Christ Preaching in the Spirit World, nā Robert T. Barrett

25 nō Novema–1 nō Tītema

1 ’e 2 Petero

« E ’oa’oa na i te ’oa’oa e’ita e ti’a ’ia parau ra, ’e te ’ī ho’i i te maita’i »

’Ia tai’o ’outou i te ’episetole a Petero, e riro ē, e fāri’i ’outou i te mau muhumuhu ’ia ’ohipa. E pāpa’i i te reira mau muhumuhu « ’a vai noa ai ā [’outou] i roto i te Vārua ra » (PH&PF 76:80) e ti’a ïa ’ia ’outou ’ia tāpa’o tano roa i te mea i ha’api’ihia ’outou.

Pāpa’i i tō ’oe mau mana’o

I muri noa iho i tōna ti’a-fa’ahou-ra’a, ’ua fa’ahiti te Fa’aora i te hō’ē tohura’a o tei fa’atapitapi mau ia Petero. ’Ua parau ’oia ē, ’ia pa’ari Petero, e hōpoihia ’oia « i te vāhi hina’aro-’ore-hia e [āna] ra …  ’ei fa’a’itera’a atu iāna i te huru o tōna pohe e maita’i ai te Atua » (Ioane 21:18–19). I tō Petero pāpa’ira’a i teie mau ’episetole, ’ua ’ite ’oia tē fātata mai ra terā maratiri i tohuhia : « ’Ua fātata vau i te ha’apae i teie nei ti’ahapa, tā tō tātou Fatu tā Iesu Mesia i fa’a’ite mai iā’u ra » (2 Petero 1:14). Te mea ’oto rā, ’ua mātauhia teie huru hāmani-’ino-ra’a rahi i te feiā mo’a i roto i te mau mata’eina’a Roma, nō rātou ho’i Petero i pāpa’i ai (hi’o 1 Petero 1:1). ’E noa atu rā te reira, ’aita tāna mau parau i ’ī i te mata’u ’e te mana’o ha’aparuparu. ’Aita, ’ua ha’api’i rā ’oia i te feiā mo’a ’ia « rahi [te] ’oa’oa », noa atu ā « te taiā poto noa ā [rātou]… i mau pohe ’ē’ē ra ». ’Ua a’o ’oia ia rātou ’ia ha’amana’o ē, e riro « te tāmatara’a o tō [rātou] fa’aro’o » i te arata’i atu « ’ei ha’amaita’i, ’e ’ei ture, ’e ’ei maita’i i te fāra’a mai o Iesu Mesia ra » ’e i « te ora o tō [rātou] vārua » (1 Petero 1:6–7, 9). Pāpū ’ua tāmāhanahana te fa’aro’o o Petero i terā nau feiā mo’a mātāmua, mai te feiā mo’a i teienei, ’oia ho’i « tē rave ato’a ra [tātou] i te mau pohe o te Mesia ; ’e ’ia fa’a’itehia mai tōna hanahana, ’ia hiemate’oa [tātou] ma te ’oa’oa rahi » (1 Petero 4:13).

Mau mana’o nō tā ’oe iho tuatāpapara’a pāpa’ira’a mo’a

1 Petero 1:3–9 ; 2:19–24 ; 3:14–17 ; 4:12–19

E nehenehe tā’u e ’ite i te ’oa’oa i te taime tāmatara’a ’e te māuiui.

’Ia hi’ohia, e mea huru ’ē tā Petero fa’a’ohipara’a i te mau parau mai te poupou, te ’oa’oa, te hanahana ’e te ’oa’oa rahi nō te ’āpiti i te mau parau e tū’ati rahi a’e i te mau tāfifira’a : te taiā, te mau fa’ahemara’a, te ’ati, te hāmani ’ino ’ū’ana ’e te mau pohe (hi’o 1 Petero 1:6 ; 2:19 ; 4:12–13). Hō’ē ā poro’i a Petero i tā te peresideni Russell M. Nelson i ha’api’i : « Te feiā mo’a ’o te nehenehe e ’oa’oa noa atu te mea e fa’aruruhia nei… Tei ni’a te fa’atumura’a o tō tātou orara’a ia Iesu Mesia ’e i tāna ’evanelia, ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a. Nō ’ō mai iāna ’e nōna te ’oa’oa e tae mai ai. ’O ’oia te tumu o te ’oa’oa ato’a » (« Te ’oa’oa ’e te oraora pae vārua », Ensign ’aore rā Liahona, Novema 2016, 82).

’Ia tai’o ’oe i te 1 Petero 1:3–9 ; 2:19–24 ; 3:14–17 ; 4:12–19, e aha te tīa’ira’a e noa’a mai ē, e nehenehe tā ’oe e ’ite i te ’oa’oa noa atu ā tei roto ’oe i te mau tāfifira’a rahi ?

1 Petero 3:18–20 ; 4:1–6

Tē porohia nei te ’evanelia i te feiā i pohe ’ia ti’a ia rātou ’ia ha’avā-ti’a-hia.

’Ia tae te hō’ē mahana, e ti’a te ta’ata tāta’itahi i mua i te ha’avāra’a nō te « fā’i rātou i te parau iāna, i tei ineine i te ha’avā mai i tei ora ’e tei pohe » (1 Petero 4:5). E uiui te mana’o o vetahi ē, nāhea pa’i e ti’a i te Atua ’ia ha’avā tano i te mau ta’ata ato’a, ’ua ta’a ’ē rahi roa ho’i te mau rāve’a nō te māramarama ’e nō te ora i te ’evanelia. E hi’o maita’i na i te ha’api’ira’a tumu tā Petero i ha’api’i i roto i te 1 Petero 3:18–20 ; 4:6 ’ei tauturura’a i te feiā mo’a i tōna ra tau ’ia māramarama ē, e mea ti’a iho ā te mau ha’avāra’a a te Atua. Nāhea teie mau ’īrava e ha’apūai ai i tō ’oe fa’aro’o i te tanora’a ’e te ti’ara’a o te Atua ?

Nō te tuatāpapa fa’ahou atu ā nō ni’a i te reira ha’api’ira’a tumu, ’a hi’o i Te Parau Ha’api’ira’a ’e te mau Parau Fafau 138, e heheura’a tā te peresideni Joseph F. Smith i fāri’i i tōna ferurira’a i te mau pāpa’ira’a a Petero. E aha te mau ha’amaita’ira’a e tae mai i te mau ta’ata e ha’amatara i te mau ’ōro’a o te ’evanelia i tō rātou mau melo o te ’utuāfare tei pohe, ’o tē tīa’i noa nei i te reira ?

2 Petero 1:1–11

Nā roto i te mana o Iesu Mesia e ti’a ai iā’u ’ia fa’atupu i tō’u nātura hanahana.

’Ua fāri’i a’ena ānei ’oe te mana’o ē, te rirora’a mai ia Iesu Mesia ’e te fa’ananeara’a i tōna mau hīro’a, ’eita e haere ? ’Ua hōro’a Elder Robert D. Hales i teie mana’o fa’aitoito nō ni’a i te huru tātou e nehenehe e riro mai te Mesia te huru : « Te mau huru o te Fa’aora… e mau huru… tei rara’ahia te tahi i ni’a i te tahi, ’āpitihia te tahi i te tahi, ’o te hotu i roto ia tātou ma te ’ohipa ’āmui. E nehenehe e parau ē, e’ita e roa’a ia tātou te hō’ē huru Mesia mai te mea ē, ’aita e roa’a ’e ’aita e fa’auru i te tahi atu mau huru. ’Ia pa’ari te hō’ē huru, e pa’ari ato’a te tahi atu e rave rahi » (« ’Ia riro ’ei pipi nā tō tātou Fatu ’o Iesu Mesia », Ensign ’aore rā Liahona, Mē 2017, 46).

Te huru tāta’itahi o te Mesia tā tātou e fa’atupu nei, e tauturu ïa ia tātou ’ia ha’une i te hō’ē hōho’a pae vārua nō te ti’ara’a pipi.

’E feruri i te tai’o i te 2 Petero 1:1–11 ’ei tū’atira’a i te poro’i a Elder Hales. E aha tā ’oe e ha’api’i mai nā roto mai i teie nā ’āpōsetolo o te tauturu ia ’oe i roto i tā ’oe tauto’ora’a ’ia riro rahi atu ā mai te Mesia te huru ?

Hi’o ato’a i te 1 Petero 4:8 ; David A. Bednar, « Te mau maitaʼi rahi roa i parauhia mai »? Ensign ’aore rā Liahona, Novema 2017, 90–93.

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :

1 Petero 2:5–10

’Ia tai’o ’outou i teie mau ’īrava ’e tō ’outou ’utuāfare, ’e feruri i te fa’a’ohipa i te tahi mau ’ōfa’i ’ei tauturura’a i te mau melo o te ’utuāfare ’ia hi’o mana’o i te mau ha’api’ira’a a Petero ē, ’o te Fa’aora tō tātou « ’ōfa’i tihi ». Nāhea tātou i te fa’ahōho’a i te mau « ’ōfa’i ora ra » tā te Atua e fa’a’ohipa nei nō te patu i tōna bāsileia ? E aha tā tātou e ha’api’i mai nā roto mai ia Petero nō ni’a i te Fa’aora ’e tō tātou ti’ara’a i roto i tōna bāsileia ? E aha te poro’i a Petero i tō ’outou ’utuāfare ?

1 Petero 3:8–17

Nāhea tātou i te « vai ineine ā ’ia parau atu i te ta’ata » ’o tē ani mai ia tātou nō ni’a i tō tātou fa’aro’o ? Penei a’e e hina’aro tō ’outou ’utuāfare e ha’uti ta’ata ora nō te huru o te ta’ata e haere mai nei e uiui ia rātou nō ni’a i te ’evanelia.

1 Petero 3:18–20 ; 4:6

E aha tā ’outou te ’utuāfare e nehenehe e rave nō te ha’api’i mai i te parau nō ni’a i tō ’outou mau tupuna i pohe ? Penei a’e ’ia tae i te mahana fānaura’a o te hō’ē tupuna i pohe, e nehenehe ’outou e tunu i te mā’a tāna i au roa, ’e e fa’a’ite’ite i tōna mau hōho’a ’aore rā e fa’ati’a i te tahi mau ’ā’amu nōna. Mai te peu e ti’a, e nehenehe ato’a tā ’outou e rave i te mau ’ōro’a nōna i roto i te hiero.

2 Petero 1:16–21

I roto i teie mau ’īrava, tē fa’aha’amana’o nei Petero i te feiā mo’a i te ’ohipa i tupu i ni’a i te mou’a o te Fa’ahuru-’ē-ra’a, tei reira ato’a ’oia (hi’o ato’a Mataio 17:1–9). E aha tā ’outou i ha’api’i mai nā roto ai i teie mau ’īrava nō ni’a i te mau ha’api’ira’a a te mau peropheta ? (hi’o ato’a PH&PF 1:38). E aha te mea e hōro’a nei i te ti’aturira’a ’ia pe’e i tō tātou peropheta i tō tātou nei ’anotau ?

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.

Haʼamaitaʼiraʼa i tā tātou haʼapiʼiraʼa

« ’Ia vai ineine ā ». E nehenehe te mau taime ’ōpua-’ore-hia nō te ha’api’i i te fare e tae vave mai ’e e reva vave atu, nō reira e mea faufa’a roa ’ia rave mai i te reira mau taime ’ia tupu ana’e mai. Nāhea ’outou e nehenehe ai e tūtava ’ia « vai ineine ā » nō te ha’api’i i te mau melo o te ’utuāfare i te mau parau mau o te ’evanelia, ’e ’ia fa’a’ite atu i « te ti’aturi i roto ia ’outou na » (1 Petero 3:15), ’ia tupu te taime nō te ha’api’i atu ? (Hi’o Ha’api’ira’a mai tā te Fa’aora, 16.)

Noa atu ā tē fa’aruru ra Petero i te hāmani-’ino-ra’a ’e te pāto’ira’a, ’ua vai ’āueue ’ore noa ’oia i roto i tōna ’itera’a pāpū nō te Mesia.