« 4–10 nō Novema. Hebera 1–6 : ‘Iesu Mesia, ‘Te tumu nō te ora mure ’ore’ » Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 4–10 nō Novema. Hebera 1–6 », Mai, pe’e mai—nō te ta’ata hō’ē ’e te ’utuāfare : 2019
Balm of Gilead, nā Anne Henrie
4–10 nō Novema.
Hebera 1–6
Iesu Mesia, « te tumu nō te ora mure ’ore »
E tauturu te tāpa’ora’a i te mau mana’o pae vārua e tae mai ia ’outou ’ia ’ite e aha tā te Vārua Maita’i e hina’aro e ha’api’i ia ’outou. E fa’a’ite te ’ohipara’a i ni’a i tō tātou mau mana’o i tō ’outou fa’aro’o i te parau pāpū o te reira mau muhumuhu.
Pāpa’i i tō ’oe mau mana’o
E ti’a ia tātou pā’āto’a ’ia fa’aru’e i te hō’ē mea nō te fāri’i i te ’evanelia a Iesu Mesia—e peu ’ino ānei, ’aore rā e ti’aturira’a hape, ’aore rā e hoara’a au ’ore, ’aore rā te tahi atu. Nō te mau ’Ētene, te fa’afāriura’a, pinepine ïa ’o te fa’aru’era’a i te mau atua hape. Nō te mau Hebera rā (te mau ’āti Iuda) te fa’afāriura’a, mai te peu e ’ere i te mea fifi roa, e mea rave ’atā atu ā ïa. Inaha ho’i, e mea poihere rātou i tā rātou mau ti’aturira’a ’e tā rātou mau peu tei a’ahia i roto i te ha’amorira’a i te Atua mau ’e te mau ha’api’ira’a a te mau peropheta, e rā ’ē te tauasinira’a matahiti. Teie rā, ’ua ha’api’i te mau ’āpōsetolo ē, ’ua fa’atupuhia te ture a Mose i roto ia Iesu Mesia ’e tē vai ra i teienei te hō’ē ture teitei a’e ’ei fa’aturera’a nō te feiā ti’aturi. E riro ānei, te fāri’ira’a i te ha’apa’ora’a keresetiano, e ti’a roa i te mau hebera ’ia fa’aru’e i tā rātou mau ti’aturira’a mātāmua ’e tō rātou ’ā’ai ? Tē ’imi nei te ’episetole i te mau Hebera ’ia pāhono i teie mau huru uira’a nā roto i te ha’api’ira’a ē, e mea faufa’a rahi te ture a Mose, te mau peropheta ’e te mau ’ōro’a, e mea faufa’a rahi atu ā rā Iesu Mesia (hi’o Hebera 1:1–4 ; 3:1–6 ; 7:23–28). Inaha ho’i, tē fa’atoro pauroa nei te reira mau mea i ni’a i te Mesia, ma te fa’a’ite pāpū nō te Mesia, te Tamaiti a te Atua ’e te Mesia i parauhia ’o tā te mau ’āti Iuda i tīa’i noa na. Te poro’i nō te mau Hebera, ’e ia tātou ato’a nei, ’oia ho’i ïa, i te tahi taime e mea ti’a roa ia tātou ’ia fa’aru’e i te mau peu tahito nō te fa’ariro ia Iesu Mesia ’ei pū mau nō tā tātou ha’amorira’a ’e nō tō tātou orara’a—nō te mea e mea nā roto i te Mesia e « arohahia mai tātou nei » (Hebera 4:16).
Mau mana’o nō tā ’oe iho tuatāpapara’a pāpa’ira’a mo’a
Nā vai i pāpa’i i te ’episetole o te mau Hebera ?
Tē uiui ra te mana’o o te tahi ’aivāna’a ē, nā Paulo ānei i pāpa’i i te ’episetole o te mau Hebera ? E mea ’ē ri’i te huru pāpa’ira’a o te Hebera i te tahi atu mau rata a Paulo, ’e ’aita ho’i te mau pūharara’a mātāmua o teie parau i fa’ahiti i te i’oa o te ta’ata pāpa’i. Nō te mea rā ē, e mea tū’ati te mau mana’o i roto i te Hebera i te tahi atu mau ha’api’ira’a a Paulo, ’ua fāri’i te rahira’a o te Feiā Mo’a i te Mau Mahana Hope’a Nei, mai te tahi atu mau keresetiano ē, ’ua tauturu Paulo i te pāpa’i i teie ’episetole.
’O Iesu Mesia « te hōho’a mau » o te Metua i te Ao ra.
E rave rahi ’āti Iuda tei tāfifi i te fāri’i ia Iesu Mesia ’ei Tamaiti a te Atua. Tē ha’api’i nei te ’episetole o te mau Hebera ē, pauroa te mau mea nō ni’a ia Iesu e fa’a’ite pāpū nei ’e e fa’ahi’o nei i tōna Metua. ’Ia tai’o ’oe i nā pene mātāmua e pae o te Hebera, e nehenehe tā ’oe e tāpe’a i te hō’ē tāpura nō te mau tōro’a o Iesu Mesia, tōna mau ti’ara’a, tōna huru ’e tāna mau ’ohipa tā ’oe e ’ite mai tei fa’ahitihia. E aha tā teie mau mea e ha’api’i nei nō ni’a i te Fa’aora ? E aha tā teie mau mea e ha’api’i nei nō ni’a i te Metua i te Ao ra ?
E aha tā te fa’ahitira’a i muri nei a Elder Jeffrey R. Holland e ha’amāramarama ia ’oe nō ni’a i te mau ha’api’ira’a i roto i teie mau pene ? « [’Ua haere mai] Iesu… nō te ha’amaita’i… i tō te ta’ata nei ferurira’a i te huru o te Atua, ’e nō te ani mai ia rātou ’ia here i tō rātou Metua i te Ao ra mai tāna i here mai ia rātou… I tō te Mesia fa’a’amura’a i tei po’ia, fa’aorara’a i tei ma’ihia, ’āvaura’a i tei ha’avare, tē fa’a’ite ra ïa ’oia ia tātou i te ’ē’a o te Metua » (« Te hanahana rahi o te Atua », Ensign ’aore rā Liahona, Novema 2003, 72).
Hebera 2:9–18 ; 4:12–16 ; 5:7–8
’Ua māmae Iesu Mesia i te fa’ahemara’a ’e te mau paruparu ’ia ti’a iāna ’ia māramarama ’e ’ia tauturu iā’u.
Tē vai ra ānei terā mana’o ē, e nehenehe tā ’oe e « ha’afātata noa atu… i te terono o te aroha mau ra » ’e ’ia tītau i te aroha ra ? (Hebera 4:16). Hō’ē poro’i a te ’episetole o te mau Hebera ra, ’oia ho’i, noa atu ā tā tātou mau hara ’e mau paruparu, e nehenehe e ha’afātata i te Atua ’e e tae i tōna ra aroha. E aha tā ’oe e ’ite ra i roto i te Hebera 2:9–18 ; 4:12–16 ; 5:7–8 ’o te ha’apūai i tō ’oe ti’aturi ē, e tauturu mai Iesu Mesia ia ’oe i roto i tā ’oe mau tāmatara’a tāhuti nei ? E feruri i te pāpa’i i roto i te hō’ē buka tāmahana i te mau mana’o o tō ’oe ferurira’a ’e tō ’oe ’ā’au, nō ni’a i te mea tā te Fa’aora i rave nō ’oe.
Hi’o ato’a Mosia 3:7–11 ; Alama 7:11–13 ; 34.
Nō te fāri’i i te mau ha’amaita’ira’a a te Atua, ’eiaha vau e « fa’aiita » i tō’u ’ā’au.
Noa atu ē ’ua fa’afāriuhia rātou i te ha’apa’ora’a keresetiano, tē vai ra te tahi feiā mo’a ’āti Iuda tei tāfifi ’ia fāri’i hope roa i te ’evanelia a Iesu Mesia ’e tō te reira mau ha’amaita’ira’a. Nā roto i te fa’ati’a-fa’ahou-ra’a i te ’ā’amu o ’Īserā’ela tahito ra, ’ua mana’o Paulo e tauturu i te mau ’āti Iuda ’eiaha ’ia hape mai tō rātou mau tupuna ra—i te fa’aru’era’a i te mau ha’amaita’ira’a a te Atua nō tō rātou ti’aturi-’ore-ra’a. (E nehenehe tā ’oe e tai’o i te ’ā’amu tā Paulo i fa’ahiti i roto i te Nūmera 14:1–12, 26–35.)
E feruri nāhea te Hebera 3:7–4:11 e nehenehe e fa’atano ia ’oe. Nō te rave i te reira, e nehenehe tā ’oe e feruri i te tahi mau uira’a mai teie :
-
Nāhea tō ’Īserā’ela fa’ao’ō’ora’a i te Fatu ? (hi’o Hebera 3:8–11). E aha te mau hope’ara’a nō te ’ā’au fa’aīīta ?
-
Afea tō’u vaiihora’a i tō’u ’ā’au ’ia fa’aīīta ? E mau ha’amaita’ira’a ānei tā te Atua i hina’aro e hōro’a iā’u ’o tā’u i ’ore i fāri’i ’ore nō te ’erera’a vau i te fa’aro’o ?
-
E aha tā’u e nehenehe e rave nō te fa’atupu i te ’ā’au marū ? (hi’o Etera 4:15 ; Maseli 3:5–6 ; Alama 5:14–15).
Hi’o ato’a 1 Nephi 2:16 ; 15:6–11 ; Iakoba 1:7–8 ; Alama 12:33–36.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
Nāhea Iesu i te fa’a’itera’a ē, e mea au nāna te parau ti’a ’e e mea au ’ore nāna te ’ohipa ’ino ? Mai te peu e mau hia’ai parau ti’a ’ore tō tātou, e aha tā tātou e nehenehe e rave nō te taui i te reira ?
E nehenehe ānei tā ’outou e feruri i te hō’ē ha’api’ira’a tao’a ’ei tauturura’a i tō ’outou ’utuāfare ’ia māramarama e aha te aura’a tē tāpe’a-māite-ra’a i ni’a i te mau parau mau o te ’evanelia « tā tātou i fa’aro’o a’enei » ? E nehenehe e fa’ahōho’a i te reira ma te hō’ē tao’a e mea pa’ari ’ia tāpe’a. E aha te tū’atira’a o tā tātou mau tauto’ora’a e tāpe’a i tō tātou ’itera’a pāpū ’e te harura’a ’e te tāpe’ara’a i te reira tao’a ? Nāhea i te ha’apāpū ē e’ita « te mau parau tā tātou i fa’aro’o a’enei » ’ia « ma’iri noa atu » i te ātea ia tātou ? (’īrava 1).
Nō te ’āparau i te parau nō « te [ra’atira] o tō rātou ora », e nehenehe tā ’outou e ha’amata i te ’āparau nā rōto e aha te hō’ē ra’atira. E aha tā te hō’ē ra’atira e rave ? E mea nāhea Iesu Mesia e riro ai ’ei ra’atira nō tātou ’e nō tō tātou ora ?
E nehenehe teie mau ’īrava e tauturu ’ia fa’atupu i te hō’ē ’āparaura’a nō ni’a i te aura’a ’ia pi’ihia te hō’ē ta’ata e te Atua ’ia mau i te autahu’ara’a ’aore rā ’ia amo i te tahi pi’ira’a a te ’Ēkālesia nā roto i te hō’ē ta’ata i ha’amanahia. E aha tā tātou e nehenehe e ’apo mai i roto i te hi’ora’a o Iesu Mesia nō ni’a i te fāri’ira’a ’e te ravera’a i te mau pi’ira’a ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
Tāmata te tahi mau arata’ira’a ’ē. ’Eiaha na e vai noa i ni’a i te hō’ē arata’ira’a tuatāpapara’a pāpa’ira’a mo’a, e feruri rā i te tahi atu mau arata’ira’a. Nō te tahi mana’o, e hi’o i te vāhi ra « Te mau mana’o nō te tauturu i tā ’outou iho tuatāpapara’a i te pāpa’ira’a mo’a » i te mau ’api mātāmua o teie buka.
Christ Visits the New World, nā Walter Rane