Tē poro ra Iesu Mesia i te ’evanelia i roto i te ao vārua

Tē Poro ra Iesu Mesia i te ’evanelia i roto i te ao vārua, nā Robert T. Barrett

25 nō Novema–1 nō Titema

1 ’e 2 Petero

« E ’oa’oa nā i te ’oa’oa e’ita e ti’a ’ia parau ra, ’e te ’ī ho’i i te maita’i »

’A ha’amana’o ē tā ’outou fā ’o te ha’api’i ïa i te ta’ata, e ’ere nō te hōhora noa i te hō’ē ha’api’ira’a. ’Ia tai’o ana’e ’outou i te mau ’episetole a Petero, ’a feruri i te mau pīahi tāta’itahi i roto i te piha ha’api’ira’a. E aha ïa te mau parau tumu e tauturu ai ia rātou ’ia pātu i tō rātou fa’aro’o ?

Pāpa’i i tō ’outou mau mana’o

tāpa’o nō te fa’a’itera’a mai

Ani ’ia fa’a’ite mai i te mau mana’o

’A pāpa’i i te mau upo’o parau 1 Petero ’e 2 Petero i ni’a i te ’iri pāpa’ira’a. ’A hōro’a te taime nō te mau pīahi ’ia tai’o fa’ahou i teie mau pene, ’e ’a ani ia rātou ’ia pāpa’i i raro a’e i teie mau upo’o parau i te mau parau ’aore rā mau pereota nō roto mai i te mau pene ’o tā rātou i ’ite e mea faufa’a. I muri iho ’a fa’a’ohipa i te mau tāpura nō te ani i te mau pīahi ’ia fa’a’ite mai i tō rātou mau mana’o.

tāpa’o nō te ha’api’ira’a

Ha’api’i i te ha’api’ira’a tumu

1 Petero 1:3–9 ; 2:19–24 ; 3:14–17 ; 4:12–19

E nehenehe tā’u e ’ite i te ’oa’oa i roto i te mau tau tāmatara’a ’e te māuiui.

• Nō te tauturu i tā ’outou mau pīahi ’ia ta’a maita’i a’e ’e ’ia fa’a’ohipa i te a’o a Petero nō ni’a i te ’imira’a i te ’oa’oa i roto i te mau taime fifi, e nehenehe tā ’outou e hōro’a i te mau pīahi te tahi mau ’api parau na’ina’i ’e ’ia ani ia rātou ’ia pāpa’i i te hō’ē pereota nō roto mai i te 1 Petero 1:3–9 ; 2:19–24 ; 3:14–17 ; 4:12–19 ’o te nehenehe e tauturu ia rātou i roto i te mau taime tāmatara’a ’aore rā te mau taime fifi. I te tahi atu pae o te ’api parau, e nehenehe tā rātou e pāpa’i nō ni’a i te hō’ē taime tāmatara’a i ’ite ai rātou i te hau ’aore rā i te ’oa’oa. E nehenehe tā te tahi mau pīahi e fa’a’ite mai i tā rātou pereota ’e te ’ohipa i tupu ia rātou, ’e e nehenehe te mau pīahi ’ia ’āparau i muri iho nō ni’a i te mau mea tā rātou i ha’api’i mai.

• Te tahi rāve’a nō te tai’o fa’ahou i te a’o a Petero i roto i te 1 Petero 1:3–9 ; 2:19–24 ; 3:14–17 ; 4:12–19 ’o te anira’a ïa i te mau pīahi ’ia feruri i te tahi ta’ata tā rātou i mātau ’o tē fa’aruru ra i te hō’ē tāmatara’a. ’A hōro’a atu ia rātou te taime i roto i te piha ha’api’ira’a nō te pāpa’i atu i te hō’ē rata i taua ta’ata ra, ma te tu’u atu i te mau parau mau mai roto mai i teie mau ’īrava ’o te fa’aitoito i taua ta’ata ra (’a hi’o ato’a PH&PF 121:1–8 ; 123:17). I muri iho e nehenehe tā te mau pīahi e paraparau nō ni’a i te mau parau mau tā rātou i mā’iti.

1 Petero 1:13–20 ; 2:1–12

’Ua pi’ihia tātou ’ei « ta’ata nō te Atua ».

• ’Ei melo nō te ’Ēkālesia a te Mesia, ’ua pi’ihia tātou ’ia pe’e atu ia Iesu Mesia. Te aura’a ’o te reira, e ta’a ’ē ïa tā tātou mau mā’itira’a i tā te tahi atu mau ta’ata. Nāhea te mau ha’api’ira’a a Petero i roto i te 1 Petero 1:13–20 ; 2:1–12 e tauturu ai i te feiā tā ’outou e ha’api’i ra ’ia ta’a maita’i a’e ā i te misiōni a te Fa’aora ’e ’ia hina’aro ’ia riro mai iāna ra te huru ? Penei a’e e nehenehe tā ’outou e ani i te mau pīahi ’ia mā’imi i teie mau ’īrava nō te hi’o i te mau fa’a’itera’a nō te aura’a ’ia riro « ’ei ta’ata nō te Atua » (1 Petero 2:10) ’e ’ia tau’aparau i muri iho i te mea tā rātou i ’ite. E nehenehe tā ’outou e ha’amāramarama i te aura’a o te tā’o « ta’a ’ē » i roto i te 1 Petero 2:9 e « ho’ohia ïa » ’aore rā « fa’ahereherehia » (’a hi’o i te fa’ahorora’a f). E aha tā teie e ha’api’i mai nei nō ni’a i te mana’o o te Atua nō tātou ’e nāhea ïa ’oia e hina’aro ai ia tātou ’ia ora ?

1 Petero 3:18–20 ; 4:6

’Ua porohia te ’evanelia i te feiā pohe ’ia nehenehe ia rātou ’ia ha’avā-ti’a-hia.

• Tei roto i te ’episetole mātāmua a Petero te hō’ē o te tahi noa mau fa’ahitira’a i roto i te Bibilia nō tō Iesu Mesia tere i roto i te ao vārua i muri a’e i tōna pohera’a—te hō’ē ’ohipa tā te heheura’a ’āpī i tauturu ia tātou ’ia māramarama atu ā. Nō te tauturu i te mau pīahi ’ia fa’ahōhonu atu ā i tō rātou ’ite nō ni’a i te ao vārua, e nehenehe tā ’outou e ani ia rātou ’ia tai’o i teie nei mau pāpa’ira’a i muri nei ’e ’ia pāpa’i i ni’a i te ’iri pāpa’ira’a te mea tā rātou i ha’api’i mai : Ioane 5:25 ; 1 Petero 3:18–20 ; 4:6 ; Alama 40:7–14, 21 ; Te Parau Ha’api’ira’a ’e te mau Parau Fafau 138:11–32.

  Tē fa’a’ite mai nei te mau fa’ahitira’a parau i roto i « Te tahi atu mau rāve’a tauturu » ē ’ua ta’ahia ’e ua ha’api’ihia te tere o te Mesia i roto i te ao vārua ’eiaha noa nā tāna mau ’āpōsetolo nā te mau ’orometua ha’api’i mātāmua ato’a ra. E nehenehe te ta’ara’a ē ’ua mo’e teie ’ite i roto i te Tāivara’a Rahi ’e ’ua fa’aho’ihia mai te reira, e tauturu i te mau pīahi ’ia ha’apa’ari i tō rātou ’itera’a pāpū nō ni’a ia Iosepha Semita ’e te fa’aho’ira’ahia mai o te ’evanelia.

• E nehenehe te ’āparaura’a nō ni’a i te 1 Petero 3:18–20 ; 4:6 e tauturu i te fa’auru i te mau pīahi ’ia rave atu ā i te ’ohipa i roto i te ’ā’amu ’utuāfare ’e te ’ohipa hiero. Nō te rave i te reira, e nehenehe tā ’outou e vāhi i te piha i roto i nā pupu e toru ’e ’ia hōro’a atu i te pupu tāta’itahi te hō’ē ’o teie mau uira’a nō ni’a i te fa’aorara’a o te feiā pohe : E aha te ’ohipa a te Fa’aora i roto i te fa’aorara’a o te feiā pohe ? E aha ïa te ’ohipa a te mau ta’ata tei pohe—tei ha’apa’o ’e te feiā tei pohe ma te ’ite ore i te ’evanelia ? E aha ïa tā tātou ’ohipa ? ’A ani i te pupu tāta’itahi ’ia tai’o fa’ahou i te 1 Petero 3:18–20 ; 4:6 ; Te Parau Ha’api’ira’a ’e te mau Parau Fafau 128:17–18 ; 138:11–32, 57–59, ma te ’imira’a i te mau pāhonora’a i tā rātou uira’a. ’A ani i te pupu tāta’itahi ’ia fa’a’ite mai i te mea tā rātou i ha’api’i mai, ’e ’a feruri i te fa’a’ite atu i te fa’ahitira’a parau a Elder D. Todd Christofferson i roto i te hō’ē ’o te mau video ’o te ’itehia i roto i « Te tahi atu ā mau rāve’a tauturu ». E aha ïa te mau ha’amaita’ira’a tā tātou i ’ite ’a ’ohipa ai tātou nō te hōpoi atu te fa’aorara’a i tō tātou mau tupuna i pohe ?

2 Petero 1:1–11

Nā roto i te mana o Iesu Mesia, e nehenehe tā tātou e fa’atupu i tō tātou mau natura atua.

• Nō te fa’aitoito i tā ’outou mau pīahi i roto i tā rātou mau tauto’ora’a ’ia riro mai ia Iesu Mesia ra te huru, e nehenehe tā ’outou e ani ia rātou ’ia hi’o i te mau maita’i o te Mesia tei fa’a’itehia i roto i te 2 Petero 1:1–11. ’A feruri i te pāpa’i i teie mau maita’i i ni’a i te ’iri pāpa’ira’a ’e ’ia ani i te mau pīahi ’ia tātara mai i te reira. E nehenehe tā te mau pīahi e tuatāpapa i muri iho e nāhea te fa’atupura’a i te hō’ē maita’i e arata’i ai i te fa’atupura’a i te tahi atu mau maita’i. ’A fa’ata’a i te taime ’ia feruri rātou i te maita’i tā rātou e hina’aro i te fa’atupu rahi atu ā (’a hi’o ato’a ’Ia Poro Haere i Tā’u Nei ’Evanelia, 126).

te hō’ē vauvau fare nati-maita’i-hia

Te maita’i tāta’itahi o te Mesia tā tātou e fa’atupu e tauturu ïa te reira ia tātou ’ia nati i te hō’ē vauvau pae vārua nō te ti’ara’a pipi.

tāpa’o nō te ha’api’ira’a mai

Fa’aitoito i te ha’api’ira’a mai i te fare

E hina’aro paha ’outou i te ha’amāramarama ē e tai’o te mau pīahi i te mau ’episetole a Ioane i te hepetoma i mua nei. E tauturu te mau ’episetole ’ia fa’atiti’aifaro i te mau ha’api’ira’a hape nō ni’a ia Iesu Mesia ’e e nehenehe te reira e ha’apa’ari i tō tātou mau ’itera’a pāpū nō te orara’a mau o te Fa’aora.

tāpa’o nō te mau rāve’a tauturu

Te tahi atu ā mau rāve’a tauturu

1 ’e 2 Petero

Tē fa’a’ite pāpū nei te ’ohipa nō te fa’aorara’a nō te feiā pohe i te misiōni a te Mesia.

’Ua ha’api’i Elder D. Todd Christofferson ē :

« I ’aro maoro noa nā te mau ’aivana’a keresetiano i te uira’a, e aha ïa te hope’ara’a o te mau miria ta’ata tei ora ’e tei pohe ma te ’ite ’ore nō ni’a ia Iesu ? Nā roto i te fa’aho’ira’a mai o te ’evanelia a Iesu Mesia ’ua tae mai ïa te ’itera’a ē e nāhea te feiā pohe tei ’ore i bāpetizohia ’e fa’aorahia ai ’e e nāhea e nehenehe ai i te Atua ’ia riro ’ei hō’ē Atua maita’i roa, ’e te ti’a ’e te aroha ato’a [Alama 42:15].

« ’A ora noa ai ’oia, ’ua tohu Iesu ē e poro ato’a ’oia i te feiā pohe [’a hi’o Ioane 5:25]. Tē parau mai nei Petero ia tātou ē ’ua tupu ïa te reira i roto i te ārea nō te fa’asataurora’a ’e te ti’afa’ahoura’a o te Fa’aora [’a hi’o 1 Petero 3:18–19]. ’Ua ’ite te peresideni Joseph F. Smith i roto i te ’orama ē ’ua tere atu te Fa’aora i roto i te ao vārua [’a hi’o PH&PF 138:30, 33]. […]

« Tō tātou mana’o pe’ape’a nō te fa’aora i tei pohe, ’e te taime ’e te mau rāve’a tā tātou e hōro’a nō taua fa’aotira’a ra, ’ua riro ïa, hau atu i te mau mea ato’a ’ei fa’a’itera’a nō tō tātou ’ite nō ni’a ’ia Iesu Mesia. ’Ua riro ïa te reira ’ei fa’ahitira’a pūai e nehenehe ia tātou ’ia rave nō ni’a i tōna huru atua ’e tāna misiōni. Tē fa’a’ite pāpū nei te reira, ’a tahi, i te ti’afa’ahoura’a ’o te Mesia ; te piti, i te ’ā’anora’a hope’a ’ore nō tāna ra tāra’ehara ; te toru, ’o ’oia ana’e te tumu nō te ora ; te maha, ’ua ha’amau ’oia i te mau tītaura’a nō te fa’aorara’a ; ’e te pae, e ho’i fa’ahou mai ’oia » « Te Fa’aorara’a ’o te Feiā pohe ’e te ’Itera’a pāpū nō Iesu »,Ensign ’aore rā Liahona, Novema 2000, 9–10).

Te mau pāpa’ira’a ’a te mau ’orometua ha’api’i mātāmua (te mau tenetere mātāmua e tae atu i te toru) nō ni’a i te porora’a i te feiā pohe.

Origen : « I tō [Iesu] rirora’a ’ei [hō’ē vārua], tei ’ore i ’ahuhia i te tino, ’ua pārahi ’oia i rotopū i taua mau vārua ra ’aore ato’a e tino tō rātou, i te fa’afāriura’a ia rātou ’o te fa’aro’o iāna » (i roto i te The Ante-Nicene Fathers, ed. Alexander Roberts ’e James Donaldson [1907], 4:448).

Hermas : « I muri a’e i tō rātou pohera’a i roto i te mana ’e te fa’aro’o i te Tamaiti a te Atua, te mau ’āpōsetolo ’e te mau ha’api’i tei poro i te i’oa o te Tamaiti a te Atua i ni’a i te fenua nei, ’ua poro ato’a ïa rātou i taua feiā ra tei ma’iri i te ta’oto nā mua atu ia rātou » (i roto i The Apostolic Fathers, trans. J. B. Lightfoot [1898], 472).

Mau video nō ni’a i te ’ohipa ’ā’amu ’utuāfare (’a hi’o LDS.org).

• « ’Ua tā’atihia tō rātou ’ā’au ia ’outou »

• « Te mau ’utuāfare ato’a i ni’a i te fenua nei »

• « E rave ānei au i tā’u tufa’a ’ohipa ? »

Ha’amaita’ira’a i tā tātou ha’api’ira’a

Ha’api’i i te « nō te aha ». I te tahi mau taime e uiui te mana’o o te mau pīahi—te feiā ’āpī ihoa rā—e aha te tū’atira’a ’o te mau tumu parau o te ’evanelia i ni’a ia rātou ’aore rā nō te aha e tītauhia ai ’ia ha’apa’o rātou i te mau fa’auera’a. Terā rā, mai te mea e māramarama rātou i te ’ōpuara’a mure ’ore a te Metua i te Ao ra nō te ’oa’oa o tāna mau tamari’i, e pāpū maita’i ïa ia rātou te mau tumu o te mau parau tumu o te ’evanelia ’e o te mau fa’auera’a ’e e rahi ïa tō rātou hina’aro ’ia ha’apa’o » (Ha’api’ira’a mai tā te Fa’aora, 20).