Perfect Love, nā Del Parson

2–8 nō Tītema

1–3 Ioane ; Iuda

« E aroha te Atua »

’Ia tai’o ’oe i te mau ’episetole a Ioane ’e a Iuda, ’a ’imi i te fa’aurura’a nō ni’a e nāhea ’oe e nehenehe ai e fa’a’ite i tō ’oe here i te Atua. Pāpa’i i te reira mau mana’o e tae mai ’e ’a rave atu i te reira.

Pāpa’i i tō ’oe mau mana’o

I te pāpa’ira’a Ioane ’e Iuda i tā rāua mau ’episetole, tē ha’amata ra te tāivara’a tei tohuhia, ’ei hope’ara’a nō te hāmani-’ino-ra’a rahi mau ’e te vi’ivi’ira’a te ha’api’ira’a tumu. Tē uiui ato’a ra vetahi mau ’orometua ha’avare ē, e parau mau ānei ’ua « haere ta’ata mai » Iesu Mesia (hi’o, ’ei hi’ora’a, 1 Ioane 4:1–3 ; 2 Ioane 1:7). Nō reira ’ua ha’amata te ’āpōsetolo Ioane i tāna ’episetole mātāmua nā roto i te hōro’ara’a i tōna ’itera’a pāpū nō te Fa’aora : « ’O te ’itera’a pāpū teie tā mātou e hōro’a nei ’o tei vai i te mātāmua ra, ’o tā mātou i fa’aro’o a’enei, ’o tā mātou i ’ite a’enei i tō mātou mata, ’o tā mātou i hi’o pāpū atu ’e ’o tā mātou i ’ōmiri noa i tō mātou rima, nō te Logo ra o te ora » (’Īritira’a a Iosepha Semita, 1 Ioane 1:1 [i roto 1 Ioane 1:1, footnote a]) Penei a’e te poro’i pūai roa a’e o te ’episetole a Ioane, ’o te here ïa : Te here o te Atua ia tātou ’e te here e ti’a ia tātou ’ia noa’a nōna ’e nō tāna mau tamari’i ato’a. Inaha ho’i, ’ua ’ite ’o Ioane iho i te here o te Fa’aora (hi’o Ioane 13:23 ; 20:2), ’e ’ua hina’aro ’oia i te feiā mo’a ’ia putapū ato’a i taua here ra i roto i te mau fifi ’e te pāto’ira’a, inaha ho’i « ’aore ’o te aroha ra e mata’u ; e pe’e te mata’u i te aroha ti’a mau ra » (1 Ioane 4:18).

Mau mana’o nō tā ’oe iho tuatāpapara’a pāpa’ira’a mo’a

1 Ioane

E māramarama te Atua ’e e here ho’i.

’Āhani e mā’iti ’oe hō’ē ’aore rā e piti ta’o nō te fa’a’ite i te Atua, e aha ïa te reira ? I roto i tāna mau ’episetole, ’ua fa’a’ohipa Ioane i nā ta’o « māramarama » ’e « here » (1 Ioane 1:5 ; 4:8, 16). ’Ia ta’io ’oe i te 1 Ioane, e feruri i te mau ’ohipa i tupu nō Ioane mai tei pāpa’ihia i roto i te ’Evanelia a Ioane, ’e e feruri nāhea teie mau ’itera’a i ha’api’i ia Ioane nō ni’a i te māramarama ’e te here o te Atua. E aha tō ’oe iho mau ’itera’a i ha’api’i ia ’oe ē, ’o te Atua te māramarama ’e te here ?

Hi’o ato’a Ioane 3:16–21 ; 15:9–17 ; 2 Nephi 26:24 ; Te Parau Ha’api’ira’a ’e te mau Parau Fafau 50:24 ; 88:6, 12–13 ; 93:36–37.

1 Ioane 2:24–3:3

E nehenehe tā’u e riro mai ia Iesu Mesia te huru.

E mea teitei roa ānei nō ’oe te fā ’ia riro mai te Mesia te huru ? E feruri i te parau fa’aitoito a Ioane : « E au mau tamari’i ra, e ’ati atu ā ’outou iāna ; ’ia itoito tātou ’ia fā mai ’oia ra… e riro tātou mai iāna ato’a te huru » (1 Ioane 2:28 ; 3:2). E aha tā ’oe i ’ite i roto i te 1 Ioane 2:24–3:3 ’o te fa’aitoito ia ’oe ’e ’o te tāmāhanahana ia ’oe ’ei hō’ē pipi nā Iesu Mesia ? ’Ia tuatāpapa ’oe i te mau ’episetole a Ioane, e hi’o i te tahi atu mau parau tumu ’aore rā te mau parau a’o o te nehenehe e tauturu ia ’oe i roto i tā ’oe tauto’ora’a ’ia riro rahi atu ā mai te Mesia te huru.

Hi’o ato’a Moroni 7:48 ; Te Parau Ha’api’ira’a ’e te mau Parau Fafau 88:67–68.

’Īritira’a a Iosepha Semita, 1 Ioane 4:12

’Aita ānei « e ta’ata i hi’o i te Atua » ?

Tē ha’apāpū nei te ’Īritira’a a Iosepha Semita, 1 Ioane 4:12 ē « ’aita ā e ta’ata i hi’o i te Atua maori rā tei ti’aturi » (hi’o ato’a Ioane 6:46 ; 3 Ioane 1:11). Tē vai nei i roto i te mau pāpa’ira’a mo’a e rave rahi taime ’ua fā te Atua te Metua i te ta’ata fa’aro’o, mai ia Ioane ato’a (hi’o Apokalupo 4 ; hi’o ato’a Te mau ’Ohipa 7:55–56 ; 1 Nephi 1:8 ; Te Parau Ha’api’ira’a ’e te mau Parau Fafau 76:23 ; Iosepha Semita—’Ā’amu 1:16–17).

1 Ioane 5

’Ia fa’a’ohipa vau i te fa’aro’o ia Iesu Mesia ’e ’ia fānau-fa’ahou-hia vau, e ti’a ïa iā’u ’ia upo’oti’a i ni’a i te ao.

E ’ite-pinepine-hia te mana’o e upo’oti’a i ni’a i te ao i roto i te mau pāpa’ira’a a Ioane. ’Ua pāpa’i Ioane i tā Iesu i parau : « E pohe tō ’outou i teie nei ao. E fa’aitoito rā, ’ua riro te rē o teie nei ao iā’u » (Ioane 16:33). ’E tei roto i te Apokalupo 2–3 tō Ioane pāpa’ira’a i te mau parau fafau a te Fatu i te mau ta’ata e ’upo’oti’a i ni’a i te ao. E aha tā Ioane i parau nō ni’a i te upo’oti’ara’a i ni’a i te ao i roto i te 1 Ioane 5:3–5 ? ’Ia tai’o ’oe i te 1 Ioane 5, e ’imi i te mea e ti’a ia tātou ’ia rave nō te upo’oti’a i ni’a i te ao ’e ’ia roa’a te ora mure ’ore. E aha te upo’oti’ara’a i ni’a i te ao i roto i tō ’oe orara’a ? E nehenehe ato’a ’oe e ’ite mai i te mau pāhonora’a ’e te tahi mau mana’o i roto i te a’ora’a a Elder Neil L. Andersen « ’Ia upo’oti’a i ni’a i te ao » (Ensign ’aore rā Liahona, Mē 2017, 58–62).

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :

1 Ioane 2:8–11

’Ei tauturura’a i tō ’outou ’utuāfare e feruri i te mau ha’api’ira’a a Ioane, e ha’aputuputu ia ’outou i roto i te hō’ē piha pōiri ’e e vaiiho i te mau melo o te ’utuāfare ’ia ha’api’i mai e aha te ta’a-’ē-ra’a i roto i te haerera’a « nō roto i te pōiri » ’e te haerera’a « nā roto i te māramarama ». Nāhea te tāiroiro e fa’ahaere ai ia tātou nā roto i te pōiri ’a turori atu ai ? Nāhea te herera’a ia vetahi ’ē e fa’atae mai ai i te māramarama i roto i tō tātou orara’a ?

1 Ioane 3:21–22

E aha te mea i roto i teie mau ’īrava e fa’arahi ai i tō tātou « ti’aturi » i ni’a i te Atua ’e i roto tō tātou ’aravihi ’ia fāri’i i te pāhonora’a i tā tātou mau pure ?

1 Ioane 5:2–3

E mau fa’auera’a ānei tā tātou e feruri nei ’ei mea « teimaha » ’aore rā ’ei mea fifi ’ia pe’e ? Nāhea tō tātou here i te Atua e taui ai i tō tātou hi’ora’a i tāna mau fa’auera’a ?

Nā te ha’apa’ora’a i te mau fa’auera’a a te Atua e tauturu ia tātou ’ia upo’oti’a i ni’a i te ao.

Iuda 1:3–4

Tē vai ra ānei te mau ’ati pae vārua tei « fa’aō ’ōmo’e » mai i roto i tō tātou orara’a ’e tō tātou ’utuāfare ? (Iuda 1:4). Nāhea tātou i te pe’e i te a’ora’a a Iuda e « mārō māite atu i te fa’aro’o » ’e e pāto’i i teie mau ’ati ? (Iuda 1:3). E aha tā ’outou e nehenehe e rave nō te ha’apāpū mai ē, « ’ia rahi mai ā… te hau, ’e te [here] » i roto i tō tātou ’utuāfare ? (Iuda 1:2).

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.

Ha’amaita’i i tā ’oe iho tuatāpapara’a pāpa’ira’a mo’a

’Ite mai i te here o te Atua. ’Ua ha’api’i Elder M. Russell Ballard ē : « Te ’evanelia, e ’evanelia ïa nō te here—te here nō te Atua ’e te here nō te tahi ’e te tahi » (« God’s Love for His Children », Ensign, Mē 1988, 59). ’Ia tai’o ’outou i te mau pā’pa’ira’a mo’a, e feruri i te pāpa’i ’aore rā i te fa’a’ū i te mau ta’o ’e te mau pereota e fa’a’ite pāpū ra i te here o te Atua.

Walk with Me, nā Greg K. Olsen