The Good Shepherd, nā Del Parson

9–15 nō Tītema.

Apokalupo 1–11

« Te hanahana, ’e te mana, ’ei… te Arenio, ē a muri noa atu »

E feruri i te pāpa’i i tā ’outou mau uira’a nō ni’a e aha tā ’outou e tai’o ra i roto i te Apokalupo. E nehenehe ’outou i muri iho e mā’imi i te pāhonora’a i tā ’outou mau uira’a ’aore rā e ’āparau i te reira ’e te tahi melo o te ’utuāfare ’aore rā i roto i te piha ha’api’ira’a i te fare purera’a.

Pāpa’i i tō ’oe mau mana’o

’Ua fifi a’ena ānei ’outou i te fa’a’ite atu i te ta’ata i te mea tā ’outou i fāri’i i te tupura’a te hō’ē ha’aputapūra’a vārua pūai mau ? E nehenehe e’ita e tano te mau parau tā tātou i mātau noa i te fa’ahiti nō te fa’ata’a i te mau ’āehuehu ’e te mau mana’o pae vārua. Penei a’e teie te tumu Ioane i fa’a’ohipa rahi ai te mau tāpa’o ’e te mau fa’ahōho’ara’a nō te fa’ata’a i tāna heheura’a hanahana. ’Ua nehenehe noa iāna e parau ē, ’ua ’ite ’oia ia Iesu Mesia, nō te tauturu rā ia tātou ’ia māramarama i te ’ohipa i tupu nōna, ’ua fa’ata’a ’oia nō te Fa’aora ma te fa’a’ohipa i te mau parau mai teie : « Mai te ura auahi ra ’ōna mata », « te hō’ē ’o’e ’o’oi mata piti ra mai roto atu i tōna vaha » ’e « tōna mata mai te mahana ra ïa e ’ana’ana mai i te avatea ra » (Apokalupo 1:14–16). ’Ia tai’o ’outou i te buka Apukalupo, e tāmata i te hi’o mai i te mau poro’i tā Ioane i hina’aro ’ia ’outou ’ia ’apo mai ’e ’ia putapū, noa atu ā ’aita ’outou e ta’a ra i te aura’a o te mau tāpa’o ato’a. Nō te aha ’oia i fa’aau ai i te mau ’āmuira’a o te ’Ēkālesia i te mau lamepa ra, ’o Sātane e fa’aau i te hō’ē teni ’e ’o Iesu Mesia e fa’aau i te hō’ē ’ārenio ? I te hope’a, ’aita i tītauhia ’ia māramarama i te mau tāpa’o ato’a i roto i te Apokalupo nō te māramarama i tāna mau tumu parau rahi, mai tāna tumu parau rahi hope : ’o Iesu Mesia ’e tōna mau ta’ata ’āpe’e te upo’oti’a i ni’a i te mau bāsileia o te ta’ata ’e o Sātane.

Mau mana’o nō tā ’oe iho tuatāpapara’a pāpa’ira’a mo’a

Apokalupo

Nāhea vau i te ’apo i te aura’a o te buka a Apokalupo ?

E riro paha, e mea fifi ’ia māramarama i te buka a Apokalupo, ’eiaha rā e ha’aparuparu i te mana’o. E fa’auru paha te parau fafau a Ioane ia ’oe ’ia tāmau ā i te tāmata : « E ao tō rātou tō tē ta’io, ’e tō te feiā e fa’aro’o ’e e māramarama i teie nei parau tohu, ’e tē ha’apa’o i tei pāpa’ihia i roto ra, inaha tē fātata ra te tau nō te ho’ira’a mai te Fatu » (’Īritira’a a Iosepha Semita, Apokalupo 1:3 [i roto Bible Appendix], reta tei fa’ahuru-’ē-hia).

E nehenehe te mau uira’a ’e te mau tauturu i muri nei e hōro’a i te tahi hi’ora’a ’a tuatāpapa ai ’oe i te Apokalupo :

• ’O vai Ioane ? (Hi’o 1 Nephi 14:18–27)

• Nāhea te fa’anahora’ahia te buka ’e e aha te tahi mau tumu parau e mā’imi?

• E aha te aura’a te mau tāpa’o i roto i te Apokalupo ? (Hi’o Te Parau Ha’api’ira’a ’e te mau Parau Fafau 77)

E tauturu ato’a te vai ra i roto i te ’Īritira’a a Iosepha Semita i te mau tuha’a rau o te Apokalupo.

Apokalupo

Tē ha’api’i nei te ’ōrama o Ioane nāhea te Metua i te Ao ra e fa’aora ai i tāna mau tamari’i.

’Ia ha’amata ’oe i te tuatāpapa i te buka a Apokalupo, e feruri nāhea te mau mea tā ’oe e tai’o ra e tū’ati ai i te mea tā ’oe i ’ite nō ni’a i te fa’anahora’a a te Metua i te Ao ra nō te fa’aorara’a ’e te fa’ateiteira’a o tāna mau tamari’i. E nehenehe ’oe e ha’amata nā ni’a i te hi’o-fa’ahou-ra’a i te vauvaura’a nō ni’a i te fa’anahora’a nō te fa’aorara’a i roto i te buka ’Ia Poro Haere i Ta’u Nei ’Evanelia (mau ’api 53–67). I muri iho, ma te tai’o i te fa’ati’ara’a a Ioane nō tāna ’ōrama, e ui ia ’oe iho i te mau uira’a mai teie : E aha te mau parau mau tā’u e ha’api’i mai i roto i te Apokalupo nō ni’a i te mea tā te Metua i te Ao ra i rave nō te tauturu iā’u ’ia ho’i iāna ra ? Nāhea te reira e tauturu ai iā’u ’ia māramarama nō ni’a i te fa’anahora’a a te Atua nō’u ?

Penei a’e e tauturu te reira ’ia ’ite ē :

• Te pae rahi o te pene 12, e parau ïa nō te orara’a hou te tāhuti nei.

• Tē fa’ata’a nei te mau pene 6–11, 13–14, 16–19 nō te orara’a tāhuti nei ’e te mau ’ohipa i tupu i roto i te ’ā’ai o te fenua nei.

• Tē fa’ata’a nei te mau pene 2–3, 15, 20–22 nō te Ha’avāra’a hope’a ’e te hanahana e tīa’i mai ra i tei ha’apa’o maita’i i roto i te mau bāsileia mure ’ore.

Apokalupo 2–3

’Ua ’ite roa Iesu Mesia iā’u ’e e tauturu mai ’oia iā’u ’ia upo’oti’a i tā’u mau tāmatara’a.

Tē fa’a’ite nei te mau parau a te Fa’aora i roto i te Apokalupo 2–3 ē, ’ua ta’a iāna te mau manuiara’a ’e te mau fifi hō’ē roa a te mau ’āma’a tāta’itahi o te ’Ēkālesia i te ’anotau o Ioane ra. ’Ua ha’apāpū ’oia i te feiā mo’a i roto e rave rahi ’āmuira’a ē, ’ua ’ite ’oia i tā rātou mau « ’ohipa », te « ’ati », te « veve » ’e te « hina’aro » (Apokalupo 2:2, 9, 19)—nā reira ato’a te tahi mau rāve’a nō te ha’amaita’i ia rātou.

E nehenehe teie mau pene e fa’aha’amana’o ia ’oe ē, ’ua ta’a i te Fa’aora tō ’oe mau pūai ’e tō ’oe mau paruparu ’e ’ua hina’aro ’oia ’ia tauturu ia ’oe ’ia upo’oti’a i tā ’oe mau tāmatara’a i te fenua nei. E aha tā Iesu Mesia i parau i te feiā e upo’oti’a mai ? E aha te mau tauira’a tā ’oe e mana’o ra e rave nō te upo’oti’a i tā ’oe mau tāmatara’a ?

Apokalupo 5

’O Iesu Mesia ana’e tē nehenehe e ha’amatara i te fa’anahora’a a te Metua i te Ao ra.

Noa atu ā ’aita ’oe e ha’amana’o ra, tei i’ō ato’a paha ’oe i roto i te mau ’ohipa tā Ioane e parau ra i roto i te Apokalupo 5. ’Ia tai’o ’oe i te teie mau ’ohipa i tupu, e feruri e aha ra tō tātou pā’āto’a mana’o i te ’itera’a ē, nā Iesu Mesia (te ’ārenio) e ha’amatara i te fa’anahora’a a te Metua i te Ao ra (heheu i te buka ’e vāhi i nā tāpa’o e hitu ra). Nō te aha nā Iesu Mesia noa e nehenehe e rave i te reira ? Nāhea ’oe i te fa’a’ite i tō ’oe fa’aro’o iāna ’ei Fa’aora nō ’oe ?

Hi’o ato’a Ioba 38:4–7.

Apokalupo 6–11

E nā mua mai te fa’aho’i-fa’ahou-ra’a mai i te ha’amoura’a e tupu hou te tae-piti-ra’a mai o Iesu Mesia.

Tē fa’a’ite nei te Apokalupo 6–11 i te mau ’ohipa e tupu i te roara’a o te vai-tāhuti-ra’a te fenua (hi’o PH&PF 77:6), mai te fa’aho’i-fa’ahou-ra’a mai o te ’evanelia i te mau mahana hope’a nei (hi’o Apokalupo 7). I te tai’ora’a i te mau ’ohipa tā Ioane i tohu ’e i te hi’ora’a i te tahi o te reira e tupu ra, e aha tei fa’auru ia ’oe nō te fa’aineine maita’i a’e ia ’oe ’e tō ’oe ’utuāfare nō te tae-piti-ra’a mai ?

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :

Apokalupo 2–3

’Āhani pa’i e hōro’a Ioane i te hō’ē poro’i i tō ’outou ’utuāfare mai tāna i hōro’a i te mau ’ēkālesia i tōna ra tau. E aha tāna e parau mai, tē haere maita’i ra ? Nāhea ’outou i tē ha’amaita’i atu ā ?

Apokalupo 3:20

E fa’a’ite i te hōho’a o te Fa’aora e pātōtō ra i ni’a i te ’ōpani (hi’o i te hōho’a i roto i teie arata’i ha’api’ira’a). E ani i tō ’outou ’utuāfare ’ia tai’o i te Apokalupo 3:20 ’e ’ia ’āparau i te mau uira’a mai teie i muri nei : Nō te aha Iesu e pātōtō ai, ’e ’aita ’oia e tomo noa mai ? Nāhea tātou i te tītau i tōna mana fa’auru i roto i tō tātou fare ?

Apokalupo 7:9, 13–14

E aha tā teie mau ’īrava e ha’api’i nei ia tātou nō ni’a i te tumu tātou e ’ō’omo ai i te ’ahu ’uo’uo nō te mau ’ōro’a o te hiero ?

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.

Haʼamaitaʼiraʼa i tā tātou haʼapiʼiraʼa

Fa’aitoito i te mau uira’a. E fa’a’itera’a te mau uira’a nō te ineinera’a te mau melo o te ’utuāfare nō te ’apo mai ’e nō te fa’ahi’o mai nāhea rātou e pāhono i te mea tā rātou e ha’api’ihia ra. Ha’api’i i tō ’outou ’utuāfare nāhea ’ia ’imi i te mau pāhonora’a i roto i te mau pāpa’ira’a mo’a. (Hi’o Ha’api’ira’a mai tā te Fa’aora, 25–26).

Let Him In, nā Greg K. Olsen