Safe in a Stable, nā Dan Burr

16–22 nō Tītema

Noela

« E parau maita’i… ’o te riro ïa ’ei ’oa’oara’a »

Nō vetahi, ’ua riro te Noela ’ei tau huehue rahi. E feruri nāhea tā ’outou tuatāpapara’a i te Faufa’a ’Āpī e nehenehe e hōpoi mai i te vārua hau ’e te mo’a i roto i tō ’outou orara’a. E feruri i te fa’aurura’a a te fānaura’a o te Fa’aora ’e tāna misiōni i ni’a i tō ’outou orara’a, ’e pāpa’i i te mau mana’o ato’a pae vārua e tae mai.

Pāpa’i i tō ’oe mau mana’o

Nō te aha te fānaura’a o te hō’ē ’aiū e hōpoi mai ai i taua ’oa’oara’a rahi ra ? Penei a’e e nehenehe te ’aiū ’āpī ’ia riro ’ei tāpa’o nō te ti’aturira’a. Tē vai nei te tahi mea i roto i te hō’ē orara’a ’āpī tei ’ī i te ’ohipa rau ’o tē tītau ia tātou ’ia feruri e aha te ananahi nō terā tamari’i ’e e aha te mau ’ohipa fa’ahiahia tāna e rave atu. ’Aita te reira i tano a’e i ni’a i te hō’ē ta’ata maori rā te fānaura’a o te Tamaiti a te Atua, ’o Iesu Mesia. ’Aita e ti’aturira’a rahi a’e i tu’uhia i ni’a i te hō’ē tamari’i, ’e ’aita a’enei e tama i fānauhia i tu’u-rahi-hia te parau fafau i ni’a iāna.

I te anira’a te melahi i te mau tīa’i māmoe ’ia haere e ’imi i te ’aiū fānau ’āpī i roto i te phatene, ’ua hōro’a ato’a ’oia i te hō’ē poro’i nō ni’a i terā tamari’i. E poro’i nō te ti’aturi—’ua tae mai teie ’aiū i ni’a i te fenua nei nō te fa’atupu i te hō’ē misiōni mo’a. ’Ua ha’a te mau tīa’i māmoe ē, « ’ua fa’a’ite hua atura rātou… ’e te feiā ato’a i fa’aro’o ra, māere ana’e ihora i te mau parau i parauhia mai ’e te mau tīa’i māmoe ia rātou ra. Ha’apa’o māite atura rā Maria i taua mau parau ra, i te feruri-māite-ra’a i roto i tōna ’ā’au » (Luka 2:17–19). Penei a’e e mea maita’i ’ia pe’e i te hi’ora’a o Maria i teie Noela : e feruri māite i roto i tō ’outou ’ā’au i te mau mea tā ’outou i ha’api’i nō ni’a i te Fa’aora i teie matahiti. Nāhea ’oia i te fa’atupura’a i tāna misiōni fa’aora i roto i te mau fa’ati’ara’a tā ’outou i tai’o ? ’E hau atu, nāhea tāna misiōni i te taui i tō ’outou orara’a ?

Mau mana’o nō tā ’oe iho tuatāpapara’a pāpa’ira’a mo’a

Mataio 1:18–25 ; 2:1–12 ; Luka 1:26–38 ; 2:1–20

’Ua fāri’i Iesu Mesia ’ia fānauhia ’oia i rotopū ia tātou i ni’a i te fenua nei.

Noa atu pa’i ’ua tai’o ’aore rā ’ua fa’aro’o ’oe i te ’ā’amu nō te fānaura’a o Iesu Mesia e rave rahi taime, e tuatāpapa i te reira i teie taime ma teie mana’o i te ferurira’a : « E ’ere te Noela i te fa’ahanahana-noa-ra’a e nāhea tō Iesu taera’a mai i ni’a i te fenua nei, ’o te ’itera’a ato’a ho’i ē ’o vai ’oia—’o tō tātou Fatu ’e Fa’aora Iesu Mesia—’e nō te aha ’oia i haere mai ai » (Craig C. Christensen, « Te tā’āto’ara’a o te ’ā’amu Noela » [Purera’a Noela a te Peresidenira’a Mātāmua, 4 nō Tītema 2016], broadcasts.lds.org).

E aha tā ’oe i ’ite ē, ’o vai Iesu Mesia hou tōna fānaura’a ? (hi’o, ’ei hi’ora’a, Ioane 17:5 ; Mosia 3:5 ; PH&PF 76:13–14, 20–24 ; Mose 4:2). Nāhea teie ’itera’a i fa’atupu i ni’a ia ’oe ’ia tai’o ana’e ’oe i te parau o tōna fānaura’a ?

E aha tā ’oe i ’ite nō ni’a i te tumu Iesu Mesia i haere mai ai i ni’a i te fenua nei ? (hi’o, ’ei hi’ora’a, Luka 4:16–21 ; Ioane 3:16–17 ; 3 Nephi 27:13–16 ; PH&PF 20:20–28). Nāhea teie ’itera’a i fa’atupu i ni’a i tō ’oe mau mana’o nō te Fa’aora ? Nāhea te reira i te fa’atupu i ni’a i te huru o tā ’oe e ora nei ?

Hi’o ato’a 2 Korinetia 8:9 ; Hebera 2:7–18 ; 1 Nephi 11:13–33 ; Alama 7:10–13.

1 Korinetia 15:21–26 ; Kolosa 1:12–22 ; 1 Petero 2:21–25

’Ua rave fa’aoti Iesu Mesia i tāna misiōni ’e ’ua fa’ati’a ’oia iā’u ’ia noa’a te ora mure ’ore.

Noa atu ā ’ua ’atihia te ’ā’amu nō te fānaura’a o te Mesia i te mau temeio, e fānaura’a mai tō te tahi atu tamari’i tōna ’āhani ’aita terā ’ohipa rahi tāna i fa’atupu i muri a’e i roto i tōna orara’a. Mai tā te peresideni Gordon B. Hinckley i parau : « E riro noa te ’aiū Iesu i Betelehema ra mai te tahi noa pēpe, ’āhani ’aita te tāra’ehara a te Mesia i Getesemane ’e i Kalavari, ’e ’āhani ’aita terā parau ’ū’ana nō te ti’a-fa’ahou-ra’a » (« The Wondrous and True Story of Christmas », Ensign, Tītema 2000, 5).

Gethsemane, nā J. Kirk Richards

E ’itehia te ha’apāpūra’a nō te misiōni hanahana a te Fa’aora ’e nō tōna here rahi i te ta’ata i roto i te tā’āto’ara’a o te Faufa’a ’Āpī. E aha te mau tuha’a ’aore rā te mau ’ā’amu tā ’oe e mana’o ra ? E nehenehe e ho’i i roto i teie rāve’a ’aore rā tā ’oe buka tuatāpapara’a nō te hi’o fa’ahou i te tahi mau mana’o i tae mai ’o tei pāpa’ihia. E nehenehe ato’a tā ’oe e tai’o i te 1 Korinetia 15:21–26 ; Kolosa 1:12–22 ; 1 Petero 2:21–25 ’e e feruri nāhea te Fa’aora ’e tāna ’ohipa i te ha’amaita’ira’a i tō ’oe orara’a. E aha tā ’oe e mana’o ra e taui i roto i tō ’oe orara’a ? Nāhea ’oe i te tītau i te mana o te Fa’aora ?

Mau mana’o nō te tuatāpapara’a pāpa’ira’a mo’a a te ’utuāfare ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :

Mataio 1:18–25 ; 2:1–12 ; Luka 1:26–38 ; 2:1–20

Nāhea ’outou te ’utuāfare e nehenehe ai e fa’ahanahana i te fānaura’a o Iesu Mesia ? Teie te tahi mau mana’o iti, ’aore rā e nehenehe ’outou e tu’u mai tō ’outou iho :

• Tai’o ’aore rā ha’uti ta’ata ora i te tahi tuha’a o te ’ā’amu nō te Fānaura’a.

• E māta’ita’i i te hō’ē purera’a Noela a te Peresidenira’a Mātāmua (broadcasts.lds.org ;).

• E hīmene ’āmui i te mau hīmene Noela, ’aore rā e mā’iti i te tahi ta’ata tupu ’aore rā te tahi hoa nō te haere e hi’o ia rātou ’e e hīmene nō rātou (hi’o Te mau hīmene, n° 118–28).

• Haere e tauturu i te tahi ta’ata.

• E ani i te mau melo o te ’utuāfare ’ia hi’o i te tahi mau tuha’a i roto i te ’ā’amu nō te Noela ’o tē hōro’a ia rātou i te tahi mana’o nō te mau fa’anehenehe tā rātou e nehenehe e hāmani ’ei ha’amana’ora’a ia Iesu Mesia.

1 Korinetia 15:21–26 ; Kolosa 1:12–22 ; 1 Petero 2:21–25

Nō te aha tātou e māuruuru ai ē ’ua fānauhia Iesu Mesia ? E aha te mau hōro’a tāna i hōro’a ia tātou ? Nāhea tātou i te fa’a’ite iāna i tō tātou māuruuru ?

« Te Mesia ora : Te ’itera’a pāpū o te mau ’āpōsetolo »

Mai te mea ’ua hina’aro ’outou e tauturu i tō ’outou ’utuāfare ’ia rōtahi i ni’a i te Fa’aora i te pu’e tau Noela, penei a’e e nehenehe tā ’outou e fa’ata’a i te tahi taime nō te tai’o ’e nō te tuatāpapa ’āmui i « Te Mesia ora : Te ’itera’a pāpū o te mau ’āpōsetolo » (Ensign ’aore rā Liahona, Mē 2017, ’o roto i te tāpo’i nō mua). Penei a’e e nehenehe tā ’outou e tāmau ’ā’au i te tahi mau tuha’a nō « Te Mesia ora » ’aore rā e ’imi i te mau fa’a’itera’a nō te orara’a o te Fa’aora i roto i te Faufa’a ’Āpī e turu i te mau parau i roto i te reira. E nehenehe ato’a tā ’outou e ani i te melo tāta’itahi o te ’utuāfare ’ia pāpa’i i tōna iho ’itera’a pāpū nō Iesu Mesia, ’e mai peu e fa’auruhia, e tai’o i te reira i te ’utuāfare.

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.

Ha’amaita’i i tā ’oe iho tuatāpapara’a pāpa’ira’a mo’a

’Imi ia Iesu Mesia. Tē ha’api’i nei te mau pāpa’ira’a mo’a ia tātou ē, tē fa’a’ite pāpū nei te mau mea ato’a nō Iesu Mesia (hi’o Mose 6:62–63), nō reira e ’imi tātou iāna i roto i te mau mea ato’a. ’Ia tai’o ’outou i te mau pā’pa’ira’a mo’a, e feruri ’ia tāpa’o ’aore rā ’ia fa’a’ū i te mau ’īrava e ha’api’i nei ia ’outou nō ni’a iāna. Rave i te tahi taime i te mahana hō’ē ē tae atu ai i te Noela nō te hi’o i te mau mea ’ati a’e ia ’outou e fa’a’ite pāpū ra nō Iesu Mesia.

The Nativity, nā Brian Call