« 11–17 nō Novema. Hebera 7–13 : ‘’Ei tahu’a rahi nō te mau mea maitata’i a muri nei’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 11–17 nō Novema. Hebera 7–13 », Mai, pe’e mai—nō te ta’ata hō’ē ’e te ’utuāfare : 2019
Melchizedek Blesses Abram, nā Walter Rane
11–17 nō Novema.
Hebera 7–13
« ’Ei tahu’a rahi nō te mau mea maitata’i a muri nei »
’A tai’o ai ’outou i te Hebera 7–13, e fāri’i mai ’outou i te tahi mau mana’o nā roto i te Vārua Maita’i. E feruri i te tahi mau rāve’a nō te pāpa’i i te reira ; ’ei hi’ora’a, e nehenehe tā ’outou e pāpa’i i te reira i roto i teie arata’ira’a ha’api’ira’a, i te hiti o tā ’outou mau pāpa’ira’a mo’a, ’aore rā i ni’a i te fa’anahora’a Vaira’a buka ’evanelia.
Pāpa’i i tō ’oe mau mana’o
I te tahi taime e fa’aruru ato’a te feiā mo’a ha’apa’o maita’i i « te fa’a’ino ’e te ’ati rahi » e nehenehe e fa’a’āueue i tō rātou ti’aturira’a (hi’o Hebera 10:32–38). ’Ua ’ite Paulo ē, tē fa’aruru ra te mau ’āti Iuda i fa’afāriuhia i te ha’apa’ora’a keresetiano i te hāmani-’ino-ra’a rahi nō tā rātou ha’apa’ora’a ’āpī. ’Ei fa’aitoitora’a ia rātou ’ia vai mau noa i tō rātou ’itera’a pāpū, ’ua fa’aha’amana’o ’oia ia rātou i te hui tupuna ha’apa’o maita’i o tō rātou ’ā’ai : ’o Abela, Enoha, Noa, Aberahama, Sara, Iosepha, Mose—e « naho’a rahi i ’ite » ē e mea pāpū tā te Atua i parau fafau mai ’e e mea ho’ona te tīa’ira’a i te reira (Hebera 12:1). Tei roto teie faufa’a ’āi’a fa’aro’o i te mau ta’ata ato’a e hi’o nei « ia Iesu, [’ei] tumu ’e ’ei fa’aoti i tō tātou fa’aro’o » (Hebera 12:2). Maoti ho’i ’oia, i te mau taime ato’a e hina’aro tātou e « ’ōra’i ti’a i muri ra » i te ’ati, e mea maita’i a’e ia tātou e « ha’afātata… ma te ’ā’au ha’avare ’ore, ma te fa’aro’o pāpū mau » (Hebera 10:22, 38). Nō tātou nei, mai te feiā mo’a i tahito ra, ’o Iesu tō tātou « tahu’a rahi nō te mau mea maitata’i a muri nei » (Hebera 9:11).
Mau mana’o nō tā ’oe iho tuatāpapara’a pāpa’ira’a mo’a
Te autahu’ara’a a Melehizedeka, ’o te autahu’ara’a teitei ïa.
E rave rahi tenetere tō te mau ’āti Iuda fa’a’ohipara’a i te autahu’ara’a Levitiko, tei mātau-ato’a-hia ’ei autahu’ara’a a Aarona. ’Ei ’āpe’era’a rā i te ’īra’a o te ’evanelia a Iesu Mesia, ’ua tae mai te autahu’ara’a teitei a Melehizedeka, ’e te mau ha’amaita’ira’a rahi a’e. E aha tā ’oe i ha’api’i mai nō ni’a i te autahu’ara’a a Melehizedeka i roto i te Hebera 7? Teie te tahi mau hi’ora’a o te mau parau mau tā ’oe e nehenehe e ’ite mai :
-
’Īritira’a a Iosepha Semita, Hebera 7:3, 21:Rātou tei fa’atōro’ahia i te autahu’ara’a Melehizedeka, ’ua « fa’arirohia [ïa rātou] mai te Tamaiti a te Atua ra » ’e e « vai tahu’a māite mai ā ē a muri noa atu ».
-
Hebera 7:11:’Aita te autahu’ara’a Levitiko e hōro’a nei i te « maita’i roa » ’e ’ua monohia e te Melehizedeka (hi’o PH&PF 84:18–22).
-
Hebera 7:20–21:Tē fāri’ihia nei te autahu’ara’a a Melehizedeka nā roto i te tapura’a (hi’o PH&PF 84:19–44).
E aha te mau ha’amaitaira’a tei fāri’ihia e ’oe nā roto i te autahu’ara’a a Melehizedeka ’e tō te reira mau ha’amaita’ira’a ?
Hi’o ato’a Alama 13:1–13 ; Te Parau Ha’api’ira’a ’e te mau Parau Fafau 121:36–46 ; Arata’i nō te mau pāpa’ira’a mo’a, « Melehizedeka », scriptures.lds.org ; Henry B. Eyring, « Te fa’aro’o ’e te tapura’a ’e te fafaura’a o te autahu’ara’a », Ensign ’aore rā Liahona, Mē 2008, 61–64 ; Dallin H. Oaks, « Te mau tāviri ’e te mana o te autahu’ara’a », Ensign ’aore rā Liahona, Mē 2014, 49–52.
Tē fa’atoro nei te mau ’ōro’a tahito ’e te mau ’ōro’a nō tō tātou ’anotau i ni’a ia Iesu Mesia.
’Āhani ’o te Hebera i tahito ra terā e tai’o i teie ’episetole, e ta’a iāna i te parau nō te sekene i tahito ra ’e te mau ’ōro’a tā Paulo e parau ra. ’Aita rā vetahi i māramarama hope ē, te fā nō teie mau ’ōro’a, ’o te fa’atorora’a ïa i ni’a i te tusia tāra’ehara a Iesu Mesia.
I te tau o te Bibilia, tē vai ra te hō’ē mahana i roto i te matahiti, tei pi’ihia te Mahana tāra’ehara, e tomo te tahu’a rahi i roto i te vāhi mo’a roa a’e i roto i te hiero nō Ierusalema ’e e fa’atusiahia te hō’ē pua’aniho ’aore rā te hō’ē ’arēnio nō te ’aufau nō te mau hara a tō ’Īserā’ela. ’Ua fa’ata’a Paulo ē, ’o Iesu Mesia te hō’ē tahu’a rahi e pūpū i te tusia hō’ē—tōna iho ora—nō te ’aufau nō te mau hara a tō te ao nei (hi’o Hebera 9:24–10:14).
E feruri i te mau ’ōro’a tā ’oe i ’āmui atu i teie mahana. E mea nāhea teie mau ’ōro’a e fa’atoro atu i ni’a ia Iesu Mesia ?
Tē tītau nei te fa’aro’o i te ti’aturi i tā te Atua i parau fafau mai.
Mai te mea e ani mai te tahi ta’ata ’ia tātara i te aura’a nō te fa’aro’o, e aha tā ’oe e parau atu ? ’Ua tūru’i te tuahine Anne C. Pingree, e melo tahito i roto i te peresidenira’a rahi nō te Sōtaiete Tauturu, i ni’a i te parau i roto i te Hebera 11 nō te hōro’a i teie tātarara’a : « Te fa’aro’o, ’oia ho’i te ’aravihi vārua e vaiiho iāna ’ia ’umehia i te ti’aturira’a i te mau mea i parauhia ’e ’o te hi’ohia ‘i te ātea ’ē’ ’e ’o te ’ore paha e noa’a i roto i teie nei orara’a, ’o te fāito mau ïa o te feiā e ti’aturi mau nei » (« Seeing the Promises Afar Off », Ensign ’aore rā Liahona, Novema 2003, 14).
E ’ōpua e hāmani i tā ’oe iho tātarara’a nō te fa’aro’o ’a feruri ai ’oe i te mau mana’o i roto i te Hebera 11. E aha te ha’api’ira’a nō ni’a i te fa’aro’o tā ’oe e tāpe’a nei i roto i te hi’ora’a o te mau ta’ata i fa’ahitihia i roto i teie pene ? (Hi’o ato’a Etera 12:6–22.)
Hi’o ato’a Alama 32:21, 26–43.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
E nehenehe tā ’outou e ani i te mau melo o te ’utuāfare ’ia fa’a’ite mai i te tahi ’ohipa pae vārua i tupu ’ua « ha’amāramaramahia » rātou i te parau mau. Mea nāhea teie mau ’ohipa e nehenehe e tauturu ia tātou « ’eiaha e fa’aru’e i tō [tātou] itoito » i te taime ’ati ra ’aore rā i te taime fē’a’ara’a ?
Nāhea tā ’outou e nehenehe e tauturu i te mau melo o te ’utuāfare ’ia ha’api’i mai nā roto mai i te mau hi’ora’a ta’ata ha’apa’o maita’i i fa’ahitihia i roto i te Hebera 11? E mea au paha ’ia ha’uti ta’ata ora i te ’ā’amu o te tahi o te reira mau hi’ora’a. ’Aore rā e nehenehe tō ’outou ’utuāfare ’ia ’āparau nō ni’a i te tahi atu mau hi’ora’a ta’ata ha’apa’o maita’i tā ’outou i mātau—mai te tupuna, te feiā fa’atere o te ’Ēkālesia ’e te tahi atu ta’ata o te ’oire.
’Ia au i teie ’īrava, nō te aha Iesu i ineine ai e fa’a’oroma’i i te māuiui ’e te mamae i ni’a i te sātauro ? E aha tā te reira e ha’api’ira’a nei ia tātou nō ni’a i te huru tātou e nehenehe ai e fa’a’oroma’i i tō tātou mau tāmatara’a ? E mau hi’ora’a au maita’i tā te peresideni Russell M. Nelson i hōro’a nō ni’a i teie ’īrava i roto i tāna a’ora’a « Te ’oa’oa ’e te oraora pae vārua » (Ensign ’aore rā Liahona, Novema 2016, 81–84).
Nō te aha te Fatu e fa’autu’a ai ’e e fa’atītī’aifaro ai ia tātou ? E aha tā te mau melo o te ’utuāfare e ’ite ra nō ni’a i te huru te Fatu e hi’o nei i te fa’autu’ara’a ’a tuatāpapa ’āmui ai ’outou i teie mau ’īrava ? E aha tā teie mau ’īrava e taui i roto i tā ’outou huru hōro’ara’a i te fa’autu’ara’a ’e te fāri’ira’a i te reira ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Haʼamaitaʼiraʼa i tā tātou haʼapiʼiraʼa
Fa’a’ohipa i te pehe nō te fa’ahaere mai i te Vārua ’e nō te ’apo mai i te ha’api’ira’a tumu. ’Ua parau te Peresidenira’a Mātāmua ē : « E mana ’ōti’a ’ore tō te pehe nō te tūra’ira’a ia [tātou] ’ia rahi atu ā te vāruara’a ’e te ha’apa’ora’a i te ’evanelia » (« Parau ’ōmuara’a a te Peresidenira’a Mātāmua », Te mau hīmene, x). Penei a’e e fa’ananea te hō’ē hīmene nō ni’a i te fa’aro’o, mai te hīmene « ’A ha’apa’o tātou i te ’evanelia » (Te mau hīmene, n° 156), i te ’āparaura’a a te ’utuāfare nō ni’a i te Hebera 11.
’Ua ha’api’i te mau tāpa’o o te hiero i tahito ra ’e tō te reira mau ’ōro’a i te ha’api’ira’a nō ni’a i te ti’ara’a o Iesu Mesia.