Tē ha’amaita’i nei Melehizedeka ia Aberama, nā Walter Rane.

11-17 nō Novema.

Hebera 7–13

« ’Ei tahu’a rahi nō te mau mea maitata’i a muri nei »

’Ia tai’o ana’e ’outou i te Hebera 7–13, ’a feruri e aha te pōro’i ’a te Fatu nā te feiā mo’a ’āti Iuda. ’A hi’o ato’a i tāna mau pōro’i nō ’outou ’e te mau ta’ata tā ’outou e ha’api’i nei.

Pāpa’i i tō ’outou mau mana’o

Ani ’ia fa’a’ite mai i te mau mana’o

Hou te ha’api’ira’a, ’a ani i te tahi mau piahi ’ia haere ineine mai nō tē fa’a’ite mai i te mau ’īrava nō roto mai i te Hebera 7–13 nō te tauturu ia rātou ’ia « ha’afātata i [te Atua] ma te ’ā’au ha’avare ’ore ’e ma te fa’aro’o pāpū mau » (Hebera 10:22).

Ha’api’i i te ha’api’ira’a tumu

Hebera 7:1-22

E arata’i te orara’a parau-ti’a i te mau fafaura’a ’e te mau ha’amaita’ira’a o te autahu’ara’a a Melehizedeka i te fa’ateiteira’a.

• Te hō’ē rāve’a nō te hi’opo’a i teie pene ’o te anira’a ïa i te mau pīahi ’ia pāpa’i i ni’a i te ’iri pāpa’ira’a e rave rahi mau fa’ahitira’a parau mau nō ni’a i te autahu’ara’a a Melehizedeka (nō te mau mana’o, e nehenehe ïa tā rātou e tai’o i te « Autahu’ara’a a Melehizedeka » i roto i te ’A Mau Māite i te Fa’aro’o, 101–2). E nehenehe ato’a ia rātou ’ia ’imi i roto i te Hebera 7:1–22 i te mau parau ’o te pāturu i te mau fa’ahitira’a parau e vai ra i ni’a i te ’iri pāpa’ira’a. E nehenehe ato’a ia rātou ’ia fa’a’ohipa i te Arata’i nō te mau Parau Tumu ’aore rā te Arata’i i te mau Pāpa’ira’a Mo’a nō te ’imi i te tahi atu mau pāpa’ira’a mo’a nō te pāturu atu.

• I roto i te Hebera 7:11 ’ua ui Paulo, « e aha ihora i tia’i ē, ’ei tahu’a e te tupu mai, mai te parau ia Melehizedeka ra, e ’eiaha ma te huru o Aarona ? » ’Oia ho’i, nō te aha tātou e hina’aro ai i te autahu’ara’a a Melehizedeka ta’a ’ē atu i te autahu’ara’a a Aarona ? Penei a’e e nehenehe tā te mau pīahi ’ia imi i te mau pāhonora’a i roto i te ’Ia Mau Māite i te Fa’aro’o, « Autahu’ara’a a ’A’arona » ’e « Autahu’ara’a ’a Melehizedeka ». E nehenehe tā ’outou e ani ia rātou ’ia feruri i tā tātou mau ha’amaita’ira’a maoti teie nā autahu’ara’a e piti (’a hi’o i te fa’ahitira’a parau a te tuahine Sheri L. Dew i roto i « Te tahi atu ā mau rāve’a tauturu »). Nāhea te mau pīahi i ’ite ai i teie mau ha’amaita’ira’a ?

Hebera 8–10

Tē fa’ahi’o nei te mau ’ōro’a tahito ’e nō teie tau i ni’a ia Iesu Mesia.

• Noa atu e ’aita tātou e pupu nei i te mau tusia animara, tē rave nei tātou i te mau ’ōro’a i teie mahana, ’o te fa’atano ato’a i tō tātou vārua i te Mesia ’e ’o te hōro’a mai « i te mau fa’atahera’a i ha’amanahia i reira te mau ha’amaita’ira’a ’e te mau mana o te ra’i e tahe ai i roto i tō tātou orara’a tāta’itahi ». (David A. Bednar, « ’Ia vai matara noa tā ’outou mau hara », Ensign ’aore rā Liahona, Mē 2016, 60). Penei a’e e nehenehe tā ’outou e hi’opo’a ’āmui i te tahi mau mea ha’iha’i nō ni’a i te mau ’ōro’a tahito tei fa’ahitihia i roto i te Hebera 8–10 ’e te aura’a ’o tō rātou mau tāpa’o. ’Ei hi’ora’a, e aha ïa tā te toto o te mau pua’atoro ’e te mau pua’a niho e fa’ahōho’a nei ? (’a hi’o Hebera 9:13–14). ’O vai tā te tahu’a rahi e ti’a nei ? (’a hi’o Hebera 9:24–26). E nehenehe te video « Tusia ’e ’ōro’a » (LDS.org) e tauturu. Nāhea te mau ’ōro’a nō teie tau e ha’amaita’i ai ’e e tauturu ai ia tātou ’ia hi’o atu ia Iesu Mesia ? E aha tā tātou e nehenehe e rave nō te fa’arahi atu ā i te faufa’ara’a ’o teie mau ’ōro’a ’e ’ia fa’atumu atu ā i ni’a i te Fa’aora ?

Hebera 10:34–38; 11

E tītau te fa’aro’o i te ti’aturira’a i te mau fafaura’a a te Atua.

• Nō te tauturu i te mau pīahi ’ia māramarama i te mau ha’api’ira’a a Paulo nō ni’a i te fa’aro’o, e nehenehe tā ’outou e ha’amata ma te ani atu ia rātou ’ia feruri e nāhea rātou e fa’ata’a ai i te aura’a o te fa’aro’o nā roto i te hō’ē noa pereota. I muri iho, ’a tai’o ’e ’a tuatāpapa ’āmui i te aura’a tā Paulo i hōro’a i roto i te Hebera 11:1. E nehenehe tā ’outou e vāhi i te mau pīahi i roto i te mau pupu na’ina’i ’e ’ia ani i te pupu tāta’itahi ’ia tuatāpapa i te parau ’o te hō’ē o te mau ta’ata tei fa’ahitihia i roto i te Hebera  11. E nehenehe tā te mau pīahi e fa’a’ohipa i te mau fa’ahorora’a ’aore rā te Arata’i i te mau Pāpa’ira’a Mo’a nō te tai’o fa’ahou i te ’ohipa a teie ta’ata i roto i te Faufa’a Tahito ’e ’ia fa’a’ite mai te hō’ē ti’a nō te pupu tāta’itahi i mua i te mau pīahi te mea tā te pupu i ’ite. Nāhea teie mau ta’ata i te fa’a’itera’a ē ’ua ’ite rātou i te hō’ē « ti’aturi i te mau mea e tia’ihia nei » ? (’īritira’a a Iosepha Semita, Hebera11:1 [i roto i te Hebera 11:1, fa’ahorora’a b]). E aha te tahi atu mau hi’ora’a o te mau ta’ata ha’apa’o e nehenehe i te mau pīahi ’ia fa’a’ite mai ? E aha te taime i fa’a’ohipa ai tātou i te fa’aro’o i roto i te mau fafaura’a tei ’ore ā i tupu ?

• E mea ’ārearea paha ’ia fa’atupu i te hō’ē ha’utira’a nō te tauturu i te mau pīahi ’ia ha’api’i mai i ni’a i te fa’aro’o mai roto mai i te Hebera 11. ’Ei hi’ora’a, e nehenehe tā ’outou e vāhi i te mau pīahi i roto e piti pupu ’e ’ia ani i te mau uira’a nō ni’a i te fa’aro’o tei pāhonohia mai i roto i te Hebera  11 (’a hi’o i « Te tahi atu ā mau rāve’a tauturu » nō te mau hi’ora’a). Te pupu mātāmua ’o te ’ite i te hō’ē pāhonora’a tei pāturuhia ’e te mau pāpa’ira’a mo’a e fāri’i ïa i te hō’ē rē. ’A ani i te mau pīahi ’ia tuatāpapa i te mea tā rātou i ’āpo mai i roto i teie mau ’īrava ’o te tauturu ia rātou ’ia ta’a maita’i a’e e aha te fa’aro’o.

• I muri a’e i te tai’ora’a i te mau ha’api’ira’a a Paulo nō ni’a i te fa’aro’o i roto i te Hebera 10:34–38; 11, e ho’ona ānei te mau pīahi i te ha’api’ira’a i te parau nō te fa’aro’o i roto i te tahi atu mau rāve’a tauturu ? E nehenehe tā ’outou e mā’iti nā mua roa i te tahi mau pīahi ’ia tuatāpapa i te hō’ē uira’a nō ni’a i te fa’aro’o mai teie: E aha te fa’aro’o ? Nāhea tātou e fa’atupu ai i te fa’aro’o? E aha ïa te mau rāve’a e ha’amaita’ihia ai tātou ’ia fa’a’ohipa ana’e tātou i tō tātou fa’aro’o ? E aha ïa te tupu mai ’ia mā’iti ana’e tātou ’ia ’ore e fa’a’ohipa i tō tātou fa’aro’o ? I muri iho a ani i te mau pīahi ia fa’a’ite i te mea tā rātou i ha’api’i mai. ’Aore rā ’a ani i te mau pīahi ’ia ha’a ’āmui i roto i te mau pupu nō te ’imi i te mau pāhonora’a. Teie te tahi ’o te mau rāve’a tauturu tā rātou e nehenehe e fa’a’ohipa Alama 32:21–43 ; Etera 12 ; « Fa’aro’o ’ia Iesu Mesia », Mau Parau Tumu o te ’Evanelia ; topics.lds.org ; ’e te Fa’atoro Parau a te Bībīlia, « Fa’aro’o ». I muri a’e i tō rātou fa’a’itera’a mai i te mea tā rātou i ha’api’i mai, ’a ani ia rātou ’ia feruri i te mea tā rātou e nehenehe e rave nō te ha’apa’ari i tō rātou fa’aro’o. ’A ani i te tahi mau pīahi ’ia fa’a’ite mai i tō rātou mau mana’o.

• E nehenehe te a’o i tō te feiā mo’a ’āti Iuda tei fa’ahemahia i te « ’ōra’i ti’a i muri » i tō rātou fa’aro’o e riro ’ei faufa’a nō te mau pīahi e fifi nei i roto i tō rātou ’itera’a pāpū. Nō te ’ite i teie a’o, e nehenehe tā te mau pīahi e tai’o i te Hebera 10:34–38 ’e te fa’ahitira’a parau a Elder Jeffrey R. Holland i roto i « Te tahi atu ā mau rāve’a tauturu ». Nō te aha te ta’ata i te ao nei e fa’aru’e ai i teie mahana i tō rātou ti’aturira’a (’a hi’o Hebera 10:35) i te Fatu ’e i tāna ’evanelia ? E aha tā rātou e nehenehe e rave nō te pātu ’e nō te tāpe’a i te fa’aro’o ’e te ti’aturi nō te « fāri’i i te utu’a a [te Atua] »? (Hebera 10:36). E nehenehe te mau video « Mau mea maita’i ’o te tupu mai » ’e « ’Ei tahu’a rahi nō te mau mea maitata’i a muri nei » (LDS.org) e tauturu i teie tau’ara’a parau.

Fa’aitoito i te ha’api’ira’a mai i te fare

’Ua matau paha te mau pīahi i te ’ā’amu o Iosepha Semita i te tai’ora’a i te Iakobo 1:5, tei arata’i atu i te ’Orama Mātāmua. ’A ani ia rātou ’ia ’imi i te tahi mau ha’api’ira’a ’āpī nō ni’a ia Iakobo1:5 ’ia tai’o ana’e rātou i te reira i teie hepetoma i roto i te a’ora’a rarahi a’e a Iakobo.

Te tahi atu ā mau rāve’a tauturu

Hebera 7–13

Mau uira’a nō ni’a i te fa’aro’o mai roto mai i te Hebera 11.

• Nāhea tō Hebera 11 fa’ata’ara’a i te parau nō te fa’aro’o ? (’a hi’o i te ’īrava 1).

• E aha tā te Fa’aro’o i fa’ati’a ia Abela ’ia rave ? (’a hi’o i te ’īrava 4).

• ’Ia au i te Hebera 11, e aha ïa te mea e ore e nehenehe ’ia rave ma te fa’aro’o ’ore ? (’a hi’o i te ’īrava 6

• E aha tā te fa’aro’o i fa’auru ia Aberahama ’ia ’imi ? (’a hi’o i te ’īrava 10).

• E aha tā Isaaka i rave ma tōna fa’aro’o ? (’a hi’o i te ’īrava 20).

• E aha tā te fa’aro’o i fa’auru ia Mose ’ia fa’aru’e ? (’a hi’o te mau ’īrava 24–27).

Tē vai nei te mau ha’amaita’ira’a o te autahu’ara’a a Melehizedeka nō te tā’āto’ara’a.

’Ua parau te tuahine Sheri L. Dew, tauturu tahito i roto i te Peresidenira’a Rahi o te Sōtaiete Tauturu : « E noa’a te mau ha’amaita’ira’a o te autahuara’a i te mau tāne ’e te mau vahine parau-ti’a ato’a. E nehenehe tātou pā’āto’a e fāri’i i te Vārua Maita’i, e fāri’i i tā tātou iho heheura’a, ’e e fāri’i i tō tātou ’ōro’a hiero, nā roto mai ho’i e faura mai ai tātou ma te ’ahuhia i te mana. E fa’aora te mana o te autahu’ara’a, e pāruru, ’e e arai i te feiā parau-ti’a pā’āto’a i te mau mana o te pōuri » (« It Is Not Good for Man or Woman to Be Alone », Ensign, Novema 2001, 13).

« Nō reira, ’eiaha e fa’aru’e atu i tō ’outou ti’aturira’a ».

’Ua ha’api’i mai ’o Elder Jeffrey R. Holland :

« E mea pāpū maita’i ē e mea fifi roa—hou ’outou ’a tomo mai ai i roto i te ’Ēkālesia, ’a tāmata ai ’outou i te tomo mai, ’e i muri a’e i tō ’outou tomora’a mai. ’Ua parau Paulo, ’o terā ïa te huru, ’eiaha rā e ’ōtohe. ’Eiaha e mata’u ’e e ’ōtohe. ’Eiaha e fa’aru’e i tō ’outou ti’aturira’a. ’Eiaha e ha’amo’e i tō ’outou huru i te hō’ē taime. ’Eiaha e ha’afaufa’a ’ore i te mea i tupu ia ’outou. […]

« I roto i te mau fa’aotira’a rahi ato’a, tē vai ra te hi’o-maita’i-ra’a ’e te feruri-maita’i-ra’a, i te taime rā ’ua tūramahia mai ’outou, ’a hi’o maita’i i te fa’ahemara’a ’ia ’ōtohe mai ’outou i taua mea maita’i ra. Mai te peu e mea ti’a te reira i te taime ’a pure ai ’outou, e ’a ti’aturi ai ’outou i te reira ’e ’a ora ai ’outou i te reira, e mea ti’a ato’a ïa i teienei. ’Eiaha e fa’aruʻe ’ia rahi noa atu te ’ume’umera’a… ’A fa’aruru atu i tā ’outou mau fē’a’ara’a. ’A ha’avī i tō ’outou mau mata’u. ’Nō reira, ’eiaha e fa’aru’e atu i tō ’outou ti’aturira’a’. ’A tāpe’a noa i te ’ē’a ’e ’a hi’o i te nehenehe o te orara’a ’o te hohorahia atu i mua ia ’outou » (« Cast Not Away Therefore Your Confidence », Ensign, Māti 2000, 6–11).

Ha’amaita’ira’a i tā tātou ha’api’ira’a

’A haere nā mua roa i roto i te mau pāpa’ira’a mo’a ’Ia riro te mau pāpa’ira’a mo’a ’ei puna mātāmua nō tā ’outou tuatāpapara’a ’e fa’aineinera’a. E nehenehe te mau parau a te mau peropheta nō teie tau e tauturu atu i te mau pāpa’ira’a mo’a (’a hi’o Ha’api’ira’a mai tā te Fa’aora, 17).