« 9–15 nō Tetepa. 2 Korinetia 1–7 : « E fa’afaite ’outou i te Atua » Mai pe’e mai—nō te Ha’api’ira’a Sābati : Faufa’a ’Āpī 2019 (2019)
« 9–15 nō Tetepa. 2 Korinetia 1–7 », Mai, pe’e mai—nō te Ha’a’pi’ira’a Sābati : 2019
9-15 nō Tetepa.
2 Korinetia 1–7
« E fa’afaite ’outou i te Atua »
’Ia tai’o ana’e ’outou i te 2 Korinetia 1-7 i teie hepetoma, ’a feruri i te tahi mau pīahi ta’a ’ē—rātou ’o tē haere mai nei ’e rātou ’o tē ’ore e haere mai nei i roto i te ha’api’ira’a. Nāhea te mau parau tumu i roto i teie mau pene e nehenehe ai e ha’amaita’i ia rātou ?
Pāpa’i i tō ’outou mau mana’o
Ani ’ia fa’a’ite mai i te mau mana’o
’A hōro’a i te taime nō te mau pīahi nō te fa’a’ite mai i te mau mana’o tei ha’amaita’i atu ā i tā rātou tuatāpapara’a i te mau pāpa’ira’a mo’a.
Ha’api’i i te ha’api’ira’a tumu
2 Korinetia 1:3–7 ; 4:6–10, 17–18 ; 7:4–7
E nehenehe tō tātou mau tamatara’a e riro ’ei hō’ē ha’amaita’ira’a.
-
Penei a’e tē vai ra te hō’ē pīahi i roto i te piha ha’api’ira’a e fa’aruru ra i te hō’ē tāmatara’a fifi. E nehenehe te mau mea tā Paulo i fa’a’ite ’e te a’o tāna i hōro’a i roto i te 2 Korinetia e tauturu i te mau pīahi ’ia feruri i te mau ha’amaita’ira’a e nehenehe e tae mai nā roto i tō rātou mau tāmatara’a. Nō te ha’amata i te hō’ē ’āparaura’a, e nehenehe tā ’outou e ani i te hō’ē pīahi ’ia haere ineine mai nō te paraparau e nāhea te hō’ē tāmatara’a i te ha’amaita’i i tōna orara’a ’e ’aore rā te mea tāna i ’apo mai nā roto mai i te tahi ta’ata tei fa’aruru i te hō’ē tāmatara’a. E nehenehe tā ’outou i muri iho e hōro’a i tā ’outou mau pīahi te tahi nau minuti nō te tai’o fa’ahou i te 2 Korinetia1:3–7 ; 4:6–10, 17–18 ; ’e 7:4–7, ma te hi’o atu i te mea tā Paulo i ha’api’i nō ni’a i te mau tumu ’e te mau ha’amaita’ira’a o te mau tāmatara’a. (Nō te mau hi’ora’a nō tāna mau ha’api’ira’a, ’a hi’o te Arata’ira’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare.). ’A ani i te mau pīahi ’ia fa’a’ite mai e aha tā rātou i ’ite mai. E nehenehe ’outou e parau ē ’ia tai’o pūai mai rātou i te ’īrava i ’ite ai rātou i te hō’ē ha’apī’ira’a ta’a ’ē ’e ’ia fa’a’ite mai i te hō’ē ’ohipa i tupu ’aore rā te ’itera’a pāpū e tū’ati atu i taua ha’api’ira’a ra.
-
’A feruri i te hōro’a atu i te mau pīahi te taime nō te feruri hōhonu e nāhea ra te mau tāmatara’a e nehenehe ai e ha’amaita’i i tō tātou orara’a, nā roto i te tai’o-fa’ahou-ra’a i te mau ha’api’ira’a a Paulo i roto i te 2 Korinetia 1:3–7 ; 4:6–10, 17–18 ; ’e 7:4–7. E nehenehe tā rātou e pāpa’i i roto i teie taime e nāhea te mau ha’api’ira’a a Paulo e nehenehe ai ’ia fa’ahaerehia i ni’a i te mau ’ati tā rātou e fa’aruru nei i roto i tō rātou iho orara’a.
-
’Ei tauturura’a i tā ’outou ’āparaura’a, ’a feruri i te hīmene ’āmui i te mau hīmene auhia e te mau pīahi ’o te fa’a’ite pāpū mai i te tāmahanahanara’a ’e te mau ha’amaita’ira’a tā te Metua i te Ao ’e tā te Fa’aora e pupu mai ia tātou i roto i te mau tau tāmatara’a—mai te « Auē te Pa’ari » (Te mau Hīmene, nūmera 41). I muri a’e i te hīmene-’āmui-ra’a, e nehenehe tā ’outou e ani i te mau pīahi ’ia hi’o i te hō’ē pereota i roto i te 2 Korinetia 1 ’e 4 tā rātou i mana’o e tano i te pōro’i ’o te hīmene.
E fāri’i tātou i te mau ha’amaita’ira’a ’e e ha’amaita’i tātou ia vetahi ’ē ’ia fa’a’ore ana’e tātou i te hara a vetahi ’ē.
-
’Ua fāri’i pā’āto’a tātou i te mau taime ’a « fa’atupu ai te tahi ta’ata i te ’oto » i roto ia tātou ’aore rā i tō tātou ’utuāfare (’īrava 5). Penei a’e e nehenehe i te mau pīahi ’ia mā’imi i roto i te 2 Korinetia 2:5–11 te a’o a Paulo, e aha rā ïa tō tātou huru i ni’a i te ta’ata tei hāmani ’ino mai ia tātou. ’A feruri i te ani i te mau pīahi ’ia tai’o fa’ahou ia Luka 15:11–32 ; Ioane 8:1–11 ; ’e te fa’ahitira’a parau a Elder Kevin R. Duncan (’a hi’o i « Te tahi atu ā mau rāve’a tauturu ») nō te fa’arahi atu ā i tō tātou ’ite ’e e aha rā tō tātou huru i te mau ta’ata tei hara. Nāhea tātou e ha’amāuiui ai ia tātou iho ’e ia vetahi ’ē ’ia ’ore ana’e tātou e hina’aro i te fa’a’ore i te hara a te tahi ?
Nā roto i te tāra’ehara a Iesu Mesia, e nehenehe ïa ia tātou ’ia fa’afaite atu i te Atua.
-
E rave rahi mau ta’ata e haere mai nei i te purera’a mā te hina’aro i te ha’afātata atu i te Atua, ’e e nehenehe te hō’ē ’āparaura’a i ni’a i te 2 Korinetia 5:14–21 e tauturu ia rātou. Nō te ha’amata, e nenehene tā te mau pīahi e ’imi i te aura’a ’o te tā’o fa’afaite, penei a’e nā roto i te hi’ora’a i te tā’o i roto i te hō’ē fa’atoro parau. E aha te mau ’ite e hōro’ahia mai nō ni’a i te fa’afaitera’a atu i te Atua ? E aha ā te tahi atu mau ’ite e noa’a mai ia tātou i roto i te tā’o « Tāra’ehara » i roto i te Fa’atoro Parau ’a te Bibilia ? Nāhea teie mau ’ite e tauturu ai ia tātou ’ia māramarama i te 2 Korinetia 5:14–21 ? E nehenehe tā ’outou e ani i te mau pīahi ’ia fa’a’ite mai i tō rātou mau mana’o nō te Fa’aora, nā tāna ho’i tāra’ehara i fa’ati’a ia tātou ’ia ’āmuihia atu i te Atua ra.
E arata’i ti’a atu te ’oto e au i te Atua i te tātarahapara’a mau.
-
Tē hōro’a mai nei te 2 Korinetia 7:8–11 i te hō’ē tātarara’a nō te ’oto e au i te Atua ’e tāna tufa’a i roto i te tātarahapara’a. E aha tā tātou i ha’api’i mai nō ni’a i te ’oto e au i te Atua i roto i te 2 Korinetia 7:8–11 ’e te mau parau a te peresideni Dieter F. Uchtdorf i roto i « Te tahi atu ā mau rāve’a tauturu » ? Nō te aha te ’oto e au i te Atua i riro ai ’ei mea faufa’a rahi nō te tātarahapara’a ?
-
E fa’auruhia paha ’outou ’ia fa’aitoito i te fa’arahi atu ā te ’āparaura’a nō ni’a i te tātarahapara’a. Mai te mea ē te reira, e nehenehe tā ’outou e tāmata i teie mea : ’A pāpa’i atu i ni’a i te ’iri pāpa’ira’a Te Tātatarahapara’a e . ’A ani i te mau pīahi ’ia ’imi i te mau rāve’a nō te fa’ahope i teie pereota, mā te fa’a’ohipa i te mau mea tā rātou i ha’api’i mai i roto i te 2 Korinetia 7:8–11, i roto ato’a i te mau pāpa’ira’a mo’a ’e te tahi atu mau rāve’a tauturu tei ’itehia i roto i « Te tahi atu ā mau rāve’a tauturu ». Nāhea e nehenehe ai ia rātou ’ia fa’a’ohipa i teie mau ha’api’ira’a nō te tauturu i te tahi ta’ata ’ia ta’a e nāhea ’ia tātarahapa mau ?
Fa’aitoito i te ha’api’ira’a mai i te fare
’A ani i te mau pīahi ē, ’ua pure a’ena ānei rātou ē ’ia ’īriti-’ē-hia atu te hō’ē tāmatara’a ’aore rā ’ati. I roto i te 2 Korinetia 8–13, e ’ite ïa rātou e nāhea tō Paulo pāhonora’a ’a pure ai ’oia nō te reira e ’aita rā tāna pure i pāhonohia mai tāna i tia’i.
Te tahi atu ā mau rāve’a tauturu
Te hi’ora’a ia vetahi ē mai tā te Atua e hi’o nei ia rātou e tauturu ïa ia tātou ’ia fa’a’ore i te hara a vetahi ’ē.
’Ua ha’api’i Elder Kevin R. Duncan ē : « Te hō’ē tāviri nō te fa’a’ore i te hapa a vētahi ’ē ’o te tāmatara’a ïa ’ia hi’o ia rātou mai tā te Atua e hi’o nei ia rātou. E nehenehe tā te Atua e vete i te paruai ’e e ha’amaita’i ia tātou i te hōro’ara’a nō te ’ite i roto i te ’ā’au, te vārua ’o te tahi atu ta’ata ’o tei hāmani ino ia tātou. E nehenehe tei mana’o e arata’i ti’a atu i te hō’ē aroha rahi nō taua ta’ata ra » (« Te rā’au fa’aora o te fa’a’orera’a hapa », Ensign ’aore rā Liahona, Mē 2016, 34).
E fa’auru te ’oto e au i te Atua i te tauira’a ’e te ti’aturira’a
’Ua ha’amāramarama mai te peresideni Dieter F. Uchtdorf :
« E fa’auru te ’oto e au i te Atua i te tauira’a ’e i te ti’aturira’a nā roto i te tāra’ehara a Iesu Mesia. ’Āre’a te ’oto o teie ao , e huti te reira ia tātou i raro, e fa’a’ore i te ti’aturira’a, ’e e tura’i ia tātou i roto i te tahi atu mau fa’ahemara’a.
« E arata’i te ’oto e au i te Atua i te fa’afāriura’a ’e i te hō’ē tauira’a o te ’ā’au. E tura’i te reira ia tātou ’ia au ’ore i te hara ’e ’ia here i te maita’i. E fa’aitoito te reira ia tātou ’ia ti’a i ni’a ’e ’ia haere i roto i te māramarama o te here o te Mesia. Te tātarahapara’a mau ’o te tauira’a ïa, e ’ere rā te ha’amāuiuira’a ’aore rā te fa’a’otora’a » (« E nehenehe tā ’outou e rave i teie nei ! » Ensign ’aore rā Liahona, Novema 2013, 56).
E aha ïa te tātarahapara’a ?
-
Fa’atoro Parau a te Bībīlia, « Tātarahapara’a »
-
« Tātarahapara’a », Mau parau tumu nō te ’Evānelia,topics.lds.org.
-
Dale G. Renlund, « Te tātarahapara’a : Hō’ē mā’itira’a ’oa’oa », Ensign ’aore rā Liahona, Novema 2016, 121–24
’Ua ha’api’i Elder Neil L. Andersen ē :
« ’Ia hara ana’e tātou, e fāriu ’ē atu ïa tātou i te Atua. ’Ia tātarahapa ana’e tātou, e fāriu atu ïa tātou i te Atua.
« Te anira’a ’ia tātarahapa e mea varavara ïa i te riro ’ei reo nō te fa’a’utu’ara’a, e anira’a rā nō te ho’i mai, ’e ’ia fāriu fa’ahou atu i te Atua ra [’a hi’o Helamana 7:17]. ’O te tāparura’a ïa a te hō’ē Metua here ’e tāna Tamaiti Fānau Tahi ’ia maita’i a’e ā tātou, ’ia noa’a ia tātou te hō’ē huru orara’a teitei a’e, ’ia taui, ’e ’ia ’ite tātou i te ’oa’oa nā roto i te ha’apa’ora’a i te mau fa’auera’a. ’Ei pipi nā te Mesia, tē ’oa’oa nei tātou i te ha’amaita’ira’a nō te tātarahapara’a ’e te ’oa’oa nō te fa’a’orera’ahia tā tātou mau hara. ’Ua riro te reira ’ei tuha’a nā tātou, ’o te arata’i i te huru nō tō tātou ferurira’a ’e tō tātou mana’o. […]
« Nō te rahira’a ’o te ta’ata, te tātarahapara’a, ’o te hō’ē ïa tere hau atu i te hō’ē fa’anahora’a nō te hō’ē mahana. E ’ere i te mea ’ōhie. E mea fifi ’ia taui. E tītauhia ’ia fa’aruru atu i te mata’i, ’ia ’au atu nō te fa’aruru i te ’opape. ’Ua parau Iesu ē « te ta’ata i hina’aro i te pe’e mai iā’u, e fa’aru’e ’oia iāna iho, e rave i tāna sātauro, ’a pe’e mai ai iā’u » [Mataio 16:24]. Te tātarahapara’a, ’o te fāriu-’ē-ra’a atu ïa i te tahi mau mea mai te parau-ti’a ’ore, te te’ote’o, te riri, ’e te mana’o ’ino ; ’e te fāriura’a atu ïa i te tahi atu mau mea mai te maita’i, te ha’apa’o-ore-noa-ra’a iāna iho, te fa’a’oroma’i, ’e te orara’a vārua. O te fāriu-fa’ahou-ra’a atu ïa i te Atua » (« ’A tātarahapa… ’ia fa’aora vau ’ia ’outou », Ensign ’aore rā Liahona, Novema 2009, 40–41).
Ha’amaita’ira’a i tā tātou ha’api’ira’a
’A fa’a’ohipa i te mau pīahi i roto i te fifi. I te tahi mau taime, te mea noa tā te mau pīahi i roto i te fifi e hina’aro nei ’ia fāri’ihia ’e ’ia herehia rātou. ’A feruri i te hōro’a atu ia rātou i te hō’ē ’ohipa i roto i te hō’ē ha’api’ira’a i mua nei. ’Eiaha e fa’aea mai te mea e’ita rātou e pāhono i tā ’outou mau tauto’ora’a i te ha’amatara’a. (’A hi’o Ha’api’ira’a mai tā te Fa’aora,8-9.)