Aberahama i ni’a i te ’āfa’a nō Mamera, nā Grant Romney Clawson

18-24 nō Novema.

Iakobo

« ’Ei feiā rave ho’i ’outou i te parau nei, ’eiaha ’ei feiā fa’aro’o noa»

Hou ’a tai’o ai i teie arata’ira’a, ’a tai’o i te ’episetole a Iakobo ’e ’a ha’apa’o maita’i i te mau muhumuhura’a tā ’outou e fāri’i. E aha ïa te mau parau tumu tā ’outou i ’ite ’o te ha’amaita’i ’e ’o te fa’aitoito i tā ’outou mau pīahi. ’A hi’o atu i teie arata’ira’a nō te tahi atu ā mau mana’o.

Pāpa’i i tō ’outou mau mana’o

Ani ’ia fa’a’ite mai i te mau mana’o

’A ani i te mau pīahi ’ia fa’a’ite mai i te mau ’īrava i roto ia Iakobo ’o te fa’auru ia rātou ’ia riro ’ei « feiā rave ho’i i te parau nei » (Iakobo 1:22). Mai te mea e ti’a ia rātou ’ia nā reira, e nehenehe ato’a ia rātou e fa’a’ite mai i tō rātou mau mana’o i te taime ’ua ti’a ia rātou ’ia rave i te parau, rātou ana’e ’aore rā ’ei mau ’utuāfare.

Ha’api’i i te ha’api’ira’a tumu

Iakobo 1:5–6

’Ia ani ana’e tātou ma te fa’aro’o, e hōro’a hua mai ïa te Atua.

• ’Ua arata’i te mau parau tumu i ha’api’ihia i roto i te Iakobo 1:5–6 ia Iosepha Semita i te hō’ē fārereira’a vārua tei taui i tōna orara’a, ’e e nehenehehe te reira e ha’amaita’i ia tātou tāta’itahi . Penei a’e e nehenehe tā ’outou e pāpa’i i teie mau huru uira’a i ni’a i te ’iri pāpa’ira’a ’e ’ia ani i te mau pīahi ’ia feruri māmū noa i te reira : E aha tā Iakobo 1:5–6 i fa’atupu i roto i tō ’outou orara’a ? E aha te ’ohipa i tupu ia Iosepha Semita nō ni’a i teie mau ’īrava i ha’api’i mai ia ’outou nō ni’a i te ’imira’a i te pa’ari nō ni’a i tā ’outou iho mau uira’a ? (’a hi’o Iosepha Semita—’Ā’amu 1:10–17). E aha te mau mea tei ha’api’i ia ’outou ē « e parau mau te ’itera’a pāpū o Iakobo » ? (Iosepha Semita—’Ā’amu 1:26). ’A ani i te mau pīahi ’ia fa’a’ite mai i tō rātou mau mana’o i muri a’e i tō rātou ferurira’a i teie mau uira’a.

• Penei a’e e nehenehe tā te mau pīahi e parau i te Iakobo 1:5–6 nā roto i tā rātou iho mau parau. Nāhea te reira e tauturu ai ia rātou ’ia ta’a maita’i a’e i teie mau ’īrava ?

• Nō te tauturu i te mau pīahi ’ia ha’amana’o ē ’ua fafau te Atua i te hōro’a hua mai i tāna mau tamari’i ’ia ha’afātata ana’e rātou iāna ra nā roto i te pure, ’a ani i te mau pīahi ’ia fa’a’ite mai i te mau ’ā’amu i tupu ai te fafaura’a i roto i te Iakobo 1:5–6 i roto i tō rātou ra orara’a. E aha tā rātou i ’āpo mai ’a ani ai rātou i te Metua i te Ao ra ’ia ha’apāpū mai i tā rātou iho mau uira’a nō ni’a i te mau parau mau o te ’evanelia ?

Iakobo 1:2–4 ; 5:7–11

E arata’i ihoa te fa’a’oroma’ira’a i te maita’i-roa-ra’a.

• Nō te ha’amata i te hō’ē tau’ara’a parau nō ni’a i te mau ha’api’ira’a a Iakobo nō ni’a i te fa’a’oroma’i i roto i teie mau ’īrava, e nehenehe tā ’outou e ani i te mau pīahi ’ia fa’a’ite mai i te mau mea i tupu ia rātou ’a tītauhia ai rātou ’ia fa’a’oroma’i ’e te mea tā rātou i ’āpo mai nā roto mai i taua ’ohipa ra. E nehenehe ato’a tā rātou e ’imi i roto ia Iakobo1:2–4 ; 5:7–11 i te mau parau tumu tā rātou e nehenehe e fa’aau i te mau mea tā rātou i ’ite. E nehenehe ato’a tā rātou e ’imi i te mau parau tumu e au ia rātou i roto i te video « Tāmau noa ma te fa’a’oroma’i » (LDS.org) ’aore rā te pōro’i a te peresideni Dieter F. Uchtdorf « Tāmau noa ma te fa’a’oroma’i » (Ensign ’aore rā Liahona, Mē 2010, 56–59). Nō te aha te fa’a’oroma’i i tītauhia ai ’a tūtava ai tātou i te maita’i-roa-ra’a ? E aha te mea i tauturu i te mau pīahi ’ia fa’atupu i te fa’a’oroma’i i roto i tō rātou orara’a ?

Iakobo 1:3–8, 21–25 ; 2:14–26

« Te fa’aro’o ’aore e ’ohipa e mea pohe ïa ».

• Te hō’ē rāve’a nō te tau’a parau i te mau ha’api’ira’a a Iakobo nō ni’a i te fa’aro’o ’e te ’ohipa ’o te vāhira’a ïa i te mau pīahi i roto e piti nā pupu—hō’ē nō te hi’o nō te aha te fa’aro’o e tītau ai i te ’ohipa ’e te tahi nō te aha tā tātou ’ohipa e tītau ai i te fa’aro’o. Nō te rave i te reria, e nehenehe tā rātou e tai’o i te Mataio 7:21–23 ; Iakobo 1:6–8, 21–25 ; 2:14–26 ; ’e Iosepha Semita—’Ā’amu 1:19. I muri iho e nehenehe i te pupu tāta’itahi ’ia fa’a’ite mai i te mea tā rātou i ’ite ’e ’ia tau’a parau nō te aha e mea tītauhia te fa’aro’o ’e te ’ohipa.

• Nō te tauturu i te mau pīahi ’ia feruri hōhonu atu ā i te parau tuiro’o « te fa’aro’o ’aore e ’ohipa e mea pohe ïa » (Iakobo 2:26), e nehenehe tā ’outou e pāpa’i i teie nei pereota i ni’a i te ’iri pāpa’ira’a : Fa’aro’o ’aore e ’ohipa mai te mea ïa e ’aita . ’A ani i te mau pīahi ’ia feruri i te mau rāve’a ’āpī nō te fa’ahope i te pereota, ’e ’ia pāpa’i rātou i tō rātou mau mana’o i ni’a i te ’iri pāpa’ira’a. E nehenehe ato’a ia rātou ’ia fana’o i te ravera’a i teie ’ohipara’a nā roto i te mau pea ’aore rā mau pupu na’ina’i. E nehenehe te ’ā’amu tei fa’ati’ahia e te peresideni Dieter F. Uchtdorf i roto i « Te tahi atu ā mau rāve’a tauturu » e tauturu i tō rātou ’ite nō ni’a i teie parau tumu. E aha ïa tā tātou e nehenehe e rave nō te rave tāmau noa i te ’ohipa ’ia au i tō tātou fa’aro’o ia Iesu Mesia ?

Iakobo 2:1–9

’Ei mau pipi a Iesu Mesia, e ti’a ïa ia tātou ’ia here i te mau ta’ata ato’a noa atu e aha te huru o tō rātou orara’a.

• Nō te tauturu i te mau pīahi ’ia fa’a’ite i te aroha o te Mesia i te mau ta’ata ato’a noa atu e aha tō rātou huru ’aore rā hi’ora’a rāpae, e nehenehe tā ’outou e ani i te mau pīahi ’ia tai’o tāta’itahi mai i te mau ’īrava i roto i te Iakobo 1:9–11 ; 2:1–10 ; 5:1–6. ’A ’āparau nō ni’a i teie mau huru uira’a : E aha ïa te aura’a ’ia « ha’apa’o i te huru o te ta’ata » ? (Iakobo 2:9). Nō te aha tātou e fa’ariro ’ē ai i te feiā moni, te tu’iro’o, ’aore rā ’e mana tō rātou i te feiā tao’a ’ore ? Nāhea e nehenehe ai ia tātou ’ia ’ore ’ia fa’ariro ’ē atu i te tahi atu mau ta’ata ’ia au i tō rātou huru orara’a ? Nāhea te feiā tei pe’e atu i te Fa’aora i riro ai ’ei feiā tao’a roa a’e ? (A hi’o Iakobo 2: 25).

Iakobo 3

E mana tō te mau parau tā tātou e fa’a’ohipa i te ha’amāuiui ’aore rā i te ha’amaita’i ia vetahi ’ē.

• E nehenehe te mau hōho’a pūai tā Iakobo i fa’a’ohipa e hōro’a mai i te mau fa’aha’amana’ora’a tauturu ’e te tura’ira’a ’ia fa’a’ohipa i te mau parau—tei parau-vaha-hia ’e tei pāpa’ihia—nō te fa’aitoito ia vetahi ’ē. ’A feruri i te ani i te mau pīahi ’ia hi’o haere i roto i te Iakobo 3 nō te ’imi i te mau hōho’a o te fa’a’ite mai e nāhea te reo e fa’a’ohipahia ai nō te ha’amāuiui ’aore rā nō te ha’amaita’i ’ia vetahi ’ē ; e au roa paha te tahi mau pīahi ’ia nīno’a i te mau hōho’a nō teie mau huru. Nāhea teie mau hōho’a e fa’ahōho’a ai i te mau ha’api’ira’a a Iakobo i roto i teie pene ? ’Ei hi’ora’a, nāhea tā tātou mau parau e riro ai mai te hō’ē auahi ? E aha ïa te mau hōho’a tā te mau pīahi e mana’o nō te fa’a’ite i te mana maita’i o te reo ? E nehenehe tā ’outou e ani i te mau pīahi ’ia feruri e nāhea i te fa’a’ohipa i te a’o a Iakobo.

Fa’aitoito i te ha’api’ira’a mai i te fare

Nō te fa’aitoito i te mau pīahi ’ia tai’o i te 1 ’e 2 Petero, ’a ani ia rātou ’ia ’imi i te mau ha’api’ira’a tumu i roto i teie mau ’episetole tei ta’a-maita’i-a’e-hia maoti te fa’aho’ira’a mai o te ’evanelia. Nāhea teie mau ha’api’ira’a e ha’apāpū mai ai i te misiōni a te peropheta Iosepha Semita ?

Te tahi atu ā mau rāve’a tauturu

Iakobo

Te fa’aro’o ’e te ’ohipa.

’Ua ha’api’i te peresideni Dieter F. Uchtdorf :

Tē vai ra te hō’ē ’ā’ai ’āti Iuda tahito nō ni’a i te hō’ē ta’ata hāmani pu’a tei ’ore i ti’aturi i te Atua. I te hō’ē mahana ’a haere ai ’oia e te hō’ē rabi, ’ua nā ’ō atu ’oia, « tē vai nei te tahi mea e’ita e nehenehe iā’u ’ia māramarama. E ha’apa’ora’a fa’aro’o tā tātou e rave rahi tauasini matahiti i teie nei. ’Ia hi’o rā ’oe i te mau vāhi ato’a te vai nei te ’ino, te petara’a, te ’ohipa pi’o, te parau-ti’a ’ore, te māuiui, te po’ia, ’e te ’iriā. E au ra ē ’aita te ha’apa’ora’a fa’aro’o i ha’amaita’i noa a’e i te ao nei. Nō reira tē ani nei au ia ’oe, e aha ïa te maita’i nō te reira ?

« ’Aita te rabi i pāhono ’oi’oi ’ua tāmau noa rā i te haere ’e te ta’ata hāmani pu’a. I muri iho ’ua fātata atu rāua i te hō’ē ’aua ha’utira’a i reira te mau tamari’i, tei ’ī i te repo, i te ha’utira’a i roto i te repo.

« Tē vai nei te tahi mea ’aita vau e māramarama nei », ’ua parau mai ra te rabi. « ’A hi’o na i teie mau tamari’i . E pu’a tā tātou e rave rahi tauasini matahiti i teie nei, ’e e repo noa ā teie mau tamari’i . E aha ïa te maita’i nō te pu’a ?

’Ua pāhono atura te ta’ata hāmani pu’a, « E rabi, e ’ere i te mea ti’a ’ia fa’ahapa i te pu’a nō teie mau tamari’i repo. E ti’a i te pu’a ’ia fa’a’ohipahia hou ’a nehenehe ai i te reira ’ia rave i tāna ’ohipa ».

« ’Ua ’ata te rabi ’e ’ua parau atu, ’Te reira ihoa’ (« E ora te feiā parau-ti’a ma te fa’aro’o », Ensign ’aore rā Liahona, ’Ēperēra 2017, 4).

Ha’amaita’ira’a i tā tātou ha’api’ira’a

’A fa’aitoito e ’ia vai te tura i roto i te piha ha’apira’a ’A tauturu i tā ’outou mau pīahi ’ia ta’a ē ’o rātou tāta’itahi ’o te nehenehe e fa’ataui i te vārua i roto i te piha. ’A fa’aitoito ia rātou ’ia tauturu mai ia ’outou i te ha’amaura’a i te hō’ē vāhi e nehenehe te ta’ata ato’a e fa’a’ite i tō rātou mau mana’o, e ’itehia te here ’e te fa’atura, ’ia ti’a ho’i i te mau ta’ata ato’a ’ia fa’a’ite i te ’ohipa i tupu ia rātou, tā rātou mau uira’a ’e tō rātou ’itera’a pāpū » (Ha’api’ira’a mai tā te Fa’a’ora, 15).