9–15 nō Tītema. Apokalupo 1–11: ‘Te hanahana, ’e te mana, ’e ei te… ārēnio ’e a muri noa atu’ » Mai, pe’e mai—nō te Paraimere : Faufa’a ’Āpī 2019 (2019)
9–15 nō Tītema. Apokalupo 1-11 », Mai, pe’e mai—nō te Paraimere 2019
Te tia’i mamoe maita’i, nā Del Parson
9–15 nō Tītema
Apokalupo 1-11
«Te hanahana, ’e te mana, ’e ’ei te… ārēnio ’e a muri noa atu »
E nehenehe te mau tāpaʼo i roto i te Apokalupo e riro ’ei mea fifi nō te mau tamariʼi ʼia tāʼa, tē vai atoʼa rā i roto i te Apokalupo te haʼapiʼiraʼa tumu nehenehe ʼe te ʼōhie.
E pāpa’i i tō ʼoutou mau mana’o
E ani ’ia fa’a’ite mai i te mana’o
E ani i te mau tamariʼi ’ia faʼaʼite mai e aha tō rātou huru mai te mea e ʼite rātou ia Iesu Mesia i roto i te hōʼē ʼōrama. E haʼamāramarama atu ē i roto i te Buka a Apokalupo, ʼua faʼaʼite Ioane i te hōʼē ʼōrama i roto i te reira i ʼite ai ʼoia ia Iesu ʼe te mau mea faufaʼa rahi e rave rahi nō niʼa i te mau mea tahito ʼe nō ʼananahi.
Ha’api’i i te ha’api’ira’a tumu
Te mau tamari’i ’āpī a’e
E nehenehe tā’u e ani ia Iesu Mesia ’ia tomo mai i roto i tō’u orara’a.
E nehenehe te parabole nō Iesu e tiʼa ra i te ʼūputa ʼe te pātoto ra e tauturu i te mau tamariʼi ʼia taʼa ē tē hinaʼaro nei ʼoia i te haʼafātata atu ia rātou.
Mau ’ohipara’a e nehenehe e rave
-
E fa’a’ite i te hōho’a i roto i te fa’anahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ʼe e taiʼo i te Apokalupo 3:20. E ani i te mau tamariʼi ’ia feruri ē tē pātōtō ra Iesu i te ʼūputa o tō rātou fare. E vaiiho ānei rātou iāna ’ia tomo mai ? I tō rātou manaʼo e aha ïa tāna e parau ʼaore rā e rave ?
-
E ani i te mau tamariʼi ʼia parau mai ia ʼoutou i te mau taime e tīaʼi ai rātou i te tahi taʼata ’o te haere mai i tō rātou fare ʼe tō rātou ʼoaʼoa rahi i te ʼite atu iāna. E aha ra te huru i te tīaʼiraʼa i taua taʼata ra ʼia pātōtō atu i te ʼūputa ? E aha ïa mai te mea eʼita roa atu rātou e vaiiho i taua taʼata ra ’ia tomo mai ? E taiʼo i te Apokalupo 3:20, ʼe e vaiiho i te mau tamariʼi ’ia tāpeʼa i te hōʼē hōhoʼa nō Iesu ’e ’ia faʼahua i te pātōtō i te hōʼē ʼopani. E nehenehe te tahi atu mau pīahi e faʼahua i te ʼiriti i te ʼūputa. E aha tā tātou e nehenehe e rave nō te vaiiho ia Iesu ’ia tāpiri mai ia tātou, noa atu eʼita e nehenehe ia tātou ʼia ʼite atu iāna ? E feruri i te hōroʼa i te tamariʼi tātaʼitahi i te hōʼē hōhoʼa nō Iesu nō te ’āfaʼi atu i te fare.
ʼO Iesu Mesia anaʼe te taʼata tiʼamā nō te riro ʼei Faʼaora nōʼu.
ʼUa haʼapiʼi mai o Ioane mai roto mai i tāna ʼōrama ē ’o Iesu Mesia anaʼe (tei faʼahōhoʼahia i te ʼārenio) ’o te nehenehe e riro ʼei Faʼaora nō tātou ʼe ’ia faʼatupu i te ʼōpuaraʼa a te Metua (tei faʼahōhoʼahia i te buka tei tāʼatihia)
Mau ’ohipara’a e nehenehe e rave
-
Hou te haʼapiʼiraʼa, e ʼimi i te mau hōhoʼa o te faʼahōhoʼa i te mau haʼamaitaʼiraʼa e vai nei nā roto i te Tāraʼehara a Iesu Mesia (mai te hiero, te bāpetizoraʼa, ʼe te mau ʼutuāfare), e tuʼu atu i te reira i roto i te hōʼē buka, ʼe e pūʼohu i te buka i te ʼapi parau ʼaore rā te taura. Ma te faʼaʼohipa i te tahi nau pereota faufaʼa i roto i te Apokalupo 5:1-10, e faʼaʼite mai i te ʼōrama tā Ioane i ʼite. E faʼaʼite atu i te buka i te mau tamariʼi, ʼe e parau atu ia rātou ē hōʼē anaʼe rāveʼa nō te ʼīriti i te buka ’o te ʼimiraʼa ïa i te mau hōhoʼa nō Iesu tā ʼoutou i huna i roto i te buka. ʼIa ʼite anaʼe rātou i te hōhoʼa, e ʼīriti i te buka ʼe e faʼaʼite atu i te mau tamariʼi te mau hōhoʼa i roto i te buka. E faʼaʼite pāpū atu ē ’o te Faʼaora anaʼe te taʼata e nehenehe e faʼatupu i taua mau mea ra.
-
E haʼapoto i te ʼōrama tei faʼaʼitehia i roto i te Apokalupo 5:1–10, ʼe e ani i te mau tamariʼi ʼia haʼuti mai e aha tā Ioane ʼe tā te tahi atu mau taʼata i ʼite i roto i te mau tuhaʼa huru rau o te ʼōrama. ʼEi hiʼoraʼa, e nehenehe tā rātou e faʼahua i te taʼi ’ia ʼore anaʼe e nehenehe i te hōʼē tamariʼi ’ia ʼīriti i te buka, ʼaore rā ʼia poupou ’ia ʼīriti anaʼe te Faʼaora i te reira.
E tauturu Iesu Mesia iāʼu ʼia mā i te hara.
ʼUa ʼite Ioane ē e rave rahi mau taʼata tei ʼahuhia i roto i te mau ʼahu « ʼua … teʼateʼa i te toto o te ʼĀrēnio » (ʼīrava 14). E feruri e nāhea teie ʼōrama e nehenehe ai i te tauturu i te mau tamariʼi ’ia taʼa i te faufaʼa ’ia tamāhia i tā tātou mau hara nā roto i te Tāraʼehara a Iesu Mesia.
Mau ’ohipara’a e nehenehe e rave
-
E faʼaʼite i te mau tamariʼi i te tahi ʼahu bāpetizoraʼa ʼaore rā te tahi atu mau ʼahu ʼuoʼuo ʼe te hōʼē hōhoʼa nō Iesu. E taiʼo i te Apokalupo 7:9, 13–14 i te mau tamariʼi, ʼe e ani ia rātou ʼia faʼatoro atu i niʼa i te hōhoʼa ʼe te mau ʼahu i te mau taime atoʼa e faʼaroʼo rātou i te tāʼo ʼuoʼuo. E tātara atu ē tē faʼahōhoʼa nei te mau ʼahu ʼuoʼuo i te mā ʼe te faʼahaʼamanaʼo mai nei te reira ia tātou ē e nehenehe tā Iesu Mesia e tamā ia tātou i tā tātou mau hape.
-
E faʼaʼite atu i te mau tamariʼi i te hōʼē huʼahuʼa ʼahu ʼuoʼuo, ʼe e vaiiho ia rātou ʼia faʼarepo i te reira ma te pāpaʼi atu i niʼa ʼe te hōʼē peni tara ʼaore rā te tuʼuraʼa i te repo i niʼa. E tātara atu ʼe e faʼarepo te hara i tō tātou vārua. E faʼaʼite i te hōʼē hōhoʼa nō Iesu i Getesemane (mai Buka hōhoʼa nō te ʼEvanelia, nūmera 56), e tuʼu atu te ʼahu repo i te hiti ʼe e faʼaʼite atu ia rātou i te hōʼē ʼahu mā ʼuoʼuo. E faʼaʼite pāpū atu ē nā roto i te Tāraʼehara a Iesu Mesia, e nehenehe tātou ’ia mā.
-
E hīmene i te hōʼē hīmene nō niʼa i te bāpetizoraʼa, mai « Le jour de mon baptême » (Chants pour les enfants, 53), ʼe e tuatāpapa e nāhea Iesu e tauturu ai ia tātou ʼia riro mai ʼei mea mā ’ia bāpetizohia tātou.
Ha’api’i i te ha’api’ira’a tumu
Te mau tamari’i pa’ari a’e
E nehenehe tāʼu e māʼiti ʼia vaiiho ia Iesu Mesia ʼia riro ʼei tuha’a nō tōʼu oraraʼa.
Nāhea e nehenehe ai ia ʼoutou ʼia tauturu i te mau tamariʼi tā ʼoutou e haʼapiʼi nei ʼia ʼīriti i tō rātou ʼāʼau ʼe oraraʼa i te mana ʼe i te fa’aurura’a o Iesu Mesia ?
Mau ’ohipara’a e nehenehe e rave
-
E ani i te mau tamariʼi ’ia hiʼo i te hōhoʼa i roto i te faʼanahoraʼa nō teie hepetoma i roto i te Mai, peʼe mai—nō te taʼata hō’ē ʼe te ʼutuāfare ’a taiʼo ai ʼoutou i te Apokalupo 3:20. Nō te tauturu ia rātou ʼia ʼīriti mai i te auraʼa nō roto mai i te hōhoʼa, e ani ia rātou ’ia haʼa nō roto i te pea nō te pāhono atu i teie mau huru uiraʼa : I tō ʼoutou manaʼo nō te aha Iesu e pātōtō ai i te ʼuputa ? Nō te aha ʼaita ʼe tāpeʼaʼa ʼopani i rapae au i te ʼuputa ? E aha te auraʼa ’ia vaiiho ’ia Iesu ʼia tomo mai i roto i tō tātou mau oraraʼa ?
-
E ani i te mau tamariʼi ’ia pāpaʼi i niʼa i te ʼiri pāpaʼiraʼa te mau huru rāveʼa ʼia « ʼīriti atu i te ʼūputa » ’ia Iesu. Te tahi mau hiʼoraʼa o te tāviniraʼa ïa ’ia vetahi ʼē, te taiʼoraʼa i te mau pāpaʼiraʼa moʼa, ʼe te ʼāmuraʼa i te ʼōroʼa.
ʼO Iesu Mesia anaʼe te taʼata tiʼamā nō te riro ʼei Faʼaora nōʼu.
ʼUa haʼapiʼi mai te ʼōrama tei faʼaʼitehia i roto i te Apokalupo 5 ē o Iesu Mesia anaʼe tei tiʼamā ʼe tei nehenehe i te rave i te Tāraʼehara ʼe ʼia faʼaʼora ia tātou i te hara.
Mau ’ohipara’a e nehenehe e rave
-
E ani i te mau tamariʼi ’ia faʼatiʼa mai i te hōʼē taime ʼua hinaʼaro rātou i te tahi taʼata nō te rave i te tahi mea eʼita e nehenehe ia rātou ʼia rave nō rātou iho. E ani ia rātou ʼia taiʼo i te Apokalupo 5:1–10 ʼe e hiʼo e aha te mea ʼe tiʼa ʼia ravehia o tā te hōʼē noa taʼata e nehenehe e rave (ʼa haʼamāramarama atu ē ’o Iesu Mesia ïa te ʼĀrēnio ʼe te buka o te ʼōpuaraʼa ïa a te Atua). E aha tā Iesu i rave nō tātou e ʼore roa e nehenehe i te tahi ʼē atu taʼata e rave ?
-
E ani i te mau tamariʼi ʼia ʼimi i te hōʼē hīmene ʼaore rā te hīmene a te mau tamariʼi ’o te faʼaʼite pāpū nei nō Iesu Mesia (mai te « Beautiful Savior », Chants pour les enfants, 62–63). E aha tā te mau parau o te hīmene e haʼapiʼi mai nei nō ni’a ’ia Iesu Mesia ? Nāhea teie hīmene e riro ai mai te hīmene ʼarueraʼa i hīmenehia nō niʼa Iesu Mesia i roto i te Apokalupo 5:9–10 ?
E nehenehe te ʼevanelia e tauturu iāʼu ’ia haʼavī i te faʼahemaraʼa.
E nehenehe te auahi tei haʼapōuri i te mataʼi i roto i te Apokalupo 9:2 ʼia faʼaauhia i te mau faʼahemaraʼa (hiʼo 1 Nephi 12:17).
Mau ’ohipara’a e nehenehe e rave
-
E pāpaʼi i te mau hōhoʼa o te mahana ʼe te ata pōuri, ʼe e pāʼoti i te reira. E ani i te mau tamariʼi ’ia taiʼo i te Apokalupo 9:2 ʼe te 1 Nephi 12:17 ʼe e pāpaʼi i niʼa i te ata pōuri e aha tā te auahi ʼaore rā te mau mahu i roto i teie mau ʼīrava e fa’ahōho’a nei. E tuʼu i te ata pōuri i niʼa i te ʼiri pāpaʼiraʼa, ʼe e ani i te mau tamariʼi ʼia pāpaʼi i te hōʼē tāpura o te mau faʼahemaraʼa tā te mau tamariʼi o tō rātou faito matahiti e faʼaruru nei. E tuʼu i muri iho i te mahana i niʼa i te ʼiri pāpaʼiraʼa ʼe e ani ia rātou ʼia pāpaʼi i te hōʼē tāpura o te mau mauihaʼa tā te Metua i te Ao ra i hōroʼa mai ia tātou nō te haʼavī i te pōuri i roto i te ao nei.
-
Nāhea e nehenehe ai i te mau tamariʼi ʼia tauturu atu ia vetahi ʼē tei roto i te pōuri pae vārua ? E ani ia rātou ’ia feruri i teie uiraʼa, e faʼaʼite atu i te video « E māʼiti i te māramarama » (LDS.org), ʼe e ani ia rātou ’ia paraparau mai nō niʼa i te taʼata ta’ataʼahi.
E faʼaitoito i te haʼapiʼiraʼa mai i te fare
E ani i te mau tamariʼi ’ia faʼaʼite atu i tō rātou ʼutuāfare i te mau rāveʼa e nehenehe ai ia rātou ʼia ani i te mana o te Faʼaora i roto i tō rātou ʼutuāfare.
Ha’amaita’iraʼa i tā tātou ha’api’ira’a
E fa’aitoito i te fa’aturara’a. Te hō’ē fāito faufa’a roa o te fa’aturara’a, o te ferurira’a ïa nō ni’a i te Metua i te Ao ra ’e ia Iesu Mesia. E ti’a paha ia ’outou ’ia fa’aha’amana’o i te mau tamari’i ’ia fa’atura nā roto i te hīmene-marū-ra’a ’e ’aore rā, te hamura’a i te hō’ē hīmene, ’e ’aore rā, te fa’a’itera’a i te hō’ē hōho’a o Iesu.