« 18–24 nō Novema. Iakobo : ‘’Ei feiā rave ho’i ’outou i te parau nei, ’eiaha ’ei feiā fa’aro’o noa’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 18–24 nō Novema. Iakobo », Mai, pe’e mai—nō te ta’ata hō’ē ’e te ’utuāfare : 2019
Abraham on the Plains of Mamre, nā Grant Romney Clawson
18–24 nō Novema.
Iakobo
« ’Ei feiā rave ho’i ’outou i te parau nei, ’eiaha ’ei feiā fa’aro’o noa »
’Ia tai’o ’outou i te ’episetole a Iakobo, e hi’o maita’i i te mau parau e riro ’ei aura’a ta’a ’ē nō ’outou ’e e pāpa’i i te reira. E aha tā te mau muhumuhu e parau nei nō ni’a i te orara’a ’outou i te reira mau parau mau ?
Pāpa’i i tō ’oe mau mana’o
I te tahi taime, hō’ē noa ’īrava o te pāpa’ira’a mo’a e nehenehe e taui i te ao nei. E au Iakobo 1:5 i te hō’ē parau iti a’o ’ōhie—tē hina’aro ra ’outou i te pa’ari, e ani i te Atua. ’Ia tai’ora’a rā Iosepha Semita, 14 matahiti, i terā ’īrava, « ’ua ō mai te reira ma te pūai rahi i roto roa i [tōna] ’ā’au » (Iosepha Semita—’Ā’amu 1:12). Maoti te reira fa’aurura’a, ’ua rave Iosepha mai te au i te a’o a Iakobo ’e ’ua ’imi ’oia i te pa’ari nō ’ō mai i te Atua nā roto i te pure. ’E ’ua hōro’a hua mai ihoa te Atua ia Iosepha hō’ē o te mau fārereira’a fa’ahiahia roa a’e i roto i te tua’ā’ai o te ta’ata nei—te ’Ōrama mātāmua. ’Ua taui roa teie ’ōrama i te orara’a o Iosepha ’e ’ua arata’i atu i te Fa’aho’i-fa’ahou-ra’a mai o te ’Ēkālesia a Iesu Mesia i ni’a i te fenua nei. Tātou pā’āto’a tei ha’amaita’ihia teie mahana maoti tō Iosepha Semita tai’ora’a ’e te ravera’a i te parau i roto i te Iakobo 1:5.
E aha tā ’outou e ’ite mai ’a tuatāpapa ai ’outou i te ’episetole a Iakobo ? Penei a’e e taui hō’ē ’aore rā e piti ’īrava ia ’outou ’e ’aore rā te ta’ata tā ’outou i here. E ’ite mai paha ’outou i te arata’ira’a ’a ’imi ai ’outou i te fa’atupu i tā ’outou misiōni i roto i te orara’a nei. E ’ite mai paha ’outou i te fa’aitoitora’a ’ia parau ma te marū ’aore rā ’ia fa’a’oroma’i atu ā. Ta’a ’ē noa atu te mea e fa’auru ia ’outou, ’ia ō mai teie mau parau « i roto i tō [’outou] nei ’ā’au ». E ha’amana’o e « fāri’i māiti… ma te marū i te parau », mai tā Iakobo i pāpa’i, « e ora ai tō ’outou vārua » (Iakobo 1:21).
Mau mana’o nō tā ’oe iho tuatāpapara’a pāpa’ira’a mo’a
’O vai Iakobo ?
Tē mana’ohia ra ē, te ta’ata i pāpa’i i te ’episetole a Iakobo, e tamaiti ïa nā Maria, te metua vahine o Iesu Mesia, e taea’e ïa nō te Fa’aora. ’Ua fa’ahitihia ’o Iakobo i roto i te Mataio 13:55 ; Mareko 6:3 ; Te mau ’Ohipa 12:17 ; 15:13 ; 21:18 ; ’e Galatia 1:19 ; 2:9. I roto i teie mau ’īrava, e au ē, e ti’a fa’atere Iakobo nō te ’Ēkālesia i Ierusalema ’e ’ua pi’ihia ’oia ’ei ’āpōsetolo (hi’o Galatia 1:19).
E arata’i te fa’a’oroma’i-māite-ra’a i te maita’i roa.
ʼUa haʼapiʼi te president Dieter F. Uchtdorf : « E nehenehe te tīa’ira’a e riro ’ei ’ohipa pa’ari. « Tē hina’aro nei tātou i te mea tā tātou e hina’aro ’e tē hina’aro nei tātou i te reira i teie nei iho ā taime. Nō reira e au ra e ’ere te parau nō te fa’a’oroma’i i te mea au-roa-hia » (« Tāmau noa nā roto i te fa’a’oroma’i », Ensign ’aore rā Liahona, Mē 2010, 56). I muri iho i te tai’ora’a i te Iakobo 1:2–4 ; 5:7–11, ’ia hi’o ’oe e aha te poro’i rahi a Iakobo nō ni’a i te fa’a’oroma’i ? E aha te tahi atu ā mau mana’o e tae mai i muri iho i te tai’ora’a i te a’ora’a a te peresideni Uchtdorf ? Nāhea ’oe i te fa’a’itera’a i te Fatu ē, ’ua ineine ’oe nō te fa’a’oroma’i ?
Iakobo 1:3–8, 21–25 ; 2:14–26 ; 4:17
E tītau te fa’aro’o i te ’ohipa.
Nāhea ’oe e ’ite ai ē, e fa’aro’o tō ’oe ia Iesu Mesia ? Nāhea tā ’oe mau ’ohipa e fa’a’ite ai i tō ’oe fa’aro’o i te Atua ? E feruri i teie mau uira’a ’a tuatāpapa ai ’oe i te mau ha’api’ira’a a Iakobo nō ni’a i te fa’aro’o. E mea au ato’a paha ’ia tai’o nō ni’a ia Aberahama ’e Rahaba, e piti hi’ora’a tā Iakobo i fa’ahiti (hi’o Genese 22:1–12 ; Iosua 2). Nāfea rāua i te fa’a’itera’a ē, e fa’aro’o tō rāua i te Atua ?
E nehenehe te tai’ora’a i te Iakobo 1:3–8, 21–25 ; 2:14–26 ; 4:17 e tauturu ia ’oe ’ia feruri i te mau rāve’a e nehenehe ai ’oe e riro ’ei ta’ata rave maita’i a’e i te parau. Pāpa’i i te mau mana’o ato’a tā ’oe e fāri’i, ’e ’a fa’anaho nō te rave i te reira.
Hi’o ato’a Alama 34:27–29 ; 3 Nephi 27:21.
Tē parau tā’u e parau, e mana tōna ’ia ha’apēpē ’aore rā ’ia ha’amaita’i ia vetahi ’ē.
I roto i te mau fa’ahōho’ara’a rahi tā Iakobo i fa’a’ohipa i roto i tāna ’episetole, te mau parau e puta maita’i, tei roto ïa i tāna parau a’o nō ni’a i te vaha. ’E feruri i te hāmani i te hō’ē tāpura nō te mau rāve’a ato’a tā Iakobo i fa’ahōho’a i te arero ’e te vaha. E aha te mau fa’aaura’a tāta’itahi ’aore rā te mau fa’ahōho’ara’a e matara mai nō ni’a i te mau parau tā tātou e fa’ahiti nei ? E feruri i te hō’ē mea tā ’oe e nehenehe e rave nō te ha’amaita’i i te hō’ē ta’ata nā roto i tā ’oe mau parau (hi’o PH&PF 108:7).
’Ei pipi nā Iesu Mesia, e mea ti’a iā’u ’ia here i te mau ta’ata ato’a, noa atu ā tō rātou huru orara’a.
’Ua fa’aara Iakobo i te feiā mo’a nō ni’a i te fāri’i-au-ra’a i te feiā tao’a ’e te hi’o-’ē-ra’a i te feiā veve, e tano ato’a rā tāna fa’aarara’a nō te tahi atu mau tumu hi’o-’ē-ra’a i te ta’ata. E nehenehe tā tātou hi’o-’ē-ra’a i te ta’ata e riro ’ei ’ohipa fifi ’ia ’ite, ’ua parau fafau rā te Fatu ē, e tauturu ’oia ia tātou ’ia ’ite i te mau vāhi e ti’a ’ia ha’amaita’i (hi’o Etera 12:27). ’Ia tuatāpapa ’oe i te Iakobo 2:1–9 nā roto i te pure, e hi’opo’a i tō ’oe ’ā’au ’e e fa’aro’o i te mau muhumuhu a te Vārua Maita’i. Tē ’ite ra ānei ’oe i te tahi tauira’a o te tītauhia ia ’oo ’ia rave i roto i te huru ravera’a ’aore mana’ora’a i te ta’ata ?
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
’E feruri ’ia tai’o i te Iakobo 1:5 ’e ’ia ani i te mau melo o te ’utuāfare ’ia fa’ati’a poto mai i te ’ā’amu nō te ’Ōrama mātāmua (hi’o Iosepha Semita—’Ā’amu 1:8–13. E ani i te mau melo o te ’utuāfare ’ia fa’a’ite mai i tō rātou ’itera’a pāpū nō te peropheta Iosepha Semita ’e nō te ’ohipa i tupu i te pāhonora’a te Metua i te Ao ra i tā rātou mau pure.
’E feruri e mātaita’i i te video ra « True Christianity » (LDS.org) ’ei tū’atira’a i teie mau ’īrava. I muri iho e tai’o atu ai i te tātarara’a a Iakobo nō te ha’apa’ora’a fa’aro’o mau ’e ’ia ’āparau atu nō te mau rāve’a e nehenehe tō ’outou ’utuāfare ’ia fa’ariro i tā ’outou ha’apa’ora’a fa’aro’o ’ei mea mau.
E rave rahi fa’ahōho’ara’a i roto i te Iakobo 3 ’o tē nehenehe e fa’auru i roto i te hō’ē ha’api’ira’a tao’a, nō te tauturu i tō ’outou ’utuāfare e ha’amana’o noa ’ia parau ma te maita’i. ’Ei hi’ora’a, e nehenehe ’outou e ’āparau nāhea te hō’ē pura na’ina’i ’aore rā te hō’ē māti na’ina’i e nehenehe e fa’atupu i te hō’ē auahi rahi, ’e e nehenehe te mau melo o te ’utuāfare e feruri i te mau taime ’ua fa’atupu te hō’ē parau au ’ore i te hō’ē fifi (hi’o ’īrava 5–6). ’Aore rā e nehenehe tā ’outou e hōro’a i te hō’ē mea ’ava’ava ’aore rā maramara i roto i te hō’ē fāri’i tei fa’ata’ahia nō te tahi mā’a monamona—mai te pape tāporo i roto i te hō’ē mōhina meri. E nehenehe te reira e ha’amata i te hō’ē ’āparaura’a nō ni’a i te hi’opo’a-māite-ra’a ē, e mea au tā tātou mau parau ’e e fa’ateitei te reira (hi’o ’īrava 9–14).
Nō te aha e mea ti’a ia tātou ’ia « ha’afātata atu i te Atua » i te taime e fa’aruru ai tātou i te fa’ahemara’a ?
Penei a’e te fa’a’itera’a i te hō’ē ’ohipa i tupu nō ni’a i te fāri’ira’a i te hō’ē ha’amaita’ira’a autahu’ara’a, e fa’aitoito i te mau melo o te ’utuāfare ’ia « ani i te hō’ē ha’amaita’ira’a autahu’ara’a i te taime e hina’aro [rātou] i te pūai pae vārua » (Dallin H. Oaks, « The Importance of Priesthood Blessings », New Era, Tiurai 2012, 4).
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
Fa’aohipa i te mau mea tā ’outou i ’apo mai. ’Ia rave ’outou i te tuatāpapara’a, e fa’aro’o i te mau muhumuhu a te Vārua nō ni’a e nāhea ’ia fa’a’ohipa i roto i tō ’outou orara’a i te mea tā ’outou i ha’api’i mai. E fafau i te pe’e i teie mau muhumuhura’a ’e ’ia ora hope atu ā i te ’evanelia. (Hi’o Ha’api’ira’a mai tā te Fa’aora, 35.)
Let Him Ask of God, nā John McNaughton