laj Melkisedek naq kirosob’tesi laj Abram

Laj Melkisedek kirosob’tesi laj Abram, xb’aan laj Walter Rane

11–17 noviembre

Hebreos 7–13

“Lix yuwa’il aj tij re li sahilal chalel”

Naq nakawil ru Hebreos 7–13, k’oxla k’a’ru li yoo chixyeeb’al li Qaawa’ reheb’ laj santil paab’anel aj Hebreo. K’e reetaleb’ li raatin choq’ ajwi’ laa’at ut choq’ reheb’ li tzolb’ileb’ aab’aan.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Rub’elaj li tzoleb’aal, patz’ re wiib’ oxib’ li komon sa’ li tzoleb’aal naq te’chalq chi kawresinb’il re xwotzb’aleb’ li raqal sa’ Hebreos 7–13 li neke’tenq’ank reheb’ “chi jilok chixk’atq li Dios chi anchaleb’ xch’ool, chi anchaleb’ xpaab’aal” (Hebreos 10:22).

reetalil li k’utuk

Xk’utb’al li tzolʼlebʼ

Hebreos 7:1–22

Xyu’aminkil li sumwank ut li osob’tesink re li Tijonelil re Melkisedek nak’amok sa’ li taqenaqil loq’al.

• Jun na’leb’ re xtz’ilb’al rix li jun ch’ol a’in, a’an xpatz’b’al reheb’ li komon sa’ li tzoleb’aal naq te’xtz’iib’a chiru li pizarron junjunq li yaalil na’leb’ chirix li Tijonelil re Melkisedek (re xtawb’aleb’ xna’leb’, naru te’ril ru “El Sacerdocio de Melquisedec” sa’ Leales a la Fe, 170–171). Chirix a’an naru te’xtz’il rix Hebreos 7:1–22 re xtawb’aleb’ li ch’ol aatin li neke’xk’am rib’ rik’in li tz’iib’anb’il chiru li pizarron. Taaruuq ajwi’ te’roksi li K’utul Raqal reheb’ li Loq’laj Hu re xtawb’aleb’ chik li raqal chirix a’in.

• Sa’ Hebreos 7:11, laj Pablo kixpatz’, “K’a’ raj chik aj-e naq taawakliiq jalan chik aj tij jo’ chanru xk’anjel laj Melkisedek, ut ink’a’ jo’ laj Aaron?” Sa’ jalan chik aatin, k’a’ut naq aajel ru choq’ qe li Tijonelil re Melkisedek, rochb’een li Tijonelil re Aaron? Maare eb’ li komon sa’ li tzoleb’aal te’ruuq chixtawb’al xsumenkil sa’ Leales a la Fe, “Sacerdocio Aarónico” ut “Sacerdocio de Melquisedec.” Naru ajwi’ taapatz’ reheb’ naq te’xk’oxla li osob’tesink naqak’ul sa’ xk’ab’a’eb’ li wiib’ chi tijonelil a’in (chi’ilmanq ajwi’ li raatin li Hermana Sheri L. Dew sa’ “Xkomon chik li k’anjeleb’aal”). Chan ru naq eb’ li komon sa’ laa tzoleb’aal xe’xk’ul lix osob’tesink a’in?

Hebreos 8–10

Eb’ li k’ojob’anb’il k’anjel sa’ najter kutan ut sa’ li kutan a’in neke’xk’ut xyaalal li Jesukristo.

• Us ta ink’a’ chik naqamayejaheb’ li xul, nokotz’aqon sa’eb’ li k’ojob’anb’il k’anjel sa’ li kutan a’in li neke’xb’eresi ajwi’ li qaam rik’in li Kristo, ut neke’xk’e “li numleb’ k’eeb’ileb’ xwankil b’ar wi’ naru te’ok li osob’tesink re choxa sa’ qayu’am chiqajunqal” (David A. Bednar, “Junelik taakanaaq eerik’in li risinkil lee maak,” Jolomil ch’utub’aj-ib’ re abril 2018). Maare taaruuq teetz’il rix sa’ komonil xkomon chik li na’leb’ chirixeb’ li najteril k’ojob’anb’il k’anjel li yeeb’ileb’ resil sa’ Hebreos 8–10, ut k’a’ru xyaalalileb’. Qayehaq, k’a’ru xyaalalil lix kik’eleb’ li teelom wakax ut li chib’aat? (chi’ilmanq Hebreos 9:13–14). Ani b’aanunb’il ruuchil xb’aan li taqenaqil aj tij? (chi’ilmanq Hebreos 9:24–26). Li video “El sacrificio y la Santa Cena” (LDS.org) naru nekexxtenq’a. Chan ru naq eb’ li k’ojob’anb’il k’anjel re li kutan a’in nokohe’rosob’tesi ut neke’tenq’an chiqab’eresinkil rik’in li Jesukristo? K’a’ru naru taqab’aanu re naq eb’ li k’ojob’anb’il k’anjel a’in mas wi’chik naq te’wanq xwanqil choq’ qe, ut toohe’xk’e chixk’oxlankil li Kolonel?

Hebreos 10:34–38; 11

Re taawanq qapaab’aal, na’ajman ru naq taqakanab’ qib’ chiruheb’ lix yeechi’ihom li Dios.

• Re xtenq’ankileb’ li komon sa’ li tzoleb’aal chixtawb’al ru li raatin laj Pablo chirix li paab’aal, naru taatikib’ rik’in xpatz’b’al reheb’ chan ru te’ruuq chixyeeb’al xyaalalil li paab’aal rik’in jun ch’ina ch’ol aatin. Chirix a’an, ilomaq ru ut aatinanqex chirix li k’a’ru kixye laj Pablo chirix sa’ Hebreos 11:1. Naru taajach ru li tzoleb’aal sa’eb’ li kok’ ch’uut, ut taaye re li junjunq ch’uut naq te’tzoloq chirix jun reheb’ li kristiaan li yeeb’ileb’ resil sa’ Hebreos 11. Eb’ li komon sa’ li tzoleb’aal naru te’roksi li kok’ tz’iib’ahom sa’eb’ li perel, malaj li K’utul Raqal reheb’ li Loq’laj Hu re xk’eeb’al reetal k’a’ru xk’ul li kristiaan a’an sa’ li Najter Chaq’rab’, ut chirix a’an jun li komon re li junjunq ch’uut naru chixwotzb’al rik’in li tzoleb’aal k’a’ru xe’xtaw sa’ li jun ch’uut a’an. Chan ru naq eb’ li kristiaan a’in ke’xk’ut naq ke’reek’a “lix k’ojob’ankil lix nawomeb’ chirix li k’a’aq re ru yo’oninb’il”? (JJS, Hebreos 11:1). Ma wankeb’ chik li kristiaan li kaweb’ xpaab’aal, li te’ruuq li komon chixwotzb’al resileb’? Jo’q’e xqak’anjela li qapaab’aal chirixeb’ li yeechi’ihom li toj maji’ neke’tz’aqlok ru?

• Maare us raj xb’aanunkil jun b’atz’unk re xtenq’ankileb’ li komon sa’ li tzoleb’aal chi tzolok chirix li paab’aal rik’in Hebreos 11. Qayehaq, naru taajach ru li tzoleb’aal sa’ wiib’ jachal, ut taapatz’ li patz’om chirix li paab’aal li sumenb’ilaqeb’ sa’ Hebreos 11 (chi’ilmanq “Xkomon chik li k’anjeleb’aal” re xtawb’al junjunq li patz’om). Li xb’een jachal li naxtaw xsumenkil, rochb’een li raqal sa’eb’ li loq’laj hu li naxk’am rib’ rik’in, naxk’ul jun punto. Ye reheb’ li komon sa’ li tzoleb’aal naq te’aatinaq chirix k’a’ru neke’xtzol rik’ineb’ li raqal a’in li natenq’ank reheb’ chixtawb’al ru li paab’aal chi mas wi’chik.

• Chirix rilb’al lix tz’iib’ahom laj Pablo chirix li paab’aal sa’ Hebreos 10:34–38; 11, ma us raj choq’ reheb’ li komon sa’ li tzoleb’aal naq te’tzoloq chirix li paab’aal sa’ jalaneb’ chik li hu? Naru taapatz’ re wiib’ oxib’ komon sa’ li tzoleb’aal chi junxilaj naq te’xtzol jun patz’om chirix li paab’aal, jo’ a’in: K’a’ru li paab’aal? Chan ru naq naqak’ul li qapaab’aal? Chan ru naq noko’osob’tesiik naq naqak’anjela li qapaab’aal? K’a’ru naqak’ul wi ink’a’ naqak’anjela li qapaab’aal? Chirix a’an, sa’ li tzoleb’aal te’ruuq chixwotzb’al li k’a’ru xe’xtzol. Malaj ut taaruuq taab’oqeb’ li komon sa’ li tzoleb’aal chi k’anjelak sa’ komonil sa’ jar ch’uut re xtawb’al xsumenkileb’ li patz’om. Junjunq li k’anjeleb’aal taaruuq te’roksi a’aneb’ Alma 32:21–43; Eter 12; “Paab’aal” ut “Paab’ank, xpaab’ankil” sa’ li K’utul Raqal reheb’ li Loq’laj Hu. Chirix naq eb’ li komon sa’ li tzoleb’aal xe’xwotz li k’a’ru xe’xtzol, ye reheb’ naq te’xk’oxla k’a’ru naru neke’xb’aanu re xkawob’resinkil lix paab’aaleb’. Kanab’eb’ junjunq li komon sa’ li tzoleb’aal chixyeeb’al lix k’oxlahomeb’.

• Li na’leb’ choq’ reheb’ laj santil paab’anel aj Hebreo li ke’aaleek re “te’xkanab’ xpaab’ankil” naru chixtenq’ankileb’ li komon sa’ li tzoleb’aal li maare yoo chi lajk lix nawomeb’ xch’ool. Re xtawb’al li na’leb’ a’in, eb’ li komon sa’ li tzoleb’aal te’ruuq chirilb’al ru Hebreos 10:34–38, ut li raatin li Elder Jeffrey R. Holland sa’ “Xkomon chik li k’anjeleb’aal.” K’a’ut naq wankeb’ ani sa’ li ruchich’och’ anajwan li yookeb’ chixkanab’ankil xkawub’ lix ch’ooleb’ (chi’ilmanq Hebreos 10:35) chirix li Qaawa’ ut lix evangelio? K’a’ru naru taqab’aanu re xkab’lankil ut xkawob’resinkil li qapaab’aal ut xk’eeb’al qach’ool chixk’ulb’al “li k’a’ru yeechi’inb’il chaq” xb’aan li Dios? (Hebreos 10:36). Li video “Las cosas buenas que vendrán” (LDS.org) taaruuq chi tenq’ank sa’ li seraq’ a’in.

reetalil li tzolok

Xb’oqb’aleb’ chi tzolok sa’ kab’l

Eb’ li komon sa’ li tzoleb’aal maare ak neke’xnaw chirix li k’a’ru kixk’ul laj Jose Smith naq kiril ru Santiago 1:5, ut chirix a’an kixk’ul li xb’een k’utb’esink. Ye reheb’ naq te’xsik’ li ak’ na’leb’ chirix Santiago 1:5 naq neke’ril ru chiru li xamaan a’in, rochb’een chixjunil li raatin laj Santiago.

reetalil li k’anjeleb’aal

Xkomon chik li k’anjeleb’aal

Hebreos 7–13

Eb’ li patz’om chirix li paab’aal sa’ Hebreos 11.

• K’a’ru xyaalalil li paab’aal, jo’ yeeb’il sa’ Hebreos 11? (chi’ilmanq raqal 1).

• K’a’ru kiru chixb’aanunkil laj Abel xb’aan li paab’aal? (chi’ilmanq raqal 4).

• Jo’ yeeb’il sa’ Hebreos 11, k’a’ru ink’a’ naru nak’ulman chi maak’a’ li paab’aal? (chi’ilmanq raqal 6).

• K’a’ru ki’musiq’aak laj Abraham chixsik’b’al sa’ xk’ab’a’ li paab’aal? (chi’ilmanq raqal 10).

• K’a’ru kixb’aanu laj Isaak rik’in lix paab’aal? (chi’ilmanq raqal 20).

• K’a’ru kixkanab’ laj Moises sa’ xk’ab’a’ li paab’aal? (che’ilmanq raqal 24–27).

Eb’ li osob’tesink re li tijonelil naru neke’xk’ul chixjunil.

Li Hermana Sheri L. Dew, li kiwan junxil choq’ tenq’ aj k’ehol na’leb’ sa’ li jolomil awa’b’ejil re li Komonil re Tenq’ank, kixye: “Li rosob’tesihom li tijonelil naru naxk’ul li junjunq chi winq ut ixq li tiik xch’ool. Chiqajunil naru naqak’ul li Santil Musiq’ej, naru naqak’ul li k’utb’esinb’il na’leb’ choq’ qe, ut naru naqak’ul li loq’laj tiqib’aak sa’ li santil ochoch, ut rik’in a’an noko’el chi “wan chiqix” li wankilal. Lix wankilal li tijonelil naxk’irtesiheb’, naxkoleb’ rix, ut naxtenq’aheb’ chixjunileb’ li tiikeb’ xch’ool chiru lix wankilal li q’ojyin” (“No es bueno que el hombre ni la mujer estén solos,” Liahona, noviembre 2001, 13).

“Meetz’eq cherix lix kawil eech’ool.”

Li Elder Jeffrey R. Holland kixk’ut:

“Yaal ajwi’ naq ch’a’aj—naq maji’ nakat-ok sa’ li Iglees, naq yookat chi ok, ut chirix naq xat-ok. Junelik wanjenaq chi jo’kan, a’ut jo’ kixye laj Pablo, maakanab’ xpaab’ankil. Michal aaxiw, ut matq’aj chi ixb’ej. Maakanab’ xkawil aach’ool. Misach sa’ aach’ool li k’a’ru xaweek’a. Maakanab’ xpaab’ankil li k’a’ru ak xak’ul. …

“Rik’in li junjunq xnimal ru na’leb’ naqasik’ ru xb’aanunkil, wan li k’a’ru tento taqak’oxla ut taqatz’il rix, a’ut chirix naq xatkutanob’resiik, taab’aanu weent naq ink’a’ tat-aaleeq chi eelelik chiru li k’a’ru chaab’il. Wi tz’aqal yaal naq xattijok chirix, naq xakanab’ aawib’ chiru, ut naq xayu’ami, tz’aqal yaal anajwan. Maakanab’ xtaaqenkil naq nachal li rahob’tesiik. … Yal aawu rik’in xkab’il rix aach’ool. Q’ax ru laa xiw. “Kawaq taxaq aach’ool sa’ laa paab’aal.” Chatkanaaq sa’ li b’e, ut chawil chi atz’umak chawu lix chaq’al ru li yu’amej” (“No perdáis, pues, vuestra confianza,” Liahona, junio 2000, 38).

Xchaab’ilob’resinkil li qak’utum

Ayu rik’ineb’ li loq’laj hu xb’een wa. Eb’ li loq’laj hu tento te’wanq choq’ xnimal ru k’anjeleb’aal naq yookat chi tzolok ut chixkawresinkil aawib’. Li raatineb’ li profeet sa’ roso’jikeb’ li kutan naru neke’wan rochb’eeneb’ li jolomil hu re li Iglees (chi’ilmanq Li k’utuk jo’ li Kolonel, 17).