Te tamā’ara’a hope’a

’E ’ua pō, nā Benjamin McPherson

10–16 nō tiunu.

Mataio 26 ; Mareko 14 ; Luka 22 ; Ioane 18

« ’Ia tupu rā tō ’oe hina’aro, ’eiaha tō’u »

’A tai’o i te Mataio 26 ; Mareko 14 ; Luka 22 ; e Ioane 18, ’e ’a feruri i te mau mana’o ’e te mau fa’a’itera’a o te tae mai i tō ’outou ferurira’a. ’E aha te mau parau pōro’i e ti’a i tā ’outou mau pīahi ’ia ha’api’i mai ?

’A pāpa’i i tō ’outou mana’o

tāpa’o nō te fa’a’itera’a

’A ani ’ia fa’a’ite mai

’A ani i te mau pīahi ’ia fa’a’ite mai i te tahi mea tā’rātou i ha’api’i mai i teie hepetoma tei tauturu ia rātou ’ia ’imi i te tahi atu ā faufa’a i roto i te ’ōro’a. E aha tā rātou i rave ’e nahea te reira i te pāitaitara’a [affecté] i tō rātou ’itera’a i te ravera’a i te ’ōro’a ?

tāpa’o nō te ha’api’ira’a

Ha’api’i i te ha’api’ira’a tumu

Mataio 26:26–29 ; Luka 22:19–20

Te ’ōro’a o te ïa rāve’a nō te ha’amana’o noa i te Fa’aora.

• Nō te aha te Fa’aora i ha’amau ai i te ’ōro’a mo’a ? Nō te aha tātou e rave ai i te ’ōro’a i te mau hepetoma ato’a ? E aha te mau pāhonora’a tā te mau pīahi e nehenehe e ’ite mai i roto Mataio 26:26–29 ; Luka 22:7–20 ; Te Parau Ha’api’ira’a e te mau Parau Fafau 20:75–79 ; ’e Mau Māite i te Fa’aro’o, 147–49 ? ’Ei hi’ora’a, tē ha’api’i nei Mau Māite i te Fa’aro’o ē tē fa’aha’amana’o nei te ’ōro’a i te tusia a te Mesia, tei fa’ati’a i te ture a Mose. E hina’aro ato’a paha ’outou e tai’o i roto i te piha te mau pure nō te ’ōro’a ’e ’ia ani i te mau pīahi ’ia ’imi i te mau fafaura’a tā’tātou e rave ’ei tufa’a nō te ’ōro’a. Nāhea tātou e nehenehe ai e tauturu i te hō’ē ta’ata ’ia māramarama i te aura’a o teie mau fafaura’a ? Nāhea tō tātou ravera’a i te ’ōro’a e fa’ahuru ’ē ai i te mau mā’itira’a tā tātou e rave i roto i te hepetoma ?

  feiā ’āpī tamāhine e rave ra i te ’ōro’a

  ’Ia rave ana’e tātou i te ’ōro’a, tē fa’a’āpī ra tātou i tā tātou mau fafaura’a.

• E fana’o paha te mau pīahi ’ia fa’aro’o i te mau mana’o o vetahi nō ni’a e nāhea ’ia ha’amana’o i te Fa’aora i roto i te ’ōro’a ’e i te ro’ara’a o te hepetoma (’a hi’o PH&PF 6:36–37). Penei a’e e nehenehe tā ’outou e ani ia rātou ’ia fa’a’ite mai i te mea tei tauturu ia rātou ’e tō rātou mau ’utuāfare ’ia ha’amana’o i te Fa’aora ’e ’ia ha’apa’o i tā rātou mau fafaura’a. E aha te mau ’īrava i roto i te tai’ora’a nō teie hepetoma i fa’ahōhonu i tō tātou fa’aturara’a i te ’ōro’a ? Nō te tahi atu mau mana’o e nāhea ’ia ha’amana’o i te Fa’aora, a hi’o Gerrit W. Gong, « ’Ia ha’amana’o noa iāna », Ensign e ’aore rā Liahona, Me 2016, 108–11.

• E nehenehe teie tau’ara’a parau e riro ’ei hō’ē rāve’a maita’i nō te hi’o e te mau pīahi i te mau tāpa’o nō te ’ōro’a. Nāhea teie mau tāpa’o i te tauturu ia tātou ’ia fa’atumu i ni’a i te Fa’aora i te taime o te ’ōro’a ? E aha tā teie mau tāpa’o e ha’api’i ia tātou nō ni’a iāna ’e tō tātou aura’a e ōna ?

• I te pae hope’a o tā ’outou tau’ara’a parau nō ni’a i te ’ōro’a, e nehenehe ’outou e hōro’a atu i te mau pīahi te tahi taime nō te feruri ’e nō te pāpa’i i te mea tei fa’auru ia rātou ’ia rave nō te fa’aineine nō te ’ōro’a i te hepetoma i mua nei. Nō te fa’arahi atu i te vārua nō teie ’itera’a, ’a feruri i te ha’uti i te hō’ē hīmene ’ōro’a ’a feruri ai te mau pīahi.

Mataio 26:36–46

E riro mai tātou mai te Mesia ra te huru ’ia mā’iti ana’e tātou e auraro i tō tātou hina’aro i te hina’aro o te Metua.

• E nehenehe te hi’ora’a o te Fa’aora i te aurarora’a i te Metua e tauturu i tā ’outou mau pīahi ’ia hina’aro ana’e rātou e nā reira ato’a. Nō te ha’amata i te hō’ē tau’ara’a parau, e nehenehe tā ’outou e ani i te pīahi tāta’itahi ’ia fa’a’ite mai i te hō’ē taime ’a auraro ai rātou i te tahi mea tā rātou i ’ite e ’ua hina’aro te Atua ’ia nā reira rātou. E aha tei tura’i ia rātou ’ia rave i taua mau mea ra ? ’A ani i te mau pīahi ’ia tai’o Mataio 26:36-42 ’e ’ia feruri nō te aha te Fa’aora i hina’aro ai i te auraro i tōna hina’aro i te hina’aro o tōna Metua. Nāhea te aurarora’a i tō tātou hina’aro i te Atua e nehenehe e ha’amaita’i ia tātou i te pae hope’a ?

• Nō te tuātapapa i te parau tumu nō te aurarora’a i te Atua, e nehenehe tā’outou e ani i te ’āfara’a o te piha ’ia tai’o Mosia 3:19 ’e i te tahi ’āfara’a ’ia tai’o 3 Nephi 9:20. E aha tā teie mau ’īrava e ha’api’i nei nō ni’a i te aura’a ’ia auraro atu i te Atua ? Nāhea tātou ’ia auraro ? E nehenehe tā te mau pīahi e feruri e nāhea rātou i te auraro i tō rātou mau hina’aro i te Atua i te hepetoma e haere mai nei. E nehenehe te fa’ahitira’a parau a Elder Neal A. Maxwell i roto i « Te tahi atu mau rāve’a tauturu » e tu’u-ato’a-hia i roto i tā’outou ’āparaura’a.

Mataio 26:20-22, 31-35

E ti’a ia tātou ’ia hi’opo’a i tō tātou iho orara’a nō te fa’aoti e nāhea te mau parau a te Fatu e tano ai i ni’a ia tātou.

• E rave rahi mau ha’api’ira’a ’evānelia tā tātou e fa’aro’o nei i roto i tō tātou orara’a, i te tahi taime rā e riro e fa’ahemara’a ’ia mana’o tātou ē, e tano hau atu taua mau ha’api’ira’a ra i te tahi ’ē atu mau ta’ata. E nehenehe te hō’ē tau’ara’a parau nō ni’a ia Mataio 26 e tauturu ia tātou ’ia ha’avī i teie peu. Nō te ha’amata i teie tau’ara’a parau, e nehenehe outou e vāhi i te piha nā te pea ’e ’ia ani i te hō’ē ta’ata i roto i te pea tāta’itahi ’ia tai’o i te Mataio 26:20–22 e te tahi ’ia tai’o te mau ’īrava 31–35. ’A ani ia rātou ’ia fa’aau i te mau pāhonora’a ’a te mau pipi i roto i teie nā ’ā’amu e piti. E aha te mau ha’api’ira’a tā tātou e nehenehe e ha’api’i mai, nō ni’a i te fa’a’ohipara’a te mau pipi i te mau parau a te Fa’aora i ni’a ia rātou iho ? Nō te ha’api’i mai atu ā, ’a hi’o i te fa’ahorora’a a te peresideni Dieter F. Uchtdorf’s i te Mataio 26:21–22 i roto i tāna parau pōro’i « E te Fatu, o vau ānei ? » (Ensign e ’aore rā Liahona, Novema 2014, 56–59).

Mataio 26:36–46

’Ua rave Iesu Mesia i te hō’ē tāra’ehara mure ’ore nō tātou.

• ’A feruri i te ani i te mau pīahi ’ia fa’a’ite mai i te mau mana’o tā rātou i ’ite mai nō ni’a i te tāra’ehara a Iesu Mesia i roto i tā rātou iho e ’aore rā tā te ’utuāfare tuātapapara’a.

• Tē fa’a’ite nei o Mataio 26 i te mea i tupu i Getesemane, ’ua ta’a maita’i ānei i tā’outou mau pīahi te aura’a o te reira i roto i tō rātou orara’a ? Nō te tauturu ia rātou, penei a’e e nehenehe tā’outou e pāpa’i i ni’a i te tāpura ’ere’ere te mau uira’a mai teie E aha tei tupu i Getesemane ? ’e Nō te aha e mea faufa’a te reira nō’u ? E nehenehe te mau pīahi e ha’a tāta’itahi e ’aore rā i roto i te mau pupu na’ina’i nō te ’imi i te mau pāhonora’a i roto Mataio 26:36–46 ; Alama 7:11–13 ; e Te Parau Ha’api’ira’a e te mau Parau Fafau 19:16–19. E nehenehe ato’a rātou e ’imi i te mau pāhonora’a i roto i te parau poro’i ’a Elder C. Scott Grow « Te temeio nō te tāra’ehara » (Ensign ’e ’aore rā Liahona, Me 2011, 108–10).

• I roto i te buka a Moromona, ’ua pi’i Iakoba i te tāra’ehara a Iesu Mesia « hō’e tāra’ehara mure ’ore » (2 Nephi 9:7). Nō te tauturu i te mau pīahi ’ia ta’a maita’i i te aura’a o te reira, e nehenehe outou e fa’a’ite atu i te mau ha’api’ira’a a te peresideni Russell M. Nelson i roto « Te tahi atu mau rāve’a tauturu » ’e ’ia ani i te mau pīahi ’ia tāpura i te mau rāve’a e nehenehe ai te mana o te tusia a te Fa’aora e fa’arirohia ’ei mea mure ’ore. E nehenehe ato’a tā rātou e tai’o i teie mau pāpa’ira’a mo’a i muri nei ’e ’ia tu’u atu i ni’a i tā rātou tāpura : Hebera10:10 ; Alama 34:10–14 ; Te Parau Ha’api’ira’a e te mau Parau Fafau 76:24 ; ’e Mose 1:33. Nāhea tātou ’ia fa’a’ite i tō tātou māuruuru nō te mea tā te Fa’aora i rave nō tātou ?

tāpa’o nō te ha’api’ira’a.

Fa’aitoito i te ha’api’ira’a mai i te fare.

Nō te fa’auru i te mau pīahi ’ia tāmau noa i te tai’o, e nehenehe ’outou e ani ia rātou ē, ’ua ’ite ānei rātou e aha nā mea e hitu tā Iesu i parau ’a vai ai ’oia i ni’a i te sātauro. A parau atu ia rātou ē, e ’ite rātou e aha tā te Fa’aora i parau nā roto i te tai’ora’a Mataio 27 ; Mareko 15 ; Luka 23 ; ’e Ioane 19.

tāpa’o nō te mau rāve’a tauturu

Te tahi atu mau rāve’a tauturu

Mataio 26 ; Mareko  ; Luka 22 ; Ioane 18

Video Bibilia (LDS.org).

« Te tamā’ara’a hope’a », « Tē mamae ra te Fa’aora i Getesemane »

Te aurarora’a i tō tātou hina’aro i tō te Metua.

’Ua ha’api’i o Elder Neal A. Maxwell : « ’A auraro ai ’outou i tō ’outou mau hina’aro i tō te Atua, tē hōro’a ra ïa ’outou iāna te mea ana’e e ti’a ia ’outou ia hōro’a iāna o tā ’outou e hōro’a mau. ’Eiaha e tīa’i maoro nō te ’imi i te fata e ’aore rā ’ia ha’amata i te tu’u i te hōro’ara’a o tō ’outou mau hina’aro i ni’a iho i te reira fata ! » (« ’A ha’amana’o i te aroha o te Fatu », Ensign e ’aore rā Liahona, Me 2004, 46).

Te tāra’ehara mure ’ore

’Ua ha’api’i te peresideni Russell M. Nelson :

« E mea mure ’ore te tāra’ehara a [Iesu Mesia]—’aore e hope’ara’a. E mea mure ’ore ato’a nō te mea e fa’aorahia te ta’ata ato’a i te pohe hope’a ’ore. E mea mure ’ore ’ia fa’aauhia i tōna mamae rahi. E mea mure ’ore i roto i te tau, na roto i te fa’ati’a-hope-ra’a i te hōho’a o te tusia animara. E mea mure ’ore i roto i te ’ā’anora’a—’ia ravehia te reira hō’ē noa taime nō te tā’āto’ara’a. ’E ’aita te aroha o te tāra’ehara i tae noa i te hō’ē numera hope’a ’ore o te mau ta’ata, ’ua tae ato’a rā i te hō’ē numera hope’a ’ore o te mau ao tei hāmanihia e āna. E mea mure ’ore hau atu i te mau fāito ta’ata e ’aore rā te ’ite o te tāhuti nei.

« ’O Iesu ana’e te nehenehe e pūpū i taua huru tāra’ehara mure ’ore ra, nō te mea ’ua fānauhia ’oia i te hō’ē metua vahine tāhuti ’e te hō’ē Metua Tāne mure ’ore. Nō tōna fānaura’a ta’a ’ē, ’ua riro Iesu ’ei hō’ē ta’ata mure ’ore » (« The Atonement », Ensign, Novema 1996, 35).

’Ua ha’api’i te peresideni Heber J. Grant : «’Aita Iesu i haere noa mai ’ei hōro’a nō te tā’āto’ara’a, ’ua haere mai rā ’oia ’ei hōro’ara’a nō te ta’ata tātai’itahi… ’Ua pohe ’oia nō tātou tāta’itahi i Kalavari ’e e fa’aora tōna toto ia tātou mai te au i te mau tītaura’a. ’Eiaha ’ei mau nuna’a, ’ei mau ’āmui-tahi-ra’a e ’aore rā mau pupu, ’ei mau ta’ata tāta’itahi rā » (« A Marvelous Growth », Juvenile Instructor, Ditema 1929, 697).

Ha’amaita’ira’a i tā tātou ha’api’ira’a

’A hi’o nā roto i te mata ’o te Atua ’A tūtava i te hi’o i tā ’outou mau pīahi mai tā te Atua e hi’o ra ia rātou, ’e e fa’a’ite mai te Vārua ia ’outou i tō rātou faufa’a ’e tō rātou ’aravihi hanahana. ’A nā reira ai ’outou, e arata’ihia ’outou i roto i tā ’outou mau tauto’ora’a ’ia tauturu ia rātou (’a hi’o Ha’api’ira’a mai tā te Fa’aora, 6).