’Ei ha’amana’ora’a iā’u, nā Walter Rane

3–9 nō tiunu.

Ioane 13–17

« ’Ia vai-here-hia atu ā ’outou e au »

’A tuatāpapa ai ’outou nā roto i te pure i te Ioane 13–17, ’a feruri e nāhea ’outou e fa’a’ite maita’i atu ai i tō ’outou here i te feiā tā ’outou e ha’api’i ra. E hōro’a mai te Vārua Maita’i i te mau mana’o i tō ’outou ferurira’a ’a tuatāpapa ai ’outou i te mau pāpa’aira’a mo’a, Mai, pe’e mai—Nō te mau ta’ata iho ’e te mau ’utuāfare, ’e teie arata’ira’a.

’A pāpa’i i to ’outou mana’o

Ani ’ia fa’a’ite mai

’A pāpa’i te mau numera 13 e tae atu i te 17 i ni’a i te tabula ’ere’ere, ’ei fa’ahōho’ara’a i te mau pene i roto ia Ioane tā te mau pīahi e tai’o i teie hepetoma. ’A ani i te tahi mau pīahi ’ia pāpa’i i piha’i iho i te numera o te pene tāta’itahi, te fa’ahorora’a i te hō’ē ’īrava tā rātou i ’ite e mea faufa’a nō rātou ’e o tā rātou e hina’aro i te tuatāpapa i roto i te piha ha’api’ira’a.

Ha’api’i i te ha’api’ira’a tumu

Ioane 13:1–17

’O te Fa’aora tō tātou hi’ora’a maita’i nō te tāvini-ha’eha’a-ra’a ia vetahi ’ē.

• Nō te tauturu i tā ’outou mau pīahi ’ia feruri i te faufa’a nō tō Iesu hōroira’a i te ’āvae o tāna mau pipi, e nehenehe ’outou e ani i te hō’ē pīahi nā mua roa ’ia ha’uti i te ti’ara’a ’o Petero i roto i teie ’ā’amu ’e ’ia uiuihia e te toe’a o te mau pīahi. ’A fa’aitoito i te mau pīahi ’ia mā’imi i roto i te Ioane 13:1–17 ’e ’ia feruri i te mau uira’a faufa’a rahi tā rātou e nehenehe e ui atu ia Petero. E aha tā tātou i ha’api’i mai nā roto mai i teie ’ā’amu o te nehenehe e pāitaita i te huru o tā tātou tāvinira’a ia vetahi ’ē ?

Ioane 13:34–35

Te here o te tāpa’o faufa’a rahi ïa o te mau pipi a Iesu Mesia.

• E aha te mea e nehenehe e fa’aitoito i te mau pīahi ’ia fa’arahi atu ā i te here ? Penei a’e e nehenehe tā ’outou e ani ia rātou e nāhea ’outou e nehenehe ai e parau i te hō’ē ta’ata tā ’outou i fārerei e pipi ’oia nā te Mesia. E aha te mau tāpa’o tā rātou i ’ite i ni’a i teie ta’ata ? E nehenehe tā ’outou e ani ia rātou ’ia ’imi Ioane 13:34–35 nō te ha’api’i mai e nāhea e ’itehia ai te mau pipi mau a te Mesia. E aha tā tātou e nehenehe e rave ’ia fa’ariro i te here ’ei tāpa’o faufa’a rahi nō tō tātou ti’ara’a pipi ? Nāhea teie ha’api’ira’a e fa’auru ai i tō tātou huru i ni’a ia vetahi ’ē, e tae noa atu i ni’a i te mau rāve'a ha’apararera'a tōtiare ?

• Ei piha ha’api’ira’a, e rave rahi mau mea tā’outou i ha’api’i mai nō ni’a i te orara’a o te Fa’aora i teie matahiti, e tae noa atu i te mau hi’ora’a e rave rahi e nāhea ’oia i te fa’a’itera’a i tōna here nō vetahi ’ē. Hō’ē rāve’a nō te tauturu i te mau pīahi ’ia feruri i te fa’auera’a i roto Ioane 13:34 o te pāpa’ira’a ïa Mai iā’u i here ia ’outou i ni’a i te tāpura ’ere’ere ’e ’ia ani atu i te mau pīahi ’ia tāpa’o mai i te mau hi’ora’a tā rātou i ha’amana’o i roto i te Faufa’a ’Āpī o te fa’ahōho’a mai i te here o Iesu. I muri iho e nehenehe ’outou e pāpa’i ’A here te tahi i te tahi i ni’a i te tāpura ’ere’ere ’e ’a ani i te mau pīahi ’ia tāpura mai i te mau rāve’a e nehenehe ai tātou e pe’e i tōna hi’ora’a nō te here. Te hīmenera’a ’e ’aore rā te fa’aro’ora’a i te hīmene « ’A here ’outou mai tā’u i here », Te Mau Hīmene, no. 190, e ’aore rā te māta’ita’ira’a i te hō’ē o te mau video i roto « Te tahi atu mau rāve’a tauturu » e mea maita’i ïa nō teie ’ohipara’a.

• Mai te mea e ere tātou i te ta’ata here roa ia vetahi ’ē, e aha tā tātou e nehenehe e rave nō te ’imira’a i te hōro’a nō te here ? E aha te a’o i roto i te Moroni 7:48 ; 8:26 i tu’u fa’ahou mai i tō tātou ta’a-maita’i-ra’a nō teie hōro’a ? ’O vai tā tātou i ’ite o te hina’aro nei ’ia ’ite i tō tātou here ?

Te here o te huru mau ïa o te mau pipi a Iesu Mesia.

Ioane 14:16–27 ; 15:26 ; 16:7–15

E tauturu te Vārua Maita’i ia tātou ’ia fa’aoti i tā tātou fā ’ei mau pipi a Iesu Mesia.

• Nō te tauturu i te mau pīahi ’ia ha’api’i mai i te ti’ara’a rau ’o te Vārua Maita’i, ’a feruri ’ia tāpupu ia rātou ’e ’ia hōro’a i te pupu tāta’itahi te hō’ē o teie mau pāpa’ira’a mo’a i muri nei : Ioane 14:16–27 ; 15:26 ; ’e 16:7–15. ’A ani i te pupu tāta’itahi ’ia pāpa’i i ni’a i te tāpura ’ere’ere te mea tā rātou i ’apo mai nō ni’a i te Vārua Maita’i nā roto i teie mau pāpa’ira’a mo’a. E nehenehe te mau pīahi e tu’u atu i te tahi atu mau mana’o tei ’itehia e rātou ’a mā’imi ai rātou i te mau pāpa’ira’a mo’a tei tabulahia i roto i « Te tahi atu mau rāve’a tauturu ». E aha te taime tō tātou ’itera’a i te mana o te Vārua Maita’i ? E aha te mau tao’a ’e ’aore rā te mau rāve’a fa’a’ite o tā ’outou e nehenehe e ’āfa’i mai i roto i te piha nō te tauturu i te mau pīahi ’ia māramarama i te mau ti’ara’a ’o te Vārua Maita’i ?

• ’A feruri i te ani na mua atu i te tahi mau pīahi ’ia tuatāpapa i te hō’ē o te mau a’ora’a i roto i te ’āmuira’a rahi tei hōro’ahia mai i roto i « Te tahi atu mau rāve’a tauturu » (’e ’aore rā te tahi ē atu mau a’ora’a i roto i te ’āmuira’a rahi tā rātou i ’ite) nō ni’a i te Vārua Maita’i. ’A fa’ati’a ia rātou ’ia fa’a’ite poto mai i te mea tā rātou i ha’api’i mai i te piha ha’api’ira’a. E aha atu ā tā teie mau parau pōro’i e fa’a’ite mai nei i te mea tā tātou i ’ite nō ni’a i te Vārua Maita’i nā roto mai i te Ioane 14–16 ?

Ioane 15:1–12

’Ia ati atu ana’e tātou i te Fa’aora, e manuia tātou ’e e ’oa’oa tātou.

• ’E aha tā te mau pīahi i ha’api’i mai i teie hepetoma nā roto mai i te parabole a te Fa’aora nō ni’a i te vine ’e te mau ’ama’a ? ’A feruri i te ’āfa’i mai i te piha ha’api’ira’a hō’ē tumu iti ’e ’ia fa’a’ohipa i te reira nō te tauturu i te mau pīahi ia fa’ahōho’a i te parabole ’a te Fa’aora. I muri a’e i te tai’ora’a Ioane 15:1–12 ’e te mau pīahi, e nehenehe ’outou e tāu’aparau i te aura’a o te « ati atu i te [Mesia] » (Ioane 15:4). E nehenehe ’outou e ani i te tahi mau pīahi ’ia fa’a’ite mai e nāhea tō rātou ’itera’a e parau mau te Ioane 15:5. (’A hi’o ato’a i te fa’ahitira’a parau a Elder Jeffrey R. Holland i roto i « Te tahi atu mau rāve’a tauturu ».) ’E nehenehe ato’a te video « Te hina’aro ’o te Atua » (LDS.org) e tauturu i teie ta’uara’a parau.

Ioane 17

’Ua hō’ē maita’i roa te Metua i te Ao ra ’e o Iesu Mesia, ’e te hina’aro nei rāua ’ia hō’ē ato’a tātou.

• E’ita paha e nehenehe ia ’outou ’ia ha’api’i i te tā’āto’ara’a o te mau parau mau faufa’a rahi e ’itehia i roto Ioane 17 i roto i te hō’ē noa tāu’ara’a parau, teie rā hō’ē rāve’a nō te tauturu ia rātou ’ia tuatāpapa e rave rahi o te mau parau mau. ’A pāpa’i i ni’a i te tāpura ’ere’ere te mau parau tumu nā roto mai i te Ioane 17, mai:

  • Tō tātou aura’a ’e o Iesu Mesia

  • Te aura’a ’o Iesu Mesia ’e tōna Metua Tāne

  • Tō tātou aura’a ’e te toe’a o te ao nei.

  • Tō tātou aura’a ’e te tahi ’e te tahi ’ei mau pipi nāna

  ’A ani i te pīahi tāta’itahi ’ia mā’iti i te hō’ē o teie mau parau tumu ’e ’ia tai’o Ioane 17, ma te mā’imi i te mau ’īrava e tū’ati atu i te reira parau tumu. ’A ani i te rahira’a ’o te mau pīahi ’ia fa’a’ite mai e aha tā rātou i ha’api’i mai.

Fa’aitoito i te ha’api’ira’a mai i te fare

Nō te fa’aitoito i te mau pīahi ’ia tai’o Mataio 26 ; Mareko 14 ; Luka 22 ; 'e Ioane 18 i te hepetoma e haere mai nei, e nehenehe ’outou e parau atu ia rātou ē i roto i teie mau pene, e tai’o mai rātou i te hō’ē o te mau taime faufa’a roa i roto i te ’ōpuara’a rahi fa’aora a te Atua.

Te tahi atu mau rāve’a tauturu

Ioane 13–17

Mau Video i ni’a LDS.org nō ni’a i te aroha.

• « ’A here te tahi i te tahi »

• « ’E fa’atusia, e hōro’a 'e e here te mau ’utuāfare »

• « Fa’aineinera’a o Thomas S. Monson : ’Ua ha’api’i mai ’oia i te aroha i roto i t-ona ’āpīra’a »

Te Vārua Maita’i.

• Te ’Ohipa 2:37–38 ; Galatia 5:22–23 ; 1 Nephi 10:17–19 ; 2 Nephi 32:3–5 ; Mosia 3:19 ; 3 Nephi 27:20 ; Moroni 8:26 ; 10:4–5 ; Te Parau Ha’api’ira’a ’e te mau Parau Fafau 8:2–3 ; 42:17

• Robert D. Hales, « Te Vārua Maita’i », Ensign ’e ’aore rā Liahona, Me 2016, 105–7

• Henry B. Eyring, « Te Vārua Maita’i ’ei hoa nō ’outou », Ensign ’e ’aore rā Liahona, Novema 2015, 104–7

• David A. Bednar, « ’A fāri’i i te Vārua Maita’i », Ensign ’e ’aore rā Liahona, Novema 2010, 94–97

’Ati atu i te Mesia

Te parau ’ati e mau tū’atira’a ïa nō te parau tāmau ’e te ha’apa’o, ’ua ha’api’i mai o Elder Jeffrey R. Holland :

« Nō reira te aura’a o teie [parau] e ’ati ïa—e ’ati rā ’e a muri noa atu.’ ’O te pi’ira’a ïa o te parau pōro’i a te ’evānelia… ’A haere mai, ’a haere mai rā nō te fa’aea roa mai. ’A haere mai ma te pāpū ’e te fa’a’oroma’i. …

« ’Ua parau Iesu, ‘i ta’a ’ē atu ’outou iā’u ra, ’aore roa ïa e mea e ti’a ia ’outou’ [Ioane 15:5]. Tē fa’a’ite pāpū atu nei au ē, e parau mau te reira a te Atua. ’Ua riro te Mesia ’ei mau mea ato’a nō tātou ’e e ti’a ia tātou ’ia ‘’ati tāmau noa iāna ra, ma te tu’utu’u ’ore, ma te tāmau noa, e a muri noa atu. ’Ia ’ūa’a ’e ’ia ha’amaita’i te hotu o te ’evanelia i tō tātou orara’a, e ti’a ia tātou ’ia ’ati-pāpū-hia atu iāna, te Fa’aora nō tātou pā’āto’a, ’e i tāna ’Ēkālesia, tei pi’ihia i tōna ra i’oa mo’a. ’O ’oia te vine tei riro ’ei puna mau nō te pūai nō tātou ’e te puna ana’e nō te ora mure ’ore. Nōna, e’ita tātou e fa’a’oroma’i noa, e manuia ’e e upo’oti’a ato’a rā tātou i roto i teie ’ohipa mo’a o te ’ore roa e fa’aru’e ia tātou » (« ’A ’ati mai iā’u », Ensign e ’aore rā Liahona, Me 2004, 32).

Ha’amaita’ira’a i tā tātou ha’api’ira’a

Ani i te Vārua. « ’Aore roa e ’orometua ha’api’i i te tāhuti nei, noa atu tōna ’ite ’aore rā tōna ’aravihi, e nehenehe e mono i te Vārua. E nehenehe rā tātou e riro ’ei mauiha’a i roto i te rima o te Atua nō te tauturu i tāna mau tamari’i ’ia ha’api’i nā roto i te Vārua. Nō te rave i te reira, e ani tātou i te fa’aurura’a a te Vārua i roto i tō tātou orara’a ’e e fa’aitoito tātou i te feiā tā tātou e ha’api’i nei ’ia nā reira ato’a.… E nehenehe tā te mau pāpa’ira’a mo’a, te mau parau a te mau peropheta nō te mau mahana hope’a nei, te fa’a’itera’a i te here ’e te ’itera’a pāpū, ’e te mau taime ferurira’a hau, e tītau i te Vārua ’ia pārahi mai i reira » (Ha’api’ira’a mai tā te Fa’aora, 10).