehenehe tā ’outou e ani i te tahi mau misiōnare rave tāmau, tei ho’i mai nei nā te misiōni, ’aore rā te mau misiōnare pāroita ’ia rave i te tahi nau minuti nō te ha’amāramarama e nāhea tō rātou ha’api’ira’a ia vetahi ’ē i te ha’api’ira’a tumu a te Mesia ma te fa’a’ohipara’a i te ha’api’ira’a 3 i roto i te ’Ia Poro Haere i Tā’u Nei ’Evanelia. Nō te aha te ha’apirira’a tumu a te Mesia i riro ai ’ei poro’i tumu nā tā tātou mau misiōnare ? Nāhea te hō’ē ta’ata tei bāpetizo-a’ena-hia ’e tei fāri’i a’ena i te hōro’ara’a a te Vārua Maita’i e tāmau noa ai i te fa’a’ohipa i te ha’api’ira’a tumu a te Mesia ?

Te mau ’Ohipa 2:37–47

E fa’auru te Vārua Maita’i ia tātou ’ia ora i te mea tā tātou i ha’api’i mai.

• ’Ia tai’o ana’e te mau pīahi i te mau pāpa’ira’a mo’a i te fare ’e ’ia tai’o ’āmui ana’e rātou i roto i te piha ha’api’ira’a i te mau hepetoma ato’a, e « putapū ïa tō rātou ’ā’au » (Te mau ’Ohipa 2:37). E fa’auruhia paha ’outou ’ia tauturu ia rātou ’ia haere atu ā i mua ma te ani atu, « e aha ïa mātou nei ? » (Te mau ’Ohipa 2:37). ’A tai’o ’āmui i Te mau ’Ohipa 2:37–47 ma te ani atu i te mau pīahi ’ia mā’imi i te mau mea tā teie pupu e 3 000 ta’ata i rave ’ei hope’ara’a nō te anira’a a Petero. Penei a’e e nehenehe tā rātou e fa’a’ite mai i te mau rāve’a tā rātou i rave mai te au i te fa’aurura’a nā roto mai i tā rātou tuatāpapara’a i te parau a te Atua. I muri iho e nehenehe tā ’outou e fa’aherehere i te taime i te pae hope’a o te ha’api’ira’a nō te pīahi tāta’itahi nō te ui ia rātou iho i te uira’a « E aha ïa vau nei ? » ’e ’ia pāpa’i i te mau mana’o tā rātou i fāri’i.

Tē poro ra Petero i muri a’e i tōna taparahira’ahia.

Noa atu ē ’ua tāpe’ahia ’e ’ua taparahihia ’oia, ’ua poro Petero i te ’evanelia ma te taiā ’ore.

Te mau ’Ohipa 3 ; 4:1–21 ; 5:12–42

’Ia ’ī ana’e tātou i te Vārua Maita’i, e nehenehe tā tātou e fa’a’ite i te ’evanelia ma te taiā ’ore.

• E nehenehe te ’ā’amu nō tō Petero ’e Ioane fa’a’ite-pāpū-ra’a mā te taiā ’ore i te parau nō Iesu e fa’auru i tā ’outou piha ha’api’ira’a ’ia taiā ’ore i te mana’o o vetahi ’ē ’a fa’a’ite ai rātou i tō rātou ’itera’a pāpū nō ni’a i te ’evanelia. E aha tei fa’aputapū i te ’ā’au o te mau pīahi nō ni’a i te taiā ’ore o Petero ’e o Ioane i roto i Te mau ’Ohipa 3 ; 4:1–21 ; ’e 5:12–42 ? E aha te aura’a i rotopū i te fāri’ira’a i te hōro’ara’a a te Vārua Maita’i ’e tō tātou ’aravihi i te fa’a’ite-pāpū-ra’a ma te taiā ’ore ? ’Ua ha’utihia te mau ’ā’amu nō roto mai i teie mau pene i roto i te mau video « Tē poro nei Petero ’e ’ua tāpe’ahia ’oia », « ’Ua ha’avāhia Petero ’e Ioane », ’e « ’Ua tāmau noa Petero ’e Ioane i te poro i te ’evanelia » (LDS.org). Tē vai ato’a ra paha tō te mau pīahi mau ’itera’a ’e ’aore ra tō te tahi ta’ata tā rātou i mātau o tei pāruru mā te taiā ’ore ’aore rā tei fa’a’ite i tō rātou ’itera’a pāpū nō ni’a i te ’evanelia.

tāpa’o nō te ha’api’ira’a mai

Fa’aitoito i te ha’api’ira’a mai i te fare

’A ani i te mau pīahi ’ia feruri e aha tā rātou e rave mai te mea ’ua ’ite rātou ē e nehenehe rātou e pohe nō tō rātou orara’a i te ’evanelia. ’A parau atu ia rātou ē i roto i Te mau ’Ohipa 6–9 e tai’o rātou nō ni’a i te tahi ta’ata tei ineine i te pohe nō tōna fa’aro’o.

tāpa’o nō te mau rāve’a tauturu

Te tahi atu ā mau rāve’a tauturu

Te mau ’Ohipa 1–5

Te pi’ira’a o te hō’ē melo nō te Tino ’Ahuru ma Piti ’āpōsetolo

’Ua fa’a’ite mai o Gordon B. Hinckley i teie mau mana’o nō te huru o te pi’ira’a ’o te hō’ē ’āpōsetolo ’āpī : « ’Nā te ’Ēkālesia ana’e a te Fatu teie ravera’a. ’Aita e tītaura’a i te tōro’a, ’aita e tata’ura’a nō te ti’ara’a, ’aita e ha’apurorora’a nō te fa’atianiani i te mau maita’i o te tahi ta’ata. ’A fa’aau nā i te ravera’a a te Fatu i te ravera’a a tō te ao nei. E mea hau te ’ē’a a te Fatu, e ’ē’a nō te hau, te maniania ’ore ’aore rā te moni ’ore. ’Aita e mana’o pipiri ’aore rā e te’ote’o ’aore rā e hia’aira’a. I raro a’e i te fa’anahora’a a te Fatu, na te hō’ē noa uira’a faufa’a rahi e fa’atere i te feiā tei ia rātou te hōpoi’a ’ia mā’iti i te feia fa’atere : ‘’O vai tā te Fatu e hina’aro ?’ E tupu te ferurira’a hau ’e te hōhonu. ’E e rahi te pure nō te fāri’i i te ha’apāpūra’a a te Vārua Mo’a ē ’ua tano te mā’itira’a » (« God Is at the Helm », Ensign, Me 1994, 53).

Ha’amaita’ira’a i tā tātou ha’api’ira’a

’A ti’aturi i tō ’outou feiā fa’atere. « Tē hina’aro nei tō ’outou feiā fa’atere autahu’ara’a ’e pupu tauturu e tauturu ’ia ’outou ’ia manuia. ’A ani i tō rātou mana’o tauturu ’a tūtava ai ’outou i te ha’amaita’i atu ā ’ei ’orometua ha’api’i ’e ’a feruri ai ’outou i te mau hina’aro o te feiā tā ’outou e ha’api’i ra » (Ha’api’ira’a mai tā te Fa’aora, 5).