Te Mesia e ti’a ra i piha’i iho i te hō’ē tamahine ’e te hō’ē ta’ata

Rā’au o Gileada, nā Annie Henrie

4–10 nō Novema.

Hebera 1-6

« Iesu Mesia, ’te tumu nō te ora mure ’ore’ »

’A feruri i te fa’a’ite i te mau pīahi te tahi ’o te mau fa’a’itera’a tā ’outou i fāri’i nō ō mai i te Vārua Maita’i nō ni’a i te Hebera 1–6. E nehenehe te ravera’a i te reira e fa’auru ia rātou ’ia ’imi i tō rātou iho mau ’ite ’ia tai’o ana’e rātou i te mau pāpa’ira’a mo’a.

Pāpa’i i tō ’outou mau mana’o

tāpa’o nō te fa’a’itera’a mai

Ani ’ia fa’a’ite mai i te mau mana’o

E hina’a’ro noa paha te tahi mau pīahi ’o te ’ore e fa’a’ite pinepine nei i tō rātou mau mana’o i roto i te piha ha’api’ira’a i te hō’ē anira’a ta’a ’ē ’e te tahi ma’a taime nō te fa’a’ineine. E nehenehe tā ’outou e fārerei i te tahi ’o rātou hō’ē mahana ’aore ’e piti nā mua roa ’e ’ia ani ia rātou ’ia haere ineine mai nō te fa’a’ite i te hō’ē ’īrava i roto i te Hebera 1–6 tei riro ’ei mea faufa’a rahi nō rātou.

tāpa’o nō te ha’api’ira’a

Ha’api’i i te ha’api’ira’a tumu

Hebera 1-5

O Iesu Mesia, « te tumu nō te ora mure ’ore ».

• Nāhea e nehenehe ai ia tātou ’ia fa’aitoito i te mau pīahi ’ia fa’a’ite mai i te mau pāpa’ira’a mo’a faufa’a rahi nō ni’a ia Iesu Mesia tei ’itehia e rātou i roto i tā rātou iho tuatāpara’a ’e te tuatāpapara’a a te ’utuāfare i teie hepetoma ? ’A feruri i te fa’ata’a e pae tufa’a ārea i ni’a i te ’iri pāpa’ira’a nō te fa’ahōho’ara’a i nā pene e pae i roto i te Hebera. ’A ani i te mau pīahi ’ia pāpa’i i roto i te ārea ti’a te mau pereota nō roto mai i teie mau pene tei ha’api’i atu nō ni’a ia Iesu Mesia ’e te ’īrava nō te reira mau pereota. Nāhea te ’itera’a i teie mau mea nō ni’a i te Fa’aora e ha’amaita’i ai i tō tātou fa’aro’o iāna ’e tō tātou hina’aro ’ia pe’e atu iāna ?

• Tē fa’a’ohipa nei te Hebera 1–5 e rave rahi mau hōho’a nō te fa’a’ite mai i te huru o te Fa’aora. Penei a’e e nehenehe tā ’outou e fa’a’ohipa i teie mau hōho’a nō te tauturu i te mau pīahi ’ia fa’ahōhonu i tō rātou ’itera’a nō ni’a i tāna misiōni. ’Ei hi’ora’a, e nehenehe tā ’outou e fārerei i te tahi mau pīahi te tahi tau mahana na mua atu nō te ani ia rātou ’ia ’āfa’i mai i roto i te piha ha’api’ira’a te hō’ē tao’a ’o te fa’ahōho’a i te hō’ē ’o teie mau fa’a’itera’a nō ni’a ia Iesu Mesia ’aore rā tāna misiōni i roto i te Hebera 1–5 (’a hi’o ta’a ’ē te Hebera 1:3 ; 2:10 ; 3:1, 6 ; 5:9). E nehenehe tā rātou e fa’a’ite atu i te mau pīahi e aha tō tā rātou mau tao’a e fa’ahōho’a nō ni’a ia Iesu Mesia ’e ’ia tai’o mai i te ’īrava e tu’ati i te reira i roto i te Hebera. Nāhea te ’itera’a i teie mau parau mau nō ni’a i te Fa’aora e ha’amaita’i ai i tō tātou orara’a ?

Hebera 2:9–18 ; 4:12–16 ; 5:7–8

’Ua māuiui Iesu Mesia i te mau mea ato’a ia nehenehe iāna ’ia ta’a ’e ’ia tauturu i te mau ta’ata e māuiui nei.

• Tē vai ra paha te mau pīahi e māuiui nei i te mau tāmatara’a ’e tē mana’o nei i te tahi mau taime ē ’ua mo’ehia rātou ’e ’aita tō rātou e ti’aturira’a fa’ahou. Penei a’e e nehenehe te hō’ē ’āparaura’a nō ni’a i te Hebera 2:9–18 ; 4:12–16 ; 5:7–8 e pātu i tō rātou fa’aro’o ’e e nehenehe tā rātou e fāriu atu i te Metua i te Ao ra ’e te Fa’aora nō te tauturura’a. Te hō’ē rāve’a nō te ha’amata i taua huru ’āparaura’a ra ’o te anira’a ïa i te mau pīahi ’ia feruri i te tahi ta’ata tei mātauhia ’e rātou ’o te māuiui nei ’e ’o te ’ore paha e ti’aturi fa’ahou nei. E aha ïa te mau parau mau tā rātou i ’ite mai i roto i teie mau ’īrava ’o tā rātou e nehenehe e fa’a’ite atu i taua ta’ata ra ? E nehenehe ato’a tā te mau pīahi e fa’a’ite e nāhea tō te Fa’aora tāmāhanahanara’a ’e pāturura’a ia rātou. ’A feruri i te fa’a’ite atu i te fa’ahitira’a parau a te peresideni John Taylor i roto i « Te tahi atu ā mau rāve’a tauturu » ’ei tufa’a nō te ’āparaura’a.

• E nehenehe ato’a tā te Hebera 2:9–18 ; 4:12–16 e tauturu i te mau ta’ata ’o te ’ite nei i te māuiui i roto i te ao nei ’e ’o tē uiui nei ē tē ’ite ra ’ānei te Atua ’e tē tau’a ra ’ānei ’oia i te reira. Penei a’e e nehenehe tā te mau pīahi e ’imi i teie mau ’īrava nō te ’ite i te mau parau mau ’o te tauturu i taua mau uira’a ra. E aha tā rātou e ha’api’i nei nō ni’a i te huru pāhonora’a a te Fa’aora i te māuiui o te ta’ata nei ? E riro paha ’ei tauturura’a ’ia ani i te mau pīahi ’ia fa’a’ite mai i te mau hi’ora’a i roto i te mau pāpa’ira’a mo’a i reira te mau ta’ata i pāturuhia ai e Iesu Mesia i roto i tō rātou mau ’ati (’a hi’o i « Te tahi atu ā mau rāve’a tauturu ») ’aore rā ’a fa’a’ite atu i te video « Mau mou’a ’e ti’a ’ia po’umahia » (LDS.org). ’A paraparau ’āmui i te mea tā ’outou i ha’api’i mai i te huru e nehenehe ai i te Fa’aora e tauturu ’ia fa’aruru ana’e tātou i te mau tāmatara’a fifi.

Hebera 3:7–4:2

E noa’a te mau ha’amaita’ira’a a te Atua i te mau ta’ata ’o te ’ore « ’e ha’apa’ari ’i tō [rātou] ’ā’au ».

• Tē vai nei i roto i te Hebera 3 ’e 4 te hō’ē pi’ira’a i te feiā mo’a ’eiaha e ha’apa’ari i tō rātou ’ā’au ’e ’ia pāto’i i te mau ha’amaita’ira’a tā te Atua i hina’aro i te hōro’a atu nā rātou. ’Ia tai’o ana’e ’outou ’e tā ’outou mau pīahi i te Hebera 3:7–4:2, ’a paraparau i te mau rāve’a e nehenehe ai te mau ’ohipa i tupu i te mau ’ati ’Īsera’ela i muta’a ihora i te fa’a’ohipahia i ni’a ia tātou i teie mahana, mai tei fa’a’ohipahia i ni’a i te mau Hebera i roto i te ’Ēkālesia i te ha’amatara’a (’a feruri i te hi’o atu i te materia nō te ha’api’ira’a nō ni’a i teie mau ’īrava i roto i te arata’ira’a nō teie hepetoma i roto i te Mai pe’e mai—nō te ta’ata hō’ē ’e te utuāfare). E aha te mea e tura’i nei i te ta’ata ’ia ha’apa’ari i tō rātou ’ā’au i tō tātou nei tau ? E aha te mea e nehenehe ia tātou ’ia rave nō te tāmarū i tō tātou ’ā’au ’e nō te pāhono atu i te hina’aro o te Fatu ? (’a hi’o Etera 4:15 ; Alama 5:14–15).

Hebera 5:1–5

E ti’a i te feiā e tāvini i roto i te bāsileia o te Atua ’ia pi’ihia e te Atua.

• ’Aita te mau pīahi ato’a i mau i te autahu’ara’a, tē pōro’i ra i roto i te Hebera  5 nō ni’a i te mau ta’ata tei mau i te autahu’ara’a tei pi’ihia e te Atua e tano ïa nō te mau ta’ata ato’a tei fāri’i i te mau pi’ira’a i roto i te ’Ēkālesia. Nō te tauturu i tā ’outou mau pīahi ’ia ha’api’i mai te aura’a « tei parauhia e te Atua mai ia Aarona ra », ’a feruri i te ani ia rātou ’ia tai’o fa’ahou i te ’ā’amu nō tō Aarona fāri’ira’a i tōna pi’ira’a i roto i te Exodo 4:10–16, 27–31 ; 28:1. E aha te mau ’ite i roto i teie ’ā’amu ’o te tauturu ia tātou ’ia ta’a i te Hebera 5:1–5 ? E aha te taime tō te mau pīahi, e tae noa atu i te mau fa’atere nō te pāroita, fāri’ira’a i te ha’apāpūra’a ē ’ua pi’i-mau-hia te tahi ta’ata e te Atua nō te rave i te hō’ē pi’ira’a ta’a ’ē ? Nāhea taua ha’apāpūra’a ra e tauturu ai ia rātou ’ia pāturu maita’i a’e i te mau ta’ata i roto i tō rātou mau pi’ira’a ? (E hina’aro paha ’outou i te ani i te mau pīahi ’eiaha e fa’a’ite mai i te mau parau nō ni’a i te mau ta’ata.) Tē vai ato’a ra paha te mau pīahi ’o te nehenehe e fa’a’ite pāpū ē ’ua fa’auru te Atua ia rātou ’a rave ai rātou i tō rātou iho mau pi’ira’a.

tāpa’o nō te ha’api’ira’a mai

Fa’aitoito i te ha’api’ira’a mai i te fare

’Ua mana’o a’ena ānei tā ’outou mau pīahi ē e mau « ta’ata ’e’ē ’e te purutia rātou i ni’a i te fenua » (Hebera 11:13) nō te mea e mea ta’a ’ē tō rātou mau ti’aturira’a i tō te mau ta’ata e ha’ati ra ia rātou ? ’A parau atu ia rātou ē ’ia tai’o ana’e rātou i te Hebera 7–13, e ’ite ïa rātou i te mau hi’ora’a ’o te mau ta’ata tei fāri’i itoito i te mau fafaura’a a te Atua noa atu e mea rahi te feiā e ha’ati ra ia rātou ’e ’aore tō rātou e fa’aro’o.

tāpa’o nō te mau rāve’a tauturu

Te tahi atu ā mau rāve’a tauturu

Hebera 1-6

’Ua ’ite Iesu Mesia e aha te fa’arurura’a i te māuiui

’Ua ha’api’i te peresideni John Taylor ē : « ’A ora ai te Fa’aora i ni’a i te fenua nei, e mea faufa’a ’ia ’ati ato’a ho’i ’oia i te mau mea ato’a mai ia tātou ato’a nei,’ ’e ’ia aroha mai ia tātou i tō tātou mau paruparu nei,’ [’a hi’o Hebera 4:15] i reira ’oia e ’ite ai i te huru ’o te paruparu ’e ’o te pūai ; te maita’i roa ’e te ’ino ’o te ta’ata hi’a nei ; e nō te mea ’ua oti i te ravehia e āna te ’ohipa i haere mai ai ’oia i te ao nei, ’e nō te mea ’ua ’aro ’oia i te peu ha’avarevare, te ’ino, te paruparu ’e te ma’ua o te ta’ata nei—’e nō te mea ’ua fārerei ’oia i te mau huru fa’ahemara’a ato’a ’e te mau huru tāmatara’a ato’a, ’e ’ua upo’oti’a, ’ua riro mai ’oia ’ei tahu’a rahi parau mau’ [’a hi’o Hebera 2:17] ’ei ti’a nō tātou i roto i te bāsileia mure ’ore o tōna ra Metua. ’Ua ’ite ’oia ’ia fa’aau, ’e ’ia tu’u i te hō’ē fāito faufa’a i ni’a i te natura ta’ata nei, nō te mea, i vai ato’a nā ho’i ’oia i roto i te mau mea ato’a mai ia tātou ato’a nei, i ti’a ai iāna ’ia fa’a’oroma’i i tō tātou paruparu ’e tō tātou mau fifi, ’e ’ia ’ite māite i te hōhonu, te mana ’e te pūai o te mau ’ati ’e te mau tāmatara’a e fārereihia e te ta’ata i roto i teie nei ao, ’e nā roto i te reira, ’ua ti’a iāna ’ia fa’a’oroma’i i te reira ma te ’ite pāpū, mai te au i te hō’ē metua ’e te hō’ē tua’ana » (Te mau Ha’api’ira’a ’a te mau Peresideni o te ’Ēkālesia : John Taylor [2001], 204–5).

Te mau hi’ora’a i roto i te mau pāpa’ira’a mo’a nō te mau ta’ata tei tāmāhanahanahia e Iesu Mesia.

• Ioane 8:1–11 : ’Ua tāmāhanahana te Fatu i te vahine tei ro’ohia i te hara fa’aturi.

• Ioane 11:1–46 : ’Ua tāmāhanahana te Fatu ia Maria ’e Mareta i muri a’e i te pohera’a o tō rāua taea’e, Lazaro.

• Enosa 1:4–6 : ’Ua fa’a’ore te Fatu i te mau hara a Enosa ’e ’ua ’īriti ’ē atu i tōna mana’o pe’ape’a.

• Mosia 21:5–15 : ’Ua tāmarū te Fatu i te ’ā’au o te mau ’āti Lamana ’ia ha’amāmā atu rātou i te mau uta’a a te nuna’a o Limehi.

• Mosia 24:14–15 : ’Ua ha’amāmā te Fatu i te mau uta’a a te nuna’a o Alama.

• Etera 12:23–29 : ’Ua tāmahanahana te mau parau a te Fatu ia Moroni.

• 3 Nephi 17:6–7 : ’Ua fa’aora te Fa’aora i te mau ma’i o te Ati Nephi.

• Te Parau Ha’api’ira’a ’e te mau Parau Fafau 121:7–10: ’Ua tāmāhanahana te Fatu ia Iosepha Semita (’a hi’o ato’a i te PH&PF 123:17).

Ha’amaita’ira’a i tā tātou ha’api’ira’a

’A fa’atupu i te hō’ē vāhi pae vārua. ’Ia fa’atupu ana’e ’outou i te vārua here ’e te hau i roto i tā ’outou piha ha’api’ira’a, e nehenehe i te Vārua ’ia ha’aputapū ’oi’oi i te ’ā’au o te mau ta’ata tā ’outou e ha’api’i ra. E aha tā ’outou e nehenehe e rave nō te fa’ahaere mai i te fa’aurura’a o te Vārua i roto i tā ’outou piha ha’api’ira’a? E nehenehe ānei tā ’outou e fa’anahonaho fa’ahou i te mau pārahira’a ’aore rā ’ia fa’a’ohipa i te mau hōho’a ’aore rā te pehe nō te tītau i te Vārua ? (’A hi’o Ha’api’ira’a mai tā te Fa’aora, 15