16-22 nō Tetepa.

2 Korinetia 8-13

« ’O te ta’ata hōro’a noa tā te Atua e hina’aro »

’Ia tai’o ’outou i te 2 Korinetia 8–13, ’a feruri i tā ’outou mau pīahi ’e ’a fa’anaho i te mau ’ohipara’a ’o te tauturu ia rātou ’ia ’ite i te mau parau tumu i roto i teie mau pene. ’A hi’o fa’ahou i muri iho i teie arata’ira’a nō te tahi atu ā mau mana’o.

Pāpa’i i tō ’outou mau mana’o

Ani ’ia fa’a’ite mai i te mau mana’o

Teie te hō’ē rāve’a nō te ani i te mau pīahi ’ia fa’a’ite mai i te mea tā rātou i ha’api’i mai nā roto mai i te 2 Korinetia 8–13. ’A ani i te tahi ’o rātou ’ia pāpa’i i ni’a i te ’iri pāpa’ira’a te hō’ē pereota i auhia e rātou i roto i tā rātou tai’ora’a, ’a ani i muri iho i te toe’a ’o te mau pīahi ’ia ’imi i te reira i roto i te mau pāpa’ira’a mo’a. ’A ani i te mau pīahi ’ia fa’a’ite nō te aha e mea faufa’a rahi nō rātou teie mau pereota.

Ha’api’i i te ha’api’ira’a tumu

2 Korinetia 8:1–15; 9:6–15

E hōro’a te feiā mo’a mā te ’ana’anatae i tā rātou mau mea nō te ha’amaita’i i te feiā veve ’e tei nava’i ’ore.

• ’Ua fa’aue te Atua i tāna feiā mo’a ’ia tauturu i te ’atu’atu i te mau ta’ata i roto i te ’ati, ’e e nehenehe te mau ’īrava i roto i te 2 Korinetia 8–9 e fa’auru i tā ’outou mau pīahi i roto i tā rātou mau tauto’ora’a. Nō te tauturu ia rātou ’ia ’imi i teie mau ’īrava, e nehenehe tā ’outou e pāpa’i i ni’a i te ’iri pāpa’ira’a i teie mau uira’a Nō te aha tātou e hōro’a ai ? ’e Nāhea e ti’a ai ia tātou ’ia hōro’a ? E nehenehe te ’āfara’a ’o te mau pīahi e ’imi i te mau pāhonora’a i roto i te 2 Korinetia 8:1–15, ’e te tahi atu ’āfa e ’imi ïa i roto i te 2 Korinetia 9:6–15. (E nehenehe tā ’outou e ha’amāramarama ē i roto i te pene 8, mau ’īrava 1–5, ’ua parau o Paulo nō te feiā mo’a i Makedonia ’ei mau hi’ora’a maita’i nō te hōro’ara’a rahi.) Nāhea e nehenehe ai i te mau parau tumu tei ha’api’ihia e Paulo e tauturu ia tātou ’ia ’atu’atu maita’i atu ā i te feiā veve ’e tei nava’i ’ore ?

• Nō te tauturu i te mau pīahi ’ia ta’a maita’i a’e i te rāve’a a te Fatu nō te pāhonora’a i te mau hina’aro pae tino ’o tāna feiā mo’a, tē vai ra ïa e rave rahi mau rāve’a tauturu tei tapurahia i roto i « Te tahi atu ā mau rāve’a tauturu ». Penei a’e e nehenehe tā ’outou e fa’ata’a i te tahi mau pīahi ’ia tai’o fa’ahou i te hō’ē ’aore rā hau atu o teie mau rāve’a tauturu ’e ’ia fa’a’ite mai i te mea tei ha’aputapū ia rātou. E nehenehe ānei i te mau pīahi ’ia ’ite i te mau mana’o i roto i te 2 Korinetia 8:1–15 ; 9:6–15 ’o tē fa’a’ite mai ē ’ua utuutu te feiā mo’a i te tau o Paulo i te feiā veve mai tā tātou e nā reira nei i teie mahana ?

2 Korinetia 11:13-33

Tē tūtava nei te mau peropheta ha’avare i te ha’avare.

• Nō te mea ho’i ē, mai te feiā mo’a nō Korinetia, tē vare pā’āto’a nei tātou i te mau ha’apira’a hape, e nehenehe ïa tātou ’ia fana’o nā roto i te tai’o-fa’ahou-ra’a i te mau fa’aarara’a a Paulo i tō Korinetia nō ni’a i te mau « ’āpōsetolo ha’avare ». E nehenehe tā te mau pīahi e ’imi i te mau hi’ora’a nō te mau ha’api’ira’a hape o te fa’ahuru ’ē nei ia tātou i teie mahana i roto i te pōro’i a Elder Quentin L. Cook « Itoito i roto i te ’itera’a pāpū nō Iesu » (Ensign ’aore rā Liahona, Novema 2016, 40–43). Penei a’e e nehenehe tā ’outou e ani i te tahi pīahi ’ia tai’o nā mua roa i teie pōro’i ’e ’ia fa’a’ite mai i te piha ha’api’ira’a i te mea tā te reira e ha’api’i ra e nāhea e nehenehe ai ia tātou ’ia ’āpe i te mau « ’ōfa’i ha’amarua » ’o te arata’i ’ē atu ia tātou i te ’evanelia. E aha te tahi atu mau ha’api’ira’a mātauhia i roto i te ao nei ’o te nehenehe e arata’i ’ē atu ia tātou i te mau parau mau ’o te ’evanelia ? E nehenehe tā ’outou e ani i te mau pīahi ’ia tai’o fa’ahou i te 2 Korinetia 11:21–33 ’e ’ia fa’a’ite mai i te mea tā rātou i ’āpo mai nā roto mai i teie mau ’īrava nō ni’a i te mau « tāvini mau a te Mesia ».

2 Korinetia 11:3; 13:5–8

E ti’a ia tātou ’ia « ’imi māite » i tō tātou ’itoito i roto i te ’evanelia a Iesu Mesia.

• Tē ’ite nei te mau melo o te ’Ēkālesia i te tahi mau taime ’e ’ua rahi roa te mau tītaura’a ’o te orara’a—mai te mau tītaura’a tā rātou e ’ite nei ’ia riro ’ei feiā mo’a i te mau mahana hope’a nei. E nehenehe te a’o a Paulo ’ia « ’imi māite ia ’outou iho i tō ’outou fa’aro’o » e tauturu ia ’outou ’e tā ’outou mau pīahi ’ia fa’atumu i ni’a i « te rōtahi noa e au i te Mesia » (2 Korinetia 13:5 ; 11:3). Penei a’e e nehenehe tā ’outou e tai’o ’āmui i te 2 Korinetia 11:3 ’e ’ia ’āparau e aha te aura’a ’o te pereota « te rōtahi e au i te Mesia ». E nehenehe ato’a tā ’outou e ani i te mau pīahi ’ia mana’o ē ’ua anihia rātou ’ia pāpa’i i te hō’ē fa’a’itera’a nō ni’a i te ’evanelia a Iesu Mesia nō te hō’ē ve’a, ’e 100 noa tā’o te roa. ’A hōro’a atu i te taime nō rātou nō te pāpa’i i tā rātou parau, ’e ’ia fa’a’ite rātou i te tahi ’e te tahi te mea tā rātou i pāpa’i. Mai te mea e hina’aro rātou i te tauturura’a, e nehenehe tā ratou e hi’o atu ia Ioane 3:16–17 ; 3 Nephi 27:13–21 ; ’e ’Ia Mau Māite i te Fa’aro’o, 76. ’A ani i te mau pīahi ’ia feruri, e mau māite ānei rātou i te mau parau tumu faufa’a rahi o te ’evanelia.

• Nō te tauturu i te mau pīahi ’ia « ’imi māite » e nāhea rātou i te fa’a’ōhie i tō rātou orara’a nō te riro ’ei pipi maita’i a’e, e nehenehe tā ’outou e fa’a’ite atu ia rātou te fa’ahitira’a parau a te peresideni Dieter F. Uchtdorf i roto i « Te tahi atu ā mau rāve’a tauturu ». E nehenehe tā te mau pīahi ’ia ’āparau e nāhea e nehenehe ai ia rātou ’ia fa’a’ohipa i te anira’a ’a te peresideni Uchtdorf ’ia « fa’atumu i ni’a i te mau ha’api’ira’a tumu, te mau parau tumu, ’e te mau fa’a’ohipara’a i te ’evanelia. E aha ïa te tahi atu mau mana’o a te mau pīahi e nāhea e nehenehe ai ia tātou ’ia ’imi māite nō te ha’apāpū ’e e mau māite tātou i te fa’aro’o ?

2 Korinetia 12:5–10

E nava’i te aroha mau o te Fa’aora nō te tauturu ia tātou ’ia ’ite i te pūai i roto i tō tātou paruparu.

• E aha ïa tā ’outou e parau atu i te hō’ē hoa tei pure e ’ia tāmarūhia ’oia i te hō’ē ma’i i te pae tino ’e tei mana’o rā ē ’aita tāna pure e pāhonohia mai ra ? ’A feruri i te ani i te mau pīahi ’ia feruri i teie uira’a ’ia tai’o māmū ana’e rātou i te 2 Korinetia 12:5–10. I muri iho e nehenehe tā rātou e fa’a’ite mai i te mau mana’o nō roto mai i teie mau ’īrava ’o te nehenehe e tauturu i roto i teie huru ’ohipa. E nehenehe ato’a tā rātou e fa’a’ite mai i te mau ’ohipa i tupu ’a ’ite ai rātou nā roto i te aroha mau o Iesu Mesia, i te pūai i roto i tō rātou paruparu. Nāhea taua ’ohipa ra i ha’amaita’i ai i tō rātou orara’a ?

Fa’aitoito i te ha’api’ira’a mai i te fare

Nō te fa’aitoitoi i tā ’outou mau pīahi ’ia tai’o i te Galatia, e nehenehe tā ’outou e ani ia rātou mai te mea ’ua ’ite rātou i te tahi ta’ata tei hahi ’ē atu i te ’evanelia. Mai te mea ē, e hina’aro rātou i te tai’o e nāhea tō Paulo anira’a i tō Galatia tei hahi ’ē atu i te ’evanelia ’ia ho’i mai.

Te tahi atu ā mau rāve’a tauturu

2 Korinetia 8-13

Te fa’anahora’a a te Fatu nō te aupurura’a i te feiā veve ’e tei nava’i ’ore.

• Mosia 4:16–27 ; Alama 34:27–29 ; Te Parau Ha’api’ira’a ’e te mau Parau Fafa’u 104:14–18.

• Buka arata’i 2 : Fa’aterera’a i te ’Ēkālesia (2010), 6.1.

• « Mau tufa’a ’ahuru ’e mau ō », Nō te Pūai ’o te Feiā ’Āpī (2011), 38–39.

• Te mau Hīmene: « Nō te mea ’ua rahi te mau ha’amaita’ira’a », « Pe’e au ia ’oe », « ’Have I Done Any Good ? » (Te mau Hīmene, nūmera 130, 131, 223).

• Mau Video i ni’a i te LDS.org : « Fare Tōtauturu––Fare Toa a te ’Episekopo », « Te ’Ohipa a Tōna na Rima », « Māuruuru i te Atua » ’e « Mau Moni Ha’apa’era’a Mā’a : E ’Ere Ānei tātou ’e mau Ta’ata Tāparu »

• Mau Parau Tumu o te ’evanelia, « Tōtauturu », topics.lds.org.

E nehenehe tā tātou e fa’a’ōhie i te huru nō tā tātou orara’a i te ’evanelia.

’Ua ha’api’i te peresideni Dieter F. Uchtdorf :

Te mau taea’e ’e te mau tuahine, ’eiaha te oraraa i te ’evanelia ’ia riro ’ei ’ohipa rave ’atā.

« E mea ’āfaro noa. E nehenehe te reira ’ia fa’ata’ahia mai teie te huru :

• « Nā te fa’aro’ora’a i te parau a te Atua mā te mana’o pāpū e fa’ati’aturi ia tātou i te Atua ’e i tāna mau parau fafau.

• Rahi noa atu tātou i te ti’aturira’a i te Atua, rahi noa ato’a atu ïa tō tātou ’ā’au i te ’ī i te here nōna ’e nō te ta’ata ato’a.

• « Nō tō tātou here i te Atua tātou e hina’aro ai e pe’e iāna mā te fa’atu’ati i tā tātou mau ’ohipa i ni’a i te reni ’o tāna mau parau.

• « Nō te mea ’ua here tātou i te Atua, e hina’aro ia tātou ’ia tāvini iāna, e hina’aro ia tātou ’ia ha’amaita’i i te orara’a ’o vetahi ’ē ’e ’ia tauturu i te feiā veve ’e tei nava’i ’ore.

• « Rahi noa atu tātou i te haerera’a i te ’ē’a o te ti’ara’a pipi, rahi noa ato’a atu tātou i te hina’arora’a i te ha’api’i i te parau a te Atua.

« E nā reira ’e nā reira noa, terā ta’ahira’a i muri mai i te tahi, ’e e fa’a’īhia ïa tātou i te fa’aro’o rahi a’e ’e te ti’aturi ’e te aroha.

E mea ’ōhie roa, ’e te tere maita’i roa ra.

« Te mau taea’e ’e te mau tuahine, mai te peu tē mana’o ra ’outou ē, ’aita te ’evanelia e haere maita’i ra nō ’outou, tē ani manihini nei au ia ’outou ’ia ho’i i muri, ’a hi’o i tō ’outou orara’a i te hō’ē vāhi teitei a’e e ’a fa’a’ōhie i tō ’outou hi’ora’a i te ti’ara’a pipi. Fa’atumu i ni’a i te mau ha’api’ira’a tumu, te mau parau tumu ’e te fa’a’ohipara’a i te ’evanelia. Tē fafau nei au ē, e arata’i ’e e ha’amaita’i mai te Atua ia ’outou i ni’a i tō ’outou ’ē’a ’ia tae i te orara’a hope roa, ’e e haere maita’i roa te ’evanelia nō ’outou. (« Te haere maita’i roa ra », Ensign ’aore rā Liahona, Novema 2015, 22).

Ha’amaita’ira’a i tā tātou ha’api’ira’a

’A ’ohipa ’āmui ’e te mau melo nō te ’utuāfare. « Te feiā e mana rahi tō rātou i ni’a i te hō’ē ta’ata—nō te maita’i ’aore rā te ’ino—i te rahira’a ’o te taime ’o te feiā ïa i roto i tōna iho ’utuāfare. Nō te mea ho’i ē ’o te ’utuāfare te pū nō te orara’a ’e te ha’api’ira’a i te ’evanelia, e hau atu ïa te manuiara’a o tā ’outou mau tauto’ora’a nō te ha’apūaira’a i te hō’ē melo nō te piha ha’api’ira’a ’ia ha’a ’āmui ana’e ’outou ’e te… mau melo o te ’utuāfare » (Ha’api’ira’a mai tā te Fa’aora, 8).