’Ia ora tātou, nā Sam Lawlor

8–14 nō Tiurai.

Te mau ’Ohipa 6-9

« E aha vau, e aha tō ’Oe hina’aro ? »

’A tai’o Te mau ’Ohipa 6–9 ’e ’a pāpa’i i tō ’outou mau mana’o. E tauturu te reira ’ia ’outou ’ia fāri’i i te heheura’a e nāhea ’ia tauturu i te mau pīahi ’ia ha’afātata atu ā ia Iesu Mesia nā roto i tā rātou tuatāpapara’a i teie mau pene.

Pāpa’i i tō ’outou mau mana’o

Ani ’ia fa’a’ite mai i te mau mana’o

’A pāpa’i i ni’a i te ’iri pāpa’ira’a te mau i’oa o te tahi o te mau ta’ata tei fa’ahitihia i roto i Te mau ’Ohipa 6–9, mai ia Setephano, Saula, Philipa, Anania, Petero, ’e Tabita ’aore rā Doreka. ’A ani i te tahi nau pīahi ’ia fa’a’ite mai i te tahi mea tā rātou i ’apo mai nō roto mai i te hō’ē o teie mau ta’ata i roto i tā rātou tuatāpapara’a i teie hepetoma.

Ha’api’i i te ha’api’ira’a tumu

Te mau ’Ohipa 7

E nehenehe te pāto’ira’a i te Vārua Maita’i e arata’i ti’a atu i te pāto’ira’a i te Fa’aora ’e i Tāna mau peropheta.

• E aha te mau parau mau tā te mau pīahi i ha’api’i mai nā roto mai i tā rātou tai’ora’a i te ’ā’amu nō Setephano i teie hepetoma ? ’A feruri i te ani i te mau pīahi ’ia tuatāpapa i te mau ha’api’ira’a a Setephano i roto i Te mau ’Ohipa 7:37–53, ma te hi’o e nāhea tō te feiā fa’atere ’ati Iuda rirora’a mai te mau tamari’i tahito nō ’Īserā’ela tei pāto’i i te mau peropheta. E hina’aro paha ’outou i te fa’atumu i ni’a i te parau a Setephano nō ni’a i teie feiā fa’atere i roto i Te mau ’Ohipa 7:51. Nāhea te 2 Nephi 28:3–6 ; 33:1–2 ; Mosia 2:36–37 ; Alama 10:5–6 ; ’e Alama 34:37–38 e tauturu ai i te mau pīahi ’ia māramarama i teie fa’ahitira’a parau ? Nō te aha tātou e « pāto’i ai i te Vārua Maita’i » ? E aha te ti’a ia tātou ’ia rave nō te ’ite ’e nō te pe’e maita’i atu ā i te mau fa’a’itera’a a te Vārua Maita’i ?

Te mau ’Ohipa 8:9–24

« ’Ia ti’a tō tātou ’ā’au i mua i te aro o te Atua » e ti’a ai.

• E nehenehe te tuatāpapara’a i te ’ā’amu nō Simona e tauturu i te mau pīahi ’ia hi’opo’a i te mau tumu nō te aha rātou e ora ai i te ’evanelia. Nō te tuatāpapa i teie ’ā’amu ’ei piha ha’api’ira’a, e nehenehe ’outou e pāpa’i i ni’a i te tāpura ’ere’ere i te mau uira’a O vai ’o Simona ? E aha tāna i hina’aro ? ’e Nāhea tōna tāmatara’a i te tītau i te reira ? ’A fa’ata’a i te pīahi tāta’itahi ’ia tai’o i Te mau ’Ohipa 8:9–24, ma te hi’o i te mau pāhonora’a i teie mau uira’a. E aha tā tātou e ’apo mai i roto i te ’ohipa tei tupu i ni’a ia Simona ?

• Nō te tauturu i tā ’outou mau pīahi ’ia ta’a maita’i i te aura’a ’ia « vai ti’a noa tō rātou ’ā’au i mua i te aro ’o te Atua » (Te mau ’Ohipa 8:21), e nehenehe tā ’outou e ani ia rātou ’ia tai’o i Te Parau Ha’api’ira’a ’e te Mau Parau Fafau 121:41–46, ma te mā’imi i te mau parau ’aore rā te mau pereota o te fa’a’ite mai i te huru ti’a o tō tātou ’ā’au ’a tūtava ai tātou i te tāvini i te Atua ’e i te fāri’i i Tāna mau hōro’ara’a. E nehenehe tā te mau pīahi e fa’aau i teie mau mana’o i te ’ā’amu nō Simona, tei ’itehia i roto i Te mau ’Ohipa 8:9–24. E aha te mau parau mau tei ’ore i ta’a-maita’i-hia e Simona ? Nāhea tātou e nehenehe ai e fa’ariro i tō tātou ’ā’au « ’ia vai ti’a i mua i te aro o te Atua » ?

• ’Ua fa’aau ānei tā ’outou mau pīahi ia Setephano ’e ia Philipa ia Simona i roto i tā rātou tuatāpapara’a, mai tei anihia i roto i te arata’ira’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare ? Mai te mea ’ua nā reira rātou, e aha ïa tā rātou i ’apo mai ? E nehenehe tā ’outou e ani ia rātou ’ia ’imi i te ha’apāpūra’a i roto i teie mau pene ’e e mea ti’a te ’ā’au ’o te tahi atu mau ta’ata—te mau ta’ata mai ia Philipa ’e i te ta’ata nō Etiopia (Te mau ’Ohipa 8:26–40) ’e ia Saula (Te mau ’Ohipa 9:1–22).

Te mau ’Ohipa 8:26–39

E tauturu te Vārua Maita’i ia tātou ’ia arata’i ia vetahi ’ē ia Iesu Mesia ra.

• Nō te tauturu i te mau pīahi ’ia ta’a maita’i e nāhea e nehenehe ai ia rātou ’ia arata’i ia vetahi ’ē ia Iesu Mesia ra (’a hi’o i Te mau ’Ohipa 8:31), e nehenehe tā ’outou e ani i te mau pīahi ’ia pārahi i mua i te tahi ’e te tahi ’e ’ia tai’o i te ’āparaura’a i rotopū ia Philipa ’e i te ta’ata nō Etiopia mai roto mai i Te mau ’Ohipa 8:26–39. E nehenehe i te toru o te pīahi ’ia tai’o i te mau tufa’a e ’ere nō roto i te ’āparaura’a. E aha tā tātou i ha’api’i mai nā roto mai i te hi’ora’a o Philipa nō ni’a i te ha’api’ira’a i te ’evanelia ia vetahi ’ē ?

• Nō te tuatāpapa i te mau hi’ora’a nō teie tau nō ni’a i te ’ā’amu i roto i Te mau ’Ohipa 8:26-39, e nehenehe tā te mau pīahi e fa’a’ite mai i te mau mea tei tupu ia rātou ’a fa’a’ite ai rātou i te ’evanelia ’aore rā ’a tomo mai ai rātou i roto i te ’Ēkālesia. Nāhea tō te Vārua Maita’i tauturura’a ia rātou ? Nāhea tō te tahi ta’ata arata’ira’a ia rātou ? ’A ani i te mau pīahi ’ia feruri ē ’o vai ra tā rātou e nehenehe e arata’i atu i te ’evanelia.

Te mau ’Ohipa 9

’Ia auraro ana’e tātou i te hina’aro o te Fatu, e nehenehe tātou e riro ’ei mau mauha’a i roto i Tōna rima.

• E nehenehe i te mau pīahi ’ia ’apo mai i te mau ha’api’ira’a pūai nō ni’a i tō rātou iho fa’afāriura’a mai nā roto i te tai’ora’a i te ’ohipa tei tupu ia Saula, ’oia ho’i te parau mau ē e nehenehe te mau ta’ata ato’a ’ia tātarahapa ’e ’ia taui mai te mea e hina’aro rātou. E nehenehe tā ’outou e ani i te mau pīahi ’ia fa’aau i te ’ohipa tei tupu ia Saula ’e te mau ’ohipa i tupu ia Alama (’a hi’o Mosia 17:1–4 ;  18 ; 26:15–21) ’e ia Lamana ’e Lemuela (’a hi’o 1 Nephi 3:28–31). E aha te mau huru o Saula ’e o Alama tei tauturu ia rāua ’ia tātarahapa ’e ’ia taui ? E aha te mau huru tei tāpe’a ia Lamana ’e ia Lemuela ’ia taui ? E aha te huru o Saula ’e o Alama i muri a’e i tō rāua fa’afāriura’ahia ? E aha te mau poro’i i ’itehia e tātou nō tō tātou iho orara’a nā roto mai i teie mau ’ā’amu ?

• Nō te tauturu i te mau pīahi ’ia fa’aau ia rātou iho i te ’ohipa i tupu ia Saula, e nehenehe tā ’outou e ani i te tahi mau pīahi ’ia haere ineine mai nō te fa’a’ite i te mea tā rātou i ’apo mai nā roto mai i te mau tufa’a tāta’itahi nō te a’ora’a a te peresideni Dieter F. Uchtdorf « Tīa’ira’a i ni’a i te purūmu nō Damaseko » (Ensign ’aore rā Liahona, Mē 2011, 70–77). Nāhea tātou e tīa’i ai i te tahi mau taime i ni’a i tō tātou iho purūmu nō Damaseko ? Mai tā te peresideni Uchtdorf i parau, e aha ïa te mea o te tauturu ia tātou ’ia fa’aro’o maita’i a’e i te reo o te Atua ? E nehenehe ato’a tā ’outou e feruri i te māta’ita’i i te video « Te purūmu nō Damaseko » (LDS.org). Nō te fa’auru i te mau pīahi ’ia pe’e i te hi’ora’a o Saula ’e ’ia ani i te Fatu, « E aha vau, e aha tō ’Oe hina’aro ? » ’a feruri i te tuatāpapa i te ’ā’amu a te peresideni Thomas S. Monson tei ’itehia i roto i « Te tahi atu ā mau rāve’a tauturu ». Penei a’e e nehenehe tā te mau pīahi e fa’a’ite mai i te mau mea tā rātou i rave nō te ’imira’a ’e te pe’era’a i te hina’aro o te Atua.

Fa’aitoito i te ha’api’ira’a mai i te fare

Nō te fa’aitoito i te mau pīahi ’ia tai’o i Te mau ’Ohipa 10–15 i te hepetoma e haere mai nei, e nehenehe tā ’outou e fa’ati’a i te tahi ’o te mau ’ohipa fifi tei tupu i roto i teie mau pene—te matarara’a maere i rāpae au i te fare ’āuri, te mau misiōnare tei fa’ariro-hape-hia ’ei mau atua Roma, ’e te hō’ē ’āpōsetolo tei pehihia i te ’ōfa’i ’e tei vaiiho pohehia—’e tei ora fa’ahou mai.

Te tahi atu ā mau rāve’a tauturu

Te mau ’Ohipa 6-9

« E aha vau, e aha tō ’Oe hina’aro ? »

’A haere ai te peresideni Thomas S. Monson i te hō’ē ’āmuira’a titi, ’ua ani te peresideni titi e haere ānei ’oia e fārerei i te hō’ē tamāhine e 10 matahiti o Christal Methvin te i’oa, o tē pohe ra i te ma’i māriri ’aita’ata. Tē ora ra te ’utuāfare o taua tamāhine ra e 128 kilometera te ātea i te vāhi i reira te ’āmuira’a. ’Ua parau mai te peresideni Monson :

« ’Ua hi’opo’a vau i te tārena o te mau rurura’a… E ’aita ihoa e taime. ’Ua puta mai ra te hō’ē fa’anahora’a mono i roto i te ferurira’a. E nehenehe ānei tā mātou e ha’amana’o i teie tamāhine iti i roto i tā mātou mau pure i te ’āmuira’a ? […]

« … [I roto i te hō’ē o te mau rurura’a] tē hi’ohi’o ra vau i tā’u mau parau pāpa’i, nō te fa’aineine i te haere atu i te purupiti, ’a fa’aro’o ai au i te hō’ē reo i te paraura’a i tō’u nei vārua. E mea poto te pōro’i, e mau parau mātauhia : « ’A tu’u mai i te tamari’iri’i ’ia haere noa mai iā’u nei, e ’eiaha e tāpe’ahia atu ; mai ia rātou ho’i tō te bāsileia o te Atua ». (Mareko 10:14.) ’Ua pōuri te mau mea tā’u i pāpa’i. ’Ua fāriu atu tō’u mau mana’o i ni’a i te hō’ē tamāhine iti e hina’aro ra i te hō’ē ha’amaita’ira’a. ’Ua ravehia te fa’aotira’a. ’Ua tauihia te tārena rurura’a […]

« … [I te fare o Methvin ma,] ’ua hi’o atu vau i te hō’ē tamari’i tei paruparu roa nō te ti’a mai—fātata i te paruparu roa nō te paraparau mai. ’Ua pō roa tōna mata i teienei nō te ma’i. Nō te pūai o te vārua ’ua tūturi au, ’ua rave i tōna rima paruparu i roto i tō’u, ma te parau noa atu, ’e Christal, tei ō nei au’. ’Ua hāmama tōna nā ’utu ’e ’ua parauri’iri’i mai, ’e te taea’e Monson, ’ua ’ite ihoa vau ē e haere mai ’oe » (« Te fa’aro’o o te hō’ē tamari’i », Ensign, Novema 1975, 20–22).

Mau matahiti i muri mai, ’ua fa’ati’a te peresideni Dieter F. Uchtdorf i teie ’ā’amu, ma te ani ia tātou « ’ia tūtava ’ia ti’a i rotopū i te feiā tā te Fatu e nehenehe e ti’aturi nō te fa’aro’o i tāna mau muhumuhura’a ’e ’ia pāhono, mai ia Saulo i ni’a i tōna purūmu nō Damaseko, « e te Fatu, e aha vau, e aha tō ’oe hina’aro ?» (« Tia’ira’a i ni’a i te purūmu nō Damaseko », Ensign ’aore rā Liahona, Mē 2011, 75).

Ha’amaita’ira’a i tā tātou ha’api’ira’a

Arata’i i tā ’outou mau pīahi. ’Ei ’orometua, e nehenehe tā ’outou e arata’i i tā ’outou mau pīahi nā roto i te mau pāpa’ira’a mo’a, mai ia Philipa i arata’i i te ta’ata nō Etiopia nā roto i te ha’api’ira’a iāna mai roto atu ia Isaia (’a hi’o Te mau ’Ohipa 8:26–37). Nō te rave i te reira, e ti’a ïa ia ’outou ’ia « ’imi ho’i i te ’ite ’oia ïa nā roto i te ha’api’i ’e nā roto i te fa’aro’o ato’a » (PH&PF 109:7). E nehenehe te ’ite ’o te noa’a mai ia ’outou e riro ’ei hō’ē pūai rahi nō te tauturura’a i te mau pīahi ’ia hina’aro i te ’ite i te parau mau nō rātou iho ’e ’ia ora i te reira.