li Kristo chi xaqxo rik’in jun xqa’al ut jun winq

B’an re Galahad, xb’aan xAnne Henrie

4–10 noviembre

Hebreos 1–6

Li Jesukristo, “xyo’leb’aal li kolb’a-ib’ ”

Naru taawotz rik’ineb’ li komon sa’ laa tzoleb’aal junjunq li na’leb’ xak’ul rik’in li Santil Musiq’ej chirix Hebreos 1–6. Wi nakab’aanu chi jo’kan, maare tixtenq’aheb’ chixsik’b’al xmusiq’ankileb’ naq neke’xtzoleb’ li loq’laj hu.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Wan naq eb’ li komon sa’ li tzoleb’aal li ink’a’ neke’xwotz lix na’leb’eb’ yal neke’raj ru naq te’b’oqe’q, ut naq te’kanab’aaq chixkawresinkil rib’ chiru junpaat. Naru taab’oq junjunq reheb’ wiib’ oxib’ kutan rub’elaj li tzoleb’aal, re te’chalq chi kawresinb’il chixwotzb’al junaq raqal sa’ Hebreos 1–6 li nawulak chiruheb’.

reetalil li k’utuk

Xk’utb’al li tzolʼlebʼ

Hebreos 1–5

Li Jesukristo a’an “xyo’leb’aal li kolb’a-ib’.”

• Chan ru naru nakawaklesiheb’ xch’ool li komon sa’ li tzoleb’aal chixwotzb’al li raqal chirix li Jesukristo li xe’xtaw sa’ xtzolb’aleb’ li loq’laj hu chiru li xamaan a’in, xjuneseb’ malaj sa’ junkab’al? Naru taatz’iib’a oob’ tzol chiru li pizarron, reetalil li oob’ ch’ol sa’ xtiklajik li hu Hebreos. Kanab’eb’ li komon chixtz’iib’ankil sa li junjunq tzol eb’ li ch’ol aatin sa’eb’ li oob’ ch’ol a’in li neke’xk’ut xyaalal li Jesukristo, ut rajlil li raqal neke’tawman wi’. Chan ru naq xnawb’al li na’leb’ a’in chirix li Kolonel naxjal li qapaab’aal, ut li qach’ool chixtaaqenkil?

• Sa’ Hebreos 1–5 wan jalan jalanq jaljookil ru aatin chirix li Kolonel. Maare tatruuq chiroksinkileb’ li jaljookil ru aatin a’in re xtenq’ankileb’ li komon sa’ li tzoleb’aal chixtawb’al ru lix k’anjel a’an. Qayehaq, naru taab’oq wiib’ oxib’ komon sa’ li tzoleb’aal junjunq kutan rub’elaj li tzolok, ut taaye reheb’ naq te’xk’am chaq sa’ li tzoleb’aal jun ch’ina k’anjeleb’aal li wan choq’ reetalil li Jesukristo ut lix k’anjel, jo’ natawman sa’ Hebreos 1–2 (qayehaq, chi’ilmanq Hebreos 1:3; 2:10; 3:1, 6; 5:9). Taaruuq te’xch’olob’ chiru li tzoleb’aal k’a’ru naxk’ut li k’anjeleb’aal li xe’xk’am chaq chirix li Jesukristo, ut te’ril ru li raqal sa’ Hebreos li na’aatinak chirix. Chan ru naq xnawb’al li yaalil na’leb’ a’in chirix li Kolonel naxjal li qayu’am?

Hebreos 2:9–18; 4:12–16; 5:7–8

Li Jesukristo kixkuy xnumsinkil chixjunil li k’a’aq re ru, re taaruuq tixtaweb’ ru li ani neke’xkuy rahilal.

• Maare wankeb’ li komon sa’ laa tzoleb’aal li yookeb’ chixnumsinkil lix yalb’aleb’ rix, ut maare neke’reek’a naq xjuneseb’ wankeb’, ut naq maak’a’ xyo’onihomeb’. Maare li aatinak chirix Hebreos 2:9–18; 4:12–16; 5:7–8 taaruuq chixnimob’resinkil lix paab’aaleb’ re te’ruuq chi xik rik’in lix Choxahil Yuwa’ ut li Kolonel re xk’ulb’al xtenq’ankileb’. Jun na’leb’ re xtikib’ankil li seraq’ a’in, a’an xpatz’b’al reheb’ li komon sa’ li tzoleb’aal naq te’k’oxla anihaq li neke’xnaw ru, li yoo chixk’ulb’al rahilal ut maare yoo chi sachk xyo’onihomeb’. K’a’ru li yaalil na’leb’ sa’eb’ li raqal a’in li te’ruuq chixwotzb’al rik’in li kristiaan a’an? Eb’ li komon sa’ li tzoleb’aal te’ruuq ajwi’ chixwotzb’al chan ru naq li Kolonel xk’ojob’eb’ xch’ool ut xtenq’aheb’ a’an. Naru taawotz li raatin li Awa’b’ej John Taylor sa’ “Xkomon chik li k’anjeleb’aal” sa’ li seraq’ a’in.

• Li aatin sa’ Hebreos 2:9–18; 4:12–16 naru ajwi’ chixtenq’ankileb’ li ani neke’ilok re li rahilal wan sa’ li ruchich’och’ ut neke’ok chixk’oxlankil ma naxk’e reetal li Dios, ut ma naxk’oxla. Maare eb’ li komon sa’ li tzoleb’aal te’ruuq chixtz’ilb’aleb’ rix li raqal a’in re xtawb’al li yaalil na’leb’ li taatenq’anq reheb’ rik’ineb’ li patz’om a’in. K’a’ru neke’xk’ut chirix chan ru naq li Kolonel naril li rahilal neke’xk’ul eb’ li winq? Maare us ajwi’ xb’oqb’aleb’ li komon sa’ li tzoleb’aal chixwotzb’aleb’ li raqal sa’eb’ li loq’laj hu b’ar wi’ neke’tenq’aak li kristiaan xb’aan li Jesukristo sa’eb’ lix ch’a’ajkilal (chi’ilmanq “Xkomon chik li k’anjeleb’aal”), malaj k’ut li video “Alto me eleva” (LDS.org). Aatinanqex sa’ komonil chirix k’a’ru naqatzol chirix chan ru naq li Kolonel naru chiqatenq’ankil naq naqanumsiheb’ li ch’a’ajkilal.

Hebreos 3:7–4:2

Li rosob’tesihom li Dios wan choq’ reheb’ li “ink’a’ neke’kawob’resink re lix ch’ooleb’.”

• Sa’ Hebreos 3 ut 4 yeeb’il reheb’ laj santil paab’anel naq ink’a’ te’xkawob’resi lix ch’ooleb’, re naq ink’a’ te’wanq chixtz’eqtaanankil li osob’tesink li naraj li Dios xk’eeb’al reheb’. Naq nekeril ru sa’ komonil Hebreos 3:7–4:2, aatinanqex chirix chan ru naq li k’a’ru ke’xk’ul laj Israelita najter nak’anjelak choq’ qe anajwan, jo’ chanru naq kik’anjelak choq’ reheb’ laj Hebreo sa’ li najteril Iglees (naru teeroksi li na’leb’ re tzolok chirixeb’ li raqal a’in sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). K’a’ut naq eb’ li kristiaan neke’xkawob’resi lix ch’ooleb’ sa’eb’ li kutan a’in? K’a’ru naru taqab’aanu re naq q’unaq li qach’ool ut taqak’ul li rajom li Qaawa’? (chi’ilmanq Eter 4:15; Alma 5:14–15).

Hebreos 5:1–5

Eb’ li neke’k’anjelak sa’ lix awa’b’ejihom li Dios tento naq te’b’oqe’q xb’aan li Dios.

• Moko chixjunileb’ ta li wankeb’ sa’ li tzoleb’aal xe’xk’ul li tijonelil, a’ut li aatin sa’ Hebreos 5 chirix naq eb’ li xe’k’uluk re li tijonelil tento naq te’wanq chi b’oqb’il xb’aan li Dios nak’anjelak choq’ re chixjunileb’ li xe’k’uluk re xb’oqb’aleb’ sa’ li Iglees. Re xtenq’ankileb’ li wankeb’ sa’ laa tzoleb’aal chixtawb’al ru k’a’ru xyaalalil naq “b’oqb’il xb’aan li Dios jo’ laj Aaron,” naru taab’oqeb’ chixka’sutinkil li resil laj Aaron naq kixk’ul lix b’oqb’al, sa’ Exodo 4:10–16, 27–31; 28:1. K’a’ru li na’leb’ naqataw sa’ li esilal a’in li nokoxtenq’a chixtawb’al ru Hebreos 5:1–5? Jo’q’e xe’xk’ul li komon sa’ li tzoleb’aal, malaj eb’ laj b’eresinel sa’ li teep, xmusiq’ankileb’ naq jun li kristiaan b’oqb’il xb’aan li Dios re xb’aanunkil jun li k’anjel? Chan ru naq li musiq’aak a’in xtenq’aheb’ chixxaqab’ankil xwankil li kristiaan a’an sa’ xb’oqb’al? (Maare taa’ajmanq ru xyeeb’al reheb’ li komon sa’ li tzoleb’aal naq te’xb’aanu weent naq ink’a’ te’xye junaq esil li tento raj naq ink’a’ taayeemanq.) Maare wankeb’ ajwi’ komon sa’ li tzoleb’aal li neke’ru chixch’olob’ankil naq li Dios xmusiq’aheb’ naq yookeb’ chixb’aanunkil lix b’oqb’aleb’.

reetalil li tzolok

Xb’oqb’aleb’ chi tzolok sa’ kab’l

Ma wan naq xe’reek’a li komon sa’ laa tzoleb’aal naq “li ruchich’och’ a’in maawa’ tz’aqal lix na’ajeb’, yal aj numeleb’ b’an arin” (Hebreos 11:13) sa’ xk’ab’a’ naq jalan lix paab’aaleb’ rik’in xpaab’aaleb’ li ani wankeb’ sa’ xsutameb’? Ye reheb’ naq sa’ rilb’al ru Hebreos 7–13, te’xtaw naq wankeb’ li ke’k’uluk re ut ke’k’ulub’ank re lix yeechi’ihom li Dios, us ta wankeb’ naab’al sa’ xsutameb’ li maak’a’eb’ xpaab’aal.

reetalil li k’anjeleb’aal

Xkomon chik li k’anjeleb’aal

Hebreos 1–6

Li Jesukristo naxnaw k’a’ru xyaalalil xnumsinkil li rahilal.

Li Awa’b’ej John Taylor kixk’ut: “Ki’ajman ru naq li Kolonel kiwan sa’ li ruchich’och’, naq “taayale’q rix sa’ chixjunil li k’a’aq re ru jo’ laa’o,” ut “taareek’a li qamajelal,” (chi’ilmanq Hebreos 4:15) re tixtaw ru li majelal ut li kawilal, li k’a’ru tz’aqal re ru ut li k’a’ru moko tz’aqal ta re ru re li wank jo’ t’anenaqil winq; ut chirix xk’anjelankil li k’a’ru kichal sa’ ruchich’och’ chixb’aanunkil, chirix xyalb’al ru rik’in lix ka’pak’alil, lix po’b’il na’leb’, lix majelal ut xmaak’a’il lix na’leb’eb’ li winq—chirix xk’ulb’al li jar paay chi aaleek ut xyalb’al rix, ut chirix numtaak sa’ xb’eeneb’, a’an okenaq choq’ “xyuwa’il aj tij aj uxtaan” (chi’ilmanq Hebreos 2:1) re xb’aanunkil quuchil sa’ lix junelikil awa’b’ejihom lix Yuwa’. A’an naxnaw chan ru xb’isb’al xloq’al ut xk’eeb’al xtz’ak li wank choq’ winq, xb’aan naq a’an, rik’in naq wanjenaq sa’ li wanko wi’ laa’o, naxnaw xkuyb’aleb’ li qamajelal ut qayajel, ut naru chixtawb’al ru lix chamal, lix kawilal, ut lix rahil li ch’a’ajkilal ut li yalok-ix li tento te’xk’ul li winq sa’ li ruchich’och’ a’in, ut rik’in xtawb’al ru, ut xb’aan li k’a’ru xk’ul a’an, naru chixkuyb’aleb’ jo’ jun li yuwa’b’ej, malaj jun li asb’ej” (Enseñanzas de los Presidentes de la Iglesia: John Taylor (2001), 227).

Eb’ li kristiaan sa’eb’ li loq’laj hu li ke’k’ojob’aak xch’ool xb’aan li Jesukristo.

• Jwan 8:1–11: Li Qaawa’ kixk’ojob’ xch’ool li ixq li kitawe’ chi muxuk sumsu.

• Jwan 11:1–46: Li Qaawa’ kixk’ojob’ xch’ool li xMaria ut li xMarta chirix xkamik laj Lazaro, li raseb’.

• Enos 1:4–6: Li Qaawa’ kixkuy xmaak laj Enos, ut kirisi lix maak.

• Mosiah 21:5–15: Li Qaawa’ kixq’unob’resi xch’ooleb’ laj Lamanita re ke’xseeb’ob’resi li riiqeb’ lix tenamit laj Limhi.

• Mosiah 24:14–15: Li Qaawa’ kixseeb’ob’resi riiqeb’ lix tenamit laj Alma.

• Eter 12:23–29: Li raatin li Qaawa’ kixk’ojob’ xch’ool laj Moroni.

• 3 Nefi 17:6–7: Li Kolonel kixk’irtesiheb’ laj Nefita chiruheb’ lix yajel.

• Tzol’leb’ ut Sumwank 121:7–10: Li Qaawa’ kixk’ojob’ xch’ool laj Jose Smith (chi’ilmanq ajwi’ Tz. ut S. 123:17).

Xchaab’ilob’resinkil li qak’utum

K’uub’ li tzoleb’aal re taa’eek’amanq li Musiq’ej. Wi taak’e aach’ool naq taawanq li tuqtuukilal ut li rahok sa’ laa tzoleb’aal, li Musiq’ej k’a’jo’ wi’chik naq taaruuq chixtoch’b’al xch’ooleb’ li ani tzolb’ileb’ aab’aan. K’a’ru naru taab’aanu re xk’eeb’al xb’oqb’al lix wankil li Musiq’ej sa’ laa tzoleb’aal? Ma naru taatusub’eb’ li chunleb’aal, malaj taawoksiheb’ li jalam-uuch ut li b’ich re xk’eeb’al xb’oqb’al li Musiq’ej? (Chi’ilmanq Li k’utuk jo’ li Kolonel, 15.)