« 9–15 nō Tītema. Apokalupo 1–11 : Te hanahana, ’e te mana, ’e ’ei… te ’Ārenio ’e a muri noa atu » Mai pe’e mai—nō te Ha’api’ira’a Sābati : Faufa’a ’Āpī 2019 (2019)
« 9–15 nō Tītema. Apokalupo 1–11 », Mai pe’e mai—nō te Ha’api’ira’a Sābati : 2019
Te tia’i mamoe maita’i, nā Del Parson
9–15 nō Tītema.
Apokalupo 1-11
« Te hanahana, ’e te mana, ’e ’ei… te ’Ārenio ’e a muri noa atu »
E tauturu te fāri’ira’a i te mau fa’a’itera’a vārua ’ia ’outou ’ia ’ite ē tē hina’aro nei te Vārua Maita’i i te ha’api’i atu ia ’outou. Tē fa’a’ite mai nei te pāpa’ira’a ’e te pe’era’a i taua mau fa’a’itera’a ra ē tē ha’afaufa’a nei ’outou i te reira ’e tē hina’aro nei ’outou i te fāri’i atu ā.
Pāpa’i i tō ’outou mau mana’o
’Ani ’ia fa’a’ite mai i te mau mana’o
’A ha’amata ai ’outou i te hō’ē ’āparaura’a nō ni’a i te Apokalupo, e riro paha ’ei tauturura’a ’ia ani i te mau pīahi ’ia fa’a’ite mai i te mau ha’amāramaramara’a tā rātou i ha’api’i mai nō ni’a i te buka a te Apokalupo i roto i tā rātou iho tai’ora’a ’aore rā tai’ora’a e te ’utuāfare. E nehenehe tā ’outou e tai’o ’āmui fa’ahou i te tahi ’o te ha’amāramaramara’a tei hōro’ahia i roto i te Mai pe’e mai—nō te ta’ata hō’ē ’e te ’utuāfare ’aore rā ’ia tai’o ’āmui i te mau fa’a’itera’a a te Fa’atoro Parau Bibilia mai ia « Ioane » ’e « Te Apokalupo a Ioane ».
Ha’api’i i te ha’api’ira’a tumu
’O Iesu Mesia te Tamaiti Ora a te Atua Ora.
-
Nō te mea ho’i ē ’ua fa’a’ohipa Ioane i te hōho’a ’e te mau tāpa’o i roto i te Apokalupo 1 nō tē fa’a’ite mai i te Fa’aora tei ti’afa’ahou ’e tāna mau ’ohipa, e riro ïa te tai’ora’a i teie pene ’ei rāve’a fa’ahiahia nō te pātu i te fa’aro’o ē tē ora nei ’oia ’e tē arata’i nei ’oia i tāna ’Ēkālesia. Penei a’e e nehenehe tā te mau pīahi e pāpa’i i ni’a i te ’iri pāpa’ira’a i te mau pereota nō roto mai i te Apokalupo 1 ’e tei roto i te reira te mau hōho’a ’aore rā te mau tāpa’o ’e ’ia fa’a’ite mai i te mea tā teie mau mea tāta’itahi e ha’api’i mai nei nō ni’a ia Iesu Mesia. ’Ei hi’ora’a, e aha ïa tā ’outou i ha’api’i mai nā roto mai i teie mau tāpa’o nō ni’a i te huru e arata’i ai te Mesia i tāna ’Ēkālesia i teie mahana ? Nāhea te fa’a’itera’a a Ioane nō ni’a i te Fa’aora e fa’aauhia ai i te fa’a’itera’a i roto i Te Parau Ha’api’ira’a ’e te mau Parau Fafau 110:1–4 ?
E nehenehe tā tātou e ha’avī i te mau tāmatara’a nā roto ia Iesu Mesia.
-
’Ua riro tātou mai te feiā mo’a tā Ioane i pāpa’i atu i roto i hō’ē huru : Tē fa’aruru nei tātou i te ’ati. ’A ani i te mau pīahi ’ia ’imi i roto i te Apokalupo 2-3 ’e ’ia ’ite i te mau ’ati tā te feiā mo’a i te tau ’o Ioane i fa’aruru, ’e ’a tauturu ia rātou ’ia ’ite ē ua ’ite Iesu Mesia i te mau tāmatara’a ’e te mau pūai ’o te mau ’āma’a tāta’itahi. Penei a’e e nehenehe tā rātou e fa’a’ite i te mau ’ohipa tei tupu i ’ite ai rātou ē ’ua ’ite te Fa’aora i tō rātou huru orara’a. E aha ïa te a’o tā te Fatu i hōro’a atu i te feiā mo’a ’o te nehenehe ato’a e tauturu ia tātou ’ia upo’oti’a i ni’a i tō tātou mau ’arora’a ?
-
I roto i teie ā mau pene ’ua rave te Fatu i te mau fafaura’a maita’i nō te feiā tei upo’oti’a. E nehenehe tā ’outou e ani i te mau pīahi ’ia ha’a nā roto i te mau pea nō te hi’ora’a i roto i te Apokalupo 2–3 ; 7:13–17 ’ia ’itehia mai te mau fafaura’a ’a te Fatu. Penei a’e e nehenehe tā rātou e nīno’a i te mau hōho’a o te tahi ’o teie mau fafaura’a, ’e ’ia fa’a’ite atu i te mau pīahi te mea tā rātou i ’ite mai. Nāhea ïa teie mau fafaura’a e fa’auru ai ia rātou ’ia tāmau noa i te tūtava i te ha’avī i tō rātou iho mau tāmatara’a ’e tō rātou iho mau paruparu ?
’O Iesu Mesia ana’e ’o te nehenehe e fa’atupu i te ’ōpuara’a a te Metua i te Ao ra.
-
E tauturu ānei te hō’ē ha’api’ira’a fa’a’ite’itera’a tao’a i tā ’outou mau pīahi ’ia ta’a i te mau tāpa’o i roto i te Apokalupo 5 nō ni’a i te Fa’aora e ’īriti ra i te buka tei tā’atihia ? E nehenehe tā ’outou e ’āfa’i mai i te tahi mā’a ’amu’amu i roto i te hō’ē fāri’i tei pōnaohia nō te hōro’a atu nā te piha ha’api’ira’a. Hou te ha’amatara’a ’o te ha’api’ira’a, ’a hōro’a huna noa i te hō’ē pīahi ra te tāviri nō te pōnao. ’A fa’a’ite atu i te mau pīahi e aha te mea i roto i te fāri’i, ’e ’a fa’ati’a i te mau pīahi ’ia tāmata i te tātara i te ’āfata hou te ta’ata e mau ra i te tāviri e ’īriti ai i te reira. I muri iho e nehenehe ïa i te mau pīahi ’ia fa’aau i teie ha’api’ira’a tao’a i te Apokalupo 5. E nehenehe teie mau huru uira’a e tauturu : Nāhea i riro ai te fa’aorara’a ’o te mau tamari’i ’a te Atua mai te fāri’i tei pōnaohia ’aore tā te buka tei tā’atihia. Nō te aha ’o Iesu Mesia ana’e ’o te nehenehe e ’īriti i te mau tītiro ? (’a hi’o i te fa’ahitira’a parau i roto i « Te tahi atu ā mau rāve’a tauturu »). E aha ïa te mau ha’amaita’ira’a tei tū’ati i ni’a i te ti’ara’a ’o te Fa’aora ’ia ’īriti i te mau tītiro ? (’a hi’o Apokalupo 7:14–17).
-
Mai te nūna’a ’oa’oa tei fa’ahitihia i roto i te Apokalupo 5, i teie mahana, e nehenehe ia tātou ’ia fa’ateitei i tō tātou mau reo nō te fa’ahanahana i te Fa’aora ’o ’oia ho’i tei parau-ti’a nō te hōro’a ia tātou te fa’aorara’a. Penei a’e e nehenehe te mau pīahi e hīmene ’āmui i te tahi mau hīmene ’āruera’a auhia nō ni’a i te Fa’aora. ’Ei hi’ora’a, e nehenehe tā ’outou e hīmene « E ’Ārue Tātou Nei » (Te mau Hīmene, nūmera 39 ; ’aore rā e māta’ita’i i te video « Auē te parau-ti’a o te Arenio » i ni’a i te LDS.org) ’e ’ia ’ite mai i te mau parau mau tā teie hīmene e ha’api’i mai nei nō ni’a ia Iesu Mesia. E aha te mau mea tei tauturu ia tātou ’ia noa’a te mau ’itera’a pāpū nō ni’a i teie mau parau mau ? E aha te hō’ē ā mau mea tā tātou e ’ite nei i rotopū i te mau pōro’i a tā tātou mau hīmene ’āruera’a ’e te mau parau i roto i te Apokalupo 5:9–14 ? Nāhea e nehenehe ai ia tātou ’ia fa’a’ohipa maita’i a’e i te mau hīmene i te fare ’e i te fare purera’a nō te ha’amori ’e nō te ’ārue i te Fatu ?
Hou te tae-piti-ra’a mai, e ha’aputuputu ïa te Fatu i te feiā parau-ti’a ’e e fa’a’ineine ’oia ia rātou ’ia pārahi iāna ra.
-
Tē fa’a’ite mai nei teApokalupo 7 i te mau ’ohipa e tupu nō te « ’onora’a o te tītiro », ’e te fa’ahōho’a nei te tahi i tō tātou nei tau. E pāhono te reira i te uira’a i te hope’a o te pene 6 : « ’Ua tae ho’i i te mahana rahi nō tōna ra riri, ’e ’o vai te ta’ata e mau ? » ’īrava 17). Penei a’e e nehenehe te mau pīahi e hi’o i te mau pāhonora’a i teie uira’a i roto i te pene 7. Teie te tahi atu mau uira’a e nehenehe tā rātou e tau’a parau : Nō te aha te Fatu i fa’ataere ai i te ha’amoura’a o te fenua nō te hō’ē tau ? Nāhea te mau ’ōro’a ’e te mau fafaura’a e tā’ati atu ai ia [tātou] e tae noa atu i te mahana e nini’ihia mai ai te riri u’ana o te Atua » ? (PH&PF 1:9). E aha ïa tā tātou ’ohipa i roto i te fa’aineinera’a i te ao nei nō te tae-piti-ra’a mai.? E nehenehe tā Te Parau Ha’api’ira’a ’e te mau Parau Fafau 1:4–23 ; 77:8–11 e hōro’a mai i te tahi atu ā mau ’ite.
Tē ha’api’i mai nei te ’orama a Ioane e nāhea te Metua i te Ao ra e fa’aora ai i tāna mau tamari’i.
-
E ’ite paha te tahi mau pīahi ē e mea fifi ’ia ta’a i te buka Apōkalupo. E riro paha ’ei tauturura’a mai te mea e hi’o rātou i te mau pāpa’ira’a a Ioane i roto i te fa’anahora’a o te ’ōpuara’a a te Metua i te Ao ra ’ia fa’ateitei i tāna mau tamari’i. ’A tai’o ai te mau pīahi i te Apokalupo 1–11 i te fare, ’ua ’ite paha rātou i te mau parau mau tei tauturu ia rātou ’ia ta’a i te ’ōpuara’a a te Metua i te Ao ra nō tāna mau tamari’i (’a hi’o i te arata’ira’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare). ’A ani ia rātou ’ia fa’a’ite mai e aha tā rātou i ’ite. E tauturu ato’a paha ’ia tai’o fa’ahou ana’e rātou i te tufa’a i roto i « Te tahi atu ā mau rāve’a tauturu » i topahia « Mau pāpa’ira’a mo’a nō ni’a i te ’ōpuara’a nō te fa’aorara’a ». ’A fa’aitoito i te mau pīahi ’ia tāmau noa i te ’imi i te mau pāpa’ira’a mo’a ’o te ha’api’i i te mau parau mau nō ni’a i te ’ōpuara’a nō te fa’aorara’a, ’ia tai’o ana’e rātou i te toe’a o te Apokalupo, ’e ’a hōro’a ia rātou te taime i roto i te mau ha’api’ira’a i mua nei ’ia fa’a’ite mai i te mea tā rātou i ’ite.
Fa’aitoito i te ha’api’ira’a mai i te fare
’A ani i te mau pīahi ’ia feruri i tā rātou peu Noera au-roa-hia. ’A ani ia rātou ’ia tai’o fa’ahou i te arata’ira’a nō teie hepetoma nō te mau mana’o e nāhea e nehenehe ai ia rātou ’ia fa’atumu i tā rātou fa’ahanahanara’a i ni’a ia Iesu Mesia.
Te tahi atu ā mau rāve’a tauturu
Mau pāpa’ira’a mo’a nō ni’a i te ’ōpuara’a nō te fa’aorara’a.
Tāra’ehara a Iesu Mesia
Orara’a mātāmua
Orara’a tāhuti nei
Orara’a i muri a’e i te tāhuti nei
’O Iesu Mesia ana’e ’o te nehenehe e fa’a’ora ia tātou.
Nō ni’a i te mau ’ohipa ’o tei tupu i roto i te orara’a mātāmua, ’ua ha’api’i Elder Jeffrey R. Holland :
« ’Ua pūpū te Mesia iāna iho nō te fa’atura i te ti’amāra’a morare o te ta’ata ato’a e tae noa atu i tōna ’aufaura’a i tā rātou mau hara. Nā roto i teie nei ravera’a, e ho’i ïa’ ’oia i te Metua ra ma te tā’āto’ara’a o te hanahana nō taua huru aroha fa’aora ra.
« ’Ua ti’a teie nei tāra’ehara hope’a ’ore a te Mesia nō te mea (1) ’o ’oia ana’e te ta’ata hara ’ore tei ora i ni’a i teie nei fenua ’e nō reira ’aita ’oia i vai i raro a’e i te pohe vārua tei tupu nā roto mai i te hara, (2) ’o ’oia te Fānau Tahi a te Metua ’e nō reira ’ua mau ’oia i te mau tāpa’o nō te atuara’a tei hōro’a iāna te mana i ni’a i te pohe tino, ’e (3) e au ra ’o ’oia ana’e te ta’ata tei nava’i i te ha’eha’a ’e tei hina’aro mau i roto i te ’āpo’ora’a, hou teie nei orara’a tāhuti, ’ia fa’atoro’ahia nō taua tāvinira’a ra » (« Te tāra’ehara a Iesu Mesia », Ensign ’aore rā Liahona, Māti 2008, 35).
Ha’amaita’ira’a i tā tātou ha’api’ira’a
Fa’a’ohipa i te mau pāpa’ira’a mo’a ’e i te mau parau a te mau peropheta o te mau mahana hopea nei. ’Ua fa’aue te Fatu ia tātou ’ia « ha’api’i atu te tahi i te tahi ra i te ha’api’ira’a ’evanelia nō te bāsileia » (PH&PF 88:77) e ’ia fa’a’ohipa i te mau pāpa’ira’a mo’a nō te « ha’api’i i te mau parau tumu nō [tāna] ’evanelia » (PH&PF 42:12). Te mau pāpa’ira’a mo’a ’e te mau parau a te mau peropheta ’e te mau ’āpōsetolo o teie mau mahana hope’a nei, ’o te puna ïa nō te mau parau mau tā tātou e ha’api’i nei » (Ha’api’ira’a mai tā te Fa’a’ora, 21).