Iesu e paraparau ra ia Petero

’A tīa’i i tā’u mau māmoe, nā Kamille Corry

24–30 nō tiunu.

Mataio 28 ; Mareko 16 ; Luka 24 ; Ioane 20–21

« ’Ua ti’afa’ahou ’oia »

Hou ’a hi’o ai i te mau mana’o nō te ha’api’ira i roto i teie arata’i, ’a tai’o Mataio 28 ; Mareko 16 ; Luka 24 ; ’e Ioane 20–21, ’e ’a feruri e nāhea teie mau pene e fa’a’ohipahia ai nō te ha’apūai i te fa’aro’o ’o te feiā tā ’outou e ha’api’i ra.

’A pāpa’i i tō ’outou mau mana’o

tāpa’o nō te fa’a’itera’a

Ani ’ia fa’a’ite mai

Nō te tauturu i te mau pīahi ’ia fa’a’ite mai i te mea tā rātou i ha’api’i mai i roto i ta rātou iho ’e tā te ’utuāfare tuatāpapara’a, ’a ani ia rātou ’ia pāpa’i i te hō’ē parau mau nō roto mai i tā rātou tai’ora’a i fa’ata’ahia i teie hepetoma ’o tā rātou i mana’o e ti’a ’ia fa’a’ite « e ’ati noa a’e te mau fenua ato’a » (’a hi’o Mareko 16:15). I te hope’a o te ha’api’ira’a, ’a ani ia rātou ē ’ua ’iteahia ānei ia rātou te tahi atu ā mau parau mau tā rātou e hina’aro i te fa’a’ite mai.

tāpa’o nō te ha’api’ira’a

Ha’api’i i te ha’api’ira’a tumu

Mataio 28 ; Mareko 16 ; Luka 24 ; Ioane 20

Nō te mea ho’i ē ’ua ti’afa’ahou mai ’o lesu, ’e ti’afa’ahou ato’a mai tātou.

• No te hōro’a i te mau ta’ata ato’a te rāve’a ’ia fa’a’ite mai i te mea tā rātou i ’apo mai nō ni’a i te ti’afa’ahoura’a, ’e nehenehe tā ’outou e hōro’a i te mau pīahi te tahi tau minuti nō te tai’o fa’ahou i te tai’ora’a fa’ata’ahia nō teie hepetoma ’e te « ti’afa’ahoura’a » i roto i te fa’atorora’a Bibilia ’e ’a pāpa’i i te mau parau mau tā rātou i ha’api’i mai nō ni’a i te ti’afa’ahoura’a. Vaiiho ’ia rātou ’ia fa’a’ite mai i te mea tā rātou i pāpa’i, ’e ’a fa’aitoito i te mau pīahi ’ia ’āfa’i i tō rātou rima i ni’a ’ia fa’aro’o ana’e rātou i te tahi ta’ata ’ia fa’a’ite mai i te hō’ē ā parau mau tā rātou i pāpa’i. Nō te aha teie mau parau mau i riro ai ’ei mea faufa’a rahi nō tātou ? Nāhea te ’itera’a ē e ti’afa’ahou tātou e fa’ahuru ’ē ai i tō tātou mana’o nō te Metua i te Ao ra ’e nō Iesu Mesia ?. E nehenehe te fa’a’itera’a i te pehe video « ’ua ti’afa’ahou ’oia » (LDS.org) e tauturu i te Vārua ’ia pārahi mai i roto i teie tau’ara’a parau.

Luka 24:13–35

E nehenehe tā tātou e ani i te Fa’aora ’ia « fa’aea mai ia tātou nei ».

• Nō te tauturu i te mau pīahi ’ia ’ite i te mau tū’atira’a i rotopū i te ’ohipa tei tupu ia rātou ’e te ’ohipa tei tupu i te mau pipi i ni’a i te porōmu i Emausa, ’a pāpa’i hōho’a i te hō’ē porōmu i ni’a i te tāpura ’ere ’ere ’e ’a ani i te mau pīahi ’ia pāpa’i i te terera’a ’o teie ’ā’amu i roto ia Luka 24:13–35 i ni’a i te hō’ē pae o te porōmu. I muri iho, i te tahi atu pae o te porōmu, ’e nehenehe tā rātou e pāpa’i i te mau fa’aaura’a tā rātou e ’ite i roto i tō rātou iho orara’a ’ei mau pipi nā Iesu Mesia. ’Ei hi’ora’a, ’e nehenehe tā rātou e pāpa’i ’ua fa’a’orehia rā te ’ite i tō rāua mata (Luke 24:16) i te hō’ē pae o te porōmu ’e ’aita tātou i te tahi mau taime e ’ite i te mana o te Fatu i roto i tō tātou orara’a i te tahi atu pae.

• Tē vai nei e piti hīmene tei niuhia i ni’a ia Luka 24:13–35 : « ’Ei Iā’u Nei, tō’u Atua ē » ’e « ’Ei Iā’u Nei, ’e te Fatu ! » Te mau Hīmene, numera 90, 91. Nāhea e nehenehe ai ia ’outou ’ia fa’a’ohipa i teie mau hīmene nō te tauturu i te mau pīahi ’ia ’ite i te aura’a hōhonu a’e i roto i te fa’a’itera’a a te pāpa’ira’a mo’a,

Mataio 28:16–20 ; Mareko 16:14–20 ; Luka 24:44–53

’Ua fa’auehia tātou ’ia poro i te ’evanelia i tō te ao ato’a nei.

• E nehenehe ato’a te fa’auera’a tā te Fa’aora tei ti’afa’ahou i hōro’a i tāna mau ’āpōsetolo ’ia poro haere i tāna ’evanelia e fa’atanohia i ni’a iho ia tātou i teie mahana. Nāhea ’outou e nehenehe ai e tauturu i tā ’outou mau pīahi ’ia hi’o i tō rātou ti’ara’a i roto i te porora’a i te ’evanelia ? Penei a’e, e nehenehe outou e ani ia rātou ’ia feruri ē, tē hōro’a ra rātou i te tahi mana’o tauturu i te hō’ē melo o te ’utuāfare ’e ’aore rā te hō’ē hoa o tē fātata ra i te reva atu nō te hō’ē misiōni rave tāmau. E aha te mea tā tātou e fa’a’ite atu mai roto mai i te mau parau ’a te Fa’aora i tāna mau ’āpōsetolo ? Nāhea e nehenehe ai ia tātou ’ia fa’a’ohipa i teie iho mau parau i roto i tā tātou mau tauto’ora’a ’ia fa’a’ite i te ’evanelia ia vetahi ’ē ?

Ioane 20:19–28

« E ao tō te feiā ’aore i ’ite iā’u e fa’aro’o mai ai ».

• Tē vai ra paha tā ’outou, te mau pīahi tei au ia Toma o tei hina’aro i te ’ite mata i te Fatu tei ti’afa’ahou, hou ’a ti’aturi ai. ’E nehenehe tā ’outou piha nō te Ha’api’ira’a Sābati e riro ’ei hō’ē vāhi i reira te mau pīahi e nehenehe ai e ha’apūai i te fa’aro’o ’o te tahi ’e te tahi i roto i te mau mea tei ’ore ’e nehenehe ia rātou i te ’ite. Penei a’e, e nehenehe ’outou e ha’amata i te ani i te tahi pīahi ia ha’apoto mai i te ’ohipa tei tupu ia Toma i roto ia Ioane 20:19–28. E nehenehe ato’a ’outou e fa’a’ite i te video « E ao tō te feiā ’aore i ’ite iā’u e fa’aro’o mai ai » (LDS.org). E nehenehe te mau pīahi e tāpura i ni’a i te tāpura ’ere’ere te tahi mau mea tā te Atua i ani ia tātou ’ia ti’aturi ma te ’ite mata ’ore E nehenehe ’outou i muri iho e ani ia rātou ’ia fa’a’ite mai i te mau ’ohipa tei ha’apūai i tō rātou ’itera’a pāpū no ni’a i teie mau mea. E aha te mau ha’amaita’ira’a e tae mai i te mau pīahi ’a fa’a’ohipa ai rātou i te fa’aro’o ?

tō te Mesia fāra’a i te mau ’āpōsetolo

’Ua ha’api’i Iesu ia Toma, « ’Eiaha e fa’aro’o tai’ata, e fa’aro’o rā » [Ioane 20:27).

Ioane 21:3–17

Tē ani nei te Fa’aora ia tātou ’ia fa’a’amu i tāna mau māmoe.

• E aha te mea e nehenehe e tauturu i tā ’outou mau pīahi ’ia fāri’i i te anira’a ’a te Fa’aora ’ia « fa’a’amu i [tāna] mau māmoe ? » E nehenehe ’outou e ha’amata mā te ani ia rātou ’ia tai’o muhu ’ore noa Ioane 21:15–17, ma te mono i te i’oa ’o Simona i tō rātou iho i’oa ’e « tā’u mau ’ārenio » ’e « tā’u mau māmoe » i te mau i’oa ’o te mau ta’ata tā rātou i mana’o ē ’ua hina’aro te Fatu ia rātou ’ia tāvini—’ei hi’ora’a, te mau ta’ata tā rātou e hāhaere nei, te mau ta’ata tupu, ’e ’aore rā te mau ta’ata tā rātou i mātau i te vāhi ravera’a ’ohipa ’e ’aore rā i te fare ha’api’ira’a. I muri a’e te tahi tau minuti, e nehenehe tā te mau pīahi e fa’a’ite mai i tō rātou mau mana’o. E aha te aura’a ’ia fa’a’amu i te mau ’ārenio ’e te mau māmoe ’a te Fa’aora ? E nehenehe te mau fa’ahitira’a parau ’a te peresideni Russell M. Nelson ’e ’a Elder Marvin J. Ashton i roto « Te tahi atu ā mau rāve’a tauturu » e tauturu i te pāhono i teie uira’a.

tāpa’o nō te ha’api’ira’a.

Fa’aitoito i te ha’api’ira’a mai i te fare

Nō te fa’auru i te mau pīahi ’ia tai’o Te ’Ohipa1–5 i teie hepetoma, ’a ani atu ia rātou ’ia ha’apa’o maita’i, e nāhea te hō’ē ta’ata rāva’ai ’ite ’ore i riro mai ai ’ei ta’ata arata’i pūai nō te ’Ēkālesia ’a te Mesia tei parare nā te ao nei. ’A tai’o ai ’outou i teie mau pene, e ’ite mai ’outou e nāhea teie tauira’a i te tupura’a.

tāpa’o nō te mau rāve’a tauturu

Te tahi atu mau rāve’a tauturu

Mataio 28 ; Mareko 16 ; Luka 24 ; Ioane 20–21

’E aha te aura’a 'ia fa’a’amu i te mau māmoe ’a te Fa’aora ?

’Ua fa’a’ite mai te peresideni Russell M. Nelson i teie mau mana’o nō roto mai i te pāpa’ira’a Heleni tahito Ioane 21 :

« I roto te [Ioane 21:15], te parau fa’a’amu nō roto mai ïa i te ta’o Heleni bosko, ’oia ho’i ’ia fa’a’amu ’e ’aore rā ’ia utuutu’. Te parau ’ārenio nō roto mai ïa i te ta’o ha’apotohia arnion, ’oia ho’i ’ārenio iti.’ …

« I roto te [Ioane 21:16], te parau fa’a’amu nō roto mai ïa i te tahi ’ē atu ta’o, poimaino, ’oia ho’i ‘’ia tīa’i, ’ia ha’apa’o, ’e ’aore rā ’ia utuutu’ Te parau māmoe nō roto mai ïa i te ta’o probaton, ’oia ho’i ‘māmoe pa’ari’. …

« I roto te [Ioane 21:17], te parau fa’a’amu nō roto fa’ahou ïa i te Heleni bosko, ’o te fa’a’amura’a ïa. ’Ua ’īriti-fa’ahou-hia te parau māmoe nā roto mai i te parau Heleni probaton, nō te fa’ahiti i te mau māmoe pa’ari.

« Noa atu hō’ē ā aura’a tō rātou nā roto i te reo Peretāne, tē vai nei i roto i teie nā ’īrava e toru, e toru nā pōro’i ta’a ’ē nā roto i te reo Heleni :

• E ti’a i te mau ’ārenio na’ina’i ’ia fa’a’amuhia ’ia nehenehe rātou ’ia pa’ari mai;

• E ti’a i te mau māmoe ’ia utuutuhia ;

• E ti’a i te mau māmoe ’ia fa’a’amuhia » (« Mau tīia’i māmoe, mau ’ārenio, ’e mau taea’e hāhaere », Ensign, ’Ātete 1994, 16).

Nāhea e nehenehe ai ia tātou ’ia « fa’a’amu i [tāna] mau māmo’e ? »

’Ua tātara mai ’o Elder Marvin J. Ashton ē nāhea e nehenehe ai ia tātou ’ia rave fa’aoti i te fa’auera’a ’a te Fatu ’ia fa’a’amu i tāna mau māmoe :

« ’Ua parau Iesu, ‘’A fa’a’amu nā i tā’u mau mamoe’. (Ioane 21:16.) E’ita ’outou e nehenehe e fa’a’amu ia rātou mai te mea ’aita ’outou i ’ite tei hea rātou. E’ita ’outou e nehenehe e fa’a’amu ia rātou mai te mea e hōro’a ’outou ia rātou i te tumu nō te pato’i ia ’outou. E’ita ’outou e nehenehe e fa’a’amu ia rātou mai te mea ’aita tā ’outou e mā’a. E’ita ’e nehenehe ia ’outou ia fa’a’amu ia rātou mai te mea ’aita to ’outou ’e aroha. E’ita ’outou e nehenehe e fa’a’amu ia rātou mai te mea ’aita ’outou e hina’aro e rave i te ’ohipa ’e ia hōro’a. …

« Te feiā e hina’aro i te tauturu, nō te mau huru fāito matahiti ato’a ïa Vetahi o tāna mau māmoe e mea ’āpī, o rātou ana’e, ’e ’ua mo’e. ’Ua rohirohi, ’ua ro’ohia te ’ati ’e ’ua pa’ari te tahi o rātou. Te tahi tei roto i tō tātou iho mau ’utuāfare, i roto i tō tātou iho mau vāhi nohora’a, ’e ’aore rā i roto i te mau poro o te ao nei i reira e nehenehe ai tātou e tauturu nā roto i te mau ō o te ha’apaera’a mā’a. Tē pohe nei te tahi i te pōia. Te pohe nei te tahi nō te here ’ore ’e te aroha ’ore.

« Mai te mea e hōro’a tātou i tāna mau māmoe i te mau tumu nō te pāto’i mai ia tātou, e mea fifi ’e e’ita te fa’a’amura’a e tupu. E’ita roa e nehenehe i te hō’ē ta’ata ’ia ha’api’i atu nā roto i te vahavaha ’e ’aore rā te tāhitohito. E tumā te fa’atītīra’a ’e ’aore rā ‘’ua tano vau ’e ’ua hape ’oe’ i te mau tauto’ora’a ato’a ’ia fa’a’amu i te hō’ē māmoe e ori haere noa ra. E pātuhia ïa te hō’ē patu nō te pāto’ira’a, ’e ’aore roa e ta’ata e maita’i mai. …

« E fa’a’ite tātou i tō tātou here nā roto i tā tātou mau ’ohipa. E mea faufa’a ’ore te mau tāpa’o fa’a’ite nō te here mai te mea e’ita tā tātou mau ’ohipa e tū’ati atu. ’Ua hina’aro pā’āto’a tāna mau māmoe i te rima ’o te hō’ē tīa’i māmoe o te here ia rātou » (« ’A hōro’a ma te pa’ari ’ia nehenehe ia rātou ’ia fāri’i ma te hanahana », Ensign, Novema 1981, 91).

Ha’amaita’ira’a i ta tātou ha’api’ira’a

’A fa’ata’a i te taime ’nō te mau pīahi ’ia fa’a’ite mai. « ’Ia fa’a’ite ana’e te mau pīahi i te mea tā rātou i ha’api’i mai, e’ita rātou e putapū noa i te Vārua ’e e ha’apūai noa i tō rātou iho ’itera’a pāpū, e fa’aitoito ato’a rā rātou i te tahi atu mau pīahi ’ia ’ite i te mau parau mau nō rātou iho. … ’A fa’ata’a i te taime nō te mau pīahi ’ia fa’a’ite mai i tō rātou mana’o i roto i te mau ha’api’ira’a ato’a—i te tahi mau taime, e ’ite paha ’outou ē o teie ihoa ïa te ha’api’ira’a nā roto mai i teie mau ’āparaura’a ». (Ha’api’ira’a mai tā te Fa’aora, 30).